Miesięczne archiwum: Marzec 2014

Po 33 min. zdało sie, że Grubiorze rozniesōm rywala. Niystety ta samo Jaga, kierej wcześnij klupli 3 bramy poradziyła jeszcze tego dnia ta strata odrobić. Trza jednak dodać: niy bez kōntrowersji.

Wiosna zaś Górnikowi za pierōna niy leży. Ostatni szpli wygrali ōni 3 grudnia łōńskigo roku. Pod wiela kludziōł ich sztab Nawałki wyglōndało to dobrze. Niyskorzij już rozmańcie… Na dyć jeszcze miesiōnc tymu wielki kōnsek zabrzańskich kibicōw śniōł o 15 tytule majstra. Teroski to już pomału kosmos…

Piyrsze minuty niedzielnego spotkania mōgły jednak chocioż trocha ożywić marzynia o wielkim Górniku. Synki z Zabrzo tyrali na maksymalnych obrotach i niy roz próbowali zaskoczyć tormana gości. Trza spōmnieć choby dwa szlagi w lata autorstwa Prejuce’a Nakoulmy.

Potym było już yno skutycznij. W 23 minucie pod słupek wycylowoł Oziębała, w 28. z dystansu sieknōł Sobolewski, a w 33 yno dostawić szłapa musioł Iwan. 3 bramy w praje 10 minut. Nawałka na trybunach musioł być dumny.

Szkoda yno, że synki niy dali pozōr w obrōnie na 3 minuty przed przerwōm. Po cyntrze z wolnego zafyrlało sie pod bramkōm gospodorzy i bal do siatki wraziōł Adam Dźwigała. 3:1 i Jaga chyciyła kōnsek nadziei.

O drugij połowie tego szpilu synki z Zabrzo powinni jak nojwarcij zapōmnieć. W porównaniu z piyrszōm niy pokozali tamek nic. Już w 50 minucie z elwra na 3:2 klupnōł Dani Quintana. Szpil musioł sie beztōż zrobić jeszcze ciekawszy.

Pechowy tego dnia ,,Prezes” hneda zaś bōł blisko gola, ale tym razym zaliczōł słupek. To mōgło by być jak kibel zimnej wody na gowy przeciwnikōw. Niystety. Jaga sztyjc była na szwōngu i do kōńca chciała walczyć o punkty.

Gości ratuje sytuacjo z kōńcōwki. W szesnostku Górnika na zol lygo Bekim Balaj i syndzia po roz drugi pokozuje na wopno. Ciynżko sie ś nim zgodzić, ale elwer jes faktym. Plizga szczylo pewnie na 3:3.

Spotkani kōńczy sie rymisym. Górnik sztyjc musi jeszcze coś ugrać coby być pewnym dalszego granio z ekipami z wiyrchu tabeli. Mono jednak do ich motywacji lepszo byłaby grupa spadkowo? Dyć jak trza to poradzōm wygrywać.

Górnik Zabrze – Jagiellonia Białystok 3:3 (3:1)
Bramy: Przemysław Oziębała (23. min. – 1:0), Radosław Sobolewski (28. min. – 2:0), Bartosz Iwan (33. min. – 3:0) – Adam Dźwigała (42. min. – 3:1), Dani Quintana (50. min. – 3:2; elwer), Dawid Plizga (81. min. – 3:3; elwer)
Górnik: Grzegorz Kasprzik – Paweł Olkowski, Boris Pandza, Antoni Łukasiewicz, Rafał Kosznik – Prejuce Nakoulma, Radosław Sobolewski, Robert Jeż (64. Łukasz Madej), Wojciech Łuczak (58. Szymon Drewniak), Przemysław Oziębała – Bartosz Iwan (45. Mateusz Zachara).

Jagiellonia: Krzysztof Baran – Adam Waszkiewicz (46. Dawid Plizga), Ugochukwu Ukah, Martin Baran, Jakub Tosik – Dani Quintana, Joel Perovuo, Adam Dźwigała, Maciej Gajos (90. Paweł Drażba), Nika Dżalamidze (74. Sebastian Rajalakso) – Bekim Balaj.

Kiedyś musieli sie potracić. Chocioż mało, kiery spodziwoł sie, że gynał tera. Ruch przegrywo na swoim placu z Piastym 0:2 i szpetnie kōńczy piykno serio 6 wygranych z rzyndu. Za to u Piastunkōw durś na opy. Sōm to ich piyrsze 3 punkty na wiosna.

Z poczōntku wiyncyj do godki mioł Ruch. Niż jednak synki z Chorzowa zdōnżyli to potwierdzi zaskoczyli ich goście. Właśnie w 16. minucie po roz piyrszy zawōniało niyspodziankōm. Dobro akcjo Piasta wykōńczōł Łukasz Hanzel. Szlag po zolu w długi rōg okozoł sie skuteczny i było 1:0.

