Archiwa kategorii: Ekstraklasa

Ȏ spadkach a awansach wiymy już forgot wszyjsko. A poradzicie pedzieć wiela ślōnskich klubów poszpilo w sezōnie 2018/19 na nojwyższym szczeblu krajowej drabiny? 2, 3 a mono 6 abo 7? Ȏdpowiydź zaś downo niy była tak ciynżko…

1. Górnik Zobrze. Nojlepszo ślōnsko ekipa latoś (4. plac) i nojwiynkszo naszo nadziejo na nowy sezōn w Ekstraklasie. Klub ȏd zdrzōdeł ślōnski i ślōnskość sztyjc prōmuje.

2. Piast Glywice. Z biydōm, ale Ekstraklasa ȏbrōniyli. Klub, kery rod ȏdwołuje sie do kresowych korzyni, jednak już w swoich poczōntkach bōł ślōnsko-kresowym miszōngiym. Po roz siōdmy z raje bydzie reprezyntowoł Ślōnsk w Ekstraklasie.

3. Zagłębie Sosnowiec. Ok, to taki pōłwic. Wszyjscy wiymy, że ze Ślōnskiym bardzij idyntifikujōm sie fusbaliści Sydney FC i Los Angeles Galaxy niż Zagłymbioki, ale jakby sie niy dziwać szpile u sia ȏd 62 lot grajōm po ślōnskij strōnie Brynicy. Kej w 1954 sztartowała budowa ich stadionu plac tyn noleżoł do Szopiynic. Dopiyro korekta administracyjno z 1960 przeciepła downe szopiynicki łōnki do Sosnowca. Do Ekstraklasy z 2. placu Zagłymbiokōw wkludzo Knōrowiok, Dariusz Dudek.

Nowościōm je, że w nowym sezōnie wiyncyj ślōnskich klubōw w piyrszej klasie rozgrywkowej zagro po strōnie czeskij. Liczymy dalij…

4. Slezský Ȏpawa. Synki z Ȏpawy byli latoś nojlepsi w drugij lidze, beztōż bydōm tera trzecim ślōnskim klubym w Gambrinus lidze.

5. MFK Karwina. Im za to udało sie niy sfurgnōnć z I ligi dziynki wygraniu ȏstatnigo szpilu z Jihlavōm.

6. Banik Ȏstrawa. Baniček tyż do kōńca groł ȏ utrzimani i misjo zrealizowoł. Tera ȏstowo walka ȏ powrōt na Ślōnsk. U nich na ȏpy niż w Sosnowcu. Grajōm na Vitkovicach, morawskim kōnsku Ȏstrawy ȏd trzech lot, bo ich ślōnski stadiōn Bazaly niy spełnio ligowych wymogōw. Chachaři (kibice Banika) niy ȏd dzisiej walczōm ȏ powrōt. Baníček patří na Slezsko!

To niy kōniec. Ni mogymy zapōmnieć ȏ frelkach.

7. GKS Katowice – zbudowano ȏd zera sekcjo kobiyco, zaliczo awans za awansym i gynał melduje sie w Ekstralidze.

Kōmu tera kibicujesz?

Niy zetrwało sztwierć wieku i voilà! Górnik Zobrze nazod w europejskich pucharach. We ôstatnim szpilu sezōnu Grubiorze wygrali 2:0 z Wisłōm Krakōw i szafli se 4. plac, kery wkludzo ich do Ligi Europy. Widzicie ôczami wyôbraźnie juzaś te szpile z Romōm abo Manchesterym City…?

Pomału! Europa ôd lot 70-tych trocha urosła. Niż pojedzie sie na Włochy czy Anglio trza nikedy po drōdze zaliczyć telki przistanki jak azerski Agdam, kazachsko Astana, abo cypryjsko Nikozja. Jeszcze pora lot do zadku fusbalisty polskich klubōw po cichu (a nikedy ofyn) lachali sie z telkich przeciwnikōw. Ôdpadniynci Wisły z Karabachym Agdam abo Jagiellonii z Irtyszym Pawłodar i inksze telki przipadki dowajōm jednak do myślynio. Nasi tyż niy lepsi! 2003/04 GieKSa ôdpado z Cementarnicōm Skopje, 2010/11 Ruch z biydōm awansuje po dwōch rymisach z maltańskōm Valettōm, 2013/14 Piasta pokōnuje Karabach. To niy cufal za cufalym. Wcześnij polski ekipy niy chciały wylosowywać drużyn z przikładowo Kazachstanu coby darować se dłōgo rajza, ale w kōńcu musieli dać pozōr, że to grocze, kerzi poradzōm ich nauczyć fusbalu.

