Miesięczne archiwum: Październik 2014

Artykuły o nastympnej polskij porażce tym razym niy doczkały sie do druku. Polsko piyrszy roz w historii wygrywo z Nimcami. Z dumōm mogiymy pedzieć, że kluczowy udział mieli samek fusbaliści ze Ślōnska. Niy piyrszy roz ,,nasi” decydujōm o losach polsko-nimieckij kōnfrōntacji…

Euro 2008: Nimce wygrywajōm z Polskōm 2:0 po dwóch bramach Łukasza Podolskigo i asystach Mirosława Klose. Fusbalistōw urodzōnych w Gliwicach i Opolu. W kadrze Nimiec gro dwóch groczy ze Ślōnska, w Polsce jedyn, ale dopiyro od 65 minuty.

Eliminacje do Euro 2016: Polska wygrywo z Nimcami 2:0. Kluczowo brama na 1:0 zdobywo Arkadiusz Milik po piyknej cyntrze Łukasza Piszczka. To synki z Tychōw i Goczałkowic. Cuzamyn do kupy bioło-czerwōnych Ślōnzokōw mōmy tukej trzech, w czornej koszulce yno jedyn i to od 77 minuty.

Kaj Ślōnzoki tam zwyciynstwo? Po analizie dwóch ostatnich polsko-nimieckich szpilōw o punkty wychodzi, że coś w tym jes. Toć, że telki wniosek trza brać z lekkim przimruzyniym oka, bo na dyć niy trza być Jackiym Gmochym ani Andrzejym Strejlauym coby wiedzieć, że dwóch czy trzech groczy samych szpilu niy wygro. To niy zmiynio jednak faktu, że mogiymy zaś być z ,,naszych” dumni.

Po sobocie jes sie czym poasić… Milik z bramōm, Piszczek z asystōm. Ale niy wiadōmo czy wiynkszego udziału w zwyciynstwie niy trza by przipisać Kamilowi Glikowi. Sztoper z Jastrzymbio Zdroju czyściōł w tym szpilu wszyjsko. Forgot to jymu i Wojtkowi Szczęsnymu noleżōm sie chyba nojwiynksze gratulacje za, że Polsko zagrała na zero ze zadku.

A mōgło byc durś na opa. Mono kieby Achim Loew wkludziōł pryndzyj na boisko Podolskigo wynik wyglōndołby inacy? Łukasz groł yno poranoście minut, a tak rychtyk to ōn bōł nojbliżyj zdobycia bramki do Nimcōw. Po jego szlagu z woleja porzōndnie zatelepała sie lata bramki Szczęsnego, kiery tym razym ni mioł ani szans na reakcjo…

Trocha cufalu i Polsko moge nawet z Nimcami wygrać. Z grzeczności niy bydymy samek spōminać o statystykach szlagōw z sobotnigo szpilu. Wynik poszoł w świat. Mōmy piykny nowy rozdział w historii fusbalu, w kierym zaś główne role grajōm synki ze Ślōnska.

To mioł być forgot jedyn z nojwiynkszych szlagrōw drugij kolejki Ligi Majstrōw. Jakby sie jednak niy dziwać to „tiki-taki” samek za pierōna niy szło zejrzeć. Na boisku dōminowoł bajzel, faule i kartki. Jednak i telki ciynżki szpile trza umieć wygrywać. Po bramie Ardy Turana 3 punkty zostowajōm w Madrycie.

Ewidyntnie wiyncyj przi balu w piyrszej połowie byli goście. Nic jednak niy poradziyli ś nim wyczarować. Wiyncyj powiy nōm beztōż inkszo statystyka – szlagi na brama. Juve ani w tym ani w drugim kōnsku szpilu niy poradziyło nasztelować cylownikōw miyndzy słupki bramy gospodorzy. Atletico w piyrszej połowie roz sprawdziyło Buffona, ale stary torman niy doł sie lekko zaskoczyć i sztyjc poprawioł rekord minut z czystym kōntym.

Bajzel, bajzel i to z czasym coroz bardzij krwawy… Nojlepsze okazje na poczōntku drugij połowy? Przody torman Atletico w rogu szesnostki walczy sōm na sōm z… balym kiery matlo mu sie pod szłapami. Niyskorzij po ostrym zagraniu w szesnostka Juve, jedyn z obrōncōw praje wrażo se bal rynkōm do swojij bramki. Na szczynści Buffon je sztyjc mōnter. Zawōniało samek elwrym, ale syndzia kozoł grać dalij.

Kieby niy tympo gry to szpil nikiedy mōgby wyglōndać jak polsko Ekstraklasa. Fusbaliści tyrali jednak wartko. Atletico nastawiyło sie nawet na wysoki pressing. Na piykne akcje sie to jednak niy przekłodało. Za to zaczły suć sie żōłte kartki za faule. W hefcie arbitra znodło sie w kōńcu dwóch groczy Atletico i aż sześciu z Juve.

Wszyjsko zapowiadało wynik bezbramkowy aż do 75. minuty. Akcja szpilu przekludzajōm wtedy gospodorze. Piyknej cyntry Juanfrana z bliskij odlygłości niy marnuje Arda Turan. Buffon ni mo samek nic do godki i traci swojo piyrszo brama w tym sezōnie.

Atletico poprawio swojo sytuacjo w grupie po darymnym sztarcie. Niy zdo sie jednak na razie coby mieli dostać telkigo szwōngu jak łōnskigo roku ,kej zatrzimali sie dopiyro w finale. Układ tabeli grupy A trocha nōm sie wyfyrloł. Teroski wszyjscy majōm po 3 punkty, beztōż bydzie coroz ciekawij…

Atletico Madryt – Juventus Turyn 1:0 (0:0)

Brama: Arda Turan (75 min.)

Żōłte kartki: Garcia, Ansaldi – Bonucci, Chiellini, Lichtsteiner, Morata, Pogba, Giovinco

Atletico: Miguel Angel Moya – Juanfran, Miranda, Diego Godin, Cristian Ansaldi – Tiago, Koke – Raul Garcia, Arda Turan (89. Guilherme Siqueira), Saul Niguez (53. Antoine Griezmann) – Mario Mandżukić (84. Mario Suarez)

Juventus: Gianluigi Buffon – Giorgio Chiellini, Martin Caceres (78. Roberto Pereyra), Leonardo Bonucci – Paul Pogba, Claudio Marchisio, Arturo Vidal (83. Alvaro Morata), Stephan Lichtsteiner (89. Sebastian Giovinco), Patrice Evra – Carlos Tevez, Fernando Llorente