Miesięczne archiwum: Lipiec 2014

Nimce świyntujōm czworty tytuł majstra świata! W kōńcu sie doczkali. Gynał 24 lata tymu pokōnali w finale Argyntyna. Historio sie powtarzo. Po zachodnij strōnie Odry uciechy w trzi miechy. A kōmu kibicowoł Ślōnsk?

Mogiymy zaś być dumni z ,,naszych synkōw”? Złote medale odbiyro na dyć dwōch fusbalistōw ze Ślōnska. Wypado beztōż pogratulować panōm Klose i Podolskimu, kierzi dołōnczyli w niedziela do Richarda Hermanna i Friedricha Labanda. Kieryś jeszcze pamiynto tych starszych fusbalistōw? Ci dwaj to tyż majstry świata w barwach Nimiec, chop z Katowic i z Zabrzo. W 1954 roku byli ōni idolami ślōnskich kibicōw. W Katowicach fest świyntowane było wtedy beztōż zwyciynstwo Nimiec z Wyngrami 3:2, co za pierōna niy pasowało kōmunistycznym władzōm. Trza to było trocha zatuszować…

Jak to wyglōndo tera? Nimce to specyficzno drużyna, do kierej Ślōnzoki wykozujōm rozmańte sympatie. Emocje przi ich szpilach sōm forgot chyba nojbardzij skrajne. Abo fest im sie kibicuje, abo fest sie kibicuje… ich przeciwnikōm.

Prziczyn historycznych do tych rozmańtych sympatii jes w pierōny i raczyj niy zależōm yno od tego kto wiela dostoł szekuladōw z Rajchu za kōmuny (chocioż to tyż ni ma pewno bez znaczynio). Nikierzi pedzōm, że Nimce to ,,nasi” inksi bydōm w skrajnych sytuacjach nawet szpetnie psioczyć na ,,pierōnskich gebelsōw”. Wiynkszość ślōnskich kibicōw mono niy używo takich skrajnych określyń, ale mało kiery dziwo sie na Nimcōw bez wiynszych emocji. Czynsto i w jednej rodzinie kibicuje sie ,,na opy”, a w szynkach przi szpilach Nimcōw niy roz trefiajōm sie swady.

Fusbal to yno fusbal i aż fusbal. Co prowda sprawa jes ciekawo, bo coś te kibicowni godo o historii i ō nas samych. Niy idzie jednak wszyjskigo brać tak durś poważnie. Na dyć ni ma co darymnie sie hajować skuli szportu.

A kōmu wy’ście kibicowali? Jo prziznōm ofyn, że chocioż lubia Mirka i Łukasza, to bardzij życzyłech wygranej Argyntyńczykōm…

Argyntyna po roz trzeci, czy Nimce po roz czworty? Już mōmy odpowiydź na nojwiynksze pytani ostatnich dni. Jednak to Nimce świyntujōm na kōniec. W 113. minucie finałowego szpilu gola, kiery doł im tytuł majstra klupnōł rezerwowy Mario Goetze.

Chocioż bez 90 minut żodyn niy poradziōł przekludzić bramkowej akcji, idzie pedzieć i tak, że finał stoł na forgot dobrym poziōmie. Pora razy yno cyntymetry decydowały o tym, że kieroś z ekip niy była bliżyj wygranej. Styknie spōmnieć lagi Higuaina czy Hoewedesa.

Od poczōntku szpilu wiyncyj przi balu byli Nimce, ale tak rychtyk to Argyntyna miała wiyncyj do godki. Dyć to ōni mieli nojwiynksze lagi piyrszej połowy. Sōm Gonzalo Higuain mōg klupnōnć hat-tricka. Nojlepsze okazjo mioł kej w truchciku spokojnie wracoł ze spolōnego i oroz dostoł niyspodziywanie elegancki podani od… Kroosa. Durś zaskoczōny Argyntyńczyk majtnōł sie z bramōm w idyalnej sytuacji sōm na sōm.

Hneda Higuainowi udało sie lepij wykōńczyć. Po piyknej akcji Argyntyny i cyntrze z prawego skrzidła napastnik wrażo w kōńcu bal do siatki. Bez jakiś 5 sekund jes bohatyrym kraju i gupnie z uciechy. Uśmiych traci mu sie dopiyro kej dowo pozōr na fankowego. Bōł minimalnie na spolōnym.