Na szczynści do fusbalistōw rajzowani na zagraniczne szpile tyż sie już zmiyniyło. Za PRL-u jak kery grocz bōł politycznie podpadniynty za granica mōgli go wcale niy puścić. Przeważnie jednak z wyjazdami na wielki szpile problymōw niy było, chocioż niy brakowało przigōd. Na trzeci szpil pōłfinału Górnik vs Roma w PZP z 1970 fusbaliści ôbu ekip mieli podjechać na stadiōn jednym autobusym. Tryner Romy zrobiōł jednak za błozna szofera i tyn Grubiorzy niy wziōn. Zobrzanōw na stadiōn podciepali swojimi autami kibice tak, że na stadiōnie byli 20 min. przed szpilym. Na finał do Wiednia Grubiorze jechali już swoim autobusym. Przijechali jednak dopiyro w dniu szpilu przed połedniym. Zmynczyni rajzōm grocze w ramach ôdpoczynku i prziszykowań poszli na…. gyszefty. Kaj tyż wracać du dōm z pustymi rynkami!

Latoś niy trza już sie ôbkupować ani wozić kryształōw na handel. Yno i aż grać…

Cofōmy sie 50 lot do zadku a pōmogajōm nōm stare fusbalisty Ruchu. Ci to tydziyń tymu spōminali swojo czelodka majstrōw a.d. 1968. 10-tego majstra po roz ôstatni zrobiyła ekipa poskłodano ze samych Ślōnzokōw. Trocha sie sam pozmiyniało… A co łōnczy Ruch 1968 z Ruchym 2018 poza niyśmiertelnym stadiōnym na Cichej?

Je jedne, co bez 50 lot sie niy zmiynio i to niy yno w Ruchu. Tak downij jak i tera fōnguje zasada „fusbal fusbalym ale punkty, tytuły i awanse musi przisztymplować jakiś ważny sztympel”. Samek wlazuje do gry polityka… Jak spōminali Antōni Piechniczek, Ruch we 1968 ni mōg sztartnōnć we Pucharze Europy Majstrōw Krajowych. Awans zrobiōł, rywala wylosowoł ale skuli ataku wojokōw Ukłodu Warszawskigo na Czechosłowacjo kluby wszyjskich państw bloku wschodnigo ôstały wyciepniynte z europejskich pucharōw.

Niy yno te wielki ukłody rzōndzōm ôd downa naszym fusbalym. Ni ma tajymnicōm, że prezesy klubōw muszōm swoi umieć, jak to sie godo – „przedeptać”. Zejrzijcie yno jak nasze realia fusbalowe lot 80. pokozuje „Piłkarski Poker”. Scyna w kerej dyrektor banku klaruje prezesowi Czarnych jak „z luftu” zaszporować 33 mln i za jednym szlagiym załatwić po 2 mln prymii do groczy z gratisowōm rajzōm Polonezym to forgot majstersztyk. Toć to yno film, ale wierzcie reżyser zrobiōł dobry research.

Dzisio tyż trza swoi ugrać poza szpilplacym. Żodyn inkszy klub jak Ruch niy wiy ô tym lepij. Do kōńca marca majōm załatwić se spłōcyni dłōgōw bez cudzo firma (sami spłocić ni mogōm). Jak sie udo to z ôdjyntych im 11. punktōw ôstanie yno -6. Ôstatnio Ruch ôtwar jeszcze jedne pole do haji. Tym razym ôni chcieli ugrać walkower za wyjazd na szpil do Olsztyna, kery sie niy ôdbōł, ale już po ptokach. Decyzyjni padali, że szpil trza rozegrać kiedy indzij… Sōndzyni sie ô punkty a sztrofy je ôstatnio modne. Górnik sōndzi sie ô ôdjynte punkty za walkower z Piastym. Piast sōndzi sie ô dokōńczyni szpilu z Górnikiym. Tōż po starymu. C.d. 22 marca…

Ô szpilu Piasta z Górnikym a ô decyzji Kōmisji Ligi Ekstraklasy SA., kero ôba ślōnski kluby ôstawiyła bez punktōw, wypedziały sie już wszyjski szpece. Nojczynścij cytowany je Z. Boniek, kery padoł że za porzōndek na stadiōnie ôdpowiado gospodorz, tōż yno Piast i kōnkretni kibice ôbu ekip powinni dostać sztrofy. Ciynżko sie niy zgodzić, ale smolić już walkowery! Mie bardzij zaciekawiyły słowa prezydyntōw Glywic a Zobrza, kerzi ofyn kozali klubōm korać kiboli zakozami stadiōnowymi. Z. Frankiewicz, prezydynt Glywic godoł nawet ô dożywotnich zakozach na glywicki stadiōn i egzekwowaniu ôdszkodowań ôd wszyskich zidyntyfikowanych kiboli-hajokōw, ale tyż ô zawieszyniu wsparcio do stowarzyszynio kibicōw Piasta. Telki słowa i to w roku wyborōw samorzōndowych… Szacunek!