Ruch niy poradziōł odpedzieć, a mōg nawet dostać jeszcze drugo brama przed przerwōm. Na szczynści dō nich Wilczek w dobrej sytuacji szczelōł Pōnbōczkowi w łokno…

Hneda po przerwie wynik 0:2 bōł już jednak faktym. Teroski to Hanzel podowo do Kędziory, a tyn gryfnie lobuje tormana. Nie zetrwało wiela, a Buchalik zaś wyciōngoł bal z siatki po szlagu Kędziery, ale tym razym ponoć bōł spolōny.

Ruch szukoł chocioż kōntaktu. To jednak doprowdy niy bōł ich wieczōr. Dobre okazje zawalili jeszcze Szyndrowski i Włodyka i było już forgot po ptokach.

Punkty jadōm za miedza do Gliwic. Ruch niy wykorzystuje szansy, kiero zōnaczyli im fusbaliści Legii i Wisły, kierzi po dramatycznym szpilu ostatecznie zrymisowali 2:2. Niebiescy majōm teroski tela samo punktōw co trzeci Lech. Piast dziynki zwyciynstwie sztyjc jes w grze o grupa mistrzowsko.

 

Ruch Chorzów – Piast Gliwice 0:2 (0:1)

Bramy: Łukasz Hanzel (16. min.), Wojciech Kędziora (49. min.)

Ruch: Michał Buchalik – Marek Szyndrowski (73. Kamil Włodyka), Marcin Malinowski, Piotr Stawarczyk, Daniel Dziwniel – Jakub Kowalski (58. Jakub Smektała), Łukasz Surma, Maciej Jankowski, Filip Starzyński, Marek Zieńczuk – Grzegorz Kuświk.

Piast: Jakub Szumski – Mateusz Matras, Jan Polak, Csaba Horvath, Krzysztof Król – Tomasz Podgórski (81. Kornel Osyra), Victor Nikiema, Kamil Wilczek (71. Matej Izvolt), Radosław Murawski, Łukasz Hanzel – Wojciech Kędziora (68. Ruben Jurado).

Ruch wygrywo na wyjeździe z Wisłōm 1:0 po bramie Grzegorza Kuświka. Tak tyż za jednym szlagiym ustanawio rekord nojdługszej serii zwyciynstw w tym sezōnie (6 szpilōw) i ,,łyko” w tabeli swojigo rywala, bez co jes już teroski na drugim placu, chocioż mo tela samo punktōw co ,,Biała Gwiazda”.

Bez tyn weekend nojważniejszym stadiōnym na fusbalowej mapie Polski mioł być obiekt w Krokowie przi ul. Reymonta. Tamek to trefić sie miały dwie ekipy, kiere gōniōm sztyjc piyrszo w tabeli Legia. Ta na szczynści dō nich ostatnio zasłużynie straciyła punkty w słynnym już niydokōnczōnym szpilu z Jagōm. Beztōż w mōmyncie kaj w Warszawie dalij sprzōntajōm po niedzielnej haji rozfechtowany po ostatnich wygranych Ruch spotyko sie z drugōm w tabeli Wisłōm, do kierej traci gynał 3 punkty.

Gospodorze od poczōntku mieli lepsze posiadani bala, ale musieli czynsto dować pozōr na grożne kōtry Niebieskich. Dyć to goście zōnaczyli nojlepszo okazjo piyrszej czynści gry. W 40 min. Kuświk znod sie w sytuacji sōm na sōm. Tym razym jeszcze tormanowi sie udało, ale aktywny napastnik Ruch mioł mieć tego wieczōra jeszcze dużo wiyncyj do godki.

Już drugo połowa. Kibice Wisły jeszcze spōminajōm laga ich drużyny sprzed poru minut, a już za chwila skutecznij odpowiedzōm goście. Na lewym skrzidle bal dostowo Dziwniel i mōmyntalnie decydyje sie na cyntra. Bal furgnie pod bramka, kaj obrōna niy poradzi uwachować ,,niebieskigo snajpera”. Kuświk wyskakuje do kepki i kieruje bal gynał pod słupek. 1:0.

Szpil sie rozfechtowoł. W 73 min. zaś bōł blisko gola Kuświk. Na drodze stanōł jednak słupek. Coroz bardzij pilniło sie jednak Wiśle. W efekcie ciekawie zrobiyło sie po drugij strōnie. Nojwiynkszych hercklekotōw prziprawić trynerowi Kocianowi musiała okazja Stilicia. Jego kepka z fest bliskij odlygłości na szczynści niy zaskoczyła tormana Ruchu. Parada Michała Buchalika – doprowdy ,,miōd-malina”.

W kōńcōwce zamloło sie jak pierōn. Synki od Smudy niy przestowali szarpać i zaś to właśnie ulubiyniec ,,Franza”, Stilić mōg zostać bohatyrym. Tym razym wrazōł nawet bal do siatki. Fankowy jednak niy drzymoł i dobrze pokozoł spolōnego.

