Miesięczne archiwum: Marzec 2017

Poloki wygrywajōm z Czornogōrōm 2:1. Toć, ni mōgło by do tego dōnś bez ślōnskigo udziału. Zwyciynsko brama szczylo Łukasz Piszczek, jedyn z dwóch Ślōnzokōw na szpilplacu w Podgoricy.

W piyrszej jedynostce Nawałki wyloz tym razym yno Piszczek i Glik. Etatowy snajper kadry Milik zaglōndoł na szpil z ławy, ale w snajperskich ôbowiōnzkach zastōmpiōł go do porzōndku spōmniany Piszczek. Po zawalyniu dwóch lagōw w minuta, zrehabilitowoł sie piyknym technicznym szlagiym na 2:1. Mōmy w polskij kadrze ślōnsko jakość i ilość. Reprezyntacjo Polski ôstatnio zaś wzbogaciyła sie o jednego Ślōnzoka (torman Łukasz Skorupski). 5 powołanych do kadry na Czornogōra to już rychtyk dobry wynik, kerego zaś downo niy było. Spōmniano piōntka: Piszczek, Glik, Milik, Wilczek i Skorupski to ponad 25% wszyjskich powołań Nawałki z zagranicznych klubōw. Gorzij wyglōndajōm powołania z polskij ekstraklasy. Tukej żodnego Ślōnzoka Nawałka niy docyniōł, ale werci sie dać pozōr, że 4 z 7 powołanych „ekstraklaseiros” mo w CV dłōgszo abo krōtszo gra w jednym ze ślōnskich klubōw.

Sztyjc jednak w pierōny daleko do ślōnskich rekordōw powołań. Były na dyć telki lata kej Ślōnzoki durś zdōminowali polsko reprezyntacjo fusbalowo. Na dyć starziki Czornogōrcōw, reprezyntanci Jugosławie w latach 30’ (czasy Wilimowskigo, Wodarza) i 60’ (czasy Pohla, Brychczego) szpilali z polskōm 11-stkōm złożōnōm nikedy z nawet ôśmiu Ślōnzokōw!

Niyskorzij Hanysōw w polskij kadrze bywało już mynij. A na poczōntku XXI w. łatwij było już znolyź Ślōnzoka w Mannschaftcie. Na Euro 2008, kej bramy szczyloł Polokōm duet Podolski-Klose, Bioło-Czerwoni mieli w składzie yno rezerwowego Piszczka. To już jednak historio. À propos, w czwortek 130. szpilym i 49. bramōm z reprezyntacjōm Nimiec pożegnoł sie Łukasz Podolski, ôstatnij jak do tyj pory ślōnski reprezyntant w Mannschafcie… Na telki pożegnani forgot trza se zasłużyć. Łukasz szlagiym z dystansu symnōł pajynczyna z winkla bramy. Kaj nastympcy?

Już niy w kōmplecie, ale sztyjc sōm my w grze. Z Ligōm Majstrōw pożegnoł sie Arek Milik… W szwierćfinale ślōnskich emocji jednak niy braknie. Już 11 kwiytnia bydymy sie dziwać na małe ślōnski derby. Borussia Łukasza Piszczka zagro z Monaco Kamila Glika. Jedne je pewne. Mōmy Ślōnzoka w pōłfinale…

Przody pora słōw a naszym „wielkim niyobecnym” w szwierćfinale. Napoli Arka Milika przegrało 2 razy z Realym (3:1 i 1:3) i pożegnało sie z Ligōm Majstrōw. W tej rywalizacji Arek już jednak piyrszych skrzipek niy groł. Właziōł na szpilplac z ławki i wiela swoim kamratōm niy poradziōł pōmōc. Szkoda, bo jego sztart w Lidze Majstrōw w tym sezōnie zapowiadoł lepszy „finisz”. 3 bramy Arka w dwóch piyrszych szpilach. Snajper z Tychōw bōł wtedy w formie. Piykny scynariusz przerwała jednak kōntuzjo i rewiyr. Milik niy zdōnżōł wrōcić do szczytowej formy i niy udało mu sie pożegnać z Ligōm Majstrōw tak jak by se to wymarzōł. Zostowo zaglōndać w TV co popochajōm kamraty z kadry.

Dwóch reprezyntantōw w 1/4 LM Ślōnsk mioł yno 3 razy ostatnio w 2009 (Klose i Podolski – Bayern) i 2007 roku (Dudek – Liverpool i Podolski – Bayern). Piyrszy roz telko sytuacjo przitrefiyła sie już dużo pryndzyj w czwortej edycji Ligi Majstrōw. Bōł to rok 1995/96, kej Panathinaikos w składzie z Krzysztofym Warzychōm i Józefym Wandzikiym wyciepali z LM w szwierćfinale Legia. „Gucio” klupnōł wtedy nawet dwie bramy. Terozki po roz piyrszy jednak nasi zagrajōm na tym poziōmie przeciwko siebie. Do Piszczka bydzie to już trzeci szwierćfinał w karierze. Ze Ślōnzokōw wiyncyj razy na tym poziōmie znod sie yno Jerzy Dudek (3 razy z Liverpoolym i roz z Realym), chocioż niy zawsze był w tych szpilach podstawowym tormanym. Glikowi dō nich daleko, w Lidze Majstrōw je absolutnym debiutantym.

Rywalizacjo Glika i Piszczka to tyż haja jednych z nojskuteczniejszych obrōńcōw w Europie. Zresztōm i Monaco i Borussia to drużyny kere majōm rade ôfynsywny fusbal. Tōż ni ma inkszej ôpcji – bydzie sie dzioło!

