Archiwa kategorii: Bez kategorii

Niy trza być wielkim szpecym coby wiedzieć, że na Mundialu ô dobry wynik biyda bez nutki szczynścio. Jakby to padoł uja Ojgyn z Rajchu trza mieć „throschka Glück’a”. Polsko kadra już na sztarcie jednak Glück’a (abo jak wolicie: Glika) straciyła. Z rozmańtych powodōw na ausie znodło sie w sumie aż 5-ciu Ślōnzokōw przimierzanych na Mundial.

Wrōca do Kamila Glika, bo to tera medialny tymat nr 1. Badania w Nicei potwierdziyły to co padali już dochtory polskij kadry. Ni ma dobrze, ale fōrtka na Mundial ni ma jeszcze durś zawarto. Jedne je pewne, synek z Jastrzymbio zrobi wszyjsko coby w Rusach poszpilać. Na finał bydzie tyroł jak mody sornik, gorzij jak Poloki niy wylezōm z grupy… Dalsze analizy jego kōntuzji wolołbych se darować, bo już za tela fandzolynio w mediach na tyn tymat. Jedyn ze szpecōw ofyn uznoł nawet, że Glik próbōm szlagu szkopyrtkōm przi siatkonodze za fest „przigwiazdorzył”, dyć żodyn ś niego Pele ani Cristiano. I nojlepsze: „ktoś powiyniyn pedzieć Kamilowi coby sie niy wygupioł”. Toć! Czamu kej Glik wybijoł sie do luftu, tryner niy padoł mu: „Kamilku, niy skokej tak, bo se ała zrobisz”. Jo sie pytōm, kaj wtedy bōł sztab szkolyniowy? Czamu fojermōny niy rozônaczyły ôchrōnnej plały? Czamu Jacek Gmoch niy rozrysowoł Kamilowi dobrego kōnta natarcio do zola? Skandal i ôstuda!

Jednak, pierzina, poniōsło mie i pojechołech z analizōm kōntuzji na trzi sztwierci felietōnu jak kożdy szanujōncy sie „szpec fusbalowy”. Kōntuzjo Glika przićmiyła już praje durś ôstateczne wybory kadrowe Adama Nawałki, a te do Ślōnzokōw mōgły być lepsze… Na Mundial niy pojadōm mody pōmocnik Górnika, Szymon Żurkowski i torman Romy Łukasz Skorupski. Skuli wielkij rywalizacje w ataku juz pryndzyj ôdpod Jakub Świerczok (Łudogorec). Na kōniec skreślōny ôstoł Kamil Wilczek (Brøndby). Jego duński tryner już pryndzyj godoł, że jak Wilczek niy pojedzie to znaczy, że Poloki majōm forma na Majstra. Przesada? Chyba ja, ale ôbadōmy. Milik, Piszczek i… Glik sztyjc w grze.

Po bosoku na rżysku, w trampkach po hasiōwie, w sztolach po kretowinach. Bramy na wartko z pukeltaszōw, abo profesjōnalne z drzewa, włosnymi rynkami pōłlegalnie załatwiōnego na rapsie w lesie. Linie z piosku, nece z gardinōw, bale ze szmatōw…

Rozmańte bywajōm poczōntki wielkich i niywielkich fusbalistōw. Zdo sie, aże jeszcze poradziesiōnt a nawet poranoście lot do zadku trza było mieć trocha wiynkszo wyôbraźnio coby do porzōndku poszpilać. Ańfachowe warōnki to jednak niy przeszkoda, a samo uciecha. Niy zrozumcie mie źle. To że infrastruktura szportowo rośnie, dziecka szpilajōm na „orlikach” co wieś, co ôsiedle to yno plus. Ôbojyntnie kaj bajtle zaczynajōm przigoda z fusbalym, ich marzynia sōm na sia podane, a finałowōm ich scyneriōm porzōndny stadiōn.