A jak wyglōndo walka z kibolami ôd zadnich dźwiyrzi? Pora lot do zadku byłech na szkolyniu do stadiōnowych stewardōw. Bez dwa dni wykłodali tamek wszyjsko co ôbsługa stadiōnu musi wiedzieć. Hruby heft, kery my dostali, mioł cołko lista rzeczy, haseł, symboli, kere na fusbalowej imprezie masowej za pierōna ni mogōm sie ôbjawić. Szalik i śmiyszno czopka przyńdōm, ale race i fany sektorowe, hakynkrojce i krziże celtycki, jak tyż noże masorski, paryzole i wino jabkowe „samuraj” na stadiōnie sōm zakozane. Szkolyli my sie w kōntroli na bramkach podług złotej zasady „chopy macajōm chopōw, baby macajōm baby”. W ćwiczyniu na bramkach prziszli stewardzi bez problymu znojdywali u „kibicōw” wszyjski potyncjalnie groźne wihajstry. Wyjōntkiym była włościcielka nojwiynkszego lajbika na szkolyniu, kero w roli kibicki przemyciyła w nim telefōn.

Terozki zagodka dlo inteligyntnych… Jaki trza mieć rozmiar cycyhaltra coby wniyś na stadiōn fana sektorowo 10x20m abo poraset racōw? Eli możliwe je coby ôbsługa sie niy kapła? Kery jeszcze wierzy, że telki cuda pochajōm sie bez wiedzy klubōw? Ciche przizwolynia i dziwne relacje kluby-kibole to sztyjc nojwiynkszy problym ślōnskich a polskich stadiōnōw.

Czesko snowboardzistka robi dwa złota w Pjongczangu – jedne na desce drugi na nartach. Tōngijski olimpijczyk-taekwondzista z Rio chyto sie tyranio na nartach. Hneda po Igrzyskach słyszymy, że kariera fusbalowo na rychtyg zaczyno rekordzista świata na 100 m. Eli multiszportowcy niy wymarli?

Niy wszyskich do jednego miecha! Spōmniano czeszka, Ester Ledecka to rychtyg fenōmyn szportowy. Faworytka w slalōmie gigancie na desce wlazła na narciorskigo supergiganta, jak włazi sie do sklepu po tytka bōmbōnōw. Pożyczyła narty, sjechała, wygrała.

Pita Taufatofua, szportowiec z Tonga to raczyj zorta „wesołe synki”. Gwiozdōm niy ôstoł, ale we historii sie szkryfnōł. Piyrszy roz ôblyk narty dopiyro we wieku 33 lot (w kōńcu ujrzoł śniyg!), ale minimum olimpijski zrobiōł, tōż w CV mo i letni i zimowe IO.

Co do fusbalowej grajfki Usaina Bolta wiymy tela co sōm sie poasi. Chce być we 50-tce nojlepszech fusbalistōw świata i klupać po 20 bramōw na sezōn. Sprinter trynowoł z BVB, chce szpilać w ManU, a w ôstatnim tydniu mioł szkryfnōnć kōntrakt w RPA. Je yno feler. Do tyj pory tyroł na zawodach po 10 sek. We fusbalu trza to robić trocha dłōżyj, że ô kopaniu do bala niy spōmna.

A nasi? Downij za (pōł)amatorskigo szportu dobrych multiszportowcōw było wiyncyj. Nikerzi poradziyli nawet na tym prziszporować. Ernest Wilimowski, fusbalowo legynda Polski a Nimiec dorobioł na ping-pōngu. Przed wojnōm rajzowoł do Byndzina, kaj w żydowskim klubie Gwiazda-Stern kożdy chcioł sie ś nim sprōbować przi stole. Za wygrany szpil w deblu kasowoł 10 zł za co szło wtedy kupić 40 porcji gorkigo wōsztu ze żymłōm(!), a Ezi i jego partner wygrywali praje zawsze. Przinajmij tak to spōminoł tyn drugi, Alfred Tkocz (nota bene dobry handbalista).

