Archiwum kategorii: Bez kategorii

Skōńczōł sie sezōn Ekstraklasy. Przinajmij bez nojbliższe 2 tydnie na Ślōnskim Fusbalu niy bydōm sie pokozywać nowe wpisy…

Paczcie tam jako i do zaś!

GB

Na tym propōnuja dzisiej skōńczyć. To ostatnio relacjo w ramach „Szpilu miesiōnca” w tym sezōnie. Tōż dziynkuja piyknie i do zaś…

Legia mono i była lepszo, co potwierdzajōm tyż choby statystyki szlagōw, ale Piast na pewno na 4:0 w pleca niy zasłużōł. W piyrszej połowie prezyntowoł sie forgot dobrze.

Legia wygrywo i je o 3 punkty i wielki krok bliżyj majstra.

90+3 min. – Kōniec.

90+2 min. – Jeszcze Piast z roga. Walka o hōnor…

90+1 min. – Syndzia koże grać jeszcze 3 minuty.

89 min. – Piast sztyjc próbuje, ale defynsywa Legii biyda dzisiej zaskoczyć.

87 min. – Laga Legiōnistōw. Nikolić majtnōł sie i bal minōł słupek bramy Szmatuły.

86 min. – Badia próbowoł prostopadłego bala do ataku, ale przeczytali to obrōńcy.

85 min. – Szeliga próbowoł tera ofōmlować dwóch obrōńcōw. Na próbie sie skōńczyło.

84 min. – Fusbaliści obu ekip radzi byliby już chyba pod prysznicami…

82 min. – Mraz cyntruje z wolnego. Legia wybijo.

81 min. – W Legii Michał Masłowski za Kucharczyka

81 min. – Sapała wartko odnotowoł sie w hefcie syndzigo. Szkoda yno, że żōłtōm kartkōm.

80 min. – Nespor szczylo po długim rogu! Wele słupka.

79 min. – Śloz Vacek. Tym razym to niy bōł jego szpil. Na boisku Igor Sapała

77 min. – Nastympne zmiany. Vranjes za Jodłowca. Szykuje sie tyż swiyży grocz Piasta.

76 min. – Kucharczyk z roga na długi słupek. Piast sprzōnto.

75 min. – To trza było widzieć. Parada Szmatuły bōmbōn!

73 min. – Zmiany w Piaście i Legii. Ślezli Mak i Guilherme.

72 min – Piast w szesnostce Legii. Podwojōne kryci. Nic z tego niy bydzie.

71 min. – Wōm tyż odechciało sie dziwać na tyn szpil…?

70 min. – Nikolić i brama. Tera już chyba durs po ptokach.

69 min. – Elwer! Guilherme na zolu. Śmieje sie z decyzji syndzigo?

67 min. – za głymboko cyntra Piasta. Malarz pewnie chyto.

66 min. – Guilherme na zolu. Pōmoc medyczno na murawie. Zaczyno sie gra na czas.

65 min. – Wiyncyj placu mo Legia przi kōntrach, ale za wiela groczy niy cisnie sie do przodku.

64 min. – Legia na wyjazd. Piast musi ukłodać nastympny atak.

63 min. – Mraz opanowoł bal po długij cyntrze i szarpnōł skrzidłym. Rōg.

62 min. – Kucharczyk klupnōł z ciynzkij pozycji. Bal fōrt w trybunach.

61 min. – Korun faulowany przez Guilherme. Piast zaczyno ze swojij połowy.

60 min. – Bukata dobrze odebroł bez co mōg za chwila klupnōnć na brama. Malarz wybijo na rōg.

59 min. – Syndzia zapraszo dwóch groczy na klachy

57 min. – Mraz wybijo na rōg. Za chwila po cyntrze torman pewnie chyto bal.

56 min. – Barisić włazi za Zivca. Napastnik za napastnika.

Przegrano presa Vacka w środku pola i Legia wylazła z przewogōm. po dograniu Kucharczyka, Hamalainen wraziōł bal juz praktycznie do pustej bramy.

54 min. – 3:0!

52 min. – 2 na 2 wylazła Legia!. Szlag Hamalainena brōni Szmatuła.

51 min. – Tera Legia z ausu przi rogowej fance na połowie Piasta. Jędrzejczyk chcioł głymboko wciepnōnć bal pod brama, ale obrvna wyczyściyła.

50 min. – Hebert kepkōm po cyntrze z roga! Niy trefiōł czysto.

49 min. – Legia ewidynti odpuściyła wysoki pressing. piast mo wiyncyj placu

48 min. – Chycōny na spolōnym Zivec.

47 min. – Rykoszet po szlagu Szeligi i bal z biydōm dokuloł sie do tormana.

46 min. – Zaczła Legia, ale wartko straciyła bal. Szmatuła wkludzo go na nowo do gry.

Fusbaliści już na szpilplacu. Hneda zaczynōmy.

45+1 min. – To była brama do szatni. Piast niystety przegrywo. Szkoda bo Legia klupła drugo brama, w mōmyncie kej Piast zaczōn ich bardzij cisnōnć.

Guilherme niyuwachowany w szesnostce. Przijōn i wycylowoł gynał pod lewy słupek.

45 min. – Brama i już 2:0!

44 min. – Szuko tera Piast rozmańtych knifōw na obrōna Legii. Na razie gospodorze se radzōm.

43 min. – Zivec na zolu. Elwer? Syndzia koże grać dalij…

41 min. – Kiery to już rōg Legii? Na szczynści tym razym kōńczy sie niygroźnie.

39 min. – Bez godki nojlepszo laga piasta. Bal w szesnostce wycofany piyntkōm. Dograni do srodka na 11 meter i próba szlagu Vacka, po kierej niy wiadōmo czamu kamil dostowo żōłto kartka.