Gynał skōńczoł sie XVIII turniej „Z podwórka na Stadion o Puchar Tymbarku”. Wielkigo finału doczkalimy sie 2 moja na PGE Narodowym we Warszawie. Tamek poznalimy nojlepsze w Polsce drużyny synkōw i dziołchōw we wieku 10-12 lot. Turniej finałowy zaczōn sie tak rychtyg 29 kwiytnia. Do Wa-wy przijechały 64 nojlepsze drużyny w Polsce. To bezmałaś nojwiynkszy telki turniej fusbalowy do bajtli w cołkij Europie. Już same zagrani na telkim stadiōnie, pod ôkiym nojważniejszych ludzi fusbalu w tym kraju i z ôtoczkōm dziynnikorzy a profesjōnalnych kōmyntatorōw to do dziecek coś ekstra. Mono znojdōm sie sam gwiozdy fusbalu (w tym turnieju zaczynoł choby Arek Milik)? Nawet jak niy to nic, tak rychtyg liczy sie uciecha!

Doś fandzolynio, dyć szport to wyniki. Ofyn trza pedzieć, że w kategorii synkōw ślōnski ekipy turnieju tym razym niy zawojowały. Hōnoru Ślōnska brōniyły dziołchy. We kategorii do 10 lot drugi plac do KKS Katowice. Ôńskigo roku we finale KKS wygroł z Beniaminkiym Krosno, tera przegroł ś nimi majstra po elwrach. 3. plac w kat. dziołchy do 12 lot zrobiōł za to Sprint Katowice. Indywidualnie nojlepszōm tormankōm do lot 10 Ula Kopacz z KKSu. Forza frele!

1848. Uniwersytet we Oksfordzie publikuje piyrszy na świecie spis przepisōw fusbalu. Hneda tyn szport sie jednak zmiyni… 1866 – przepis ô spolōnym. 1878 – syndzia dostowo gwizdek. 1883 – bramy majōm laty. Nowoczesny fusbal powstoł w Anglii i tamek tyż rodziyły sie piyrsze przepisy a fusbalowe nowinki technologiczne.

Nojważniyjsze sie niy zmiynio, ale w świat fusbalu sztyjc wlazujōm nowości i sztyjc trza ich szukać na Zachodzie. Patyntōw na Goal Line Technology było pora, ale FIFA w 2013 postawiyła na projekt Nimcōw. Systym powtōrek VAR piyrszy roz przetestowali w 2016 w USA, a hneda na sparingu Włochy vs Francjo. Niydowno rozkulała sie nawet haja ô syndziowsko „pianka do golynio” (hit ôd Mundialu 2014). Brazylijski wynolozca chce ôd FIFA 100 mln $ ôdszkodowanio, bo bezmałaś ukradli mu patynt… Dobre pōmysły zmiyniajōm szport, a i pōmogajōm prziszporować. Czamu niy wymyślymy czego sami?

Ślōnzoki ôstatnio fest punktujōm w szportowych nowinkach technologicznych. W 2017 sztartło Ludmo. To mobilno aplikacjo zrychtowano bez dwōch Katowiczokōw. Styknie pobrać jōm na smartfōna, kerego wrażo sie do ekstra ku tymu zônaczōnej koszulki tryningowej. Ludmo godo kaj, jak wartko i wiela loce grocz. Wiela stoi, wiela szpacyruje, eli kopie prawōm abo lewōm nogōm i jak fest. Wszyjsko przeliczo i dowo porzōndno analiza jak w inkszych profesjōnalnych programach, yno rychtyg po tanimu. Rewolucyjny patynt do mynij bogatych klubōw i amatorōw.

