Piszczek skōńczōł kariera w 2013 roku. Kōntuzjowane biodro niy pozwolyło dalij szpilać. Miyszko w Goczałkowicach i ôstoł ikōnōm tamtejszego sanatorium. Milik serwoł wiynzadła yno w jednym kolanie (2016). Pōł roku czekoł na rezōnans, potym wartko diagnoza i zapisani sie na ôperacjo. Na bezrok trefi na stōł. Glik po szpetnej kōntuzji barku dostoł zarozki profesjōnalno pōmoc. Klubowy fachman pofukoł mu to zamrażaczym w szpreju, a po szpilu doł „jednego” na znieczulyni. Idzie ku dobrymu, a przinajmij boli mynij…

Tak mōgłoby to wyglōndać keby spōmniani fusbaliści szpilali w naszych C-klasowych klubach i byli wiernymi fanami lyczynio bez NFZ. Na szczynści tak ni ma. Trzech synkōw ze Ślōnska przifurgło na Mundial, ale ich drōga prosto gynał niy była.

Łukasz Piszczek poważne problymy z biodrym zaczōn mieć już w 2008. Sytuacjo pogorszyła sie w 2013. W lutym było już wiadōmo, że bez ôperacje sie niy ôbyndzie. „Problym” w tym, że Łukasz rozgrywoł sezōn życio a Borussia w Lidze Majstrōw cisła na fol szwōngu. Piszczek czekoł z ôperacjōm i musioł rozszyrzyć dieta ô zastrziki przeciwbōlowe. W ôstatnim sezōnie tyż ni mioł lekko, w paździyrniku kōntuzjo kolana wyciepła go na rewiyr aż do kōńca roku. Sōm zaś nazod, Piszczek i forma.

Arek Milik to nastympny rewiyrowy rekordzista. 24 lata, a na kōncie serwane wiynzadła w dwōch kolanach i to w ôdstympie ani roku. Po piyrszym powrocie niy zdōnżōł ani prziś do formy. Tera wyglōndo to lepij. Pytania ô kōntuzje yno szterujōm Arka. Ofyn godo: dejcie pokōj. Z kolanami je ok.

Kamil Glik rehabilituje sie tera ôd rana do wieczora i bezmałaś szykuje sie na szpil z Kolumbiōm. Kōntuzja barku to niy wszyjsko. Jego tyż niy minyły problymy z kolanym. Ôd poru lot szpilo ze serwanym wiynzadłym krziżowym zadnim. Kolano niy telepie mu sie dziynki sile muskli, beztōż ôperacjo fōndnie se dopiyro na pyndzyji.

Pora lot do zadku medycyna skreślyłaby kożdego ś nich. Dzisio idōm na szpil…

Niy trza być wielkim szpecym coby wiedzieć, że na Mundialu ô dobry wynik biyda bez nutki szczynścio. Jakby to padoł uja Ojgyn z Rajchu trza mieć „throschka Glück’a”. Polsko kadra już na sztarcie jednak Glück’a (abo jak wolicie: Glika) straciyła. Z rozmańtych powodōw na ausie znodło sie w sumie aż 5-ciu Ślōnzokōw przimierzanych na Mundial.

Wrōca do Kamila Glika, bo to tera medialny tymat nr 1. Badania w Nicei potwierdziyły to co padali już dochtory polskij kadry. Ni ma dobrze, ale fōrtka na Mundial ni ma jeszcze durś zawarto. Jedne je pewne, synek z Jastrzymbio zrobi wszyjsko coby w Rusach poszpilać. Na finał bydzie tyroł jak mody sornik, gorzij jak Poloki niy wylezōm z grupy… Dalsze analizy jego kōntuzji wolołbych se darować, bo już za tela fandzolynio w mediach na tyn tymat. Jedyn ze szpecōw ofyn uznoł nawet, że Glik próbōm szlagu szkopyrtkōm przi siatkonodze za fest „przigwiazdorzył”, dyć żodyn ś niego Pele ani Cristiano. I nojlepsze: „ktoś powiyniyn pedzieć Kamilowi coby sie niy wygupioł”. Toć! Czamu kej Glik wybijoł sie do luftu, tryner niy padoł mu: „Kamilku, niy skokej tak, bo se ała zrobisz”. Jo sie pytōm, kaj wtedy bōł sztab szkolyniowy? Czamu fojermōny niy rozônaczyły ôchrōnnej plały? Czamu Jacek Gmoch niy rozrysowoł Kamilowi dobrego kōnta natarcio do zola? Skandal i ôstuda!