Sōm tacy co i dzisio trynujōm na 2 frōnty. Choby „bohatyr” ôstatnigo tydnia. Grzegorz K. rezerwowy torman Górnika po szpilu we Wrocławiu razym z kōmplami kibolami prōbowoł siył w MMA. Medalu niy było, ale wynik poszoł w świat. Alkōmat pokozoł im ôd 0,7 do 2 prōmili.

Mrōz chyto to i sie hajcuje. Szkoda yno, że niy kożdy poradzi robić to do porzōndku. Skiż tego z luftu robi siy gynsty zac, kerego skłod je dłōgszy niż w nojgorszej zorty ôplerkach i zdołby sie ku nimu spis treści. W telkich warōnkach trynuje „do zdrowio” fol ślōnskich fusbalistōw z klubōw, kerym gynał trocha brakuje coby pojechać na ôbōz na Cypr. Je tyż jednak inkszo zorta fusbalistōw, kerzi ni majōm problymōw ze smogiym i to jedyn pierōn czy trynujōm u sia czy szpilajōm za granicōm. We słowyńskij Lublanie skōńczyły sie gynał Mistrzostwa Europy we Futsalu.

Na halowym Euro niy brakło Ślōnzokōw, wszyjscy w reprezyntacji Polski, kero ôstatni roz szpilała na telkim turnieju we 2001. Byli fusbalisty Clearexu Chorzōw (3), Piasta Glywice (2) i GSF Glywice (1) jak tyż ze ślōnskich połedniowo-wschodnich kresōw, tōż z Rekordu Bielsko-Biała (3). Po rymisie z Rusami (1:1) i przegranej z Kazachstanym (1:5) bioło-czerwōni niy wyleźli z grupy, ale gańby ni ma! Futsal a fusbal na trowie to inksze światy. Sam żodnego niy dziwi, że w grupie ôdpadujōm Włochy czy Francjo, a dalij lezōm wspōmogane brazylijskōm tiki-takōm kadry Azerōw a Kazachōw.

Forgot, werci sie roz za kedy sprōbować halōwki, bo to szport warciejszy, jeszcze bardzij techniczny i w naszych realiach zimowych nojzocniejszy a nojzdrowszy. Futsalisty już w dōma, tōż i my wracōmy a chytōmy sie fachlowanio. Nikere szpilplace musiały już być ôdśnieżōne na ôstatni piōntek, kej sztartła Ekstraklasa. Zaro we piyrszym szpilu mōglimy ôbadać forma Grubiorzy. Wyjazd do Płocka bōł do trynera Górnika ekstra misjōm, bo ôbrōna skuli kartek a kōntuzji musioł zrychtować praje na nowo. Kōmbinowoł bez cołko pauza, ale eksperymynt jak to padajōm „niy pyknōł”. Synki z Zobrzo dali se wklupać aż 4 bramy i ze 4:2 w pleca pojechali du dōm.

Trza trynować dalij… Tōż, drogi hajcyry! Dejcie żyć tym co robiōm fōrma na „świyżym” lufcie. Ô tōńszym a zdrowszym hajcowaniu poczytocie wszyjsko sam: http://czysteogrzewanie.pl/

We raji zbiōrka! Do jedynoście ôdlicz! I terozki chwila prowdy…

Marcin Brosz jeszcze tydziyń do zadku ni mōg być pewny eli jego „złoto” jedynostka sie utrzimie. Podstawa skład Górnika Zobrze bez jesiyń zmiynioł sie tak rychtyg yno wtedy kej musioł. Bez godki stracyni kogoś z podstawy byłoby czuć. Ôd 1 lutego na szczynści ôkno transferowe we nojwiynkszych europejskich ligach je zawarte, tōż Zobrze moge dychnōnć. A dyć starać było sie ô co! Bezmałaś „za piynć dwanoście” włosko Fiorentina chciała jeszcze skludzić Szymōna Żurkowskigo, 20-letnigo kapitana polskij młodziyżōwki. To już jednak (na jakiś czos) niyaktualne. Tera yno niy dać sie cylnōnć „fesztrōm” z USA, Chin eli Japōnii, chocioż do modych Grubiorzy z grajfkōm telki kierunki chyba mynij zocne.

Co do transferōw na plus Górnik tyż niy gupnōł. Testowali swoich modych synkōw – telko tera klubowo polityka. Za ciekawszy ruch idzie uznać yno wypożyczyni 22-letnigo ôbrōńcy Pawła Bochniewicza z Udinese. Tradycyjnie nojciekawszym transferym, kerego niy było, przekludziny Łukasza Podolskigo. Niy starejcie sie… Kaj tam 65! Łukasz na pyndzyjo jeszcze niy idzie.