Jak już ô amatorskim szporcie godka… Synki ze Żorōw i Ôrzeszo majōm coś ekstra do wos! Jeszcze w 2017 sztartła ich darmowo aplikacjo Chaliso. Pōmogo ôna zebrać ekipa na szpil rozmańtych zortōw szportu ôd fusbalu bez jazda na kole po szachy a scrabble. Rychtujesz zdorzynia szportowe, zbiyrosz ekipa, trynujesz. Proste. Praktyczne. Profesjōnalne. Ôd niydowna we angielskij wersji jynzykowej coby podbić Zachōd. A tera – pozōr! Chaliso gynał debiutuje po ślōnsku (przekłod GB)! Ôbadejcie sami a chytejcie sie trynowanio!

https://app.chaliso.pl/

Gynał 2 tydnie tymu polski fusbalisty wywalczyli 3. plac na Euro po tym jak klupli Hiszpanōm 3:1. Telko synsacyjno zdałoby sie wiadōmość w mediach jednak za fest sie niy wyônaczyła na światło dziynne…

Godka jednak o Amp fusbalu, szporcie sztyjc młodym, chocioż to tak rychtyg zwykły fusbal z tym, że po szpilplacu tyro sie ô berłach, a fusbalistami sōm szportowcy z jednōm nogōm (wyjōntkiym jednorynki torman). W Polsce szport tyn po leku chyto szwōng. Latoś w Ekstraklasie grało yno piynć klubōw (w tym nimiecki Hoffenheim), ale już na bezrok fusbalistōw na berłach w ôficjalnych rozgrywkach przibydzie. Tōż tera pytani, kerego ni moge braknōnć. Kaj nasi?

Ślōnsk tradycje fusbalowe mo wpisane w DNA. Mapa regiōnu z wiyrchu na dōł wysztrykowano klubami, tōż i w amp fusbalu biołym flekiym niy bydymy. W sezōnie 2007 trzeci plac w Ekstraklasie zebroł klub ze ślōnskigo pograniczo, Kuloodporni Bielsko-Biała. Ale pozōr, bo rośnie im kōnkuryncjo praje w cyntrum ślōnskij aglōmeracji. Ôd marca trynujōm, na dyć ampfusbaliści Szōmbierek Bytōm. Na razie Szōmbierki i Kuloodporni dobrze wspōłprocujōm. Bytōmioki wypożyczyli nawet dwōch swoich groczy do Bielska-Białej na finałowy turniej sezōnu 2017. Na bezrok jednak miyndzy Szōmbierkami a Bielskiym zacznie sie regularno haja ô punkty.

Żodyn niy pedzioł że bydzie lekko. Na poczōntku paździyrnika była już godka ô rozwiōnzaniu Amp Fusbalu Szōmbierek. Terozki tyn news już bezmałaś niyaktualny, ale klub sztyjc tropiōm rozmańte problymy. Dalij szukajōm spōnsorōw i (co nojważniejsze) fusbalistōw… Beztōż pozōr! Szportowcy bez nogi chytejcie sie granio! Ni ma ale… Dyć w Szōmbierkach szpilajōm niy yno Bytōmioki i niy yno chopy. Swoich krykofusbalistōw posłały haniok tyż Glywice, Żory czy Świyntochłowice, a w składzie zielōnych jes tyż i kobiyta.

Niych was niy bydzie gańba! Na zachynta… Jak Szōmbierki rychtyg wlezōm do Ekstraklasy bydōm tamek nojbardzij ropoznowanōm markōm, na dyć to majster Polski z 1980!

Downo, downo tymu kej za tyrani za balym szło zarobić co nojwyżyj szacunek kibicōw a transfery robiyło sie za krzinka piwa i wōszt (ciekawe wiela piwa i wōsztu idzie kupić za 222 mln euro?) bōł taki szport… „rychtyg fusbal”.

„Rychtyg fusbal” to terozki już szport praje na wymarciu. Ôd profesjōnalnego fusbalu rōżni go podstawowo zasada „grōmy yno do uciechy”. W XXI w. mało kōmu beztōż telki szport już ôdpowiado, pomału smolōm go nawet „wielki fusbalisty” z B-klasy. Uciecha to za mało. Piniōndze! Na szczynści kożdy kalyndorz mo dni wyjōntkowe. Sōm jeszcze telki dni kej na szpilplac wyłażom nojlepsi szportowcy i gwiozdy, kerzi niy szpilajōm z myślōm ô swojij kapsie. Grajōm do uciechy i co nojważniejsze coby pōmōc inkszym.

