Miesięczne archiwum: Grudzień 2013

Ruch zblizo sie do Grubiorzy na dystans 8 punktōw. Górnik zostanie jednak dalij na placu wicelidera. Tera trza liczyć, że Legia zaś sie potknie i niy odskoczy za fest.

Statystyk pokozujōm, że zwyciynstwo Niebieskich to niy żodyn cufal. Gospodorze mieli praje 2 razy wiyncyj szlagōw niż goście.

90+4 min. – Buchalik chyto bal meczowy. Kōniec spotkanio! 3 punkty w Chorzowie.

90+3 min. – Kartka do Smektały. Bydzie wolny.

90+2 min. – Daleko z ausu Małkowski. Wszyscy w szesnostce Ruchu. Zaroski jednak kōntra i z przewogōm wyłażōm gospodorze.

90 +1 min. – Zagrōmy 3 minuty dłużyj. Jeszcze mo nadziejo Górnik.

90 min. – Dobrze brōni sie Ruch. Niy dowajōm sie tera zawrzeć na swojij połowie Niebiescy.

89 min. – Cyntra Ruchu. Zawiyroł Smektała. Wele słupka.

88 min. – Chwila zetrwała ta przerwa. Na spolōnym tera Smektała. Górnik wartko gro do przodku.

86 min. – Leży na zolu ktos z Ruchu. W miyndzyczasie w ekipie gości Iwan włazi za Przybylskigo.

85 min. – Do heftu syndzigo wpisuje sie Oziębała. Niystety yno skuli żōłtej kartki.

Wraziōł głowa tam kaj mioł! Szlag z bliskij odlygłości. Torman chycic tego ni mōg, ale powiniyn pryndzyj do tego wylyź. Ausdruk Steinborsa.

83 min. – BRAMA! STAWARCZYK WYKLUDZO RUCH NA 2:1

82 min. – Odpedzioł teroski Górnik. Dobro akcjo. Szlag Mączyńskigo z wysokości wele 11. metra zablokowany.

81 min. – Szlag Kuświka z ostrego kōnta. Dobrze ciepie sie Steinbors i ratuje Grubiorzy.

80 min. – Długo próbowoł skludzic przeciwnika na zol Włodyka. W kōńcu mu sie udało i zasłużōł na żōłto kartka.

78 min. – Zaś za dużo placu dali Starzyńskimu Grubiorze. Tym razym szlag Filipa chyto torman.

77 min. – Kuświk głowōm z praje szesnostego metra. Ciynżko było coś z tego wymyślić. Chyto Steinbors.

76 min. – Mioł swoji okazje Górnik, mōg klupnōnć na 2:0, a tera szpil zaczyno sie nōm od nowa. Przi balu Ruch.

Szlag z ponad 30. metra. I bal furgnie w sōm winkel. Pierōnym mocno, pierōnym dokładnie. Bramkorz ni mo samek nic do godki. Elegancko to wraziōł Starzyński!

73 min. – Starzyński! To je brama na 1:1!

72 min. – Cotargoł tera przeciwnika zaq batki Mączyński. Faul i kartka.

71 min. – W pierōny placu na lewym skrzidle mioł tera Ruch, ale syndzia niy wiadomo kaj, ale ujrzoł przi tym spolōnego.

69 min. – Z roga gospodorze. Grajōm krōtko i tym razym Ruch oddalo zagrożyni.

68 min. – Zaś Zachara powiniyn podwyższyć. W dobrej okazji mōg szczylać pryndzyj, ale zatańcowoł jeszcze z obrōńcami i dopiyro potym klupnōł nad latōm.

67 min. – Zaś rozfechtowany Madej zagrywo wzdłuż bramki. Piyntōm chcioł to wrazić do siatki Zachara. Bal bōł jednak warciejszy i napstnik Górnika sie majtnōł.

66 min. – Bajzel w środku pola bez chwila

65 min. – Z piōntego metra bal wkludzo do gry Steinbors.

64 min. – Nakulma delikatnie pokiloł rywala po puklu, a tyn sie obalōł. Wolny zza szesnostki niywykorzystany przez Ruch.

63 min. – Nojsłabszo ostatnio formacjo Górnika na razie bez wiynkszych ausdrukōw. Dobrze wachujōm na razie bramki Steinborsa.

62 min. – Wartkim wyciepaniym z ausu chcieli tera zaskoczyć Grubiorze. Mało brakło a ,,Prezes” bōłby sōm na sōm z Buchalikiym.

61 min. – To było dobre klupniynci Włodyki. Soczyście, ale wele słupka.

59 min. – Świyżo wkludzōny Helik szpetnie fauluje. Na razie bez kartki.

58 min. – Z roga zacznie Górnik. Rykoszet i bal nazot u Małkowskigo. Jego szlag lepij zostawić jednak bez kōmyntarza.

