Ôd ponad tydnia Ślōnsk mo nowego reprezyntanta na Zachodzie. I to kaj! Fusbalistōm legyndarnego FC Liverpool ôstoł mody grocz Ruchu Chorzów, urodzony w Rudzie Ślōnskij Kamil Grabara.

Kamil bezmałaś już je w Anglii, ale jeszcze trocha zetrwie niż bydzie drugim Jurkiym Dudkiym. Punkt startowy mo na dyć durś inkszy. Kamil kludzi sie do Liverpoolu w wieku 17 lot i bez ani jednego szpilu w Ekstraklasie. Jurek trefiōł do The Reds kej mioł 24 lata z tytułym majstra i nojlepszego tormana ligi holynderskij na kōncie. Przed modziokiym dłōgo droga. Na razie z transferu radzi sōm w Ruchu (bezmałaś nojdroższy w historii klubu). Kōmyntorze jednak sōm rozmańte. Zibi Boniek ofyn szkryfnōł na tweeterze, że lepszy byłoby potrzimać Kamila u nas jeszcze pora lot i że z telkim podynściym Liga Majstrōw bydzie sam za 100 lot. W kożdym razie Zibi synka chwolōł, podobnie jak tryner Ruchu, kiery jednak je bardzij wyrozumiały do swoich szefōw. Waldi pedzioł nawet, że jak telki klub jak Legia niy poradzi zatrzimać u sia młodych to tym bardzij biyda to zrobić Ruchowi.

Ruch straciōł bez ôstatni lata poru forgot dobrych tormanōw. W 2014 klub ôstawiōł Michał Buchalik, terozki piyrszy bramkorz Wisły. Rok niyskorzij tyż na wschōd, ale kōnsek dalij, bo do Japōnii wyjechoł Krzysztof Kamiński. Latoś prziszoł czas na Kamila. W klubie sztyjc za to gro, a raczyj grzeje ława jego starszy kamrat Wojtek Skaba, kiery jeszcze pora lot tymu tyż zapowiadoł sie na klasowego tormana, ale przynści do Legii zamiast rozfechtować, wyhamowało jego kariera.

Jakby sie niy dziwać Ruch moge sie poasić wyszkolyniym poru ciekawych, bramkorzy. Werci sie jednak dać pozōr, że żodyn ś nich niy bōł rychtyk wychowankiym Niebieskich. Z wyżyj spōmnianych przikładowo Buchalik zaczynoł w rybnickim Górniku Boguszowice, Grabara w rudzkim Wawelu Wirek, a jedyny samek niy-Ślōnzok Kamiński w mazowieckim KS Łomianki. Dyć to w małych klubach zaczyno sie wielko gra…

Komentarze (1):

  1. olo

    Kiedy Ruch 2008 Chorzów spłaci 60 000 000 zł długu ? Zawodnicy od roku nie dostają wypłat tyko zapomogi. Kiedy komunistyczny klub nie będzie miał oparcia w CZERWONYM betonie z PZPN ? Boniek obudź się bo jak Ruch spad z ligi to komuniści z PZPN uratowali go kosztem Polonii Warszawa która miał tylko 3 milionowy dług.
    Nie może być innej miary dla Polonii czy ŁKS a innej dla Ruchu tylko dla tego że to komuniści.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*