Miesięczne archiwum: Lipiec 2016

Rok 2004, finał Euro w Portugalii. Pierōńsko skuteczni Grecy ôgrywajōm gospodorzy. Styknōł jedyn dobry szlag i „joga bonito” wziyna w łeb… 12 lot niyskorzij sytuacjo zwyrto sie ô 180 stopni. Tym razym gospodorzami sōm Francuzi a „joga bonito” zdōnżyła ewoluować w stylu greckim. Szpetnie sie na to dziwo, ale to ôna nojlepij ze wszyjskich poradziyła se z francuskōm „beau jeu”. Ta rychtyk gryfno gra chyba jednak zaś przegrywo…

Już po szpilu Polokōw z Portugalczykami europejski media miały biyda przeboleć, że do pōłfinału wlazła ekipa, kero niy wygrała w 90. minutach jeszcze żodnego szpilu i cufalym, skiż nowych przepisōw wylazła z grupy z trzema rymisami. Nimiecki „Die Welt” nazwoł awans Portugalii do pōłfinału „ponurym wicym”, a portal „France24.fr” zastanawioł sie eźli do sie wygrać Euro bez wygranio szpilu.

Ôstatecznie fusbal to niy łyżwiarstwo figurowe ani taniec z gwiazdami, beztōż ani noty za styl ani sms-y telewidzōw ni majōm samek (na szczynści) nic do godki. Jakby sie niy dziwać majstrym sōm Portugalczyki, beztōż wypado im pogratulować. Tradycyjnie na „Ślōnskim fusbalu” trza by jeszcze yno poszukać jakigo Ślōnskigo kōntekstu. Ciynżko sprawa… Bohatyrym finału zdobywca bramy ze 109. min., urodzōny w byłej portugalskij kolōnii w Afryce, Eder. Idzie ze świycōm i taszlampōm deptać, ale biyda byłoby mu wynolyź starzika Hanysa…

Niy doczkali my sie niystety historycznego finału z udziałym naszych fusbalistōw. Poloki ôdpadli w szwierćfinale, a ôstatni Ślōnzok w turnieju, Podolski pojechoł du dōm po pōłfinałowej przegranej Mannschaftu z Francuzami. Trocha gryfnej gry my jednak ôbejrzeli, tōż dziwić ni moge, że na rynku transferowym nasi sōm coroz bardzij w zocy. Kamil Glik jeszcze przed kōńcym turnieju szkryfnōł kōntrakt z AS Monaco, a Arek Milik sztyjc analizuje ôferty rozmańtych europejskich  klubōw. Dyć na Euro fusbal sie niy kōńczy. Gryfno gra jeszcze bydzie zocno!

 

PS. Ślōnski Fusbal włazi gynał w przerwa letnio, ale spokojnie. Bydymy nazod…

GB

Ôstatni sztyry dni szwierćfinałōw prziniōsły kibicōm masa rozmańtej zorty emocji. Zdo sie, że francuski turniej w kōńcu nabroł szwōngu. W sztyrech szpilach ôbejrzelimy 15 bramōw. Do tego trza dociepnōnć dodatkowe atrakcje: dwie dogrywki, dwie serie elwrōw, jedyn kibic-gupielok na murawie i jedyn fusbalista-tancyrz.

Czwortek. W Polsce niy jedyn szykowoł już urlop czy rewiyr na nastympny dziyń. Tak daleko w Euro Poloki na dyć jeszcze nigdy niy doszli. Ôstatni roz w fazie pucharowej byli gynał 30 lot tymu na Mundialu w Meksyku. Polocy już po 100 sekundach szwierćfinałowego szpilu z Portugaliōm fōndli nōm nojwarciejszo brama tego turnieju autorstwa Lewandowskigo. Bez nastympne minuty ciśli Portuglczykōw, przi czym miejscami pokozali kōnsek dobrej „tiki-taki”. Niystety to niy stykło. W elwrach lepsi Portugalczyki, kerzi na tym Euro niy wygrali jeszcze w 90. minutach żodnego szpilu.

Piōntek. Zdałaby sie jako niyspodzianka, pra? No tōż voilà. Walijczyki pokōnujōm Belgōw 3:1. Nastympni faworyci z płaczkami jadōm du dōm.

Sobota. Szpil chyba nojsłabszy, chocioż grały nojbradzij samek utytułowane ekipy. Porzōndne emocje, a mono trzaby było pedzieć masa śmiychu prziniōsły dopiyro elwry. Zawodnicy trefiali w trybuny, tormanōw, abo słupek bramki. Symbolym tej serii ôstoł Simone Zaza i jego szlag „Pōnbōczkowi w ôkno” ôzdobiony jak policzyli nojlepsi polscy szpece 18-kroczkowym tańcym przed balym. W kōńcu po 9-ciu seriach 6:5 wygrywajōm Nimce.

Niedziela. I je sie na co dziwać. W kōńcu ktoś poradziōł naklupać pora bramek. Francuzi wartko skludziyli Islandio na zol. 4:0 do przerwy to niy cufal. Islandczyki pokozali jednak charaktyr. Tryner wartko porobiōł zmiany i postawioł na staro taktyka „wszyjscy do przodku”. Kibice z Islandii z uciechōm klackali nawet po bramie na 5:2.

Z Francji odfurgło już du dōm trzech ślōnskich reprezyntantōw Polski. Ô majstra sztyjc walczy Łukasz Podolski, chocioż na razie zagroł yno 18 minut ze Słowacjōm. Zostowo pedzieć: pacz tam jako!