Miesięczne archiwum: Kwiecień 2017

Gynał skōńczyła sie runda rewanżowo w Ekstraklasie a hneda ôstatni 7 szpilōw, w kerych Ruch Chorzōw bydzie sie musioł prać ô kożde ôko coby niy sfurgōnć. W tym kluczowym mōmyncie z Niybieskimi żegno sie tryner Waldek Fornalik, a dō nikerych Waldek King – ôstatnio nadziejo Ruchu. Tera pōmōc mo inkszo klubowo legynda…

Problymy licyncyjne, ujymne punkty, straty ważnych fusbalistōw, dłōgi, zalygłości w wypłatach itd. nazbiyrało sie tego trocha. ôdynści Waldigo to yno jedyn z cołkij litani problymōw, kere tropiōm Niybieskich. Eźli niy ôkoże sie tym gwoździym-krokwiokiym do truły? Forgot szkoda by było. Tym bardzij, że Ruch pokozoł latoś, że we fusbal grać poradzi. Naklupoł na dyć Legii na wyjeździe (1:3), wygroł tyż z Lechiōm u sia (2:1). Wtedy zdało sie, że te klocki po lekku zaczynajōm sie ukłodać i Waldi zaś rychtuje jakiś mały cud. Tera już wiymy, że Fornalik tym razym niy dokludzi Niebieskich do happy end-u…

W swoim ôświadczyniu Waldi ofyn pedzioł, że ni mōg strzimać telkij sytuacji, w kerej niy czuje sie ôn „wyłōncznie ôdpowiedzialny za wyniki”. Do tego dokludziyły bezmałaś „wydarzynia ôstatnich miesiyncy – w tym szczególnie ôstatnich dni”. To, że w Chorzowie brakuje piniyndzy i skuli tego wyprzedowo sie groczy tajymnicōm niy było nigdy. Zdało sie, że Waldi do tego przibadoł. Niydowno jednak skuli braku wypłat szprajcli sie fusbaliści i niy wyleźli na tryning. W ôstatnim tydniu prezydynt Chorzowa pokozoł skala problymu. Ruch do 15 maja musi spłacić 5 mln zł dłōgu wzglyndym fusbalistōw US i ZUS-u, coby dostać licyncjo na nastympny sezōn.

Ciekawe, że prezes Paterman na ôdynści Fornalika bōł już prziszykowany. Wartko dowiedzielimy sie, że zastōmpi go chop, kerego tak rychtyk niy trza kibicōm Niybieskich przedstawiać, to były snajper Ruchu i Panathinaikosu, Krzysztof Warzycha. Fusbalista wybitny, ale tryner sztyjc niydoświadczōny. Bydzie mioł swoji 5 minut coby sie w Polsce zareklamować, ale trza pedzieć ofyn utrzimani abo spadek tak czy tak zrobi ekipa Fornalika, chocioż już bez Waldka…

Przed ôstatecznymi rozwiōnzaniami w Lidze Majstrōw propōnuja trocha se ôd nij dychnōnć, a podziwać sie na rozgrywki na durś inkszym poziōmie. Ôbadejcie liga, w kerej jak w żodnej inkszej wre od ślōnsko-zagłymbiowskij rywalizacje, a poziōm niyprzewidywalności zaskokuje nawet starych bukmacherōw…