Hneda zaś rozhajcuje sie haja ô Mundial… Adam Nawałka już ôgłosiōł zagraniczne powołania na szpil Polski z Czornogōrōm. Mōmy być z czego radzi do kadry wraco po kōntuzji Arek Milik. Powołani dostoł tyż jego stary kamrat z Zobrzo, Łukasz Skorupski nowy torman nr 3 w Polsce.

Piszczek, Glik, Milik, Wilczek i Skorupski. Do piynciu urosła nōm ślōnsko delegacjo w reprezyntacji Polski. Po tym jak Artur Boruc ôgłosiōł reprezyntacyjno pyndzyjo, rola drugigo rezerwowego erbnōł pō nim Łukasz Skorupski. Były grocz Gornika reprezyntuje terozki w Serie A Empoli FC (na wypożyczyniu z AS Roma). 10 szpilōw z czystym kōntym w drużynie, kero brōni sie przed spadkiym to wynik, kery dużo godo ô jego formie w tym sezōnie.

Łukasz to stary znajōmy selekcjōnera. Dyć to u Nawałki Skorupski debiutowoł w Ekstraklasie (nota bene razym z Milikiym i Olkowskim). Za piykne ôczy powołanio jednak niy dostowo. Selekcjōner sztyjc mo go w pamiynci. Na kadra zaprosiōł już go na jesiyń, ale Łukasz na swojo szansa bydzie musioł jeszcze trocha doczkać, bo kōnkuryncjo na bramie wielko. Swoji 5 minut jeszcze dostanie, a ôn gynał już wiy jak to wykorzystać. Pokozoł to choby w swoim debiucie w kadrze U-21 w paździyrniku 2011 r. W szpilu z Portugaliōm prziszło mu wlyź na boisko i chytać elwer. „Spokojnie, jo to chyca” pedziōł yno kamratōm na ławce i tak tyż zrobiōł.

Ślōnski słowa Łukasza trefiyły po tym szpilu do tytułōw relacji poświyncōnych tymu szpilowi. Łukasz niy gańbuje sie ofyn godać po ślōnsku. Nikedy wciepnie pora słōw po naszymu dziynnikorzowi. Bezmałaś czuje sie Ślōnzokiym i dobrze godo po ślōnsku, chocioż jego familio gynał ze Ślōnska niy pochodzi. Wychowani z synkami na Zaborzu zrobiyło jednak swoji. À propos wychowanio… Z Łukasza downij bōł niyzły hajok. Ôstatnio chyba jednak spoważnioł i spokojnie czeko na swoji nastympne 5 minut. Do tyj pory w piyrszej reprezyntacji zagroł yno roz w 2012 r. z Macedōniōm (4:1) jeszcze za Fornalika. Tyn synek mo szmaki na wiyncyj…

Pora dni tymu w wieku 85 lot umrzōł Raymond „Kopa” Kopaszewski. Ikōna fusbalu we Francji. Grocz Realu Madryt, z kerym 3 razy wygrywoł Puchar Europy. Zdobywca Złotego Bala. Synek z Noeux-les-Mines w Pas-de-Calais, regiōnu grubiorzy, gołymbiorzy i fusbalistōw. Brzmi swojsko, pra?

Niy. Niy byda samek dokopywoł sie ślōnskich korzyni „Kopy”. Tyn niywosoki synek z wybitnōm grajfkōm do fusbalu to Francuz z polskij imigranckij familie. Jego starziki wykludziyli sie z Krakowa w 1919 r. Ale niy ôni jedni… Francjo po I Wojnie Światowej fest potrzebowała siyły roboczej. Do zniszczōnych i wyludniōnych regiōnōw industrialnych zaczło sie beztōż skludzać masa ludzi ze wschodu, kerzi żyli tamek potym w swoich diasporach. Urodzōny w 1931 r. Kopa wychowywoł sie beztōż z potōmkami emigrantōw m.in. z Wielkopolski czy Ślōnska.

Pas-de-Calais to już raczyj regiōn postindustrialny. Grubiorzy biyda znolyź, ale ludzi co erbli po starzikach hodowani gołymbi a nawet ślōnsko godka idzie już spokojnie trefić. Ślōnski ślad w Pas-de-Calais ôstawiyli jednak niy yno grubiorze i gołymbiorze, ale i fusbalisty. Synki piyrszych emigrantōw szpilali już w nojwyższych ligach, a nawet klupali do reprezyntacji Francji jeszcze przed wojnōm… Nojwiyncyj do godki ślōnscy fusbaliści na pōłnocy Francji mieli jednak w latach 70-tych. Tym razym świyżo ślōnsko emigracjo. To jednak niy cufal, że nasi chopcy trefiali gynał do Pas-de-Calais.

Luft na pōłnocy Francji naszym fusbalistōm fest pasowoł. Grubski regiōn ze sztyjc silnym środowiskiym polōnijnym bōł do Ślōnzokōw bardzij „swojski”. Wartko sie tamek aklimatyzowali, ô czym ofyn godoł choby pan Achim Marx jedyn z piynciu Ślōnzokōw, kerzi reprezyntowali francuski RC Lens w latach 70-tych. W krwisto-złotych barwach grali tyż wtedy Walter Winkler, Ryszard Grzegorczyk, Werner (Paweł) Orzechowski a Eugeniusz Faber. Tyn ôstatni doczkoł sie w Pas-de-Calais (Liévin) nawet stadiōnu swojigo imiynia. Na to trza se zasłużyć czymś inkszym niż fedrowani…