Telki dziyń trefiōł 9 września. Legyndarny Kosmiczny Szpil przikludziōł na stadiōn ROWu Rybnik kole 5 tys. kibicōw i fol gwiozd. Na szpilplacu do haji stanyli szportowcy vs kabareciorze z kamratami. Dōminowali Ślonzoki, ale niy brakło wybitnych auslyndrow. Tak to u szportowcōw zagrali Dariusz Gęsior, Marcin Baszczyński i grocze ROW-u (np. Sebastian Musiolik), ale tyż Marcin Wasilewski, czy Jerzy Brzęczek. Niy brakło reprezyntantōw inkszych dyscyplin. Sam nojwiynksze nazwiska to Plawgo (lekkoatletyka), Gacek (siatkōwka) a Woryna (żużel). W kabareciorzach Ślōnsk reprezyntowali ôrganizatory – rybnicki Kabaret Młodych Panōw, pōmogało im Radio 90 i zespōł Myslovitz a nawet sōm Adam Małysz. Z auslyndrōw – gwiozdy kabaretu Tōmek Jachimek i Ewa Błachnio.

Teoretycznie wiymy kto lepij kopie do bala, ale w telkim szpilu ô faworytach sie niy godo. Zresztōm niy yno szpil bōł tego popołednia atrakcjōm. Sōm wjazd groczy na stadiōn na wypasiōnych motorach autach i… traktorze robiōł wrażyni. Niyskorzij rozgrzywka w rytmach zumby, do kerej skokoł cołki stadiōn! Poza fusbalym dziwalimy sie na rajzy żużlowcōw i rajdowcōw. Piniōndze zaszporowane na imprezie przekozane sōm Fundacji Piątka.

Samo uciecha! „Rychtyg fusbal” sztyjc żyje!

Po słowach Marco van Bastena zawōniało rewolucjōm. Były snajper a terozki szef kōmisji FIFA ds. rozwoju fusbalu ofyn godoł w ôstatnim tydniu ô swoich wizjach „fusbalu prziszłości”. Likwidacjo spolōnego, akcje sōm na sōm zamiast serii elwrōw abo wykluczynia minutowe to yno nikere z jego rewolucyjnych pōmysłōw…

Tukej niy zaskocza, reprezyntanci Ślōnska wielkigo wpływu na kształt dyscypliny nigdy ni mieli. Nojważniejsze reguły fusbalu kształtowały sie w XIX w. w Anglii. Tamek już w poczōntkach stulecio popularno była gra w bal, w kerej hneda zakozali używanio rōnk. Piyrsze przepisy fusbalowe wydoł Uniwersytet w Oksfordzie już w 1848 r. Zasada spolōnego ôpisano i wkludzono bōła w 1866. W 1883 bramki ôgraniczyli z wiyrchu latōm. 1885 r. to ustalyni liczby fusbalistōw na szpilplacu a 1890 r. poczōntek przepisu ô elwrze. Wielki zmiany wkludzane były po lekku a niyskorzij w XX w. zasady fusbalu bōły już na tela „dokōńczōne”, że mogymy godać raczyj yno ô korektach.

Widzymy beztōż, że nikere propozycje van Bastena bulōm porzōndek, kery fungowoł bez ponad 100 a nawet 150 lot. Reakcje na te projekty sōm rozmańte, tyż na Ślōnsku. Nikere ś nich majōm fol fanōw i na pewno werci sie ni rozwożyć (np. minutowe wykluczynia). Inksze sōm zaś tak kōntrowersyjne, że szpece i pseudo-szpece już wdowajōm sie w haje. Eźli likwidacjo spolōnego uatrakcyjni szpile czy raczyj zredukuje taktyka do „kopej a leć”?