Ja, dzisio ô polskij piyrszej lidze. Wiym, że nikerzi ciepnōm tera tym felietōnōm w pierōny, bo wiyncyj emocji to dyć majōm na grzibach. Tej zorcie kibicōw chca spōmnieć, że z deficytym emocji w szporcie ludzie już downo nauczyli se radzić. Darymnie przeca zakładōw bukmacherskich niy wymyślili. Już w starożytnym Rzymie ludzie niy roz szli ô weta, kery gladiator „wklupie” kerymu. Ôjczyznōm bukmacherki uznowo sie jednak Wielko Brytanio. Tamek już w XVIII w. szło sie wetnōnć na wyścigach kōnnych. Biznes bukmacherōw rozfechtowoł sie jednak do porzōndku z rozwojym fusbalu na przełōmie XIX i XX w. Do terozki, trza pedzieć, jak idzie ô fantazjo przi wetach bukmacherskich, to Angliki wyprzedzajōm nas i to fest. Przi ôkazji Olimpiady w Lōndynie szło dyć wetnōnć sie, że na stadiōnie wylōnduje UFO, abo że kōmuś ôd pochodni olimpijskij hajcnōm sie włosy. Wielko haja skuli zakładōw bukmacherskich rozônaczyła sie tyż tamek i latoś, kej w szpilu ô Pucharu Anglii rezerwowego tormana piōntoligowego Sutton United chyciōł głōd. Ôkozało sie, że jedyn z bukmacherōw doł szansa kibicōm wetnōnć sie, że doświadczōny i, trza pedzieć ofyn, bachraty torman zjy w trakcie szpilu „a pie” (nadziywany maszket na słodko abo słōno). Zostało yno wyjaśnić czy był to tyn rychtyg tyn angielski „pie” czy zwykło sznita…

Bukmacherka poradzi dodać emocji fusbalowi. Ale wyboczcie, miało być o I lidze… Tamek telkich kosmiczno-spożywczych kōmplikacji niy trza. I liga to nojbardzij niyprzewidywalne rozgrywki jaki znōm. Ô awans gro latoś pora ślōnskich drużyn, a coby było ciekawij przeszkadzajōm im w tym Zagłymbioki. Ôstatnio zdało sie, że żodyn niy chce awansować. Górnik, kery zapowiado awans ôdkōnd spod z Ekstraklasy, poradzioł wygrać z Sandecjōm (2:0), coby potym przegrać z ôstatnim Kluczborkiym (2:1) i ôstatnio z Sosnowcym (1:2) po bramie z 89 min. (tyn sōm Sosnowiec przegroł wczesnij z tōm samōm Sandecjōm 5:0!). GKS Katowice sztyjc w czubie, ale sztyjc tyż sōm kōmplikuje se szanse na awans (porażki z Podbeskidziym i Sosnowcym). Gieksa i Górnik mōgłyby już sie z awansym pożegnać, ale rywale tyż poradzōm zaskoczyć. Lider z Chojnic w ôstatnij kolejce dostowo wklupane z potyncjalnym spadkowiczym, GKS-ym Tychy (1:4). I kto sam chce awansować? Aż żol tych bukmacherōw…

Ôdliczōmy ôstatni godziny do wtorkowego szwierćfinału Ligi Majstrōw. Taktyki prziszykowań do „ślōnskich derbōw” Monaco-Borussia rozmańte. Piszczek szporuje siyły Glik bydzie właziōł w szpil w cugu. Co lepij zafunguje?

Monaco wygrało w ôstatnij kolejce w Angers 1:0, a Kamil Glik rozegroł cołki szpil w ekipie lidera Ligue 1. Ni mōgło być na dyć inacy. Kamil to jedyn z nojbardzij eksploatowanych groczy w klubie. Jak yno moge to gro w podstawie. W cołkim sezōnie jeszcze ani razu niy śloz z boiska przed czasym. Tryner niy doł mu tyż se dychnōnć w ôstatnio sobota, dyć wiy że nojlepszy Glik to Glik w cugu. Ni ma co majstrować.

Der Klassiker to szpil, na kery dycki sie czeko z uciechōm. Łukasz dostoł jednak bezmałaś na beztydziyń lekkij kōntuzji kostki. Do kōńca wahało sie eźli zagro abo niy, ale w kōńcu prziszła decyzjo, że ni ma co darymnie ryzykować. Łukasz dobrze zno swoji ciało. Jak trza poradzi zacisnōnć zymby. W sezōnie 2012/13 bez długi czos tyroł na dyć na zastrzikach, skuli problymōw z biodrym. Na ôperacjo dogodoł sie dopiyro po sezōnie. Kej zdało sie, że już niy wrōci, ôn po lekku ôdbudowywoł forma. Głōd fusbalu dycki mu pōmogoł. Po ôbejrzyniu jak Bajeroki rozônaczajōm Borussia 4:1, wyposzczōny Piszczu wylezie na Monaco w podstawie…

