Miesięczne archiwum: Maj 2014

Szłoby sie spytać ,,Kaj do Europy?”. Legia zaroski po ogłoszyniu ich majstrym została brutalnie skludzōno na zol przez synkōw z Chorzowa. Dziyń pryndzyj skuli fusbalistōw z Zabrzo odfurgły w pierōny pucharowe marzynia Wisły. Ruch wygrywo w Warszawie 2:1, Górnik w Krakowie 3:2.

Ta kolejka do ślōnskich ekip z grupy wiyrchu tabeli bōła jak nojbardzij udano. Tak Ruch jak i Górnik sōm sztyjc w grze o podium. Yno co to do? Obie drużyny jak na razie ni majōm licyncji na gra w europejskich pucharach. Niy zdo sie coby Górnikowi fest zoleżało na udziale w Lidze Europy. Dō nich zresztōm kōmisja licyncyjno miała nojwiynksze wōnty. Ruch mo sie odwoływać. Ostateczne decyzje licyncyjne poznōmy bezmała 30 maja.

Na razie zamiast darymnie poltykować wypado za to pochwolić poru szportowcōw. Nojwiynksze uznani mo u mie Adam Danch, sobotni bohatyr Grubiorzy. Jego dwa szlagi plus jedyn Zachary pozwylyły Górnikowi pokōnać Wisła na wyjeździe 3:2. Chop, kiery od września bōł na fest długim rewiyrze skuli kōntuzji kolana, chwila po wrōcyniu do poważnej gry pokozuje wiela jes we werci. Grubiorze jeszcze bydōm mieli ś niego pożytek, bele go yno za wartko niy sprzedali.

Brawa tyż do cołkij drużyny Ruchu. Niebiescy po golach Starzyńskigo i Stawarczyka pokōnujōm Legia 2:1. Dobrze, że ktoś spamiyntoł Wojskowych i pokozoł im, że do poziōmu Ligi Majstrōw to im jeszcze forgot dużo brakuje.

W Ekstraklasie już nojciekawsze zagadki sie rozwiōnzały. Przed nami jednak jeszcze 2 kolejki i sztyjc pora pytań do wyjaśniynio. Toć, że nojbardzij ciekawi nos czy kieroś ślōnsko drużyny bydzie mōgła pokozać sie w Europie. Hneda bydymy mōndrzejsi…

 

Wisła Kraków – Górnik Zabrze 2:3 (2:1)

Bramy: Semir Stilić (10.) Wilde Donald Guerrier (43.) – Mateusz Zachara (3.), Adam Danch (67. i 86.)

Wisła: Miśkiewicz, Burliga, Czekaj, Dudka, Brożek, Stjepanović, Chrapek (Nalepa 57.), Sarki (Szewczyk 76.), Stilić, Guerrier, Brożek (Garguła 53.)

Górnik: Steinbors, Kosznik, Gancarczyk (Szeweluchin 80.), Danch, Olkowski, Sobolewski, Iwan (Kurzawa 59.), Małkowski, Drewniak, Oziębała (Madej 54.), Zachara

 

Legia Warszawa – Ruch Chorzów 1:2 (0:1)

Bramy: Filip Starzyński (30.-elwer), Piotr Stawarczyk (62.), – Miroslav Radović (75.)

Legia: Kuciak, Bereszyński, Rzeźniczak, Astiz, Brzyski, Żyro, Vrdoljak, Jodłowiec, Duda (58. Saganowski), Kucharczyk (65. Sa), Radović.

Ruch: Kamiński, Szyndrowski, Malinowski, Stawarczyk, Sadlok, Zieńczuk, Surma, Babiarz (84. Jankowski), Starzyński, Dziwniel (90+1. Gigołajew), Kuświk (87. Włodyka).

Wygrano derbowo mōgła być tym przełōmym, od kierego Górnik zaczōnby spinać sie na wiyrch. Lech okozoł sie jednak za mocny, beztōż Grubiorze przegrywajōm na wyjeździe 2:1. Przinajmij kibice ni mogōm zaś pedzieć, że niy było sie na co dziwać. Sobotni brameczki były forgot z kategorii ,,miōd-malina-ostrynżyna”.

Szczylani w sobota zaczon Gergo Lovrencics. Mōmy dopiyro 6 minuta i bal po idyalnie wycylowanym szlagu Wyngra z wele szesnostego metra trefio pod słupek bramki Steinborsa. Wartko klupniynto bramka bōła dobrōm prognozōm na reszta spotkanio.