NImce doś czynsto pojawiajōm sie pod szesnostkōm Albicelestes, ale to zaś ci drudzy sōm blisko gola. Messi w swoim stylu na fol szwōngu wjyżdżo pod brama przeciwnika mijo nawet Neuera, ale w ostatnij chwili bal praje z bramy wybijo Boateng.

W doliczōnym czasie piyrszej połowy nojgroźniejszo sytuacjo jak do tyj pory majōm Nimce. Po cyntrze z roga kepkōm szczynścio próbowoł Hoewedes, ale na drodze stanōł słupek. Jeszcze basym mōg to dobić kieryś z jego kōmpli, ale to już bōłby spolōny nawet jak bal trefiōłby do neca.

Fusbaliści narobiyli kibicōm szmakōw na drugi kōnsek szpilu, kiery tyż niy musioł sie długo rozkryncać. Zaroski po wynściu z szatni dobro okazjo w szesnostce Neuera mioł zaś Messi. Tym razym jednak po jego szlagu bal minōł słupek bramki.

Pod kōniec coroz wiyncyj do godki mieli Nimce ale żodnych stoprocyntowych sytuacji już niy było. Werci sie spōmnieć yno miniynty szlag Kroosa zza szesnostki z 82 minuty. Zapowiadało sie coroz bardzij na dogrywka.

Na szczynści bez dodatkowe pōł godziny żodno z ekip ni miała zamiaru darymnie czakać na elwry. Jako piyrsi ,,bajsnōnć” prōbowali Nimce. Schuerrle z wele 10. metrōw klupnōł jednak prosto w tormana.

Odpowiydź Argyntyny mōgła być dużo lepszo. W 98. minucie mōmy gryfno cyntra z lewej strōny od Rojo, po kierej bal przefurgnie nad Hummelsym i trefi na klata Rodrigo Palacio. Próba lobowanio tormana bydzie jednak niyudano, bal ostatecznie spadnia na zol wele lewego słupka. Telko laga!

Ktoś coś w kōńcu musioł klupnōnć. A jak już kōmuś sie mo picnōnć w kōńcōwce to sōm to Nimce. Coś w tym powiedzōnko Linekera jes. Wszyjscy grajōm a wygrywajōm Nimce. W 113. minucie po zagraniu Schuerrle bal na klata przijmuje Goetze i trefio gynał po długim słupku. Tyn chop do tyj pory na Mundialu sieknōł yno jednego gola i to jak stoł sōm przed pustōm bramōm i przi próbie zagranio kepkōm szczelōł kolanym. Tym razym to niy cufal, yno nojważniejszo brama Mundialu. Argyntyna już nic niy zmiyni. Szlag Messigo z wolnego w ostatnij minucie furgnie wysoko w trybuny. Nimce majstrym!

 

Nimce – Argyntyna 1:0 po dogrywce (0:0, 0:0)

Brama: Mario Goetze (113. min. – 1:0)

Nimce: Manuel Neuer – Philipp Lahm, Jerome Boateng, Mats Hummels, Benedikt Hoewedes – Thomas Mueller, Bastian Schweinsteiger, Christoph Kramer (32. Andre Schuerrle), Toni Kroos, Mesut Oezil (120. Per Mertersacker) – Miroslav Klose (88. Mario Goetze).

Argyntyna: Sergio Romero – Pablo Zabaleta, Martin Demichelis, Ezequiel Garay, Marcos Rojo – Lucas Biglia, Javier Mascherano, Enzo Perez (86. Fernando Gago) – Gonzalo Higuain (78. Rodrigo Palacio), Lionel Messi, Ezequiel Lavezzi (46. Sergio Aguero).

Brazylia – Nimce 1:7. Tyn kiery zawetnōł sie o telki wynik u „buka” dzisio chyba niy musioł iś do roboty. Co samek sie robi? Czy to rychtyk pōłfinał Mundialu? Gole do zwyciynzcōw klupiōm Mueller, Klose, Khedira  i po dwa Kroos i Schuerrle. Gospodorze sztyjc jeszcze niy wiedzōm co sie stało.

