Miesięczne archiwum: Październik 2016

Z politykōm miywōmy niynojlepsze skojarzynia. Ôd polityki jednak dzisio niy citnymy. We ôstatni piōntek to na dyć niy piykne szlagi ani parady tormanōw rzōndziyły wiadōmościami szportowymi. Na piyrszy plan wyônaczyły sie wybory w PZPN-ie…

Ślōnzoki gynał latoś niy prali sie ô nojważniyjsze stołki. Ô prezesowaniu żodyn ani niy myśloł. Zresztōm w ôstatnich kadyncjach było podobnie. Ôstatnim prezesym PZPN-u zwiōnzanym ze Ślōnskiym bōł Marian Dziurowicz (1995-99) z GKS-u Katowice, ale urodzōny w Sosnowcu. Na nowo kadyncjo mōmy yno reprezyntantōw w szyrokim składzie Zarzōndu. Sōm to Hynryk Kula, prezes ŚlZPN i Wojciech Cygan, prezes GieKSy.

Jeszcze pora tydni do zadku zdało sie, że Zibi Boniek bydzie sōm sztartowoł na prezesa, a tukej na ôstatnij prostej pokozoł sie „czorny kōń”. Józef Wojciechowski to chop forgot wyjōntkowy. Jego zainteresowani fusbalym ôbjawiyło sie trocha niyskoro, ale jak już wloz w to, to zaro na fol szwōngu. W 2008 r. ôdkupiōł od Zbigniewa Drzymały Groclin Grodzisk Wlkp., kery połōnczōł z II-ligowōm Poloniōm Warszawa i tym knifym wroz fōndnōł se Ekstraklasa. Potym bywało rozmańcie, a że W. interesowały yno wygrane to musioł sztyjc robić porzōndki. Bez 6 lot w Polōnii robiyło aż 19 trynerōw…

To niy kōniec, bo historio p. Józika mo i ślōnski kōntekst. Kej zmierzło mu sie inwestować w fusbal sprzedoł 100% swoich udziałōw w Polonii Ireneuszowi Królowi, kery wzorym W. chcioł połōnczyć ekstraklasowy klub z I-ligowym GKS-ym Katowice. Groclino-Polōnio-GKS mioł grać jako KP Katowice. 16 lipca 2012 KP bōł juz zgłoszōny w ŚlZPN. Stadiōn GKS-u niy nadowoł sie jednak do ekstraklasy, beztōż coby awansować trza było sie już „yno” czasowo przekludzić do Krakowa abo… Sosnowca. Co przeszło 4 lata pryndzyj w Wa-wie niy przeszło tym razym na Ślōnsku. Szprajcli sie kibice i Rada Miasta. W Katowicach żodyn niy chcioł cyganiōnego awansu, beztōż ôbrali staro taktyka „pomału a sztyjc” (mono do hneda awans?). Podobnie latoś w PZPN-ie. Prezesym Zibi.

Wielkich Derbōw Ślōnska sie latoś niy doczkōmy. Z ślōnskimi drużynami w Ekstraklasie biyda. Ciekawij zrobiyło sie za to poziōm niżyj. W piyrszej lidze mōmy tera wiynkszo szansa na ôbadani jakij porzōndnej ślōnsko-ślōnskij „haji” i to przeważnie w wiyrchnim kōnsku tabeli. Fyrlo sie w tym gorcu fest! A kej dociepnymy dō niego jeszcze troszka pierōnsko ôstrej ślōnsko-zagłymbiowskij rywalizacje to dostowōmy forgot szmak wyjōntkowy.

Bez fandzolynio i fulanio gupot. Powiym ofyn. Ni ma żech z tych kibicōw, kerzi poradzōm dziwać sie na szpile Ekstraklasy i I ligi ôd poczōntku do kōńca tydziyń w tydziyń. Musza jednak pedzieć, że aktualno tabela I ligi koże nawet mie pedzieć, że jednak werci sie dać pozōr co sie tamek pocho. Niy bez cufal to gynał dzisio godka ô piyrszoligowcach. Spōmniołech, że ślōnski kibic moge być latoś wygłodzōny derbōw w Ekstraklasie. I liga dowo sam alternatywa. Za nami szpil katowickij GieKSy z Górnikiym z Zobrzo (1:1). Ôstatnio godajōm na to „ślōnski klasyk”, bezmałaś kamracki szpil klubōw, kerych kibice sie kōmplujōm (chocioż jak podziwać sie pora lot do zadku to rozmańcie z tym bywało). Woga spotkanio zwiynkszo tyż fakt, że ôbie ekipy majōm w tym sezōnie szmaki po awansie i ofyn ô tym godajōm.