Grubiorze jednak niy poradziyli sie znerwować na tela coby przejōnć wyraźnie inicjatywa. Sztyjc wiyncyj do godki mieli chyba gospodorze. Kieby Linetty niy majtnōł sie w 37 minucie z poru metrōw, szpil bōłby na pewno mynij ciekawy…

Na szczynści Lech niy podwyższōł, beztōż hneda Górnik mōg odpedzieć wyrownaniym, i to jakim! Tego co zrobi Radek Sobolewski w 40. min. żodyn ni mog sie spodziywać. Mało kiedy oglōndo sie szlag z praje 40 metrow, przi kierym torman ni mo tak rychtyk ani szans na skutyczno reakcjo. Bal furgnie w som winkel. Bez godki jes to brama kolejki jak niy sezonu…

Do szatni Grubiorze szli w lepszych humorach, ale poczōntek po przerwie zaś przidrzymali i zaś pokuloł ich tyn sōm grocz. Lovrencics znod sie na kraju szesnostki gości i sieknōł efejym tak, że było pośmiatane. Nastympno piykno brama i zaś kludzōm gospodorze!

Gospodorze niy pozwolyli już synkōm z Zobrzo na wiela i poradziyli dokludzić korzystny wynik do kōńca. W Poznaniu 2:1.

Górnik niy gōni czołōwki. Za to Lech sztyjc gro o majstra. Legia im niy odskakuje. Pedziołbych, że gynał to do kibicōw ze Ślōnska jes pozytywnym aspektym przegranej ekipy z Zobrzo. Liga tyż na tym skorzysto. Dyć bez emocji niy ma fusbalu…

 

Lech Poznań – Górnik Zabrze 2:1 (1:1)
Lovrencsics (4 min. – 1:0, 49 min. – 2:1) – Sobolewski (40 min. – 1:1)

Lech: Maciej Gostomski – Mateusz Możdżeń, Paulus Arajuuri, Marcin Kamiński, Tomasz Kędziora (56. Luis Henriquez) – Gergo Lovrencsics, Karol Linetty, Łukasz Trałka, Daylon Claasen (75. Dawid Kownacki), Szymon Pawłowski (85. Dariusz Formella) – Kasper Hamalainen.

Górnik: Pavels Steinbors – Paweł Olkowski, Adam Danch, Ołeksandr Szeweluchin, Rafał Kosznik – Prejuce Nakoulma, Dzikamai Gwaze, Radosław Sobolewski (80. Przemysław Oziębała), Bartosz Iwan, Łukasz Madej (83. Rafał Kurzawa) – Mateusz Zachara (67. Robert Jeż).

 

Górnik Zabrze – Ruch Chorzów 2:0!

Derby sōm doprowdy durś niyprzewidywalne. Potracōny ostatnio Górnik dochodzi do sia w tak ważnym do kibicōw szpilu. Teroski obie ekipy dzieli już yno 1 punkt.

90 + 3 min. – Ostatni gwizdek! Grubiorze wygrywajōm 101 Wielki Derby Ślōnska!

90 + 3 min. – Mōgli za to dołozyc brama Grubiorze! Nad latōm Olkowski!

90 + 2 min. – Już chyba po ptokach. Ruch niy umi tera ani podjechać blizyj bramki.

90 + 1 min. – Steinbors niy piluje. Pomału…

90 min. – Pograli elegancko Niebiescy. Bal wycofany przed bramka. Ni mo kto skōnczyć…

88 min. – Nakoulma idzie na presa wysoko pod bramkōm Ruchu

86 min. – Starzyński z roga. Bal niy przeszoł ani piyrszego zawodnika. Aus.

85 min. – Od bramki Buchalik. Kopnie se przinajmij bal torman, bo wiela wiyncyj tyż juz ni mo do roboty.

84 min. – Drewniak oddowo bal w ryncy tormana. Durś zmarnowany wolny.

83 min. – Na wyjazd Górnik.

82 min. – Włodyka szczylo. Rykoszet. kaj je bal? Wybijo na rōg Steinbors, bohatyr w masce!

80 min. – Tera złazi Oziębała. Za niego Tomas Majtan.

78 min. – Kocian wkludzo Włodyki za Jankowskigo.

76 min. – Steinbors chyto! Starzyński pocylowoł gynał pod słupek, ale torman idyalnie go wyczuł.

75 min. – Bydzie elwer do Ruchu! W rynka dostowo Kosznik.

