Miesięczne archiwum: Sierpień 2013

 Fusbalyry Górnika na wyjeździe w Gdańsku podzielili sie punktami z gospodorzami (1:1). Skuli tego na wiyrchu tabeli sztyjc mōmy rymis absolutny, a obie ekipy mogōm dalij asić sie bilansym bez ani jednej porażki.

W spotkaniu dwóch ex equo liderōw Ekstraklasy spodziywalimy sie doprowdy wielkich emocji, jednak w piyrszej połowie żodno z drużyn niy ciepła kibicōw na kolana. Akcji podbramkowych pora mono by sie dało wybrać, ale tak rychtyk żodyn z tormanōw ni mioł za wiela okazji coby sie porzōndnie wysztrekować.

Nojważniejszym wydarzyniym piyrszej połowy była niystety kōntuzjo kolana Adama Dancha, skuli kierej kapitan Górnika musioł ślyź z boiska. Miyjmy nadziejo, że niy wyśle to go na długszy rewiyr.

W drugij połowie Górnik odważnij ciepnoł sie do przodku, co dało tyż szanse w ataku gospodorzōm. Po zagraniu Piotra Wiśniewskigo bliski wrażynio bala do siatki wślizgiym bōł Paweł Buzała. Kōnsek brakło mu do szczynścio.

Wynik spotkanio w kōńcu otwarli jednak fusbalyry ze Ślōnska. W 62. minucie po cyntrze Rafała Kosznika bal trefio do Przybylskigo, kiero mo jeszcze na tela czasu i placu, że poradzi elegancko przijōnć i sieknōnć wele tormana. Bal w siatce i syndzia pokozuje na środek boiska.

W 77. minucie zaś zafyrloł jak zawsze nad-aktywny Nakoulma. Tyn chop w polskij lidze wyróżnio sie nikiedy choby bajtel z ADHD w przedszkolu. Górnik sportowo może fest stracić na jego ewyntualnych przekludzinach na zachōd. Tym razym ,,Prezes” wkrynciōł w zol poru obrōńcōw i złōnaczōł se okazjo ,,miōd-malina”. Niystety jego szlag niy bōł już tak dobry. Bal niy pofurgnōł ani w światło bramki.

To sie musiało zymścić i rychtyk wiela niy zetrwało i było 1:1. W 81. minucie gospodorze mieli elwer, po tym jak bal bez cufal trefiōł w rynka Ołeksandra Szeweluchina. Z jedynostego metra zaś niy bez kōnska szczynścio do siatki trefiōł Pietrowski. Steinbors co prowda odbiōł bal, ale tyn i tak jakoś pechowo znod sie w bramce.

Wynik już sie niy zmiyniōł, chocioż okazji niy brakowało. Nojbardzij szkoda niywykorzystanej sytuacji Olkowskigo już z doliczōnego czasu gry.

Ostatecznie oba lidery kasujōm po punkcie i na wiyrchu tabeli na razie nic sie niy zmiynio.

 

Lechia Gdańsk – Górnik Zabrze 1:1 (0:0)

Bramy: Mariusz Przybylski (62. min. – 0:1) – Marcin Pietrowski (81. min. – 1:1 z elwra).

Lechia: Sebastian Małkowski – Deleu, Sebastian Madera, Jarosław Bieniuk, Adam Pazio – Paweł Dawidowicz, Marcin Pietrowski (92. Maciej Kostrzewa), Przemysław Frankowski (67. Piotr Grzelczak), Daisuke Matsui, Piotr Wiśniewski (76. Patryk Tuszyński) – Paweł Buzała.

Górnik: Pavels Steinbors – Paweł Olkowski, Adam Danch (23. Rafał Kosznik), Ołeksandr Szeweluchin, Seweryn Gancarczyk – Radosław Sobolewski (73. Sergei Mosnikov), Mariusz Przybylski, Maciej Małkowski (81. Łukasz Madej), Krzysztof Mączyński – Mateusz Zachara, Prejuce Nakoulma.

Już hneda, w nojbliższy piōntek szykuje nōm sie rychtyk ciekawe fusbalowe świynto, jakim do wszyjskich ślōnskich kibicōw bydōm 99. ligowe Wielki Derby Ślōnska.

Spōmnymy yno, że w ostatnich 98 szpilach Ruchu z Górnikiym 39. razy wygrywali synki z Zabrzo a 26. razy lepsi byli ich kamraci po fachu z Chorzowa. W 33. spotkaniach kōmpletu punktōw niy zgarnyła żodno z ekip.

Teroski lekkim faworytym zdowajōm sie być gospodorze. Na dyć to Górnik po sztyrech szpilach z dziesiynciōma punktami kludzi w ekstraklasowej tabeli. Ruch mo o połowa mynij oczek i jes na 9. placu. W ostatnij kolejce to jednak ōni jako piyrsi w tym sezōnie klupli warszawskij Legii (2:1 u sia). Bez tego Górnik niy wyłaziōłby na piōntkowe derby jako lider.

Mōmy nadziejo, że szportowych emocji niy braknie, a na trybunach atmosfera bydzie piknikowo, ale niy plażowo, jak przi ostatnij zabawie chorzowskich ,,gringos” i ich ,,amigos” z Meksyku.

Tōż zaproszōmy w piōntkowy wieczōr na dziennikzachodni.pl, kaj już chwila przed godzinōm 20:30 ekstra dlo wos zacznymy relacjonować szpil minuta po minucie. Yno tukej bydziecie mōgli przeczytać ślōnskojynzyczno relacjo na żywo z tego spotkanio.