Brazylio przeciśniynto do pōłfinału?

Kategorie: Bez kategorii

Tagi: , , , ,

Ekipa Scolarigo pucuje już szczewiki na pōłfinał z Nimcami, w tym samym czasie fusbaliści Kolumbii pakujōm tasze du dōm. Canarinhos wygrali w piōntkowym szwierćfinale 2:1, ale kōntrowersje po szpilu zostały…

Wartko klupniynto brama mōgła zapowiadać gryfne spotkani. Już w 7. minucie na 1:0 gospodorzy wykludzo Thiago Silva. Po cyntrze z roga niyuwachowany zawodnik wrażo bal do siatki udym. Stadiōn gupnie!

Brama ustawiyła tyn szpil. Brazylio niy pozwolała dalij Kolumbii rozōnaczyć skrzideł i sie do porzōndku rozfechtować. Goście niy poradziyli naciepnōnć swojigo stylu gry, kiery wszyjscy ostatnio podziwiali. Trza jednak prziznać, że szpil kuloł sie w doś wartkim tympie. Na boisku było jednak fol faulōw. Ciynżki 45 minut mioł szczególnie Rodriguez, indiwidualnie wachowany przez Fernandinho, kiery za pierōna ni mioł zamiaru szanować kości rywala.

Kluczowe momynty szpilu to okres od 67. do 69. minuty. Na poczōntek robi sie miszōng pod bramkōm Julio Cesara. Ostatecznie bal do siatki posyło Yepes i jes wyrownani, a raczyj tak sie yno wszyjskim zdo bez chwila. Fankowy niy wiedzieć czamu pokozuje spolōny. Fusbaliści Kolumbii niy umiōm sie z tym pogodzić. Sztyjc 1:0. Hneda za faul na Hulku żōłto kartka obejrzy Rodriguez, a do bala ustawiōnego jakiś 30 metrōw od bramki Ospiny podyndzie David Luiz. Tyn szlag bydōm pokozywać chyba nawet na TVP Seriale! Po klupniynciu Luiza wysztrekowany torman furgnie pod lewy winkel i poradzi nawet lekko szmyrnōnć bal, ale w niczym to niy pōmoże. Za wielko siyła, 2:0!

Zdało sie, że Kolumbia już sie niy spamiynto, ale to niy bōł kōniec szpilu. W 78. minucie Julio Cesar praje wytargoł ze szczewikōw Carlosa Bacca, kiery zdōōł już przeciepać nad nim bal. Tego niy szło niy widzieć. Syndzia musioł pokozać na wopno. Torman Brazylii musi być rod, że dostoł YNO żōłto kartka. Hneda elwer idyalnie wykōnuje nojlepszy snajper Mundialu James Rodriguez. Jes kōntakt!

Ostatni minuty to tyż ostatni próby i nadzieje Kolumbijczykōw. Teroski tak rychtyk jednak wiyncyj było leżynio na zolu i rozmańtych przerw w grze niż efektywnej gry. Nic już sie samek niy zmiyni. Brazylio jes już w pōłfinale w belo Horizonte, chocioż niy bez strat. Niy zagro tamek wykartkowany Thiago Silva i kōntuzjowany Neymar, kierego bezmała czeko poranoście dni rewiyru.

 

Brazylia – Kolumbia 2:1 (1:0)
Bramki:
Thiago Silva 7, David Luiz 69 – James Rodriguez 80 (e)

Brazylia: Julio Cesar – Maicon, Thiago Silva, David Luiz, Marcelo – Hulk (83. Ramires), Fernandinho, Oscar, Paulinho (86. Hernanes), Neymar (88. Henrique) – Fred

Kolumbia: David Ospina – Juan Camilo Zuniga, Cristian Zapata, Mario Yepes, Pablo Armero – Juan Guillermo Cuadrado (80. Juan Quintero), Fredy Guarin, Carlos Sanchez, Victor Ibarbo (46. Adrian Ramos) – Teofilo Gutiérrez (70. Carlos Bacca), James Rodríguez

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*