Miesięczne archiwum: Kwiecień 2014

Klamka zapadła. Kryska w tabeli ostatecznie szkryfniynto. Górnik i Ruch znodli sie w wiyrchnij czynści tabeli, tōż w grupie, kiero teoretycznie piere sie o majstra. Rychtyk tak je?

Na wiosna zdało sie, że Górnik robi wszyjsko co sfurgnōnć do grupy spadkowej. Ostatni szpil i wklupane 0:3 od Lechitōw miało to yno przisztymplować. To jednak niy stykło. Ani Jaga, ani Cracovia niy poradziyły zdobyć kōmpletu punktōw, beztōż Grubiorze bydōm grać w ,,elicie”.

Synki z Zabrzo zas po jesiyni narobiyli nōm szmakōw. Plac wicelidera i marzynia o majstrze wartko jednak odfurgły do Pierōnowic. Yno dziynki zaszporowanym na jesiyń punktōm Górnik jes tera tam kaj jes. Bez wiosna niy wygrali ani razu!

Teroski przichodzi na myśl pytani czy dobrze sie stało? Mono fusbalistōm z Zabrzo zdałaby sie walka o utrzimani w ramach motywacji. Tera na dyć nic im już niy grozi. Po wiosynnej grze żodyn niy bydzie przeca od nich wymagoł majstra ani nawet gry w pucharach. Ostatni roz jak liga była podobnie dzielōno, tj w sezōnie 2001/2002 Górnik znod sie w grupie spadkowej i tamek okozoł sie potym nojlepszōm drużynōm. Tera może być durś na opy…

Wraco za to wiara w chorzowski Ruch. Chocioz za nimi tyż doprowdy ciynżko trefić. Zaczli sezōn darymnie. Potym wyraźnie sie poprawiyli. Ostatnio zaś huśtawka. Po serii 6 wygranych szpilōw prziszły 3 porażki i tera zaś 2 zwyciynstwa. Nadziejo wlywo szczególnie ostatni 3:0 z ciynżkim rywalym w Bydgoszczy.

Ruch nazot jes w strefie pucharowej. Tera yno pytani czy mo ambicje i możliwości coby sie tam utrzimać abo i zagrać o coś wiyncyj. Czy marzōm w ogóle o wyprzedzyniu Górnika w wyścigu po 15 korōna?

Hneda bydymy wiedzieć wiyncyj. Runda zasadniczo ruszo już tydziyń po świyntach…

 

 

Jak sie mo taki lagi i niy trefio sie ani razu do siatki to ni ma co godać o punktach. Gōniyni wyniku w 10 to to jednak ciynżko zabawa. Cracovia idyalnie wypunktowała ausdruki Grubiorzy i przewoga liczebno, bez co wygrała u sia 2:0.

Górnik wynik musioł odrabiać straty od samego poczōntku. Hneda po piyrszym gwizdku akcjo Cracovii skutycznym szlagiym pod lata wykōńczōł Ntibazonkiza. Gospodorze kludziyli 1:0 już w 2 minucie szpilu.

Sytuacjo pogorszyła sie jeszcze w 34 minucie. Oziębała wyciōn rywala rowno z zolym, kej mioł już na kōncie żōłto kartka. Hneda skōmpletowoł beztōż drugo i na reszta szpilu mōg sie dziwać już w TV.

To trocha chyba poszterowało gości, kierzy w kōńcōwce przekludziyli rychtyk groźno kōntra. Ze szlagiym Nakoulmy z biydōm poradziōł se jednak torman Cracovii.

Górnik w osłabiyniu sztyjc mioł wiyncyj do godki. Żodyn niy poradziōł jednak wrazić bala do neca gospodorzy. Ci za to ni mieli litości do tormana Górnika, kiery zafundowoł im geszynk w 61 mniucie. Ciynżko pedzieć po jakigo pierōna Witkowski wylatowoł w tej sytuacji za szesnosty meter. Faktym jes, że zostoł bez problymu miniynty. Szlag Ntibazonkizy próbowali jeszcze wybijać dwaj obrōńcy. Piyrszy sie majtnōł, a drugi obrōniōł, ale wystawiōł przi tymu piykny bal przeciwnikowi. Bernhardt ustalo wynik na 2:0.

Górnik sztyjc próbowoł. Szczynścio jednak ostatnio za pierōna ni mo Nakoulma. Po jego szlagu bal z samej linii wybiōł gowōm obrōńca. Dobitka Madeja już zostawiymy bez kōmyntarza.

Ci, kierzi liczyli, że punkty natrzaskane na jesiyń styknōm na spokojne pykani do kōńca wiosny, chyba sie pomylili. Górnik zaś w pleca i coroz bardzij realno jes grupa spadkowo. Za tydziyń czeko Lech, tyż niy bydzie lekko.

Cracovia Kraków – Górnik Zabrze 2:0 (1:0)

Bramy: Saidi Ntibazonkiza (2 min. – 1:0), Edgar Bernhardt (61 min. – 2:0).
Czerwōno kartka:  Przemysław Oziębała (34).

Cracovia: Krzysztof Pilarz – Krzysztof Nykiel, Mateusz Żytko, Damian Dąbrowski, Adam Marciniak – Rok Straus, Sławomir Szeliga (84. Vladimir Boljevic), Sebastian Steblecki – Edgar Bernhardt (90+1. Bartłomiej Dudzic), Giannis Papadopoulos, Saidi Ntibazonkiza (90+3. Przemysław Kita).
Górnik: Norbert Witkowski – Paweł Olkowski, Boris Pandza, Antoni Łukasiewicz, Rafał Kosznik – Przemysław Oziębała, Szymon Drewniak, Robert Jeż (88. Wojciech Łuczak), Bartosz Iwan (70. Dzikamai Gwaze), Maciej Małkowski (64. Łukasz Madej) – Prejuce Nakoulma.