38 min. – Agresywnie z przodku Guilherme. Efekt? Piōnty meter.

37 min. – Piyknie Piast rozgrywo tera bal po cołkij szyrokości boiska. Na razie niy dowo to jednak wiynkszych efektōw.

36 min. – Ewidyntny spolōny Nikolicia

34 min. – Zawōniało dobrōm lagōm po stracie Legiōnistōw. Brakło jednego dokładnego podania i Nespor bōłby sōm na sōm z tormanym.

33 min. – Przi cyntrze niyuwachowany jodłowiec. Na szczynści niy wykorzystoł tego błyndu gliwickij defynsywy.

32 min. – Hebert za fest wypuściōł se bal i szczasnōł sie z przeciwnikiym. faul.

31 min – Groźnie po cyntrze. Szlag z ostrego kōnta zablokowany

30 min. – 30 metrōw od bramy faulowany Pietrowski. Guilherme psioczy na syndzigo.

Po nastympnej cyntrze z roga fest zamloło sie na piōntym metrze. Dużo było w tym cufalu, ale bal znod sie w necu. Brama zapisano Igorowi Lewczukowi.

28 min. – 1:0!

26 min. – Serio zablokowanych szlagōw Legii. Gospodorze majōm coroz wiyncyj do godki.

25 min. – Legia praje wylazła 2:2. na szczynści dograni Hamalainena zablokowane.

24 min. – Trocha ping-pōngu przed szesnostkōm i szlag Hamalainena. Dobrze chyto Szmatuła.

23 min. – Aus do Piasta i fol walki w środku pola.

21 min. – Zaś z roga gospodorze, kieryś z ich groczy siōngnōł bal gowōm, ale tyn polecioł w przeciwnym kierunku od bramki.

20 min. – Po rogu Legii w szesnostce Piasta zrobioł sie miszōng, kiery trwoł dobrych pora sekund

19 min. – Kucharczyk przeciepoł se bal za zawodnikiym Piasta, ale niż go oblecioł „wyjazd” zrobiōł obrōńca.

17 min. – Nespor agresywnie presuje tormana Legii. Bōł forgot blisko odebranio mu bala.

16 min. – Bal „miōd-malina” po pisce Pietrowski-Nespor. Napastnikowi Piasta bal zamatloł sie jednak miyndzy szłapami. ostatecznie klupnoł jeszcze na bramka, ale tormana ni mōgło to zaskoczyć.

14 min. – Na zolu Hebert. Guilherme chcioł go spresować, ale za niyskoro wraziōł szłapa i faulowoł.

13 min. – Coroz wiyncyj placu w środku mo Piast. Dłōgo pogrywajōm balym miyndzy sobōm.

11 min. – Tera dłōgigo bala niy dogōniōł Hlousek… Piōnty meter.

10 min. – Mak dostoł tera piykny bal wiyrchym od Vacka, ale obrōńcy Legii niy pozwolyli mu przijōnć.

9 min. – Tera próbuje Piast. prostopadły bal w szesnostka pokuloł sie jednak za plecami rozfechtowanego Vacka.

8 min. – Obrōńca Piasta odkludzioł bal za linia i zaś z piōntego metra zaczyno Szmatuła.

7 min. – Zivec wżon tera na sia mocny szlag Hlouska. Bal juz lecioł w strona bramki piasta.

6 min. – Terozki trocha placu na prawym skrzidle znod se Jodłowiec. jego cyntra wybito na rōg

5 min. – Terozki piyrszy roz groźnie szczyrknyły kości. Korun faulowoł Lewczuka.

4 min. – Po faulu Borysiuka, wolny do Piasta w środku boiska. Długo cyntra żodnego efektu jednak  niy prziniōsła

3 min. – Bal krōtko rozegrany i wartko stracōny. Z piōntego metra zaczyno torman.

2 min. – Legia bydzie miała piyrszy rōg.

1 min. – Bal już w grze!

Syndzia gynał ciepnōł mōnetōm. Bal do Piasta. legia wybiyro połowa.

Z piyrszego składu Piasta wypod niystety Radek Murawski. Do gry wraco za to Kamil Vacek. poza tym wszyjscy zdrowi i na 100% prziszykowani do walki o majstra, abo raczyj jak woli trynel Latal, do wygranio nastympnego szpilu.

Gynał 15 minut dzieli nos od piyrszego gwizdka w dzisiejszym „szpilu o majstra”.

Składy:

 

Legia Warszawa:  Malarz – Hlousek, Pazdan, Lewczuk, Jędrzejczyk – Jodłowiec, Borysiuk – Guilherme, Kucharczyk, Hamalainen – Nikolić.

Piast Gliwice: Szmatuła – Pietrowski, Hebert, Korun – Mraz, Szeliga, Bukata, Vacek, Mak – Zivec, Nespor

Styknie podziwać sie na tabela ekstraklasy i tak rychtyk niedzielnego szpilu niy trza już wiyncyj reklamować. Po niedzieli mono i sytuacjo bydzie sztyjc ôtwarto, ale tyn, kiery wygro bydzie ô wielki krok bliżyj majstra. Legia vs Piast. Już niy idzie sie doczkać…

Do kōńca sezōnu 3 kolejki, ale kluczowy mōmynt przidzie już w tyn weekend. Jeszcze niydowno w Gliwicach niy godali radzi ô grze ô majstra. Terozki żodyn sie już niy bawi w ciuciu-babka. Piast jedzie do Warszawy po 3 punkty, inkszego cylu mieć ni moge. Drugi plac na kōniec sezōnu bōłby wielkim sukcesym, ale kej je sie tak blisko to szmaki rosnōm. Synki z Gliwic stojōm przed życiowōm szansōm. Kto niy chciołby zagrać w telkim szpilu i naklupać Legii?

