Miesięczne archiwum: Czerwiec 2014

Wartki bramy. Messi na szwōngu i w kōńcu Argyntyna, na kiero idzie sie dziwać. W Porto Alegre Albicelestes wygrywajōm z Nigeriōm 3:2, ale po szpilu ni ma przegranych. Obie ekipy w 1/8.

Tyn kiery pora minut za niyskoro włōnczōł transmisjo straciōł niy yno śpiywani hymnōw. Po sztyrech minutach szpilu mielimy już na dyć bramkowy rymis. W 3. minucie z lewej strōny szczyloł Di Maria, ale tyn szlag obrōniōł jeszcze torman na spōła ze słupkiym. Przi dobitce Messigo żodyn ni mōg już jednak nic zrobić. 1:0. Uciecha niy zetrwała za długo. Już po minucie piyknym szlagiym idyalnie pod słupek bal zawijo Ahmed Musa i momy forgot ekspresowe wyrownani.

Messi tak tego ni mōg zostawić. W doliczōnym do piyrszej połowy czasie Argyntyńczyk pokozuje, że rychtyk poważnie interesuje go korōna krōla strzelcōw mundialu. Szlag z wolnego miōd-malina! Bal furgnie nad murym i trefio gynał pod słupek. Do szatni z uciechōm cisnōm Argyntyńczycy.

W drugim kōnsku szpilu zaś trza było do porzōndku dować pozōr od piyrszych sekund. Fusbaliści niy kozali nōm długo czakać na nastympne bramy. W 47. minucie drugo brama tego dnia klupnōł Musa. Argyntyńczycy zostawiyli mu fol placu tak, że tyn mōg wlyź cyntralnie w szesnostka jak nabrōszōny nōż w masło. Nigeryjczyk ze spokojym wykōńczōł akcjo i wyrownoł wynik na 2:2.

Tym razym to Argyntyna poradziyła sie wartko spamiyntać. 3 minuty niyskorzij przi cyntrze z roga gola zdobywo niyuwachowany Marcos Rojo. Trza jednak ofyn pedzieć, że było w tym trocha cufalu. Chop, kiery wyskakiwoł do kepki wraziōł bal do siatki… kolanym. W notesie syndzigo tak czy tak sie znoloz, beztōż wypado mu yno pogratulować ustalynio wyniku na 3:2.

Na boisku nic już sie niy zmiyniło. Bez presji szpil zostoł dograny. Śloz nawet Messi, kierego siyły tryner zdecydowoł prziszporować już na nastympno runda. Argyntyna we wtorek zagro ze Szwajcariōm, Nigeria dziyń pryndzyj trefi sie z Francjōm.

Nigeria – Argyntyna 2:3 (1:2)

Bramy: Ahmed Musa (4 min.-1:1 i 47 min.-2:2) – Lionel Messi (3 min.-0:1 i 45+1 min.-1:2), Marcos Rojo (50 min.-2:3).

Nigeria: Vincent Enyeama – Efe Ambrose, Joseph Yobo, Kenneth Omeruo, Juwon Oshaniwa – John Mikel Obi, Ogenyi Onazi, Ahmed Musa – Peter Odemwingie (80. Uche Nwofor), Emmanuel Emenike, Michael Babatunde (65. Michael Uchebo).

Argyntyna: Sergio Romero – Pablo Zabaleta, Ezequiel Garay, Marcos Rojo, Federico Fernandez – Fernando Gago, Javier Mascherano, Angel Di Maria – Lionel Messi (63. Ricardo Alvarez), Gonzalo Higuain (90+1. Lucas Biglia), Sergio Aguero (38. Ezequiel Lavezzi).

Uff… Już posprzōntane, pośmiatane, a do nikierych już po ptokach. Rekordowo długi sezōn ekstraklasowy za nami Co tak rychtyk ś niego zapamiyntōmy?

Jedyn pierōn czy nazwiymy to ekstraklasōm czy  I-szōm ligōm i czy bydōm tamek grupy „majstrōw” i „boroczkōw” czy tyż niy,  Premiership ani Serie A to to na dyć niy bydzie. Reforma ekstraklasy mōgła tak rychtyk yno pōmōc zōnaczyć emocje do ostatnigo gwizdka. Niystety to tyż sie niy udało. Spotkani Legii z Lechym bōło juz yno szpilym ,,o czopka śliwek”…

Jedynym pytaniym przed ostatniōm kolejkōm bōło to kto zgarnie trzeci plac. W grze o to sztyjc bōły dwie ślōnski ekipy. Górnik do szczynścio potrzebowoł trzech punktōw i przegranej swojigo kōnkurynta, czyli Ruchu. Tela, że synki z Zabrzo i tak do zdobycio mieli yno wiynkszo prymio do klubu i gryfny wpis do CV. O europejskich pucharach niy było godki skuli braku licyncji, z kierōm zarzōnd Górnika już downo doł se pokój.

Rywal zza miedzy tyż mioł podobne problymy, ale im mono jednak udo sie wycyganić paszporty do Europy. Tego tyż wypado Ruchowi winszować, kej to gynał ōni okozali sie lepsi na boisku. W niedziela Niebiescy u sia zagrali na tela wiela musieli. Rymis 0:0 z Pogoniōm dowo im prawo do gry w Lidze Europy już po roz trzeci w ostatnich piynciu latach.

Za to Górnik w ostatnim szpilu z Lechiōm niy pogupnōł. Zobrzańsko ofynsywa niy wykorzystała poru lagōw, na co goście odpedzieli dwōma pewnymi szlagami z elwra i to by było na tela. 0:2 w pleca. Podium niy bydzie. Rozfechtowano szola z Grubiorzami sjyżdżo w dōł fōrt aż na szōsty plac.

Cudōw w europejskich pucharach chyba ni mōmy sie co po Ruchu spodziywać, chocioż fusbal to fusbal… Czos pokoże. Teroski chyba jednak z uciechōm przesztelujymy antyny na Rio. Po przeszkyrtniynciu kanału na Mundial znojdymy sie przez chwila w inkszym klimacie i do porzōndku dychnymy od Ekstraklasy.

To już hneda, a na tera polecōm moji ulubiōne antidotum na ekstraklasowe zniechyncyni, czyli amatorski fusbal. Ni ma co darymnie psioczyć na zawodowych fusbalistōw, lepszy samymu brać bal i na dwōr… Stować lebry!