57 min. – Musi zlyź kōntuzjowany Malinowski. Na boisku już Helik.

55 min. – Tera w kōńcu balym na jedy kōntakt pogroł Ruch. Szlag na bramka kōńczy sie jednak w rynkach tormana.

54 min. – Nakoulma zaś na szwōngu z balym krōtko przi nodze wloz w szesnostka. Niy udało sie jednak z tego nic wiyncyj wyczarować.

53 min. – Zaskoczyła wszyjskich to akcjo Grubiorzy po okresie przewagi Ruchu. Kto tera przejmie inicjatywa?

52 min. – Ale okazjo Górnika! Madej dolecioł do praje stracōnego bala i elegancko dogroł wzdłuż bramki. Zamykoł to wszyjsko Nakoulma. Jego szlag pofurgnōł jednak ,,Pōnbōczkowi w okno”.

51 min.- Od bramki daleko wybijo Buchalik.

50 min. – Konczkowski próbuje głowōm po cyntrze z roga. Bal furgnie nad latōm.

48 min. – Na razie dobrze sie brōni Górnik, ale widać, że Ruch bydzie groł tera wyżyj.

47 min. – Piyrszy rōg do Ruchu

46 min. – Od razu zmiana. Na boisku Jankowski za Babiarza. Kocian wkludzo na boisko drugigo napastnika. Zaro obejrzymy co to tak rychtyk wniesie…

 

45 min. – Syndzia stwierdziōł, że smoli już te stoci na mrozie. Idymy do szatni bez doliczōnych minut.

44 min. – Nakoulma! Tyn chop je niymożliwy. Obalōny na zol utrzimoł sie przi balu i pojechoł ś nim dalij. Akcjo jednak przerwano. Była rynka.

43 min. – Oddalōł gra od swojigo szesnostka Górnik w ostatnich minutach.

41 min. – Blisko trzimany Olkowski poradziōł zacyntrować. Ni mioł jednak tamek kto tego skōńczyć.

39 min. – Ostro sie zrobiyło. Wyciynty rowno z zolym Babiarz. Sobolewski chyto za to żōłto kartka.

38 min. – Mōndrze doł sie sfaulować Nakoulma. Musi to uspokoić Górnik.

37 min. – Uciyk bal Olkowskimu. Zas przi balu Ruch. Wiyncyj majōm tera do godki Niebiescy.

36 min. – Przekōmbinowali… Na spolōnym Ruch.

35 min. – Lepij tera przimierzōł Janoszka! Cyntymetry od prawego słupka!

34 min. – Teroski Babiarz chcioł być bohatyrym. Próba z wele 30. metra fest niyudano.

32 min. – Durs rozklepano tera obrōna Ruchu. Piykno akcjo zakōńczōno jednak szlagiym wysoko nad latōm.

31 min. – Zadkiym do bramy głowōm szczylo Kuświk. Zaś blisko.

30 min. – Szlag Starzyńskigo i piykno parada Steinborsa. Za dużo mioł sam tera placu pōmocnik Ruchu.

29 min. – Tera wartki dwie groźne akcje po obu strōnach boiska. Zdo sie, że brama jeszcze bardzij rozfechtowała tyn szpil.

28 min. – Próbuje odpedzieć Ruch. Tera szczasło sie dwóch groczy w szesnostce. Ni ma szans na elwer

Krōtko rozegrany rōg. Potym ostro cyntra na piōnty meter. Tamek bal odbijo sie od poru groczy. Bramkorz zostowo na zolu, a w odpowiednim placu znod sie Radek Sobolewski. Bal wlatuje do pustej bramki!

25 min. – Sobol otwiyro wynik szpilu. 0:1!

24 min. – W odpowiedzi na pełnym szwōngu w szesnostka Ruchu wloz Nakoulma. Rōg.

24 min. – Dziwniel fest aktywny tamek dzisio na skrzidle.

23 min. – Wysoki pressing Górnika

21 min. – Wartko kōntra Ruchu. Przeczytała to defynsywa. Ostatecznie akcjo kōńczy sie faulym gospodorzy.

20 min. – Zaś zamloło sie po rogu pod bramkōm Górnika. Konczkowski próbowoł to skōńczyć szkopyrtkōm. Kieby to wlazło bōłby bohatyrym…

19 min. – Ruch ciśnie lewym skrzidłym. Fol samek placu. Dziwniel cyntruje ostro, ale wybijo Pandża.

18 min. – Elegancko tera przijōn i zwyrtnōł sie z balym Madej. Jego szlag trefio jednak gynał w rynce Buchalika.

17 min. – Niydokładnie Górnik. Od bramki zacznie Buchalik.

15 min. – Cyntra z roga. Mijo sie z balym Steinbors! Głōwka… aj, było teroski doprowdy blisko. Ruch mōg klupnōnć na 1:0.