Zaglōndani na piyrszy lepszy ańfachowy szpil ekstraklasy to nikiedy forgot jakoś zorta umartwiyń. To jednak niy tyczy sie niedzielnego szpilu w Warszawie. Tamek emocji niy braknie, bo być muszōm. Te emocje czytelnicy internecowego DZ jak zawsze w ramach Szpilu Miesiōnca bydōm mieli serwowane minuta po minucie, wartko, kōnkretnie i durś po ślōnsku!

Zapraszōm fest. Niedziela 08.05.2016 r., godzina 6 we wieczōr (18:00, a nawet chwila pryndzyj)!

Dziynkuja piyknie. Zapraszōm zaś. „Ślōnski Fusbal” wraco za tydziyń, a nastympny „Szpil miesiōnca” już w kwiytniu.

Górnik mioł dzisio pora dobrych mōmyntōw, ale ewidyntnie wiyncyj do godki miała Legia. Trza liczyć na punkty kaj indzij…

Górnik szczylo latoś piyrszo brama, ale to dzisio za mało choby na 1 punkt. W 2016 roku statystyki niy wyglōndajōm nojlepij: 5 szpilōw, 4 porażki.

90 + 3 min. – To by było na tela.

90 + 1 min. – Złazi Kucharczyk, a tryner dowo szansa Aleksandrowowi… Szansa na podeptani po trowie bez pora sekund.

90 min. – Torman Legii tera musioł se chwila poczekac aż ruszy do niego, kieryś z Grubiorzy

89 min. – Szlag Masłowskigo. Wiela niy brakło

88 min. – Jeszcze roz z roga Kucharczyk. Cyntra… i nazod bal pod rogowo fanka.

87 min. – Już chyba wszyjscy radzi poszliby pod prysznic.

86 min. – Zmiana u gospodorzy. Po boisku już loce Masłowski.

84 min. – Legia już niy piluje z grōm. Fest pomału chodzōm po bale, kej zaczynajōm z ausu.

83 min. – Za niyskoro Górnik ciepnōł sie do przodku…

82 min. – Atakuje Górnik. Nastympny rōg.

81 min. – Groźno cyntra Madeja. próbowoł wrazić tam gowa Steblecki.

80 min. – Jes kōntra. Piynciu Grubiorzy z przodku… Bydzie yno rōg.

79 min. – Faulowany Jędrzejczyk. Zaś szansa do gospodorzy.

78 min. – Zmiana u Grubiorzy. Kurzawa za Kwieka.

Prostopadły bal do Prijovicia i idealne wykōńczyni po długim rogu. To już chyba po ptokach…

76 min. – Posprzōntane. 3:1!

74 min. – Jedyn, drugi a trzeci! Szlag za szlagiym. Dramatycznie brōniōł sie tera Górnik. Przody podwójno obrōna Janukiewicza, niyskorzij z linii bal wybijo Przybylski.

73 min. – Kwiek próbowoł szlagu z daleka, ale trefioł gynał w pukel Kucharczyka.

71 min. – Górnik sztyjc niy decyduje sie coby ciepnōnć wiynksze siyły do przodku.

69 min. – W kōńcu kōntra Górnika. Strata, ale zaro zaś Górnik pod bramōm Legii. W szesnostce obalōny napastnik, ale syndzia koże grać dalij.

68 min. – Danch zaś czyści w obrōnie.

66 min. – Po stracie bramy z boiska śloz Mariusz Magiera. Za niego włazi Kallaste.

65 min. – Górnik bydzie mioł biyda sie spamiyntać. tym bardzij, że bal sztyjc kulo sie po ich połowie

Po cyntrze Kucharczyka Jędrzejczyk uwalnio sie od krycio i szczylo kepkōm.

63 min. – 2:1! Jędrzejczyk kōńczy akcjo z bliska

62 min. – Legia moge dzisio ćwiczyć rozmańte rozwiōnzania gry z roga boiska.

61 min. – Miszōng pod bramōm Górnika. Nikoliciowi niy udało sie klupnōnć.

60 min. – Górnik zaś na wyjazd. Ni ma tera kōmu przitrzimać bal z przodku.

59 min. – Górnik przejmuje bal, ale yno na chwila. Bal zagrany do przodku przez Widanowa leci w pierōny…

58 min. – Z kożdym faulym robi sie bardzij nerwowo na boisku.

57 min. – Kucharczyk dostowo żōłto kartka po tym jak przi próbie dobitki kopnōł nogōm w gowa obrōńcy. Szpetne to było, forgot!

56 min. – Haja na boisku po piyknej akcji Legii!

55 min. – Jodłowiec! Piyknie zwyrtnōł sie z balym tak, że Magiera, kiero go wachowoł, niy wiedzioł kaj je. Szlag i zaś rōg.

53 min. – Déjà vu z piyrszej połowy. Górnik zaś brōni sie głymboko cofniynty cołko drużynōm.

52 min. – „Cyntro-szlag” po kierym piōnstkuje torman.

51 min. – Z roga Legia i zaro faul. Bydzie nastympno szansa na cyntra do gospodorzy.

50 min. – Łokciym piźniynty kieryś z Grubiorzy. Faul bez godki!

49 min. – Długim wykopym z piōntego metra wkludzo bal do gry Janukiewicz

48 min. – Steblecki zaś aktywny. Przody poszoł na presa i wywalczōł aus. Hneda szczyloł, ale pora metrōw wele słupka.