To bydōm piyrsze ślōnski derby na telkim etapie LM i niychby było takich wiyncyj! Poru naszych synkōw mo tera rychtyk pewny plac we wielkich klubach europejskich. Tōż jako powtōrka ślōnskich derbōw w LM za rok czy 2 je fest prowdopodobno. Szanse rosnōm. Piszczek szkryfnōł gynał nowy kōntrakt z Borusssiōm do kōńca czyrwca 2019. Dziynnikorski klachule niy roz widziały już Łukasza w Realu, Barcelōnie czy Liverpoolu. Tera to już chyba kōniec fandzolynio. Łukasz ofyn godo, że rod skōńczy kariera w BVB, klubie kery regularnie szpilo w LM.

Telko ôferta moge przebić już yno… LKS Goczałkowice, macierzysty klub Piszcza z ligi okryngowej. Ligi Majstrōw tam mono i ni ma, za to ślōnski derby sztyjc…

Gynał tydziyń tymu spōminołech, że z siedmiu fusbalistōw powołanych ôstatnio do polskij kadry, żodyn ni ma ze Ślōnska. Pyndziałkowe derby Ruchu i Piasta kożōm sie zastanowić eźli trynery ôstatnich ślōnskich klubōw w ekstraklasie dowajōm chocioż szansa Nawałce pozaglōndać na jakiś naszych synkōw, kerzi byliby co we werci?

Trza zaczōnć ôd tego – Ruch i Piast w tym sezōnie walczōm sztyjc w dolnym kōnsku tabeli, a mōmyntami realno robiyła sie groźba, że latoś Ślōnsk pozbydzie sie z Ekstraklasy ôbydwu swoich drużyn. Ôstatnio jednak nad Chorzowym i Glywicami wylazła klara i zablindowało nadziejōm, kej Ruch i Piast wygrały swoji 2 ôstatni przedderbowe szpile. Serio Niybieskich je nawet lepszo. Latoś przegrali yno z Cracoviōm, niyskorzij już sztyjc punktowali, a po drōdze wklupali Legii we Warszawie (3:1) i Lechii u sia (2:1).

W ôstatnij kolejce Ruch w piyrszej 11-stce wystawiōł dwóch wychowankōw (Michał Helik z Chorzowa i Maciej Urbańczyk z Mikołowa) a w sumie sztyrech Ślōnzokōw (plus Martin Konczkowski z Rudy Śl. i Łukasz Moneta z Raciborza). Poradziesiōnt lot do zadku telki wynik bōłby słaby, ale tera inksze czasy –sztyjc sie zmiynio kluby. Tym bardzij na tle rywala ni ma sam gańby. Liczba wychowankōw i groczy ze Ślōnska w piyrszym składzie Piasta to 1 (Radek Murawski z Glywic).

Wszyjski spōmniane samek Ślōnzoki z Ruchu i Piasta to mode synki. Toć, Nawałka powołań im jeszcze niy wysyło. Ni ma jednak prowdōm, że ślōnski kluby ni majōm swoich kadrowiczōw. Na ôstatni szpile reprezyntacji Polski U-21 pojechało na dyć sztyrech groczy Ruchu (Helik, Moneta, Niezgoda, Lipski) i jedyn z Piasta (Murawski).

Tōż coby podsumować… Forma w ôstatnich szpilach – punkt do Ruchu, fusbaliści w reprezyntacji – lepszy Ruch, inwestycje w wychowankōw i chopcōw ze Ślōnska – tyż na plus do Niybieskich. Wartki przedderbowy bilans pokozuje 3:0 do synkōw z Chorzowa. Jak sie to mo do pyndziałkowych derbōw [tekst ôddany do druku przed szpilym]?