Ślōnzok bywo kōnserwatywny, ale historio nauczyła go, że trza przibadać do rozmańtych decyzji „ważniejszych”. Jak uzno FIFA tak bydzie i u nas. Niy szprajcnymy sie. Ale spokojnie… Kōnserwatywni sōm tyż Brytyjczyki, a przi tym niyradzi zmiyniajōm stare zasady i sztyjc sōm majōm swoji do godki. Coby przisztymplować zmiany przepisōw zgoda musi dać IFAB, ôrganizacjo, do kerej noleży Anglio, Szkocjo, Walio, Irlandio Płn. i 4 inksze zwiōnzki nōminowane bez FIFA. 75% głosōw musi być na ja. Bez Brytyjczykōw Van Basten i jego kōmisjo sami fusbalu niy zmiyniōm.

Nocka jeszcze dłōgo wygrywać bydzie z dniym, ale hneda klara zacznie coroz dłużyj świycić. Przełōmowy mōmynt w cyklu rocznym. Ludzie dycki uznowali telki czos za wyjōntkowy. Tak było u nos niż prziszło chrześcijōństwo i tak je terozki, kej gynał w tych dniach fajrujymy Pōnbōczkowe Narodzyni. Kōńczy sie stare, idzie nowe – nojlepszy mōmynt na rozmańtej zorty wrōżby. Bezmałaś jak bez wilijo tak bez cołki rok…

Pozwolyłech se po kōnsku ôdkopać tymat sprzed roku i nawet zaczōnć podobnymi słowami. Wyboczcie. W lufcie zaczyno po lekku wōniać kaprami i moczkōm, tōż erbło mi sie trocha tej atmosfery czasu, kery chocioż cyklicznie sie powtarzo rok w rok i zdo sie fest przewidywalny, sztyjc fascynuje, dycki niesie kōnsek tajymniczości. Czas na podsumowania, postanowiynia, wrōżyni prziszłości.

Wypado mi sie tyż rozliczyć z ôstatnigo wrōżynio. Kōńcōwka 2015 zapowiadała nic yno sukcesy. Wszyjscy ślōnscy ekstraklasowcy powygrywali swoji szpile przed wilijōm. Górnik zaczōn ôdbijać sie od dna. Ruch trzimoł sie wiyrchu, a Piast kludziōł w tabeli i szoł na majstra. Bramy Milika i Podolskigo zapowiadały ciekawo rywalizacjo Polski z Nimcami na Euro.

Trza ofyn pedzieć, że na wiosna niy wszyjsko pokulało sie tak jak miało. Piast na samym finiszu doł sie ściepać z piyrszego placu. Górnik do ôstatnij kolejki liczōł, że niy sfurgnie – niystety. Ruch cudōw już niy pokozoł. Co do szpilu Poloków z Nimcami to tamek gynał bramōw niy było (chocioż Milik pora lagōw mioł). Ôbie reprezyntacje wylazły jednak z grupy i pokozały sie niynojgorzij. Polocy skończyli Euro na szwierć- Nimce na pōłfinale.

W drugij połowie roku tyż nōm sie niy mierzło. Podolski kōńczy z reprezyntacjōm. Milik w Napoli. Glik w Monaco. Kōntuzjo Arka. Klose idzie na pyndzyjo. Trzech Ślōnzokōw 1/8 Ligi Majstrōw. I na deser forgot klasyk – finansowo-szportowo-ôrganizacyjnych problymōw Ruchu ciōng dalszy. Chocioż… Ôstatni szpil Niebiescy wygrali. Mono powrōżymy?

