Blisko-bliżyj-po ptokach…

Kategorie: Ekstraklasa

Tagi: , , , ,

Tyn sezōn ślōnskim fusbalistōm a kibicōm prziniōs niymało uciechy, fol małych sukcysōw i jeszcze wiyncyj rozhajcowanych nadziei. Jednak kej podziwōmy sie choby na kōńcowo tabela ekstraklasy to forgot płaczki sie cisnōm do ôczu. Nasi w „90. minucie” sezōnu zmaściyli swoji lagi.

Ślōnsk mioł szansa na piyrszego majstra Polski ôd 27 lot. Ôstatni roz telko ôkazjo była 4 lata tymu, kej do ostatnij kolejki o 15. korōna biōł sie Ruch. Synkōm Fornalika brakło wtedy jednego ôka. W podobnej sytuacji byli wczora fusbaliści Piasta Gliwice. Tyż musieli liczyć na strata punktōw przez lidera. Niystety… Drugi plac to i tak nojwiynkszy sukcys w historii klubu z Gliwic. Ani przed sezōnym ani tyż dłōgo niyskorzij, żodyn tamek ô majstrze głośno niy godoł. Kōmu jednak tera ni ma żol, kej było tak blisko? Wiymy, że budżety i możliwości Piasta i Legii to dwa inksze światy, ale bezmałaś piniōndze niy grajōm. Dyć tym wiynkszo uciecha naklupać bogatszym faworytōm. Była na to ôkazjo w bezpośrednim szpilu tydziyń tymu. Piast wyloz ôfynsywnie i niystety doł sie rozklupać.

Gorsze humory majōm terozki w Zobrzu. Tamek tyż była walka do ôstatnij minuty, a nawet sekundy. Jeszcze wczora pora minut po 6 we wieczōr świat do kibica Grubiorzy wyglōndoł durś inaczyj. Na tyn mōmynt Górnik wygrywoł i przi aktualnym wyniku z Wrocławia miołby ôbstoć w ekstraklasie. Hneda sytuacjo sie zwyrtła. W 53 min. Górnik traci brama na 1:1 i musi zaś coś klupnōnć. Nieciecza pokozała, że nazwa wsi zobowiōnzuje i zaprezyntowała, nota bene, szczelno gra w ôbrōnie. Jedna brama zdecydowała ô losie Grubiorzy. Klub zaliczo swōj trzeci w historii spadek z ekstraklasy. Pocieszo yno, że po ôstatnich dwōch (1978, 2009), już po roku awansowali nazod. Zdałoby sie jaki déjà vu…

Nasi latoś forgot ni majōm szczynścio do finiszōw. Coś moge ô tym pedzieć były grocz Górnika. Arek Milik w tym sezonie klupnōł 21 bramōw do Ajaksu. Do szczynścio brakło tej jednej w ôstatnim szpilu. Majster zaś citnōł…

 

Komentarze (1):

  1. svatopluk

    Chopie, je zejś ze Warszawy? Ferajna ze Ślōnska zrobiyła majstra dopiyro co sztyry lata nazod!
    Tyn rok niy bōł nojgorszy. Manszaft ze Gōrnego Ślōnska na drugym placu i jeszczy jedyn manszaft we Top8.
    Szkoda yno co Zobrze śleciało.

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *

Time limit is exhausted. Please reload the CAPTCHA.

*