„Nasze” sukcesy

Kategorie: Bez kategorii

Ôstatni weekend cudōw niy prziniōs. Nasi fusbaliści tym razym światowych mediōw niy podbiyli. Nawet na naszym ekstraklasowym placu bez wiynkszych rewelacji. Żodnych snajperskich wyczynōw, szwarnych bramek. Nic. Kaj ci nasi? Trza chyba dokładnij przesztudiyrować papiōry…

Sukcys to produkt kōńcowy jakigoś wysiłku. Narzyndzi rozmańtej zorty walk. Na sukcesach buduje sie kariera polityczno, czy szportowo… Sukcys być musi, nawet jak go ni ma! Dyć sukcys potyncjalnie zawsze kaś jes. Trza se go yno zōnaczyć. Znolyź, piyknie ôpakować i fertig. Lubiymy słuchać ô sukcesach „naszych” ludzi, kiere sōm z automatu „naszymi” sukcesami. Polscy dziynnikorze szportowi w wynojdywaniu „naszych” sōm forgot fachmanami. Byli tacy co chcieli znolyź polskich starzikōw nawet Emmanuelowi Olisadebe. Kożdy kiery mo „polski korzynie” i jako tako nadowo sie do gry moge być „naszym”.

Wiymy już jak to sie robi. Tōż zaglōndōmy jeszcze roz i… Voilà! Mōmy ślōnsko brama w Bundeslidze. Naszym bohatyrym grocz Stuttgartu, zdobywca bramy na wyrownani w przegranym 2:1 szpilu z Augsburgiym, 24-letni Daniel Ginczek. Z telkim imiyniym i nazwiskiym u nos by niy podpod. Jes yno mały feler. Chyba rychtyk pedzieć, że Daniel to Ślōnzok to jednak lekki nadużyci. Ze Ślōnska pochodziyły jego starziki, ale ōn raczyj niy poradzi godać ani po ślōnsku ani po polsku. Ginczek to były młodziyżowy reprezyntant Nimiec. Troszyczka „nasz”.

W tym tydniu w Nimcach mōmy jednak wiyncyj „naszych” sukcesōw. Zwyciynsko brama do St. Pauli w 2. Bundeslidze klupie Lasse Sobiech. Rodzina Artura z Rudy Ślōnskij? Mono. Ciynżko ustalić skōnd dokładnie zza Odry przijechali jego ôjce, ale ōn tyż moge być „nasz”.

Bardzij czy mynij zwiōnzanych ze Ślōnskiym fusbalistōw, ôbywateli Nimiec je fol. Styknie spōmnieć yno poru nastympnych, kierzi zagrali w ôstatnij kolejce jak: Matthias Wittek (FC Heidenheim), Adam Bodzek (Fortuna Dusseldorf), czy Matthias Ostrzolek (Hamburger SV). Nasi…?

Komentarze (2):

  1. jo

    Ôstatni weekend cudōw niy prziniōs. Nasi fusbaliści tym razym światowych mediōw niy podbiyli. Nawet na naszym ekstraklasowym placu bez wiynkszych rewelacji. Żodnych snajperskich wyczynōw, szwarnych bramek. Nic. Kaj ci nasi? Trza chyba dokładnij przesztudiyrować papiōry

    Dyć jo by to tak pedzioł:

    Łostatnio niydziela cudow niy prziniosła.nasze fusbalery terozki świata niy podbiyli.Dyć w naszyj lidze tyż.Ani niy szczylali piyknie,a ni szwarnych torow.Nic.Kaj ci nasze chopcy?
    Ja,myśla.że muszom lepi przesztudierować papiory.Dyć te zew szpilow,jak sie mo rać i jak grali.

    Ale synku szkryflej,bo ta nasza odka prawie te orole nom sasmrodziyli.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*