74 min. – Trza pedzieć, że juz synek próbuje. Lygo na zol przed szesnostkiym, ale faulu ni ma.

73 min. – Małkowski za Zachary. Mono ōn coś samek szwōngnie?

72 min. – Tympo chyba trocha spadło. Kibicōm sie pomału mierznie…

71 min. – Obalōny na zol Zachara. Ze swojij połowy zacznie Górnik.

70 min. – Olkowski przeczytoł tera rywali i rozfechtowoł kōntra. Szlag Iwana, ani rykoszet niy zaskakujōm Buchalika.

69 min. – Ostro tera. Syndzia niy gwizdo.

67 min. – Gryfnie poklepali teroski Niebiescy. Bydzie jednak yno aus.

65 min. – Tera trocha wiyncyj mo do godki Ruch, ale sztyjc niy poradzōm klupnōnć tej bramy na kōntakt.

64 min. – Lata! Miōd-malina pocylowoł z wolnego Starzyński. To forgot byłaby brama kolejki!

62 min. – Kuświk! Szczyloł czy niy, ale było to groźne. Rykoszet i kozioł mōg zaskoczyc tormana.

61 min. – Kuświk piyknie tera przijmuje bal i wystawio Zieńczukowi. Mocny szlag, ale zaś bal w trybunach.

60 min. – Starzyński… Fajnie to wymyślōł, ale podani niydokładne.

59 min. – Naciskany Babiarz klupnōł ,,Pōnbōczkowi w łokno”

58 min. – Uśpili tera gości. A sam oroz cyntra i szlag kepkōm Iwana. Wiela sie niy pomylōł…

58 min. – Trzimiōm sztyjc na dystans Niebieskich gospodorze.

57 min. – Kosznik z Nakoulmōm fajnie pogrywajōm na skrzidle, ale zaś spolōny.

55 min. – Tracōm w ataku bal Grubiorze, zaś cisnie Ruch.

54 min. –  Zachara sōm na sōm w tormana! Tak czy tak fankowy pokozoł jednak spolōny.

53 min. – Nastympny rōg do gości. Bal zagrany jednak w pierōny. Za fest pojod…

51 min. – Zieńczuk wlecioł tera na obrōńcy w szesnostku. Wybity z rytmu juz nic sam niy wyczaruje…

50 min. – Już po akcji i z ausu Ruch.

49 min. – Zas poklepali na skrzidle Grubiorze. Bydzie rōg.

48 min. – Z roga Niebiescy, ale juz wyjazd.

47 min. – Nakoulma! Fol placu mioł tera! Przelecioł dobry kōnsek boiska, dynamicznie zafyrloł w szesnostce i oddoł szlag. Wele słupka.

46 min. – Zaczōn Ruch. Jadymy!

 

45 + 2 min. – Zaś było gorko. Cyntra Nakoulmy mōgła cufalym wpaś Buchalikowi za kragiel

45 + 2 min. – Z ausu Olkowski. Pomału. Niy pilujōm z grōm. bal wraco do tormana.

45 + 1 min. – Wolny do ruchu. Niypewnie wybijoł teroski Steinbors.

45 min. – Zaś z rogu Górnik. Dobrze zawiyroł to wolejym Kosznik. Bal jednak w rynkach Buchalika.

43 min. – Świyca w szesnostka Ruchu. Tyn bal lecioł wiecznie, ale Dziwniel poradziōł wybic go yno na rōg.

42 min. – Niyudano próba Zieńczuka. Juz bal nazot do gry wkludziōł Steinbors.

42 min. – Fauluje na 30 metrze Sobolewski. Trefiōł w bal, ale syndzia ocyniōł to inacy.

41 min. – Od bramy zaczōn Buchalik.

39 min. – Niy do rady grac dalij Gwaze. Włazi za niego Łukasiewicz. Grocz Górnik zagroł praje 40 min. w kierych zaliczōł brama, kartka i kōntuzjo. Intynsywnie…

38 min. – Starzyński sieknōł tera z ostrego kōnta. bal w rynkach Steinborsa.

37 min. – Poczuł rynce Sobola na puklu Kuświk i chcioł to wykorzystać. Elwra jednak słusznie niy bydzie.

36 min. – Syndzia spamiyntoł przed chwilōm Prezesa po tym jak tyn potraktowoł przeciwnika łokciym.

35 min. – Z ausu Zieńczuk. Oddoł bal rywalōm.

34 min. – Leży na zolu Gwaze. Syndzia to puszczo, ale chop sztyjc niy stowo. Mōmy przerwa.