47 min. – Szlag Nikolicia. Musioł wysztrekować sie Janukiewicz.

46 min. – Mita i lecymy z tym światym. Zaczyno Legia.

Nazod na murawie bydymy za pora minut. Bydźcie samek!

Szkoda jak pierōn. Brama do szatni to nic przijymnego. Trza bydzie zaś sie spamiyntać.

Tym razym krōtko rozegrali rōg i to dało efekt. Hlousek wrażo bal do neca gowōm.

45 +1 min – Brama! do Legii. 1:1!

45 min. – Słupek-lata-torman! Sie popochało. Tera Górnika ratuje cufal!

45 min. – Kiery to już rōg Legii…

44 min. – Dobro cyntra Kucharczyka efejym. Obrōna Górnika jednak zaś to posprzōntała.

43 min. – Darymny futer. Zaś nic z tego niy bydzie

42 min. – Syndzia tera sie trocha sfifroł. Legia dostowo w geszynku nastympny rōg

40 min. – Z roga Legia sztyjc niy poradzi złōnaczyć tak rychtyk żodnego zagrożynio.

40 min. – Danch wybijo bal na rōg

Piyknie wkryncił w zol obrōńcy Kante, po czym zaro wystawiōł Stebleckimu „patelnia”. Pewne wykōńczyni! Górnik wygrywo w Warszawie!

38 min. – Brama! Steblecki! 0:1!

36 min. – Zdo sie, że po piyrszych minutach ewidyntnej przewogi Legii szpil sie wyrownoł, przinajmij jak godōmy o akcjach podbramkowych, bo przi balu sztyjc dłuzyj Legia.

35 min. – Odpedzieć z dystansu próbowoł Nikolić. Wysoko nad bramōm.

34 min. – Co za szlag Stebleckigo. To miało wlyź! Lata!

32 min. – Zaś obcis Madej tym razym fizycznie. Szpetnie kopniynty w muskla przez Jędrzejczyka

31 min – Syndziowie zrobiyli se krōtki klachy po kierych żōłto kartka obejrzoł Madej. Ciynżko pedzieć za co.

30 min. – Zaś na zolu Grubiorz. Mōndrze doł sie obalić Magiera.

29 min. – Bal już wykopany na połowa Legii. lider zaś bydzie wykludzoł atak.

28 min. – Wolny do gospodorzy blisko szesnostki… Cyntra wybito na rōg.

27 min. – Groźno cyntra Legii. Żodyn tego niy przeciōn…

26 min. – Podani z ausu do tormana. Yno po pierōna??? Zpresowany Janukiewicz wybijo za liniia boczno

25 min. – Faul. Górnik zaczyno ze swojij połowy.

24 min. – Kwiek szczylo abo cyntruje…? Bal w trybunach.

23 min. – Ała! Magiera z wolnego wycylowoł gynał w mur.

22 min. – Szpetny faul Rzeźniczaka.

22 min. – W kōńcu Górnik ciekawie pogrywo przed szesnostkiym Legii.

21 min. – Niy wykorzystano szansa z roga wartko rozfechtowała kōntra Górnika. Obrōna Legii jednak czujno.

20 min. – Groźnie. Rykoszet po zagraniu Nikolicia. Bydzie rōg.

18 min. – Zaś próba cyntry i szlagu głowōm. Próbowoł Prijović. Legia na szczynści ni mo nasztelowanych cylownikōw.

17 min. – Na razie dobrze poukłodani w obrōnie Grubiorze

16 min. – Zaś Górnik próbuje fechtnōnć swōj napad długim balym. tym razym niy wyszło.

15 min. – W kōńcu Górnik z przōdku. Dobro akcjo skōńczōno szlagiym Stebleckigo… Wele słupka

14 min. – Legia z ausu. Kucharczyk wyciepuje fōrt w szesnostka. Była próba szlagu kepkōm. Na szczynści „kole a wele”

13 min. – Tera Legia przihamowała i tyż pōmału rozgrywo bal, ale nawet w tym widać róznica. Legia stoi wysoko obrōnōm

11 min. – Górnik rozgrywo bal w obrōnie, ale już samek wyłażōm na presa Warszawioki. Wyjazd do przodku.

10 min. – Zaś Legia pod bramōm gości. Niybezpieczny szlag Dudy odbijo Janukiewicz.

9 min. – Kucharczyk za fest wypuściōł se bal. Górnik zacznie od bramy.

8 min. – Wartko akcjo Legii. Nikolić kōńczył kepkōm. Majtnōł sie.

7 min. – Piykny bal do Jose Kante, ale zarozki przi nim 3 chopōw. Sōm wszyjskich niy ofōmluje.

5  min. – Niy bydzie dzisio leko. Górnik zawarty na trzidziestym metrze od swojij bramki.

4 min. – Na razie wiyncyj przi balu gospodorze. Przed chwilōm próbowali prostopadłym balym przeniyś akcjo w szesnostek Górnika, ale żodyn do tego niy dolecioł.

3 min – Legia wykludzo atak pozycyjny

1 min. – Zaczynajōm Grubiorze, kierzi dzisio tyrajōm w czornych koszulkach. Legia na bioło.

Fusbaliści już na boisku.

Znōmy historio. Legia z Górnikiym dycki majōm se coś do udowodniynio. Do tego trza dociepać aktualny kōntekst. Górnik latoś jeszcze niy wygroł, a pora dni tymu wyciepoł trynera. Zafyrlało sie w składzie. Legia mono i w lidze kludzi, ale dopiyro co dostała wklupane z Niecieczōm. Ci i ci muszōm se poprawić humory.