22 lipca 1956. „Wielki dzień całego społeczeństwa województwa stalinogrodzkigo”. Ôtwarty zostoł ôbiekt zbudowany jak sie wtedy godało „pracą, wysiłkiem i ofiarnością społeczeństwa śląskiego przy wydatnej pomocy Partii i Rządu”. Mogymy terozki podśmiywywać sie z tego propagandowego fandzolynio, ale zbudowani telkigo 100-tysiyncznika było wtedy ôsiōngniynciym, kere docyniali i kerego nawet zowiścili na Zachodzie. Budowa Stadiōnu Ślōnskigo zetrwała 3 lata i 4 miesiōnce…

Gynał mijo 7 lot ôd ôstatnigo szpilu na Ślōnskim. W szporcie to forgot epoka. W tym czasie Michael Phelps zdobył 12 medali olimpijskich, Arek Milik 5 razy zmiyniōł klub a San Marino klupło brama Polsce w eliminacjach do Mundialu. Jakby sie niy dziwać w słusznie miniōnym systymie budowa stadiōnu zetrwała 2 razy krōcyj niż sztyjc niydokōńczōno modernizacjo w XXI wieku. Straciylimy Euro’12, fol czasu i fol piniyndzy. Zdałoby sie, że szpil nowego ôtwarcio Stadiōnu Ślōnskigo bōłby w telenoweli ô jego przebudowie wydarzyniym na miara zmartwychwstanio Hanki Mostowiak. Niyjedyn zwōntpiōł że tego doczko.

Mogymy tak fandzolić, wynokwiać i wyśmiywać sie bez kōńca. Beztōż hamuja, bo hneda poradzilibymy dōnś do starego motta pt. „za kōmuny było lepij”. Niy ô tym dzisio. Ô Ślōnskim pisza w tym tydniu niy bez cufal. Dyć stadiōnowo telenowela przeżywo gynał ważne (przełōmowe?) mōmynty. W ôstatnim tydniu Ministerstwo Szportu szkryfło ze Stadiōnym Ślōnskim umowa na dofinansowni na wkludzyni na ôbiekcie funkcji lekkoatletycznej. Tym knifym w Chorzowie bydymy mieli stadiōn I klasy IAFF przirychtowany do rozgrywanio nojwiynkszych imprez w lekkij atletyce. Ministerstwo Szportu ciepnie na to 10 mln zł. Do tego trza jeszcze znolyź jakiś nastympne 20 mln, ale gynał to przi setkach miliōnōw zainwestowanych w Ślōnski, wielkigo wrażynio już niy robi.

Bezmałaś kōniec telenoweli przewidziany je gynał za rok, 30.09.2017. Rychtyk?

Euro wkulało sie w kluczowo faza. Terozki kożdy, nawet nojmyjszy cufal, majtniynci sie z balym czy szlag życio mogōm decydować o zostaniu w turnieju abo prziśpieszōnej rajzie du dōm. Ni ma ugodowych rozwiōnzań, ni ma rymisōw. Sōm za to elwry.

„Kiedyś to było klarowne. Szpil otwarcio, szpil o wszyjsko, szpil o honor. Kōmu to zawadzało? Ciynżko się zmiynio przizwyczajynia”. Prezes PZPN-u mo recht. Przibadali my do telkigo schymatu gry Polokōw na wielkich turniejach. Latoś jednak kulo się to durś inaczej. Pewniaki Nawałki, tōż Glik, Milik a Piszczek gynał załatwiyli se bilety do szwierćfinału. Do tego trza dociepać rezerwowego u Joachima Loewa, Łukasza Podolskigo i mōmy we Francji kōmplet sztyrech Ślōnzokōw, kerzi sztyj sōm w wielki grze.. Bioło-czerwoni po wyciepaniu z turnieju Szwajcarōw pucujōm już fusbaloki na Portugalio. Doczkali my sie masy emocji, a przi tym zaś trefiyło nōm sie dziwać na historyczne mōmynty, o kerech ni mogli my usłyszeć ani w żodnej historyjce z serii „a pamiyntosz jak w 1974…?”.