Bramy żodnej już ni ma tōż fest cynne punkty jadōm do Chorzowa. Wisła zaliczo piyrszo porażka w tym sezōnie i obie ekipy tracōm tera (przed szpilym Śląsk-Legia) 5 punktōw do lidera…

 

Wisła Kraków – Ruch Chorzów 0:1 (0:0)

WISŁA: Michał Miśkiewicz, Dariusz Dudka, Michał Nalepa, Gordan Bunoza, Piotr Brożek, Łukasz Garguła, Ostoja Stjepanović (55′ Emmanuel Sarki), Michał Chrapek, Semir Stilić, Wilde-Donald Guerrier (81′ Michał Szewczyk), Paweł Brożek

RUCH: Michał Buchalik, Marek Szyndrowski, Marcin Malinowski, Piotr Stawarczyk, Daniel Dziwniel, Łukasz Surma, Filip Starzyński, Jakub Kowalski, Maciej Jankowski, Marek Zieńczuk, Grzegorz Kuświk

Ruch wygrywo u sia z Widzewym 2:1. Jes to już ich piōnty szpil z rzyndu za 3 punkty, beztōż zaś umacniajōm sie na wiyrchu tabeli.

Synki z Chorzowa przeskoczyli już Górnik o 3 punkty [stan przed szpilym Górnik – Korona], a po postawie obu ekip w ostatnich kolejkach teroski to Ruch zdo sie mieć wiynksze szanse na 15. korōna majstra. Chocioż może sie okozać, że w obu przipadkach jes to durś niyosiōngalne w tym sezōnie.

Cuda w fusbalu tyż sie jednak trefiajōm. Na dyć na wartko szykowane zmiany trynerōw w trakcie sezōnu praje nigdy niy dowajōm od razu efektōw. Jednak w Ruchu po przijściu Jana Kociana drużyna spamiyntała sie w momyncie. Darymny sztart sezōnu w Chorzowie już downo zapōmniany. Od jesiynnego zwyciynstwa z… Widzewym Niebiescy spinajōm sie na wiyrch. Teroski klupiōm nawet do strefy pucharowej. Bele yno niy brakło im luftu w płucach na ,,finiszu”.

Ale jak to godoł Leo Beenhakker ,,step by step”. Tōż po leku jadymy z tym światym. W piōntkowe popołedni Ruch przimierzoł sie do nastympnych punktōw, tym razym w kamrackim spotkaniu z Widzewym. Faworytym gospodorze, bo dyć w tabeli byli lepsi o 22 punkty, a i Widzew niy wygroł jeszcze w tym sezōnie ani razu na wyjeździe.

W piyrszej połowie mioł czego żałować Jankowski. Grocz tyn mōg 2 razy wykludzić Niebieskich na 1:0. Już w 7 mnucie przegroł pojedenek oko w oko z tormanym gości, podobnie w 28 minucie bal po jego lobie niy pofurgnōł tam kaj mioł.

Hneda wyrynczōł go jednak kolega. Sytuacjo była jeszcze bardzij uproszczōno bo Starzyński biōł z wopna. Syndzia odgwizdoł elwra za niypotrzebny faul tormana na Kowalskim. W efekcie w 31 minucie mōmy 1:0 do Ruchu.

Do przerwy gospodorze yno kōntrolujōm sytuacjo, ale już chwila po zmianie strōn pokozujōm kto samek gro o co. W 50 minucie oglōndōmy piykno cyntra Jankowskigo, po kierej kepkōm do siatki bal kieruje Kuświk. 2:0!

Widzew niy bōł w stanie nic wyczarować, a Ruch niy szarpoł za fest beztōż szpil trocha ,,siednōł”. Łatwij goście mieli jednak od 71 minuty, bo po murawie tyrało już wtedy yno 10 niebieskich. Czerwōno kartka obejrzoł Kowalski.

Dziynki przewodze liczebnej Widzew w kōńcu poradziōł pokōnać Buchalika, a dokładnij zrobiōł to w 80 minucie po lekkim podbramkowym miszōngu Mateusz Cetnarski.

Jak niy liczyć próby wymuszynio elwra z 93 minuty przez Visnakovsa to wiela wiyncyj goście jednak już niy wymyślili. 3 punkty zostowajōm w Chorzowie, skuli czego Ruch zostanie po tej kolejce na podium. Ich kamraty z Łodzi ni majōm tak fajnie – ostatni plac i z biydōm 16 punktōw.

Ruch Chorzów – Widzew Łódź 2:1 (1:0)

Bramy: F. Starzyński (31. – 1:0 – elwer), G. Kuświk (50. – 2:0) – M. Cetnarski (80. – 2:1)

Czerwōno kartka: Kowalski (Ruch – 71 min.)

Ruch: Buchalik – Szyndrowski, Malinowski, Stawarczyk, Dziwniel – Kowalski, Surma, Jankowski, Starzyński, Zieńczuk (89. Włodyka) – Kuświk (77. Smektała).

Widzew: Wolański – Stępiński (77. Gela), Mroziński, Nowak, Kikut (46. A. Visnakovs) – Rybicki, Lafrance, Cetnarski, Kasprzak, Kaczmarek (64. Batrović) – E. Visnakovs