Piyrsze 10 minut szpilu kulało sie do gospodorzy zgodnie z planym. To ōni mieli wiyncyj do godki i sztyjc ciśli na brama Neuera. Niy zetrwało wiela…

W 11 minucie po cyntrze z roga wynik spotkanio otwiyro Thomas Mueller. Fusbalista Nimiec szczylo nogōm z wysokości siōdmego metra kaj jes durś niywachowany. Prosty ausdruk defynsywy, zdarzo sie. Na razie jeszcze idzie sie szarpnōnć na znano i lubiano w Polsce pieśniczka ,Nic się nie stało”, ale to dopiyro poczōntek…

W 23 minucie ,,na raty” tormana gospodorzy pokōnuje Mirosław Klose. Ta sytuacjo dała uciecha kibicōm niy yno po zachodnij strōnie Odry. Fol Ślōnzokōw tyż może być dumnych ze ,,swojigo chopa”, kiery ustanawio historyczny rekord. Snajper z Opola sieknōł na dyć gynał swojo 16. mundialowo brama, czego do tyj pory niy zrobiōł żodyn inkszy.

W nastympnych sekundach wpadajōm nastympne bramki. W sumie od 23. do 29 min. Julio Cesar jes pokōnany sztyry razy. Zdo sie że kaś wele drugij trzeci bramki Brazylijczycy już sie poddali. Szok bōł z minuty na minuta coroz wiynkszy, beztōż tyż kolejne bramki były coroz to gupij tracōne.

Do szatni fusbaliści złażōm przi stanie 0:5. To nawet niy wyglōndało na nadzwyczaj dobro gra Nimcōw, ale raczyj na paraliż Canarinhos kierzi nikiedy sami oddowali gościōm bal i tyrali potracyni po swojij szesnostce. Pierōnowy bajzel…

Drugo połowa niy zapowiadała wiynkszych emocji. Co prowda Brazylio ciepła sie do ataku, ale chyba yno coby wyładować emocje na tormanie Nimcōw, bo wszyjski szlagi leciały gynał w niego. Nimce zaczli ju szanować siyły na finał. Teroski to Canarinhos byli lepsi, ale sztyjc bramy klupali goście. Dwa razy w hefcie arbitra zapisoł sie rezerwowy Andre Schuerrle. Hōnorowo brama do gospodorzy wpadła dopiyro w 90. minucie po indywidualnej Akcji Oscara.

Brazylio w żałobie. Teroski forgot żol jes Neymara i Thiago Silvy, kierzi bezradni dziwali sie na tyn szpil. Taki spotkania trza wartko zapōmnieć. Yno jak? Tyn szpil już tera zapisoł sie w historii fusbalu i bydzie długo spōminany, bo padło tamek pora rekordōw. W pōłfinale Mundialu na dyć takigo wyniku jeszcze niy było nigdy.

NImce spokojnie czekajōm na swojigo rywala w finale. Na ich plus już tera działo dobro atmosfera po wielkim zwyciynstwie, jak tyż jedyn dziyń odpoczynku wiyncyj i to po szpilu, w kierym tak rychtyk za fest sie niy zmynczyli. Do tytułu majstra jednak sztyjc im daleko. W finale tak łatwo już raczyj niy bydzie.

 

Brazylia – Nimce 1:7 (0:5).

Bramy: Thomas Mueller (11. – 0:1), Miroslav Klose (23. – 0:2), Toni Kroos (24. – 0:3 i 26. – 0:4), Sami Khedira (29. – 0:5), Andre Schuerrle (69. – 0:6), Andre Schuerrle (79 – 0:7)  –  Oscar (90. – 1:7).

Brazylia: Julio Cesar – Maicon, David Luiz, Dante, Marcelo – Oscar, Fernandinho (46. Paulinho), Luiz Gustavo, Bernard, Hulk (46. Ramires) – Fred (69. Willian).

Nimce: Manuel Neuer – Philipp Lahm, Jerome Boateng, Mats Hummels (46. Per Mertesacker), Benedikt Hoewedes – Bastian Schweinsteiger, Sami Khedira (76. Julian Draxler), Toni Kroos, Mesut Oezil – Thomas Mueller, Miroslav Klose (58. Andre Schuerrle).

