Toć! Tego zanegować niy poradzi ani kalyndorz ani sōm Jarek Kret. Jesiyń za nami, a za tydziyń zaczyno sie wiosna… Telki anōmalia po reformie Ekstraklasy to już standard. Fusbaliści bydōm szpilać jeszcze pora tydni, ale my już tera ôbadōmy cōż to popochało sie, że latoś 2 ślōnski kluby ôpanowały 2 przeciwne kraje tabeli.

Tytuł jesiynnego majstra trefio na Ślōnsk. Synki z Gliwic zaskoczyli wszyjskich szpecōw. Po 15 kolejkach kludzōm w tabeli a 8 punktōw przewogi nad drugōm Legiōm godo, że to raczyj niy cufal. Przed sezōnym za pierōna niy zapowiadało sie w Gliwicach na telki cuda. Piast straciōł na dyć krōla szczelcōw ligi, chopa kery poradziōł klupnōnć 20 bramōw i to w sezōnie, kery jego klub kōńczōł na 12. placu. Bez Wilczka, ale tyż bez Jurado, Podgórskigo i Vassiljeva, ôfynsywa Piasta zdała sie fest szczyrbato. Nowy tryner dostoł beztōż ciynżki zadani zrychtować na wartko jaki „gybis”.

Hneda ôkozało sie, że niy trza Wilczka coby dobrze bajsnōnć. Rewolucjo w piastowskij ôfynsywie ô dziwo sie sprawdziyła. Wszyjscy sztyrej napastnicy w klubie to grocze skludzyni do Gliwic bez lato. Yno to niy wszyjsko. Cuzamyn do kupy Piast załatwiōł se na jesiyń 12 nowych groczy. Na 24 bramy zdobyte przez majstra jesiyni aż 16 klupnyli synki z letnich transferōw.

Durś inksze nastroje w Zobrzu. Tam tyż żodyn na cuda niy liczōł, ale tak darymnie ni miało być. Ôstatni plac i yno 9 punktōw. Górnik wyplōmpany z nojlepszych groczy w końcu przestoł fungować jak trza. Polityka transferowo ôstatnich poru lot… Szkoda godki. Ô nowych groczach tyż tak rychtyk ni ma co pedzieć.

Tajymnicōm ni ma, że kibice Piasta z kibicami Górnika a inkszych ślōnskich klubōw przeważnie za fest se niy przajōm. Ale chyba niy yno ci piyrsi byliby radzi keby na wiosna majster zamiast w Warszawie znod sie w Gliwicach. Z tym, że na razie raczyj sztyjc mało kto w telki bojki wierzy. Tym bardzij kej czeko nos dzielyni punktōw i fest długi drugi a trzeci kōnsek sezonu.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*