Pogoń-Górnik 2:2. Yno i aż rymis. [Zapowiydź relacji live z WDŚ!]

Kategorie: Bez kategorii

Górnik rymisuje w Szczecine w ostatnim szpilu piyrszej kolejki ekstraklasowej ,,grupy majstrōw” (niy mylić brōńcie Pōnbōczku z Ligōm Majstrōw!). Tym razym synki z Zabrzo pokozali jednak kōnsek charaktyru. To dobro prognoza przed niedzielnym szpilym derbowym z Ruchym [ślōnsko relacjo live, ndz., godz. 18:00].

Zaczyło sie źle, coby niy pedzieć darymnie. Już w 2 minucie Grubiorze przegrywajōm walka w środku pola, Hernani przeciepuje na ślepo bal za swoji plecy, a tyn gynał trefio pod nogi Robaka. Nojlepszy snajper ekstraklasy niy dowo chycić sie na spolōnego i hneda szlagiym po krōtkim słupku otwiyro wynik szpilu.

Grubiorze mōgli odpedzieć po 10 minutach. Fol placu na prawym skrzidle mioł wtedy Madej, beztōż poradziōł zagrać długo cyntra ,,miōd-mailna” w szesnostka. Tamek gynał w tympo wloz Iwan i po jego szlagu głowōm lata bramki Janukiewicza aż sie zatelepała. Ni ma jednak bramy…

Niy długo. Pōmocnik Górnika poprawi sie już pora minut niyskorzij. Tym razym Grubiorze przekludzōm perfekcyjno akcjo. Teroski defynsywa Pogōni bydzie już durś rozōnaczōno. Olkowski fajnie wyłoży bal po zolu przed piōnty meter, kaj wszyjsko wykōńczy spōmniany już Iwan. 1:1.

Z czasym zaś wiyncyj do godki mieli jednak gospodorze, kierzi w kōńcu zaś wykorzystali ausdruk Grubiorzy. Strata i ciśnie Pogōń. Defynsywa brōni sie rychtyk dramatycznie. Dwóch obrōńcōw buli sie na zol, ale po wszyjskim zaś rod jes Robak. Napastnik bramōm do sztani wykludzo gospodorzy na 2:1.

Drugo połowa jak na ekstraklasowe realia kulała sie w doprowdy wartkim tympie. Dziwalimy sie na pora forgot ciekawych okazji z obu strōn. Jedynego gola w tym kōnsku szpilu klupnōł jednak Górnik. Po cyntrze z wolnego w 67 minucie do kepki nojlepij poskłodoł sie Sobolewski tak, że bal pofurgnōł gynał pod słupek. Torman ani sie niy ciepnōł i stan szpilu zaś sie wyrownoł.

To sztyjc niy kōniec. Nastympnōm bōmbōm z dystansu próbowali coś jeszcze zmiynić gospodorze, a w doliczōnym czasie na sōm na sōm na fol szwōngu wyloz ,,Prezes” Nakoulma. Bal niy znoloz już jednak drōgi do neca.

Dziynki urwaniu dwōch punktōw Pogōni przez Górnik, sztyjc na trzecim placu jes Ruch, kiery tyż yno zrymisowoł w tej kolejce z Lechiōm. Grubiorze sztyjc bez wygranej na wiosna, ale w pyndziałek ich gra miejscami mōgła sie podobać. Jak to bydzie sie miało do niedzielnych, trzecich już w tym sezōnie Wielkich Derbōw?

Tradycyjnie już zaproszōmy na relacjo na żywo i durś po ślōnsku z Wielkich Derbōw Ślōnska. Zaczynōmy w niedziela wele 6 wieczōr (18:00)! Bydźcie z nami!

 

Pogoń Szczecin – Górnik Zabrze 2:2 (1:0)

Bramy: Marcin Robak (2, 45) – Bartosz Iwan (13), Radosław Sobolewski (67)

Pogoń: Radosław Janukiewicz – Adam Frączczak, Maciej Dąbrowski, Hernani, Sebastian Rudol – Patryk Małecki (46. Pavle Popara), Rafał Murawski, Jakub Bąk (73. Dominik Kun), Maksymilian Rogalski, Takuya Murayama – Marcin Robak.

Górnik: Pavels Steinbors – Paweł Olkowski, Adam Danch, Radosław Sobolewski, Rafał Kosznik – Przemysław Oziębała, Bartosz Iwan (78. Antoni Łukasiewicz), Szymon Drewniak, Dzikamai Gwaze (65. Robert Jeż), Łukasz Madej (65. Prejuce Nakoulma) – Mateusz Zachara.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*