Ekipa Scolarigo pucuje już szczewiki na pōłfinał z Nimcami, w tym samym czasie fusbaliści Kolumbii pakujōm tasze du dōm. Canarinhos wygrali w piōntkowym szwierćfinale 2:1, ale kōntrowersje po szpilu zostały…

Wartko klupniynto brama mōgła zapowiadać gryfne spotkani. Już w 7. minucie na 1:0 gospodorzy wykludzo Thiago Silva. Po cyntrze z roga niyuwachowany zawodnik wrażo bal do siatki udym. Stadiōn gupnie!

Brama ustawiyła tyn szpil. Brazylio niy pozwolała dalij Kolumbii rozōnaczyć skrzideł i sie do porzōndku rozfechtować. Goście niy poradziyli naciepnōnć swojigo stylu gry, kiery wszyjscy ostatnio podziwiali. Trza jednak prziznać, że szpil kuloł sie w doś wartkim tympie. Na boisku było jednak fol faulōw. Ciynżki 45 minut mioł szczególnie Rodriguez, indiwidualnie wachowany przez Fernandinho, kiery za pierōna ni mioł zamiaru szanować kości rywala.

Kluczowe momynty szpilu to okres od 67. do 69. minuty. Na poczōntek robi sie miszōng pod bramkōm Julio Cesara. Ostatecznie bal do siatki posyło Yepes i jes wyrownani, a raczyj tak sie yno wszyjskim zdo bez chwila. Fankowy niy wiedzieć czamu pokozuje spolōny. Fusbaliści Kolumbii niy umiōm sie z tym pogodzić. Sztyjc 1:0. Hneda za faul na Hulku żōłto kartka obejrzy Rodriguez, a do bala ustawiōnego jakiś 30 metrōw od bramki Ospiny podyndzie David Luiz. Tyn szlag bydōm pokozywać chyba nawet na TVP Seriale! Po klupniynciu Luiza wysztrekowany torman furgnie pod lewy winkel i poradzi nawet lekko szmyrnōnć bal, ale w niczym to niy pōmoże. Za wielko siyła, 2:0!

Zdało sie, że Kolumbia już sie niy spamiynto, ale to niy bōł kōniec szpilu. W 78. minucie Julio Cesar praje wytargoł ze szczewikōw Carlosa Bacca, kiery zdōōł już przeciepać nad nim bal. Tego niy szło niy widzieć. Syndzia musioł pokozać na wopno. Torman Brazylii musi być rod, że dostoł YNO żōłto kartka. Hneda elwer idyalnie wykōnuje nojlepszy snajper Mundialu James Rodriguez. Jes kōntakt!

Ostatni minuty to tyż ostatni próby i nadzieje Kolumbijczykōw. Teroski tak rychtyk jednak wiyncyj było leżynio na zolu i rozmańtych przerw w grze niż efektywnej gry. Nic już sie samek niy zmiyni. Brazylio jes już w pōłfinale w belo Horizonte, chocioż niy bez strat. Niy zagro tamek wykartkowany Thiago Silva i kōntuzjowany Neymar, kierego bezmała czeko poranoście dni rewiyru.

 

Brazylia – Kolumbia 2:1 (1:0)
Bramki:
Thiago Silva 7, David Luiz 69 – James Rodriguez 80 (e)

Brazylia: Julio Cesar – Maicon, Thiago Silva, David Luiz, Marcelo – Hulk (83. Ramires), Fernandinho, Oscar, Paulinho (86. Hernanes), Neymar (88. Henrique) – Fred

Kolumbia: David Ospina – Juan Camilo Zuniga, Cristian Zapata, Mario Yepes, Pablo Armero – Juan Guillermo Cuadrado (80. Juan Quintero), Fredy Guarin, Carlos Sanchez, Victor Ibarbo (46. Adrian Ramos) – Teofilo Gutiérrez (70. Carlos Bacca), James Rodríguez

Francuzy niy bez problymōw wygrywajōm z Nigeriōm 2:0 i wlazujōm do szwierćfinału jako drugo ekipa ze Starego Kōntynyntu. Kōńcōwka szpilu noleżała bez godki dō nich, ale o reszcie szpilu forgot ciynzko tak pedzieć.