10 minut do rozpoczyncio szpilu… Trza ofyn pedzieć, że prognozy do Grubiorzy na dzisio sōm darymne. Statystyki godajōm same za sia. Legia na placu piyrszym, Górnik na ostatnim. Ale fusbal to niy prognoza pogody, zresztōm nawet Jarek Kret nikiedy sie pomyli…

Legia vs Górnik – juz hneda zaczynōmy. Za wczasu obadejcie składy…

Legia: 1. Arkadiusz Malarz – 5. Artur Jędrzejczyk, 4. Igor Lewczuk, 25. Jakub Rzeźniczak, 14. Adam Hlousek – 7. Ariel Borysiuk, 3. Tomasz Jodłowiec – 8. Ondrej Duda, 99. Aleksandar Prijović, 18. Michał Kucharczyk – 11. Nemanja Nikolić.

Rezerwa: 29. Jakub Szumski, 28. Łukasz Broź, 17. Tomasz Brzyski, 23. Stojan Vranjes, 16. Michał Masłowski, 77. Mihail Aleksandrov, 2. Michał Pazdan.

Tryner: Stanisław Czerczesow.

Górnik: 84. Radosław Janukiewicz – 31. Pavel Vidanov, 2. Bartosz Kopacz, 26. Adam Danch, 21. Mariusz Magiera – 11. Roman Gergel, 19. Mariusz Przybylski, 9. Aleksander Kwiek, 18. Łukasz Madej, 71. Sebastian Steblecki – 29. Jose Kante.

Rezerwa: 33. Sebastian Przyrowski, 5. Oleksandr Shevelyukhin, 7. Rafał Kurzawa, 14. Armin Cerimagić, 15. Ken Kallaste, 22. Szymon Matuszek, 23. Szymon Skrzypczak.

Tryner: Jan Żurek.

Tym razym „Szpilym Miesiōnca” bydzie pojedynek ekip z piyrszego i ostatnigo placu w ekstaraklasowej tabeli. To jednak niy znaczy, że braknie emocji i już znōmy wynik. Szpile Legii z Górnikiym to na dyć dycki coś wyjōntkowego…

Forgot niy z telkōm perspektywōm i niy z telkim widokiym w tabeli powinno sie czakać na telki szlagier. Sytuacjo Górnika i Legii downych głównych rywali w grze ô majstra je durś inkszo. Latoś ô nojlepsze place bydōm szpilać yno Warszawioki. Synkōw z Zobrzo czeko ciynżko walka ô to coby niy sfurgōnć z ekstraklasy. Przikro sprawa, ale telki sōm tera realia.

W kożdym razie niy zostowo nōm nic inkszego jak liczyć na dobry szpil. Fandzolyni ô różnicach w tabeli musi skōńczyć sie przed piyrszym gwizdkiym w sobota. Potym liczyć bydzie sie już yno fusbal. Legii tyz idzie wklupać i mogōm to zrobić nawet skozani na porażka „boroczki”, co udowodniyła w tym tydniu drużyna z Niecieczy (wygrali u sia 3:0!).

Relacjo minuta po minucie ze „Szpilu Miesiōnca” sztartuje w sobota szwierć na 9 wieczōr (20:15) na internecowej zajcie DZ. Bydźcie samek!

Dejcie tyż pozōr na nojnowsze felietōny na Ślōnskim Fusbalu. Tōż do zaś…

Jo dziynkuja wszyjskim i już tera zaproszōm na marcowy Szpil Miesiōnca.

Górnik bydzie musioł wartko sie spamiyntać. Terozki punktōw tracić już ni mogōm, bo w tabeli piyknie to niy wyglōndo.

Bez godki lepszy bōł dzisio Ruch. 3 punkty jadōm do Chorzowa

90 + 4 min. – Kōniec szpilu. Waldi Fornalik dźwigo rynce do gōry!

90 + 2 min. – Na ostatni sekundy Efir zmiynio Stępińskigo

90 + 1 min. – Jeszcze roz Kante. Piyknie zrobiōł obrōńcy, śloz do środka, ale tam już tela placu ni mioł. Niy udało sie skutecznie wykōńczyć akcji

90 min. – Próbowoł spōmnieć o sia Kante, ale bal w rynkach tormana

89 min. – Z boiska śloz Mazek. Za niego niydowno skludzōny do Chorzowa Łukasz Hanzel

88 min. – Jedyny knif grubiorzy na zaistniyni w syndziowskim hefcie to dzisio faule. Kartka zbiyro Magiera.

86 min. – Po rogu – po ptokach. Faulowany Surma

85 min. – Źle wybijo Putnocky. Hneda za kragiel wciepnōł by mu bal Golański. Bydzie rōg.

84 min. – Niy zdo sie coby Górnik mioł sie jeszcze dzisio spamiyntać. Sztyjc atakujōm Niebiescy.

83 min. – Zieńczuk pocylowoł z wolnego pod lata. Na rōg wybijo Janukiewicz

Ruch wyloz ataku dwóch na dwóch i hneda Mazek przeżōł deja vu. Drugi roz stanōł przed pustōm bramōm wele piōntego metra, ale tym razym sie niy sfifroł

80 min. – 0:2 Mazek wrażo bal do bustej bramy!

78 min. – Mocne zagrani do Kante. Tyn przepuszczo se bal. Wciepuje 5. bieg, ale Koj je przi balu pryndzyj

76 min. – Odpowiydź Fornalika. Za Podgórskigo wkludzōny Zieńczuk

75 min. – Zafyrloł w składzie tryner Górnika. Wyżyj gro tera Danch. Na szpicy Korzym. Co to do?

