Po „ekstra”klasie. Sztelować antyny na Rio…

Kategorie: Bez kategorii

Tagi: , , ,

Uff… Już posprzōntane, pośmiatane, a do nikierych już po ptokach. Rekordowo długi sezōn ekstraklasowy za nami Co tak rychtyk ś niego zapamiyntōmy?

Jedyn pierōn czy nazwiymy to ekstraklasōm czy  I-szōm ligōm i czy bydōm tamek grupy „majstrōw” i „boroczkōw” czy tyż niy,  Premiership ani Serie A to to na dyć niy bydzie. Reforma ekstraklasy mōgła tak rychtyk yno pōmōc zōnaczyć emocje do ostatnigo gwizdka. Niystety to tyż sie niy udało. Spotkani Legii z Lechym bōło juz yno szpilym ,,o czopka śliwek”…

Jedynym pytaniym przed ostatniōm kolejkōm bōło to kto zgarnie trzeci plac. W grze o to sztyjc bōły dwie ślōnski ekipy. Górnik do szczynścio potrzebowoł trzech punktōw i przegranej swojigo kōnkurynta, czyli Ruchu. Tela, że synki z Zabrzo i tak do zdobycio mieli yno wiynkszo prymio do klubu i gryfny wpis do CV. O europejskich pucharach niy było godki skuli braku licyncji, z kierōm zarzōnd Górnika już downo doł se pokój.

Rywal zza miedzy tyż mioł podobne problymy, ale im mono jednak udo sie wycyganić paszporty do Europy. Tego tyż wypado Ruchowi winszować, kej to gynał ōni okozali sie lepsi na boisku. W niedziela Niebiescy u sia zagrali na tela wiela musieli. Rymis 0:0 z Pogoniōm dowo im prawo do gry w Lidze Europy już po roz trzeci w ostatnich piynciu latach.

Za to Górnik w ostatnim szpilu z Lechiōm niy pogupnōł. Zobrzańsko ofynsywa niy wykorzystała poru lagōw, na co goście odpedzieli dwōma pewnymi szlagami z elwra i to by było na tela. 0:2 w pleca. Podium niy bydzie. Rozfechtowano szola z Grubiorzami sjyżdżo w dōł fōrt aż na szōsty plac.

Cudōw w europejskich pucharach chyba ni mōmy sie co po Ruchu spodziywać, chocioż fusbal to fusbal… Czos pokoże. Teroski chyba jednak z uciechōm przesztelujymy antyny na Rio. Po przeszkyrtniynciu kanału na Mundial znojdymy sie przez chwila w inkszym klimacie i do porzōndku dychnymy od Ekstraklasy.

To już hneda, a na tera polecōm moji ulubiōne antidotum na ekstraklasowe zniechyncyni, czyli amatorski fusbal. Ni ma co darymnie psioczyć na zawodowych fusbalistōw, lepszy samymu brać bal i na dwōr… Stować lebry!

Komentarze (3):

  1. Avatar
    svatopluk

    A we Rio jak prawie durch grać baje yno dwōch Ślōnzŏkōw.
    Poldi i Miro. Dlŏ Miro to juz ôstatnŏ szansa na majstra we tym manszafcie.
    Ciynżko bandzie ale choby poradziōł Ronaldo.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*