Niy yno ôni jednak radzi poszpilaliby w Ekstraklasie. Ślōnski kamraty majōm latoś ciynżkigo zagranicznego rywala. Szpile z klubym z tajymniczych terynōw, kere przeciyntny miyszkaniec zza zachodnich brzegōw Brynicy zno przeważnie z wicōw, to jednak poważno sprawa, nic do śmiychu. GieKSa u sia z Zagłymbiym yno zrymisowała 0:0, a Górnik w Sosnowcu przegroł 2:1. Po 14. kolejce to Zagłymbioki kludzōm w tabeli, 3 oczka po zadku drugi GKS, a 9 traci szōsty Górnik.

Frekwyncjo na szpilach miyndzy nimi yno potwierdzo, że to sztyjc wyjōntkowo rywalizacjo. W niedziela stadiōn GKS-u piyrszy roz w tym sezōnie bōł fol. Rymis w kamrackim szpilu bōłby do tych kibicōw mono i dobrym zakōńczyniym, kieby niy myśl, że trza gōnić Zagłymbiokōw. Niy trza godać co to znaczy…

W 11-stce Polskij kadry lekki miszōng. Styknōł jedyn szpil i ze składu wyfurgło dwóch naszych synkōw. Na Polsko-Armynio Milik z Piszczkiym mōgli dziwać sie yno w TV. Niy doś, że trza lyczyć kolana to sam jeszcze telko dawka hercklekotōw! Po szlagu Lewego mōgli dychnōnć. Yno co na ta brama padaliby Pan Ernest Pohl i co czujōm Pan Włodek Lubański?

Nasi poza szpilplacym, abo trocha w ciyniu. Poza debiutym Kamila Wilczka nic co byłoby we werci ôpisać. W cyntrum zainteresowanio za to sztyjc Robert Lewandowski. Po klupniynciu 40-stej bramy w kadrze w piyrszej 10-tce nojlepszych snajperōw reprezyntacji wyprzedziōł już trzecigo Ślōnzoka. Tym razym Lewy wziōn Ernesta Pohla, kery tyroł w bioło-czerwōnym „ancugu” w latach 1955-65. Za Robertym sōm już telki legyndy jak Ernest Wilimowski (21 bramōw, 9. plac) czy Gerard Cieślik (27 bramōw, 7. plac). Ze zadku ôstoł tyż snajper Górnika Zabrze, urodzōny w Gdańsku Andrzej Szarmach (32 bramy, 6. plac). Lider sztyjc w ślōnskich rynkach, ale po lekku zagrożōny. Do Lubańskigo Lewy traci na dyć już yno 8 bramōw.

To jednak jeszcze niy sōm szczyt ślōnskich reprezyntacyjnych rekordōw. 48 bramōw, tela samo co Lubański, klupnōł w kadrze Łukasz Podolski. W Nimcach to stykło jednak „yno” na nojniższy stopiyń podium. Piyrszy plac na snajperskij liście Mannschaftu i aż 71 bramōw noleży do Mirka Klose. Co by ci Nimce zrobiyli bez Ślōnska…

Trza jednak ofyn pedzieć, że pokolyni Lewego mo fory. Reprezyntacje grajōm tera czynścij. Spōmnianymu Pohlowi do siekniyncio 39 bramōw stykło 46 szpilōw, Lewy coby go dogōnić musioł zagrać aż 83 razy. Chytōmy za kalkulator… Skutyczność Roberta to 48%. W porownaniu z Pohlym (85%), Lubańskim (64%), czy Cieślikiym (60%) mo na noc. A kaj mu tam do Wilimowskigo (95%), kerego wynik przi dodaniu wystympōw w kadrze Nimiec rośnie do 113% (34 bramy na 30 szpilōw)!

Perspektywy na rekordy? Arek Milik (21. plac, 11 br.). Latoś już nic niy dociepnie, ale po rewiyrze bydzie mioł fol czasu…

Poloki wygrywajōm z Daniōm 3:2 po trzech bramach Lewandowskigo. W piyrszej jedynostce Polski wylazło zaś trzech ślōnskich pewniakōw, ale kej godōmy ô nich to trza se ofyn pedzieć: mōgło być lepij… Dzisiejszo relacjo bydzie bardzij szporobliwo przi ciepaniu bōmbōnowo-maszketowymi metaforami.

Zaczna ôd plusōw, bo niy wypado ô nich zapōmnieć. Poloki zdobyli 3 punkty i do tego dociepnōł coś kożdy z trzech Ślōnzokōw, kerzi tyrali w sobota po szpilplacu. Fest aktywny bōł Arek Milik, kery wywalczōł elwer i kerego fest brakowało w drugij połowie. Niy idzie tyż zapōmnieć ô dłōgim podaniu/”wyjeździe” Łukasza Piszczka, po kerym Lewandowski klupnōł trzecio brama. Mono tela styknie… Trocha spamiyntanio sie na dyć noleży!