Jednak, pierzina, poniōsło mie i pojechołech z analizōm kōntuzji na trzi sztwierci felietōnu jak kożdy szanujōncy sie „szpec fusbalowy”. Kōntuzjo Glika przićmiyła już praje durś ôstateczne wybory kadrowe Adama Nawałki, a te do Ślōnzokōw mōgły być lepsze… Na Mundial niy pojadōm mody pōmocnik Górnika, Szymon Żurkowski i torman Romy Łukasz Skorupski. Skuli wielkij rywalizacje w ataku juz pryndzyj ôdpod Jakub Świerczok (Łudogorec). Na kōniec skreślōny ôstoł Kamil Wilczek (Brøndby). Jego duński tryner już pryndzyj godoł, że jak Wilczek niy pojedzie to znaczy, że Poloki majōm forma na Majstra. Przesada? Chyba ja, ale ôbadōmy. Milik, Piszczek i… Glik sztyjc w grze.

Ȏ spadkach a awansach wiymy już forgot wszyjsko. A poradzicie pedzieć wiela ślōnskich klubów poszpilo w sezōnie 2018/19 na nojwyższym szczeblu krajowej drabiny? 2, 3 a mono 6 abo 7? Ȏdpowiydź zaś downo niy była tak ciynżko…

1. Górnik Zobrze. Nojlepszo ślōnsko ekipa latoś (4. plac) i nojwiynkszo naszo nadziejo na nowy sezōn w Ekstraklasie. Klub ȏd zdrzōdeł ślōnski i ślōnskość sztyjc prōmuje.

2. Piast Glywice. Z biydōm, ale Ekstraklasa ȏbrōniyli. Klub, kery rod ȏdwołuje sie do kresowych korzyni, jednak już w swoich poczōntkach bōł ślōnsko-kresowym miszōngiym. Po roz siōdmy z raje bydzie reprezyntowoł Ślōnsk w Ekstraklasie.

3. Zagłębie Sosnowiec. Ok, to taki pōłwic. Wszyjscy wiymy, że ze Ślōnskiym bardzij idyntifikujōm sie fusbaliści Sydney FC i Los Angeles Galaxy niż Zagłymbioki, ale jakby sie niy dziwać szpile u sia ȏd 62 lot grajōm po ślōnskij strōnie Brynicy. Kej w 1954 sztartowała budowa ich stadionu plac tyn noleżoł do Szopiynic. Dopiyro korekta administracyjno z 1960 przeciepła downe szopiynicki łōnki do Sosnowca. Do Ekstraklasy z 2. placu Zagłymbiokōw wkludzo Knōrowiok, Dariusz Dudek.

Nowościōm je, że w nowym sezōnie wiyncyj ślōnskich klubōw w piyrszej klasie rozgrywkowej zagro po strōnie czeskij. Liczymy dalij…

4. Slezský Ȏpawa. Synki z Ȏpawy byli latoś nojlepsi w drugij lidze, beztōż bydōm tera trzecim ślōnskim klubym w Gambrinus lidze.

5. MFK Karwina. Im za to udało sie niy sfurgnōnć z I ligi dziynki wygraniu ȏstatnigo szpilu z Jihlavōm.

6. Banik Ȏstrawa. Baniček tyż do kōńca groł ȏ utrzimani i misjo zrealizowoł. Tera ȏstowo walka ȏ powrōt na Ślōnsk. U nich na ȏpy niż w Sosnowcu. Grajōm na Vitkovicach, morawskim kōnsku Ȏstrawy ȏd trzech lot, bo ich ślōnski stadiōn Bazaly niy spełnio ligowych wymogōw. Chachaři (kibice Banika) niy ȏd dzisiej walczōm ȏ powrōt. Baníček patří na Slezsko!

