W niedziela do „derbowej” haji stanyli fusbaliści nojlepszej ślōnskij drużyny 2015/16, wicemajstry Polski i krōl ślōnskij myśli szkolyniowej, nojbardzij doświadczōny tryner Ekstraklasy. 1:0!Gornik Łeczna lepszy ôd Piasta Gliwice. Franciszek Smuda zbiyro piyrsze punkty…

Z tōm zapowiedziōm mono trocha podkolorowołech. Piast wicemajstrym dłōgo już niy bydzie. Latoś w trzech szpilach bez punktu. Zaś Smuda to stary pochytany w Ekstraklasie fachman, ale jego nowy klub tyż niy wyglōndo nojlepij. Franz przed Piastym kludziōł Grubiorzy z Łyncznej dwa razy. Bilans zero punktōw i bramy 0:10 godo sōm za sia. Bohatyry niedzielnych quasi-derbōw bydōm latoś walczyć yno ô utrzimani.

Franz żodnej roboty sie niy lynko. Przejynci klubu z Łyncznej skōmyntowoł w swoim poetyckim stylu – „Harakiri tyż nikedy trza podjōnć”. To yno potwierdzo, że Smuda rychtyk poradzi robić cuda. Przinajmij nikedy… Sfurgnōnć z ligi tyż mu sie już na dyć przidarziło (2013 z Jahn Ratyzbōna do III ligi). Doświadczynio a sukcesōw żodyn synkowi z Lubōmii jednak niy ôdebiere. Franz majstra Polski zrobiōł 3 razy (1995/96 i 1996/97 – Widzew, 1998/99 – Wisła), roz wygroł Puchar Polski (2008/09 – Lech). Dokludziōł Widzew Łōdź do Ligi Majstrōw (1996/97), a Lech Poznań do 1/16 finału Pucharu UEFA (2008/09). Z reprezyntacjōm Polski gynał mu niy poszło, ale nazwisko Smuda sztyjc w Polsce sie liczy.

486. szpil za trynera w Ekstraklasie prziniōś Franzowi 246. wygrano. Żodyn inkszy aktualny tryner klubu w Ekstraklasie telkimi statystykami ni moge sie poasić. Co ciekawe po Smudzie nojwiyncyj rozegranych szpilōw majōm tera dwaj inksi trynerzy ze Ślōnska. Sōm to Bytōmiok Michał Probierz, kery kludzi Jagiellōnia i Waldemar Fornalik, tryner Ruchu urodzōny gynał poza Ślōnskiym, ale z nojwiynkszym doświadczyniym w naszych klubach. Ci dwaj hneda dobijōm do trzistu szpilōw. Franz w przedôstatnij kolejce tego sezōnu zaliczy szpil nr 500. Jaki geszynk zrychtujōm mu jego grocze? Eźli je życi po „harakiri”?