To niy bōł nojlepszy szpil Kamila Glika. Pokozała to już piyrszo akcjo Duńczykōw z 4. minuty. Zło kalkulacjo Kamila pozwolyła wlecieć rywalowi na fol szwōngu w „szesnostka” Fabiańskigo. Dogodywani sie z nowym sztoperym Cionkiym tyż niy fungowało jak trza. W drugim kōnsku szpilu Glik pokozoł jednak, że je w snajperskim cugu. Po piyknej bramie w Lidze Majstrōw prziszła (tyż niy szpetno) brama w kadrze, szkoda yno że do swojigo neca.

Niynojgorsze zawody groł Łukasz Piszczek, ale jakby sie niy dziwać to jymu niy udało sie wybić bala spod szłapōw Poulsena przi akcji na 3:2. Ciynżko co złego pedzieć ô Arku Miliku. Wiela niy brakło a klupnōł by brama po cyntrze Grosickigo. Hneda jednak szpetnie spod na kolano i musioł slyź, chocioż jeszcze bez dwie minuty przed przerwōm liczōł, że kōntuzjo „rozdepce”. Niystety już wiymy, że czeko go dłōgszy rewiyr i to je tak rychtyk nojwiynkszy minus tego szpilu.

Toć… Dycki niy bydzie idyalnie. Nikiedy trza klupnōnć samobója coby kiedy indzij być man of the match w Lidze Majstrōw, pra? Kto jak kto, ale Glik w tym tymacie wiy ô co sie rozchodzi. Proszōny ô kōmyntorz do samobóji pedzioł, że niy piyrszo to i niy ôstatnio w jego karierze. Kibel zimnej wody w wygranym szpilu ni ma zły.

Nastympny udany tydziyń trzech ślōnskich muszketerōw w Lidze Majstrōw. Ekipy naszych synkōw jeszcze niy przegrały i kludzōm w swoich grupach. Piszczek, Milik i bohatyr tydnia Glik forgot zaś majōm z czego być radzi.

Ô telkich mōmyntach marzy kożdy bajtel, kery tyro za balym. Nikerzi poradzōm sie doczkać… Monaco we wtorek niy grało wielkigo fusbalu, a ôd 73 min. przegrywało. Prziszła jednak 94 min. i szef defynsywy fechtnōł sie do przodku. Szlagiym z woleja zza szesnostki zaskoczōł wszyjskich i samego siebie. To niy bōł na dyć gol w stylu Kamila Glika, kery ofyn prziznoł, że to jedna z nojgryfniejszych bramōw w jego karierze.

We wtorkowo-środowych szpilach LM mōgli my dziwać sie na cołki festiwal niyszczelōnych elwrōw. Na szpilplacach po cołkij Europie fusbaliści prezyntowali roztomańte knify na zmaszczyni jedynostki. Z wopna niy poradziyli pokōnać tormanōw egzekutory Kopynhagi, Sewilli, Łudogorca, PSV i Atletico. Nawet bohatyr Euro’16 Antek Griezmann pocylowoł w lata. Na sześ elwrōw bal do neca wkuloł sie yno roz. Hōnor snajperōw uratowoł Arek Milik mocnym szlagiym w dolny rōg bramy. Niyskorzij mioł jeszcze jedna laga, ale z bliska klupnōł „Pōnbōczkowi w ôkno”. Skiż tego z trzema bramami plac lidera w klasyfikacji nojlepszych szczelcōw LM musi dzielić z Messim, Cavanim i Sergio Aguero. W kożdym razie bramōm i asystōm Milik szkryfnōł sie pod efektownōm wygranōm Napoli z Benfikōm 4:2.

Pierōnym ważny punkt w szlagrze kolejki zdobyła tyż drużyna Łukasza Piszczka. Real wygrywoł w tym szpilu 2 razy, ale gospodorze za kożdym razym poradziyli dokludzić do rymisu. Dziynki tymu Borussia niy dała sie wyprzedzić w tabeli Krōlewskim, od kerych je lepszo yno bramkami. To moge sie jednak hneda zmiynić. Hiszpany grajōm na dyć z Legiōm…

Po sztyry punkty Monaco i Borussi i kōmplet sześciu ôczek Napoli. Telki wyniki dowajōm kożdej z tych ekip piyrszy plac w tabeli swojij grupy. Już tera idzie pedzieć, że „ślōnski” drużyny bydōm miały latoś w LM swoji do godki.