To niy kōniec. Ni mogymy zapōmnieć ȏ frelkach.

7. GKS Katowice – zbudowano ȏd zera sekcjo kobiyco, zaliczo awans za awansym i gynał melduje sie w Ekstralidze.

Kōmu tera kibicujesz?

Niy zetrwało sztwierć wieku i voilà! Górnik Zobrze nazod w europejskich pucharach. We ôstatnim szpilu sezōnu Grubiorze wygrali 2:0 z Wisłōm Krakōw i szafli se 4. plac, kery wkludzo ich do Ligi Europy. Widzicie ôczami wyôbraźnie juzaś te szpile z Romōm abo Manchesterym City…?

Pomału! Europa ôd lot 70-tych trocha urosła. Niż pojedzie sie na Włochy czy Anglio trza nikedy po drōdze zaliczyć telki przistanki jak azerski Agdam, kazachsko Astana, abo cypryjsko Nikozja. Jeszcze pora lot do zadku fusbalisty polskich klubōw po cichu (a nikedy ofyn) lachali sie z telkich przeciwnikōw. Ôdpadniynci Wisły z Karabachym Agdam abo Jagiellonii z Irtyszym Pawłodar i inksze telki przipadki dowajōm jednak do myślynio. Nasi tyż niy lepsi! 2003/04 GieKSa ôdpado z Cementarnicōm Skopje, 2010/11 Ruch z biydōm awansuje po dwōch rymisach z maltańskōm Valettōm, 2013/14 Piasta pokōnuje Karabach. To niy cufal za cufalym. Wcześnij polski ekipy niy chciały wylosowywać drużyn z przikładowo Kazachstanu coby darować se dłōgo rajza, ale w kōńcu musieli dać pozōr, że to grocze, kerzi poradzōm ich nauczyć fusbalu.

Na szczynści do fusbalistōw rajzowani na zagraniczne szpile tyż sie już zmiyniyło. Za PRL-u jak kery grocz bōł politycznie podpadniynty za granica mōgli go wcale niy puścić. Przeważnie jednak z wyjazdami na wielki szpile problymōw niy było, chocioż niy brakowało przigōd. Na trzeci szpil pōłfinału Górnik vs Roma w PZP z 1970 fusbaliści ôbu ekip mieli podjechać na stadiōn jednym autobusym. Tryner Romy zrobiōł jednak za błozna szofera i tyn Grubiorzy niy wziōn. Zobrzanōw na stadiōn podciepali swojimi autami kibice tak, że na stadiōnie byli 20 min. przed szpilym. Na finał do Wiednia Grubiorze jechali już swoim autobusym. Przijechali jednak dopiyro w dniu szpilu przed połedniym. Zmynczyni rajzōm grocze w ramach ôdpoczynku i prziszykowań poszli na…. gyszefty. Kaj tyż wracać du dōm z pustymi rynkami!

Latoś niy trza już sie ôbkupować ani wozić kryształōw na handel. Yno i aż grać…

Po ôstatnich szpilach yno nojwiynksi ôptymiści liczōm jeszcze na utrzimani Ruchu. Nawet nojwiynkszy ôptymista traci jednak ôptymizm kej prowda powiy matymatyka. Telki mōmynt mioł prziś już w tyn weekend. Ôstatnigo gwoździa do truły niy poradzioł jednak dobić GKS Katowice. Ruch sztyjc jednak w dramatycznej sytuacji. Kogoś to ruszo?