14 min. – Długi bal na lewo. Dziwnel ledwo zdōnżōł. Zafyrloł sam obrōńcami i poradziōł wywalczyć jeszcze rōg.

13 min. – Szlag z dystansu Mączyńskigo. Bal szpetnie odbijo sie jeszcze od zola, ale torman pewnie chyto.

13 min. – Zaś o rogu wartko my zapōmnieli. Grōmy dalij

12 min. – Rōg Górnika. .Kibice ciepiōm w niego kulkami ze śniega.

11 min. – Zaś z ausu Grubiorze. Mało tamek placu. Ciynżko przeciś sie bliżyj bramki.

9 min. – Już po wszyjskim, akcjo spod bramki wykludzajōm Grubiorze.

8 min. – Pocylowany tera balym Sobol. i mōmy rōg.

7 min. – Wartko wymiana podań, ale potraciōł sie w ataku Górnik.

6 min. – Cyntra! Szpetny bal do bramkorza, ale Steinbors poradził wybić go na aus.

5 min. – Olkowski straciōł bal i faulowoł. Wolny.

4 min. – Defynsywa Górnika przerwała tera dwa groźne ataki Ruchu.

2 min. – Ostro walka w środku pola. Z tego mogiymy być radzi, bo zapowiado to dobry szpil.

1 min. – Wartki tympo i już widzielimy piyrszy szlag Nakoulmy. Daleko od bramki.

1 min. – Bal sie kulo. Ruch…

Fusbaliści już na murawie i zaczōn sie kōnsek oficjalny tej imprezy. Grocze odebrali gynał pamiōntkowe medale.

W obu ekipach doś trocha zawodnikōw na rawiyrze. Szczególnie osłabiōno kōntuzjami jes obrōna Górnika.

Składy:

Ruch: Buchalik – Dziwnel, Stawarczyk, Malinowski, Konczkowski – Janoszka, Surma, Babiarz, Włodyka, Starzyński – Kuświk

Górnik: Steinbors – Małkowski, Pandża, Łukasiewicz, Olkowski – Madej, Sobol, Mączyński, Przybylski, Nakoulma – Zachara

Stawki tych szpilōw bywały niyroz wiynksze, oprawa i cołko otoczka tyż bez godki bywała lepszo. Na dyć w sobota na Cichej butel bydzie robić yno 8300 kibicōw Niebieskich, a fani z Zabrzo bydōm musieli dziwać sie na te spotkani przed telewizorami. Jakby sie niy dziwać Wielki Derby Ślōnska bywały niy roz ,,wiynksze” i to niy zaś tak downo tymu. Prestiż derbōw jednak jak zawsze pierōnym wysoki, beztōż zawodnicy nogōw samek niy bydōm odstawiać. Liczymy na rychtyk dobre widowisko.

Setne derby Ślōnska już za 15 minut. Dejcie pozōr!

Stawki tych szpilōw bywały niyroz wiynksze, oprawa i cołko otoczka tyż bez godki bywała lepszo. Na dyć w sobota na Cichej butel bydzie robić yno 8300 kibicōw Niebieskich, a fani z Zabrzo bydōm musieli dziwać sie na te spotkani przed telewizorami. Jakby sie niy dziwać Wielki Derby Ślōnska bywały niy roz ,,wiynksze” i to niy zaś tak downo tymu.

Styknie spōmnieć szpil z 2008 roku, kej na Stadiōnie Ślōnskim zebrało sie 41 000 kibicōw, a fusbalistōw na murawa wykludzali Gerard Cieślik i Włodzimierz Lubański. Tako motywacjo pōmōgła szportowcōm zrychtować doprowdy piykne widowisko w jubileuszowych 90. Wielkich Derbach Ślōnska.

W nojbliższo sobota derby odbydōm sie po roz setny, ale o tako atmosfera jak 5 lot tymu bydzie biyda. Jednak jak chodzi o czysto szportowe widowisko, to wszyjsko je tak rychtyk w rynkach a raczyj nogach groczy.

Poza tym jak już tak porównujymy te szpile i godōmy o aspekcie szportowym wypado podziwać sie tyż na ekstraklasowo tabela. Gynał pod tym wzglyndym szpil z grudnia 2013 mo lepsze noty wstympne niż spōmniany z marca 2008. Obie ślōnski ekipy w tabeli stojōm teroski bez godki lepij. Górnik jes na drugim, a Ruch na ōsmym placu, przi czym 5 lot tymu byli odpowiednio na ōsmym i jedynostym.

Tym pozytywnym akcyntym chciołbych zaprosić wszyjskich po roz kolejny na ślōnsko relacjo live z Wielkich Derbōw. Emocji niy braknie. Sztartujymy jeszcze przed pōł 9 we wieczōr (20:30).