74 min. – Zamloło sie pod bramōm gości! Ruch ratuje sie wybiciym na rōg.

73 min. – Podwójno zmiana w Górnika. Janota za Sobolewskigo i Korzym za Madeja

72 min. – krōtko po grali. Ostro cyntra, ale bal w kōńcu wybity.

71 min. – Bydzie rōg do górnika

69 min. – Goście trzimiom Grubiorzy daleko od swojij bramy, ale muszōm zaczōnć wykorzystywać lagi, bo jeszcze rozmancie sie to moge skōńczyć.

68 min. – Górnik sztyjc ni mo pōmysłu na przekludzyni porzōndnej akcji.

66 min. – Jakim cudym tera ni ma bramy??? Stępiński znod sie w szesnostce. Źle przijōn bal, ale i tak przeszoł przeciwnika i wycofoł na piōnty meter do Mazka. Piōnty meter, pusto brama, ale jeszcze wraziōł tam szłapa obrōńca. Laga szpilu!

64 min. – Piykno cyntra Podgórskigo. Z biydōm opanowuje sytuacjo defynsywa gospodorzy

63 min. – c.d. haji Widanow vs Podgórski. Tym razym grocz Ruchu zbiyro szlag w gowa łokciym. Widanow dorobiōł sie w kōńcu żōłtej kartki.

61 min. – NI ma taryfy ulgowej. Widanow coby utrzimać sie przi balu robi se plac wszyjskimi kōńczynami. Ucierpioł Podgórski.

59 min. – Syndzia znod chyba w szatni kartki i terozki chyntnij dzieli. Tym razym za zagrani nakładkōm spamiyntany Gergel.

58 min. – Wartko akcjo Ruchu. Stępiński zagroł „klepa” z obrōńcōm Górnika i bez cufal znod sie sōm na sōm… Yno rōg do Niebieskich

57 min. – Praje stargoł tera koszulka przeciwnikowi Koj, beztōż w kōńcu ujrzelimy żōłto kartka.

55 min. – Dobro Cyntra Stępińskigo. Defynsywa gospodorzy czyści

54 min. – Górnik tera czynścij na połowie gości, ale sztyjc bez efektōw.

52 min. – Atakuje Górnik. Na zolu leży Podgórski, ale ni ma przerwy, w tym samym czasie Gergel szczylo „Pōnbōczkowi w okno”

50 min. – Wolny do Górnika. Cyntra Kwieka i szlag Kepkōm Widanowa. Wszyjsko piyknie, ale bal wisioł w lufcie za długo.

49 min. – Głymboky cyntra z roga. Janukiewicz piōnstkuje

48 min. – Ruch w ofynsywie. Mazek na fol szwōngu wlecioł w szesnostka i wycofoł przed brama na piōnty meter. Wybijajōm Grubiorze.

46 min. – Grōmy. Jeszcze do porzōndku sie niy zaczło a już sōm ofiary. Na murawie swijo sie Iwański.

Zaro zaczynōmy. Luft przinajmij klarowny. Miyjmy nadziejo, że bydzie na co zaglōndać.

45+ 3 min. – I to tela. Brama do szatni kōńczy piyrszo połowa. Pora minut na popisy grubskich orkiestrōw. Zapraszom nazod za chwila…

Ruch w kōńcu wykorzystuje cyntra z roga. Szlag na raty, ale bal w necu. Oleksy wykorzystoł złe zachowani Janukiewicza, kiery stoł jak przispawany do linii bramkowej.

45 + 3 min. – Brama! Paul Oleksy!

45 +1 min – Wiyncyj placu mo tera Ruch z przodku. Akcjo kōńczōm niyudanym szlagiym.

45 min. – Piyrszo połowa zetrwie jeszcze dodatkowe 3 miuty.

44 min. – Nastympny rōg do gości. Pomału po bal idzie Podgórski… Cyntra i wyjazd. Aus do Ruchu

43 min. – Mōgło byc groźnie po drugij strōnie, ale gwizdniynty faul na Sobolewskim

42. min. – Widanow wywalczōł se plac na prawym skrzidle i dogroł mocno po zolu przed brama. Ni mioł tego kto skōńczyć

41 min. – Madej faulowany wele środka boiska

39 min. – Górnik terozki chce wciōngnōnć gości na swojo połowa, ale wszyjsko kōńczy sie wykopniynciym bala na oślep przez Szeweluchina.

37 min. – Jaki miszōng terozki po ausie Górnika! Bal leci fōrt pod bramkorza. Tyn wysztrekowany wybijo. Dobitka z szesnostego metra zablokowano. W kōńcu wyjazd. Bramy już z tego niy bydzie…

35 min. – Fusbaliści po obu strōnach lygajōm na zol jedyn po drugim. Syndzia pozwolo forgot na mynski szpil…

33 min. – Koj chyba za fest sie sztachnōł „gynstego luftu” i zaś niybezpiecznie majtnōł sie z balym. Rōg do Górnika.

32 min. – Bal nazod w grze. Od bramy zaczyno Ruch

30 min. – Fusbaliści na ausie. Sztyjc „mlyko” na Roosvelta

29 min. – Syndzia koże doczkać aż sie rozwidni.

28 min. – Ruch cyntruje z wolnego. Bal traci sie w mgle pod bramkōm Górnika. Niystety kibice Górnika za fest zainwestowali w pirotechnika. Grubiorze majōm za dużo szczałowych.

27 min. – Faul Dancha. Przi balu goście

25 min. – Nastympn akcjo Niebieskich. Tym razym kōńczy sie niydokładnym podaniym. Od bramki torman.

24 min. – Ciekawie rozfechtowywała sie ta akcjo Ruchu, ale zaś doł sie chycić na spolōnym Podgórski.