Nojwiynkszym ôptymistōm ôstatnich miesiyncy w Chorzowie bōł prezes Ruchu, Janusz Paterman. Ôstatnio w mediach za fest sie jednak niy pokozuje. Co mioł pedzieć już pedzioł. Sytuacjo w Ruchu kōmyntujōm za to starzi fusbaliści Niybieskich, kerych to co sie tera pocho fest szteruje. Dwie wypowiedzi, dwōch chopōw i ôbadocie ô co sie rozchodzi…

Jan Benigier – „ôswojōny gorol”. Majster z Ruchym z 1974, 1975 i 1979. Mało kery grocz spoza Ślōnska tak sie w Ruchu zaaklimatyzowoł jak ôn i tak fest sie po latach z tym klubym idyntyfikuje. Po ôstatnij przegranej z Puszczōm Niepołomice ofyn skrytykowoł taktyka i decyzje kadrowe. Niymoc, brak walki – telki ôbrozek dokludzioł Benigiera do… mōnopolowego. Były grocz Ruchu uznoł, że zdałaby sie flaszka coby ô tym zapōmnieć.

Antoni Piechniczek – rodowity chorzowiok. Majster z Ruchym z 1968. Na szpile Ruchu przestoł chodzić niydowno. Ô ôbecnym składzie pado „to niy sōm ludzie, kerzi bydōm umiyrać za Ruch”. Myśli, że ci mieliby biyda pedzieć wiela Ruch zrobiōł majstrōw, abo wymiynić chocioż poru przedwojynnych groczy.

Rewolucjo w składzie, poskludzani bezmałaś tōńszych auslyndrōw i zmiany trynerōw przi jednoczesnych uśmiychach pt. „idzie ku dobrymu”…  Niy pōmōgło. Nowy tryner Dariusz Fornalak przed piyrszōm wygranōm z GieKSōm (1:0) zaliczōł 4 rymisy i 4 przegrane. Terozki to jednak ôn wlazuje w rola ôptymisty przodowego. Ôstatnio pozwolo se na testowani modziokōw. Wiy że to nie niojlepszy czas na debiuty, ale pado że coś ś nich bydzie. Pod wiela skorzysto na tym Ruch? Rada pana Antka: Jak te synki bez nojbliższe 4 lata ôstanōm w klubie to mo to syns. Inaczyj Ruch bydzie ańfachowōm czelodkōm zbiyrokōw.

Po bosoku na rżysku, w trampkach po hasiōwie, w sztolach po kretowinach. Bramy na wartko z pukeltaszōw, abo profesjōnalne z drzewa, włosnymi rynkami pōłlegalnie załatwiōnego na rapsie w lesie. Linie z piosku, nece z gardinōw, bale ze szmatōw…

Rozmańte bywajōm poczōntki wielkich i niywielkich fusbalistōw. Zdo sie, aże jeszcze poradziesiōnt a nawet poranoście lot do zadku trza było mieć trocha wiynkszo wyôbraźnio coby do porzōndku poszpilać. Ańfachowe warōnki to jednak niy przeszkoda, a samo uciecha. Niy zrozumcie mie źle. To że infrastruktura szportowo rośnie, dziecka szpilajōm na „orlikach” co wieś, co ôsiedle to yno plus. Ôbojyntnie kaj bajtle zaczynajōm przigoda z fusbalym, ich marzynia sōm na sia podane, a finałowōm ich scyneriōm porzōndny stadiōn.

Gynał skōńczoł sie XVIII turniej „Z podwórka na Stadion o Puchar Tymbarku”. Wielkigo finału doczkalimy sie 2 moja na PGE Narodowym we Warszawie. Tamek poznalimy nojlepsze w Polsce drużyny synkōw i dziołchōw we wieku 10-12 lot. Turniej finałowy zaczōn sie tak rychtyg 29 kwiytnia. Do Wa-wy przijechały 64 nojlepsze drużyny w Polsce. To bezmałaś nojwiynkszy telki turniej fusbalowy do bajtli w cołkij Europie. Już same zagrani na telkim stadiōnie, pod ôkiym nojważniejszych ludzi fusbalu w tym kraju i z ôtoczkōm dziynnikorzy a profesjōnalnych kōmyntatorōw to do dziecek coś ekstra. Mono znojdōm sie sam gwiozdy fusbalu (w tym turnieju zaczynoł choby Arek Milik)? Nawet jak niy to nic, tak rychtyg liczy sie uciecha!

