Miesięczne archiwum: Sierpień 2014

Hneda UEFA podo ostateczno decyzjo co do dalszych ewyntualnych szans Legii na walka o Liga Majstrōw. Odwoływani sie jednak od poczōntku skozane było na porażka. Tak rychtyk bōł to yno finał darymnego butlu, kiery zōnaczōł sie w ostatnim tydniu w polskich mediach. O co ta haja?

,,Nieprawdopodobny skandal”, ,,Stronniczość pseudodziałaczy”, ,,[Panowie z UEFA] nie liczą się z nikim”… To yno pora negatywnych kōmyntarzy co do decyzji UEFA. Yno o co tak rychtyk ci ludzie sie ciepiōm? w przepisach na dyć wszyjsko jes ofyn wyklarowane. Śmiyszne sōm argumynty, że wpuszczyni Bereszyńskigo ni miało wpływu na wynik rywalizacji. Jedyn pierōn czy zagroł 3 minuty czy cołki szpil. Walkower bez godki!

Poradza jeszcze zrozumieć żol fusbalistōw. Logiczne jes tyż odwoływani sie działoczy Legii, kierzi chcōm jakoś uciyc od winy i gańby. Za to wypowiedzi nikierych polskich szpecōw nikiedy ciynżko mi sie słucho.

Krōlym ,,złotoustych” fachmanōw jes standardowo pan Janek T. Były poseł PiSu i słynny torman reprezyntacji Polski znod już swojo teoria spiskowo. Bezmała Celtic już przed rewanżym kōmbinowoł jak załatwić se walkower. Mono Szkoci już wtedy wiedzieli, że Legia klupnie se samobója i wystawi zawieszōnego grocza, skuli czego potajymnie kōntaktowali sie z UEFA? Pan poseł jes tyż nawet pewny, że zachodni kluby niy byłyby tak niysprawiedliwie potraktowane w tej sytuacji. Yno kto jes w stanie wyobrazić se analogiczny warszawski bajzel w Barcelonie czy Manchesterze? Tera zostowo yno czakać, aż w sejmie ruszy nowo kōmisja śledczo… Zaś uciecha do dziynnikorzy.

Mono do kōmisji tej wloz by tyż ktoś z inkszej partii? Co ciekawe Rōman Kosecki poseł PO mo podobne zdani, co jego niydowny rywal polityczny. Decyzja UEFA go ,,zniesmaczyła”. Co wiyncyj nasz polityk zastanawio sie czamu delegat UEFA niy przestrzegoł Warszawiokōw przed szpilym, coby niy wpuszczali Bereszyńskigo. Widać wojskowy klub, ale organizacjo z wojskiym ni mo wiela wspólnego. Delegat powiniyn ich wachować jak przedszkolanka…

Niy wszyjscy wypowiadajōm sie w tym tōnie. Z drugij strōny pojawiajōm sie kōmyntorze, z takimi słowami jak ,,frajerstwo”, ,,niechlujstwo”, czy ,,kompromitacja” Legii. Nojlepij jak dō mie sytuacjo ocynio Jerzy Dudek. Były torman Liverpoolu podkreślo, że na kożdym poziōmie rozgrywkowym wystawiyni niyuprawniōnego grocza kōńczy sie walkowrym. Tōż w B czy C-klasie musiałoby sie to skōńczyć podobnie. Legia zachowała sie po amatorsku i to ewidyntnie ich wina.

Ni ma co psioczyć i przezywać. Nastympnym razym lepszy posprzōntejcie swōj bajzel niz zaś zaczniecie butlować. Po co darymnie robić se gańba?

Forgot żol wōm jes Legii? Bo jo za nimi niy płacza…