23 min. – Ewidyntnie spolōł tera Podgórski

22 min. – Zaś wōniało elwrym. Napastnik Ruchu ostro potraktowany, ale to za mało na 11. meter.

21 min. – Strata Ruchu. Co tera sie pocho. Syndziowie chyba sie niy dogodali. Akcja przerwano.

19 min. – Mazek ciśnie sie miyndzy trzech chopōw. Wszyjskich oroz jednak niy ofōmluje.

18 min. – Przi balu Grubiorze. Po leku wykludzajōm atak.

17 min. – Prawōm strōnōm zaś próbuje fechtnōnć sie Ruch. Oroz w szesnostce na zolu spektakularnie lygo, kieryś z ich groczy. To niy plaża. Grōmy dalij…

16 min. – Górnik wyłazi 3 na 2. Steblecki decyduje sie na szlag. Torman zaś pewnie chyto.

15 min. – Zza szesnostka klupnōł Stępiński, ale bal z biydōm dokuloł sie do bramki.

14 min. – Podani miōd-malina i sōm na sōm znod sie Widanow! Ni mioł jednak wiela placu i czasu. Dobrze wyloz Putnocky.

13 min. – Szlag z wolnego wychycōny bez problymu.

12 min. – Trocha darymnej jakości tyjatru w wykōnaniu Mazka. Syndzia jednak doł sie zrobić za błozna. Wolny do Ruchu.

11 min. – O samym rogu ni ma co godać. Sōm my już na drugij połowie. Szczylo Kante! Rykoszet… To mōgło zaskoczyć Putnockygo. Wynik sztyjc bez zmian.

10 min. – Idealno cyntra na gowa Stępińskigo. Bal odbijo sie jeszcze od zola tak, że torman z biydōm wybijo na rōg!

9 min. – Tera Ruch trocha spróbowoł „tiki-taki”. Na razie jeszcze do porzōndku sie to niy klei.

8 min. – Zaś groźnie pod bramkōm Ruchu. Szlag z dystansu Kwieka mnimalnie mijo słupek.

6 min. – Niy bydzie samek dzisio delikatnie. Iwański wloz przed chwilōm ostrym wślizkiym. Przeciwnik praje wytargany z fusbalokōw.

4 min. – Po cyntrze do kepki nojlepij wyskoczył Sobolewski. Bal mijo słupek o pōł metra

4 min. – Faul i bydzie piyrszy wolny do gospodorzy, Do bramy Ruchu jakiś 40 metrōw

3 min. – Po darymnie kopniyntym rogu gospodorze wykludzajōm kōntra

2. min. – Na razie yno pora niydokładnych zagrań

1 min. – Bal sie kulo. Zaczyli Grubiorze

Chocioż oba nojbardzij utytułowane kluby w Polsce latoś niy bydōm grać miyndzy sobōm o majstra, jak to bywało downij, to i tak to bez godki szlagier kolejki.

Yno sekundy dzielōm nos od 105. Wielkich Derbōw Ślōnska. Latoś w forgot wyjōntkowej oprawie! 24 a pōł tys. kibicōw na „nowym-starym” stadiōnie Górnika.

Zaczynōmy chwila niyskorzij po lekkich problymach technicznych, ale terozki relacjo już je durś LIVE

Składy:

GÓRNIK

  • Radosław Janukiewicz,
  • Paweł Widanow,
  • Adam Danch,
  • Oleksandr Szeweluchin,
  • Mariusz Magiera,
  • Radosław Sobolewski,
  • Aleksander Kwiek,
  • Roman Gergel,
  • Sebastian Steblecki,
  • Łukasz Madej,
  • Jose Kante

RUCH

  • Matus Putnocky,
  • Martin Konczkowski,
  • Rafał Grodzicki,
  • Michał Koj,
  • Paweł Oleksy,
  • Łukasz Surma,
  • Maciej Iwański,
  • Kamil Mazek,
  • Patryk Lipski,
  • Tomasz Podgórski,
  • Mariusz Stępiński

Ekstraklasa tak rychtyk dopiyro sztartuje, ale hneda chyci porzōndny szwōng. Dyć już w niedziela bydymy dziwać sie na szpil, kiery do ańfachowych noleżeć ni moge. Ekstra do czytelnikōw internecowego DZ i „Ślōnskigo Fusbalu” przekludzōno bydzie w tyn dziyń relacjo na żywo w ramach serii „Szpil miesiōnca”.

Wybōr szpilu miesiōnca w lutym gynał ni mōg być inkszy. Wielkich Derbōw Ślōnska raczyj niy trza ekstra reklamować. Jak pokozuje historio godka ô faworycie to samek darymny futer i niy zmiynio tego fakt, że przed niedzielōm Ruch je na 6. placu, a Górnik dopiyro na 15. Emocje sōm na dyć ôbowiōnzkowo wpisane w te szpile. Tak musi być i tera, ale jednak w niedziela bydzie inaczyj niż bywało bez ôstatni lata. W kōńcu doczkōmy sie dopingu godnego derbōw. Nowy stadiōn Górnka bydzie fol, 24 563 kibicōw! Lepij w XXI wieku bywało yno 7-8 lot tymu kej ôbie ekipy trefiały sie na Stadiōnie Ślōnskim, a na szpil przichodziyło po 40 tys. ludzi.

Wyjōntkowy szpil, wyjōntkowo ôprawa i wyjōntkowy kōmyntorz. Yno w DZ relacjo live po ślōnsku. Sztartujymy już trzi szwierci na 6 (17:45)!