Samek w 1/8 już ni ma boroczkōw do rozklupanio, zresztōm ciynżko byłoby na cołkim tym Mundialu znolyź 1 tako drużyna, kiero fest wyraźnie zaniżałaby poziōm. Tym bardzij beztōż w błyndzie bōł tyn, kiery liczōł na łatwe zwyciynstwo Francuzōw z Nigeriōm. Super Orły niy yno niy wylynkały sie faworyta, ale nawet bez wiynkszy kōnsek szpilu mieli tak rychtyk wiyncyj do godki.

Hugo Llorisowi przinajmij sie niy mierzło. Francuski torman od poczōntku sztyjc bōł szterowany bez ofynsywa Nigerii. Po 18. minutach Super Orły poradziyły w kōńcu go zaskoczyć i wrazić bal do siatki. Dziwōmy sie wtedy na gryfno cyntra z lewego skrzidła i idyalne wykōńczyni płaskim lekkim szlagiym w wykōnaniu Emmanuela Emenike. Brameczka? Niy! Fanka dźwigniynto. Z colsztokiym w rynku szłoby stwierdzić 5 cyntymetrōw spolōnego. Kieby syndzia to puściōł Francuzy forgot ni mieliby sie o co ciepać.

To chyba trocha spamiyntało synkōw Deschampsa. Hneda w środku zacznie fyrlać Pogba. Bal bydzie zagrany na prawe skrzidło, kaj zaroski do środka zacyntruje Valbuena i bal trefi nazot do grocza Juventusu, kiery piyknym szlagiym z woleja sprawdzi refleks Eneyamy. Torman Nigerii zdowo egzamin! Akcja szpilu!

Po przerwie dalij wiyncyj cisła Nigerio. Żodnym knifym jednak niy udało im sie pokōnać Llorisa. Sytuacjo zwyrtła sie w kōńcōwce. Francjo coroz czynścij zaczła dochodzić do głosu. Pōmōgło w tym m. in. wkludzyni na boisko Antoina Griezmanna.

Wynik mōg otworzyć już w 77 min. Cabaye, ale jego szlag zatrzōns yno latōm bramki Eneyamy. Skuli tego piyrszym, kiery zapisze sie w hefcie arbitra bydzie dopiyro Paul Pogba. Chwila niyskorzij po cyntrze z roga i lekkim miszōngu, w kierym źle piōnstkowoł torman, bal do siatki kepkōm pokierowoł mody fusbalista Francji. 1:0!

Super Orły musiały ciepnōnć wszyjsko do przodku, ale to wiela niy dało. Już w doliczōnym czasie gry Valbuena zagrywo po zolu na piōnty meter. Tamek bal atakuje Griezmann, ale ostatecznie gola zdobywo tyn kiery go wachowoł. Tym boroczkiym jes Joseph Yobo. Chyba niy tak wyobrażoł se finał tego szpilu…

2:0 i pośmiatane! Nigeryjczycy niystety już pakujōm tasze du dōm. Za to Francjo może zbiyrać sie do Rio, kaj po zwyciynstwie z Algeriōm wybiyrajōm sie juz tyż Nimce, beztōż w szwierćfinale szykuje sie nōm niyzły szlagier.

Francja – Nigeria 2:0 (0:0)
Bramki: Pogba (79 min. – 1:0) , Yobo (90 min. – 2:0; samobójczo)

Francja: Hugo Lloris – Mathieu Debuchy, Raphael Varane, Laurent Koscielny, Patrice Evra – Paul Pogba, Yohan Cabaye, Blaise Matuidi – Mathieu Valbuena (90. Moussa Sissoko), Olivier Giroud (62. Antoine Griezmann), Karim Benzema

Nigeria: Vincent Enyeama – Efe Ambrose, Joseph Yobo, Juwon Oshaniwa, Kenneth Omeruo – Ahmed Musa, Ogenyi Onazi (59. Reuben Gabriel), John Obi Mikel, Victor Moses (89. Uche Nwofor) – Emmanuel Emenike, Peter Odemwingie