Doś fandzolynio, dyć szport to wyniki. Ofyn trza pedzieć, że w kategorii synkōw ślōnski ekipy turnieju tym razym niy zawojowały. Hōnoru Ślōnska brōniyły dziołchy. We kategorii do 10 lot drugi plac do KKS Katowice. Ôńskigo roku we finale KKS wygroł z Beniaminkiym Krosno, tera przegroł ś nimi majstra po elwrach. 3. plac w kat. dziołchy do 12 lot zrobiōł za to Sprint Katowice. Indywidualnie nojlepszōm tormankōm do lot 10 Ula Kopacz z KKSu. Forza frele!

Na beztydziyń GKS Katowice przegrywo zaległy szpil w Niypołomicach (1:0). Niyskorzij we niedziela yno rymisuje u sia z Bytoviōm Bytōw 0:0, ale nawet tyn drugi wynik wiecznym kandydatōm do awansu smakować musi choby porażka. Do kōńca sezōnu 6 kolejek. To juzaś tyn mōmynt kej GieKSie zaczynajōm citać marzynia, abo yno troszka sie zafuczeli i jeszcze pokożōm wiela sōm rychtyg we werci? Na razie sztyjc drugi plac.

Rok tymu GieKSa tyż „robiyła” awans. Zapowiadała sie ciekawo haja miyndzy nimi a Sosnowcym. Kōńcōwka sezōnu wyglōndała jednak choby cołki wiyrch tabeli chcioł awans sprzedać, yno żodyn jeszcze niy wiedzioł kto go rychtyg chce kupić. Ôstatecznie sōmsiodōw znad Brynicy pogodziōł zobrzański Górnik. GieKSa chocioż dłōgo kludziyła w tabeli ô Ekstraklasie zaś mōgła zapōmnieć. Niy piyrszy roz…

Żodyn z piyrszoligowcōw niy gro tak dłōgo ô awans do Ekstraklasy jak GKS. Pōmysł starszy jak wōngiel i paprotki w nim wysztymplowane. Awans w Katowicach po cichu planowali za czasōw II ligi, kej ta jeszcze rychtyg II ligōm była. Hneda GieKSa znodła sie w lidze I, tōż szło już wtedy ôgłosić sukcys i iś na lody, ale… Sztyjc to tyn sōm drugi poziōm rozgrywek, a w cyntrum gōrnoślōnskij aglōmeracji kōmpleks tego drugigo poziōmu bez 11 sezōnōw szpilanio w nim yno rosnōł. A dyć plany sōm ambitniejsze! W Katowicach majōm bezmałaś budować durś nowy stadiōn na 12 tys. (do rozbudowy na 15 tys.), chocioż nojstarsze górole katowicki niy pamiyntajōm telkij frekwyncji na GieKSie. Złoto zasada „idōm wybory – bydzie lepij”!

À propos… Sōm prezydynt Katowic, Marcin Krupa, po słabym sztarcie GKS-u jeszcze we wrześniu padoł, że trza sie raczyj nasztelować na awans w 2019. Na złość Krupie GieKSiorze zaczli wygrywać, a co nojważniejsze wklupywali nojwiynkszym rywalōm w haji ô awans. W rundzie rewanżowej pokōnali Miedź, Raków, Chojniczanka, Odra O., Zagłębie S., Wigry czy Chrobrego – praje cołki wiyrchni kōnsek tabeli! Siyła na awans je! Yno te 2 ôstatni szpile… Déjà vu?