33 min. – Miszōng w srodku pola. Zodno ekipa tera niy poradzi utrzimac sie dłuzyj przi balu.

31 min. – Szpetny faul. Zasłużōł na kartka Gwaze. Zaroski drugi roz znojdzie sie w hefcie syndzigo.

30 min. – Szyndrowski rynkōm. Zaś bal do gospodorzy.

29 min. – Wysoko do pressingu wyłażōm Niebiescy. W kōńcu udowo im sie przejōnć bal.

28 min. – Teroski doł sie chycic na spolōnym Kuświk.

27 min. – Olkowski z ausu ciepie fōrt w szesnostka Ruchu. Tera jednak faulujōm Grubiorze.

26 min. – Starzyński z wolnego w szesnostka, ale ni mo z tym problymōw defynsywa gospodorzy.

24 min. – Nastympno próba Prezesa. Tym razym lepszy Buchalik.

23 min. – Zaś cyntymetry od słupka bramki Buchalika. Nakoulma zagrywo piyntōm do Gwaze a tyn posyło mocny bal na piōnty meter, kaj wlatuje Oziebała… Tym razym ni ma gola.

22 min. –  Ruch pomału próbuje wykludzać pozycyjny atak. Na pewno dłuzyj sōm przi balu.

21 min. – Szczasnōł sie tera Babiarz i Zachara. Zacznōm Grubiorze…

20 min. – Zza szesnostki próbowoł klupnōnć Drewniak. Minimalnie nad latōm.

19 min. – Elwer? Niy, yno wolny. Przi szlagu Iwana rynkōm zablokowoł Stawarczyk. Żōłto kartka.

17 min. – Dziwniel próbowoł zagrac prostopadły bal do przodku, ale fest niydokładnie…

16 min. – Ruch bydzie mioł biyda sie spamiyntac. Czujno obrōna Górnika.

15 min. – Z rogu Ruch. Zieńczuk mijo sie przi próbie szlagu głowōm.

Pora podań wymiynili gospodorze przed 16 metrym. W kōńcu bal dostoł Gwaze, kiery eleganckim technicznym szlagiym podwyższōł wynik. Bal wpado Buchalikowi za kragiel.

12 min – 2:0! Gwaze praje w sōm winkel!

11 min. – Strata Grubiorzy w środku pola, ale niy bydzie wartkij kōntry.

10 min. – Ciśnie Ruch. Próbujōm z obu strōn. Na razie bez wiynkszych efektōw.

9 min. – Piykno akcjo i piykno cyntra z prawej strōny na kepka Starzyńskigo. Kole a wele…

8 min. – Próbuje odpedziec Ruch, ale gro niydokładnie w ofynsywie. Zieńczuk niy opanowuje bala.

To je tyn ,,Prezes” Kierymu przajōm kibice. Nojprzōd zmiyniōł strōna, wypuściōł elegancko kamrata na wolny plac i polecioł do środka kaj za chwila z wysokości 11. metra otwar wynik szpilu.

5 min. – Nakoulma na 1:0!

5 min. – Wolny wykōnany darymnie. Nic z tego niy bydzie.

4 min. – Faul Dancha. Chycioł przeciwnika obōma rynkami i bezpiecznie skludziōł na zol.

3 min. – Za fest na ślepo do przodku groł Kowalski. Pierōn wiy do kogo podowoł.

2 min. – Nakoulma pogrywoł z Kosznikiym na skrzidle, ale blisko tamek byli obrońcy

1 min. – Piyrszy gwizdek. Zaczyli gospodorze.

Reforma ekstraklasowo wkludziyła lekki miszōng w rozgrywkach. Dziynki tymu mogiymy jednak już po roz trzeci w tym sezōnie dziwać sie na Wielki Derby Ślōnska. Po rymisie 2:2 w Zabrzu i wygranej Ruchu u sia 2:1 wracōmy nazot na plac Grubiorzy. Jak bydzie dzisio? Piyrszy gwizdek usłyszymy gynał o 6 we wieczōr…

 

Prowdopodobne składy:

Górnik: Steinbors – Olkowski, Danch, Szeweluchin, Kosznik – Nakoulma, Sobolewski, Drewniak, Oziębała, Iwan – Zachara.

Ruch: Buchalik – Szyndrowski, Malinowski, Stawarczyk, Dziwniel – Kowalski, Surma, Babiarz, Starzyński, Zieńczuk – Kuświk.