Ale po kolei. 1976 rok. Finał Euro. Piyrszy roz w historii o tytule majstra decyduje serio elwrōw. Po ostanim szlagu Antonina Panenki Czechosłowacjo wygrowo z RFN-ym 5:3. Nimce rehabilitujōm sie 6 lot niyskorzij, w piyrszej serii elwrōw w historii Mundialu wygrywajōm pōłfinał z Francuzami. Nimce bohatyrami serii elwrōw bywali niy roz, ale żodyn, ale żodyn Ślōnzok przi tymu niy zasłynōł. Kadra Polski co to elwry w poważnym szpilu tak rychtyk do niydowna ni miała pojyncio. Coby obadać naszych synków w tej wyjōntkowej fusbalowej wojnie nerwōw trza było nōm beztōż czakać aż do ostatnij soboty.

Nazod w Saint-Etienne. Sobotni wieczór. Luft gynstnieje. Pot sie leje. Ciśniyni idzie w gōra. Warunki bez godki niy do ludzi, kerzi ciyrpiōm na hercklekoty. Dopiyro terozki dowiadujymy sie komu tryner nojbardzij w tej drużynie ufo, za kogo je pewny, że niy kopnie o kretowina. 5 szlagōw – 5 goli. Jednymi z autorów nastympnego rozdziału elwrowej historii Milik z Glikiym. Szkryflejcie dalij…

Nastympny tydziyń Euro za nami. U nas nojwiynksze emocje zwiōnzane bōły z czwortkiym. Polska – Nimce to dycki szpil wyjōntkowy. Ślōnscy i Polscy kibice wiōnżōm ś nim specyficzne emocje. Tym bardzij kej gra je ô poważne punkty.

Nimce w polskij narracji historycznej ni majōm lekko. Ni ma co godać – trocha „napochali”. Jako by historio niy była, to gynał polsko kinymatografio z Nimcami umi se poradzić. Ôd Krziżakōw po Hansa Klosa i Sztyrech Pancernych… Nimce ni majōm lekko. Lata lecōm, epoki sie zmiyniajōm, ale potrzeba pokōnanio, rozklupanio i rozônaczynio Nimca w Polsce je sztyjc aktualno. Na szczynści terozki rywalizacjo kulo sie już yno na szpilplacach. Chocioż Polocy radzi ôdwołujōm sie przi ôkazji szpilōw z Nimcami do historie. Ni ma ôpcji coby w telkij sytuacji w mediach niy spōmnieliby ô bitwie pod Grunwaldym. Trza sie na dyć dowartościować. Tak stwierdziyło tyż latoś TVP, beztōż w czwortkowy wieczōr pokozali „2 szpile Polokōw z Nimcami”, z czego przinajmij jedyn musioł być wygrany. Ulrich von Jungingen już na sztarcie mioł słabe typy u bukmacherów…

Fusbal rzōndzi sie jednak swoimi prawami. Tukej nie tak lekko pokōnać Nimca jak w filmie. Bywało rozmańcie. Ślōnzoki niy roz grywali tamek głōwne role. W latach 30-tych knify na Nimcōw w reprezyntacji Polski poradziyli znolyź yno Hanysy – Wilimowski, Pazurek, Wodarz i Peterek. Ôd bramy tego ôstatnigo w 1938 mniyło 70 lot aż nastympny Ślōnzok w polsko-nimieckij kōnfrōntacji trefiōł do neca. Dwie bramy Łukasza Podolskigo, dały na Euro 2008 wygrano Nimcōm. Trza było doczkać jeszcze 6 lot na brama bioło-czerwōnego Ślōnzoka. Zaś historyczny mōmynt – eliminacje do euro 2016. Arek Milik szczylo na 1:0 i Polsko piyrszy roz wygrywo z Nimcami.

Cufal zadecydowoł, że Polska i Nimce zaś trefiyli na sia w Euro. Tym razym bez goli, chocioż Milik ewidyntnie mioł szmaki. Nic yno trefić w bal… Ale mono jeszcze niy po ptokach? Eźli Poloki i Nimce niy stanōm hneda do nastympnej historycznej haji?