Jeszcze miesiōnc do zadku wyglōndało to biydnie. Pewny plac w ataku Nawałki mioł Lewandowski, a dalij szyroko kadra – rewiyrowcy, prawie pyndzyjōnisty, szpece ôd ławkowego „zic-hajcungu”. Sytuacjo jednak durś sie zwyrtła. W nojważniejszych szpilach sezōnu bramy zaczły klupać ślōnski snajpery. Hneda mogymy mieć majstrōw we trzech europejskich ligach…

Danio. Kamil Wilczek niy dostoł powołanio na sparingi z Nigeriōm a Koreōm. Toć, to Nawałka wkludzoł go do kadry i sztyjc powoływoł ôd 2015, ale do tera Kamil zagroł tam yno 3 szpile (z biydōm 116 min). Stary ni ma, ale modym wilczkiym tyż go biyda nazwać. Naciski coby dać se ś nim pokōj rosły, a że przestoł szpilać regularnie w Brøndby znod sie powōd. We marcu bōł już skreślōny. A co sie pocho tera? We sztyrech szpilach grupy majstrowskij Wilczek klupie piynć bramōw w tym dwie w tym nojwazniejszym z FC Midtjylland.

Bułgario. Jakuba Świerczoka ôstatni zgrupowani kadry gynał niy minyło, ale i tak za fest tamek niy poszaloł. Nijaki 23 min. we szpilu z Nigeriōm do Mundialu go na pewno niy przibliżyły. Tydziyń niyskorzij w szpilu ligowym ze Starōm Zagorōm mioł jeszcze mynij czasu coby sie wykozać, ale klupnoł dwie bramy. W ôstatnio sobota szczelōł na 4:2 z Botewym Płowdiw. To jego trzeci szpil z rzyndu, w kerym trefio i szōsto brama w lidze.

Italio. Miesiōnc tymu Milik bōł na kadrze, ale ô jego formie sztyjc wiedzielimy mało. Spōmnioł ô sia w szpilu z Chievo, kej w dwie ôstatni minuty zaliczōł brama a asysta i wykludziōł Napoli na 2:1. W ôstatnio środa z Udinese bōł już w podstawie (po 242 dniach!) i zaś wraziōł bal do neca. To dało mu plac na ôkłodce La Gazetta dello Sport i rozhajcowało dyskusje ô zwiynkszyniu jego roli w ataku. Po piyrszej kōntuzji kolana bōł nazod na szpilplacu pryndzyj. Tera za to wraco na wiynkszym szwōngu, ale Sarri Milikowe siyły sztyjc szporuje. W niedziela z Juve Arek zaś wloz z ławy, ale za to 3 punkty jaki zocne! Do ôdrobiynio ôstatni ôko…

Bydōm 3 majstry? Panie Adamie kōmbinujcie…

1848. Uniwersytet we Oksfordzie publikuje piyrszy na świecie spis przepisōw fusbalu. Hneda tyn szport sie jednak zmiyni… 1866 – przepis ô spolōnym. 1878 – syndzia dostowo gwizdek. 1883 – bramy majōm laty. Nowoczesny fusbal powstoł w Anglii i tamek tyż rodziyły sie piyrsze przepisy a fusbalowe nowinki technologiczne.

Nojważniyjsze sie niy zmiynio, ale w świat fusbalu sztyjc wlazujōm nowości i sztyjc trza ich szukać na Zachodzie. Patyntōw na Goal Line Technology było pora, ale FIFA w 2013 postawiyła na projekt Nimcōw. Systym powtōrek VAR piyrszy roz przetestowali w 2016 w USA, a hneda na sparingu Włochy vs Francjo. Niydowno rozkulała sie nawet haja ô syndziowsko „pianka do golynio” (hit ôd Mundialu 2014). Brazylijski wynolozca chce ôd FIFA 100 mln $ ôdszkodowanio, bo bezmałaś ukradli mu patynt… Dobre pōmysły zmiyniajōm szport, a i pōmogajōm prziszporować. Czamu niy wymyślymy czego sami?