Minyła połowa stycznia tōż pocho sie na rynku transferowym i pochać sie jeszcze bydzie. Standardowo jeszcze wiyncyj je przi tymu godki, spekulacji i roztomańtych famōw…

United, City, Arsenal, West Ham, Everton, Newcastle, Tottenham, Wolfsburg, Stuttgart, Galatasaray, Milan – to yno niypełno „litanio” klubōw, kiere bez ôstatni rok bezmałaś chciały, rychtyk chciały, abo chciały i ofyn próbowały skludzić do sia Kamila Glika. Lista zainteresowanych Arkiym Milikiym niy wyglōndo wcale gorzij: Barça, Galatasaray, Inter, Ol. Marsylia, Juve, Leicester, Newcastle. Haja ô korōna ślōnskigo krōla transferowych famōw byłaby zaciynto… Ôba grocze bierōm se to jednak po leku. Arek ôfyn wyśmiywo famy ô swoim transferze do Barcy. Pomału a sztyjc – lepij spokojnie szykować sie na Euro. Podobno taktyka ôbroł Kamil, kiery urwoł ôstatecznie dyskusje na swōj tymat po podpisaniu nowego kōntraktu z Torino do 2020 r.

Łukasz Piszczek bez jesiyń w BVB coroz czynścij siedzioł na ławie, beztōż na famy o przekludzinach niy trza było długo czakać. Nikierzi widzieliby go już w Liverpoolu, kaj mōgby sie przidać starymu znajōmymu Jürgenowi Kloppowi. Te przimiarki zostały jednak na etapie „medialnego fandzolynio”. Inaczyj było pora lot tymu kej forgot nomen omen realny bōł jego transfer do Madrytu. Niyskorzij była nawet godka ô Barcelonie…

Terozki fakty! Na Anfield rychtyk kludzi sie inkszy Ślōnzok, Kamil Grabara. Ô 17-letnigo tormana z Rudy Ślōnskij grały bezmałaś jeszcze 2 nojwiynksze kluby Manchesteru (przinajmij tak godały media). Ôstatecznie modziok ôbroł drōga Jurka Dudka.

Ale pozōr! Nawet kej wielki transfer przestowo być wielkōm famom to do wielkigo sukcesu jeszcze fōrt daleko. Wiy ô tym nojlepszy snajper Ekstraklasy 2014/15 Kamil Wilczek, kiery we Włochach niy zdōnżōł ani zmarasić fusbalokōw. Bezmałaś chcōm go w Lechu. A mono by tak nazod do Piasta grać ô majstra? Czas pokoże – doś fandzolynio!

W niedziela przekludzōno bydzie nastympno z serii ślōnskich relacji live. Tym razym domy pozōr na to co popocho sie w Warszawie. Na dyć lepszo propozycjo do Szpilu Miesiōnca biyda znolyź. Legia vs Piast tōż wicelider vs lider. Szpil na durś na szczycie…

Niedzielny szpil pokoże wiela we werci je ekipa Piasta. Szmaki w Gliwicach niyśmiało rosnōm. Sztyjc żodyn ofyn niy godo o tytule majstra, ale niy zdo sie coby synki z Gliwic po telkij rundzie mieli oroz odpuścić. Dużo powinny pedzieć nōm nojbliższe szpile. Piast je w trakcie serii ciynżkich kōnfrōntacji. Niydowno derby z Ruchym i Górnikiym, terozki Legia a za tydziyń Lech. Ni ma leko.

Jeszcze 2 tydnie tymu przewoga Piasta siōngała 10 punktōw. Tera stopniała do 5. Legia zaś bydzie chciała sie zbliżyć i odbić se czwortek, kej w ich ôstatnim w tym sezōnie szpilu Ligi Europy 5:2 rozklupało ich Napoli. Warszawioki mogōm być trocha wyplōmpani. Ciynżko pedzieć czy tryner pofachluje składym. Piast i tak musi dać pozōr. Dobro informacjo je tako, że Legia straciyła we Włochach poru pseudokiboli.

Liczymy beztōż że ôbydzie sie bez haji poza boiskiym. Za to na murawie kości mogōm zaszczyrkać. Ni ma inkszej opcji kożdy bydzie chcioł wygrać!

Niedzielno relacjo na żywo znojdziecie na www.dziennikzachodni.pl . Sztartujymy już ô 17:45!

„Szpil Miesiōnca” to nowo-staro propozycjo „Ślōnskigo Fusbalu”. Ôd dzisio zaczynōmy regularno serio relacji na żywo, minuta po minucie z nojciekawszego szpilu w miesiōncu. Propozycjo na listopad to tref Piasta Gliwice z Ruchym Chorzōw…

Już yno godziny dzielōm nas ôd tego szpilu. Do Gliwic na plac lidera, kery sztyjc synsacyjnie kludzi w lidze z przewogōm ôśmiu punktōw, przijyżdżo sōmsiod zza miedzy, Ruch. Rywal to niybelejaki. Magiczno rynka Waldka Fornalika zaczyno na dyć działać. Ôstatni 5 kolejek bez porażki, tōż Niebiescy po leku spinajōm sie w tabeli na wiyrch i sōm już na czwortym placu. Idzie pedzieć – szpil na szczycie, chocoż ôbie ekipy dzieli aż 13 punktōw.

W kożdym razie bydzie sie dzioło. Na dyć w derbach ni ma ôdpuszczanio. W ôstatnij kolejce piōntkowi rywale klupli razym aż 8 bramōw. Jak snajpery utrzimiōm forma to forgot bydzie sie na co dziwać.

27.11.2015 r., Piast Gliwice vs Ruch Chorzów -> Relacjo live sztartuje już szwierć na 9 (20:15)! Zapraszōm fest!