Ślōnzoki ôstatnio fest punktujōm w szportowych nowinkach technologicznych. W 2017 sztartło Ludmo. To mobilno aplikacjo zrychtowano bez dwōch Katowiczokōw. Styknie pobrać jōm na smartfōna, kerego wrażo sie do ekstra ku tymu zônaczōnej koszulki tryningowej. Ludmo godo kaj, jak wartko i wiela loce grocz. Wiela stoi, wiela szpacyruje, eli kopie prawōm abo lewōm nogōm i jak fest. Wszyjsko przeliczo i dowo porzōndno analiza jak w inkszych profesjōnalnych programach, yno rychtyg po tanimu. Rewolucyjny patynt do mynij bogatych klubōw i amatorōw.

Jak już ô amatorskim szporcie godka… Synki ze Żorōw i Ôrzeszo majōm coś ekstra do wos! Jeszcze w 2017 sztartła ich darmowo aplikacjo Chaliso. Pōmogo ôna zebrać ekipa na szpil rozmańtych zortōw szportu ôd fusbalu bez jazda na kole po szachy a scrabble. Rychtujesz zdorzynia szportowe, zbiyrosz ekipa, trynujesz. Proste. Praktyczne. Profesjōnalne. Ôd niydowna we angielskij wersji jynzykowej coby podbić Zachōd. A tera – pozōr! Chaliso gynał debiutuje po ślōnsku (przekłod GB)! Ôbadejcie sami a chytejcie sie trynowanio!

https://app.chaliso.pl/

Kibice fusbalu po ôstatnim tydniu dzielōm sie na dwie zorty. Jedni sztyjc emocjōnujōm sie szkopyrtkōm Cristiano, inksi analizujōm tabela Ekstraklasy po rundzie rewanżowej. Jo propōnuja bramka nr 3 i zaglōndōm na szpilplace IV ligi… Toś pojechoł Buchalik! Tera żeś straciōł ôstatnigo wiernego czytelnika… Wyboczcie, ale historyczny transfer z Bundesligi na 5 poziōm rozgrywek w Polsce ôdnotować trza nawet jak dō niego jeszcze niy doszło.

Łukasz Piszczek kōntrakt z Borussiōm Dortmund mo szkryfniynty do 2020 i do tego czasu musi zrobić forma, bo poważne szpilani zacznie sie niyskorzij. Przed świyntami Piszczek ofyn padoł Kickerowi, że profesjōnalno kariera skōńczy w BVB, a potym przyndzie do LKS Goczałkowice! Tymat tyn pojawioł sie już niy roz, ale tera po lekku znojduje kōnkretny plac w kalyndorzu. IV liga czeko, yno aby rychtyg czworto? Kieby LKS utrzimoł tympo awansōw to hneda zacznie sie zbliżać do poważniejszego fusbalu. To ni ma już tyn sōm klub, z kerego Łukasz wyjyżdżoł w świat 17 lot tymu.

W LKS-ie trocha sie pomiyniło i to niy bez pōmocy „niywidzialnej rynki”. Łukasz żodnej oficjalnej funkcji w klubie ni mo. Raczyj ôdgrywo rola „uje z Rajchu”. Kaj jak kaj, ale na Ślōnsku wiedzōm, że nikedy werci sie mieć bogatego ujka w Nimcach. Downij taki to posyłoł bōmbōny abo jaki towory deficytowe. Toć, po 1989 „instytucjo” ujka z Rajchu ni ma już tak fest zocno, chocioż we Goczałkowicach… Łukasz ôd poru lot bardzij pōmogo swoimu klubowi, w kerym sztyjc prezesuje jego ôjciec i szpilo brat. Roz podciepnie sprzynt, roz załatwi sparing w Nimcach. Inkszym razym sōm robi na ławce za drugigo trynera. Jak niy przijedzie to dziwo sie na szpil (live!) na mobilnioku.

Łukasz to raczyj kolega fusbalistōw LKS-u niż „ujek ôd bōmbōnōw”, ale geszyng „na zajōnczka” zrychtowoł… 28 marca Piszczek szkryfnōł umowa w goczałkowickim urzyndzie Gminy. Jego fundacja mo wybudować profesjōnalne zaplecze szportowe i pokludzić akadymio fusbalowo, kero bydzie wspōłpracować z BVB. Autobana do Rajchu…