Tōż kaj te ślōnski hity transferowe? Niy w Zobrzu to mono w Glywicach? Niy, tam asić sie mogōm co nojwyżyj wypożyczyniym dwōch legiōnistōw, kerych Wa-wa już niy chciała (Czerwiński a Jodłowiec). Szukōmy dalij i dojyżdżōmy na Dolny Ślōnsk. We Lubinie na dyć synkōw i z Gōrnego Ślōnska niy brakuje. Jedyn ś nich ôstowo bohatyrym zimowego szlagra. Jakub Świerczok trefio do Łudogorca Razgrad i zaro na sztart we trzech sparingach szczylo 4 bramy. W Lubinie Świerczok tyroł yno bez pōł roku. Kej Bułgary ciepli na stōł piniōndze szkryfniynte w kōntrakcie było już pośmiatane.

Rownowoga we przirodzie być musi. Do Lubina kludzi sie synek spod Raciborza, Łukasz Moneta (24 l.). Z Gōrnego na Dolny Ślōnsk GPS pokludziōł go bez Warszawa, kerej niy zawojowoł po roz drugi. Lubin chyba rychtyg lepszōm ôpcjōm do naszych chopcōw, pra? A i kibicować pódzie Monecie… z czystym sercym.

Fusbalisty na ôbozach, tōż i newsy z naszego światka fusbalu choby we szczycie sezōnu ôgōrkowego (w realiach styczniowych to raczyj bydōm kiszōne).

Szlagrym tydnia rajdowo rajza Bartosza Sarnowskigo. Auto prezesa Górnika Zobrze miało ôstatnio lekki szczaśniynci. Nic to rychtyg poważnego, problym yno że prezes ni mo prawa jazdy, kere wypunktowała mu pryndzyj drogōwka. I co sam pedzieć? Keby yno Gornik tak punktowoł! Majstra miołby już w kapsie… Kiedyś prezydynt Wrocławia po wjechaniu pod prōnd na glajzach godoł, że pilowoł do kurie. W Zobrzu jednak tłumaczyni na biskupa niy pōmoże. Trza rzykać do wyższej instancje, bo Sarnowskimu grozi 2 lata wiynziynio!

Co do rzykanio… Mono pōmogōm kibole? Dyć ekumyniczno pōnć polskich kibicōw (ôd Legii po Odra W.) już tera szafła se miano nojgłośnyjszej pōnci 2018, a kaj tam siyrpiyń! Z cołkim szacunkiym do tych co rychtyg poszli 13 stycznia na Jasno Gōra porzykać, zaś ôbadalimy że kibol poradzi i to niy ważne czy je w miejskim haźlu czy w sanktuarium. Kibole na mszy usłyszeli to co słyszeć chcieli, a na dworze zrobiyli „młyn” we swoim stylu. Race, rasistowski fany (przody poświyncōne) plus mało fojera z transparyntōw kōntrmanifastacje. Niy brakło tradycyjnych pōntniczych prziśpiywek ôd „Jeszcze Polska” po „zamiast liści będą wisieć komuniści”.

Poważno impreza zrychtowoł za to prezes Śl.ZPN Hynryk Kula. Debata na tymat co trza zrobić coby ślōnski klub zaś bōł majstrym Polski, tōż w skrōcie „czamu jes jak jes i kiedy bydzie jak było”. Chciałoby sie pedzieć – nic nowego. Debat na tyn tymat idzie posłōchać niy ôd dzisiej w piyrszym lepszym ślōnskim szynku kaś przi trzecim-czwortym piwie. Ale u prezesa Kuli, zwracōm hōnor, było kōnkretnij. Szpece godali ô knifach na wspōmożyni systymu szkolynio a sōm prezes na kōniec pedzioł, że hneda Śl.ZPN wkludzi w życi pora idyji ekstra dlo modych fusbalistōw, jak choby program stypyndiōw. Coś sie robi i dobrze… Dyć samym fandzolyniym przi krauzie ôgōrkōw świata niy zmiyniymy!

Tradycyjnie już na kōniec roku Ślōnski Fusbal chyto sie za wrōżyni na bezrok. Dyć to nojlepszy ku tymu czos. Kery niy w tymacie spōminōm skōnd to sie wziyno…

Nocka durś pokōnała dziyń. Świat ôstoł w cimoku. Hneda jednak klara zacznie sie pokozywać na dłōżyj. Na świat przidzie Pōnbōczek, światło. Idzie nadziejo na lepsze. Tyn przełōmowy mōmynt nasze starziki ôd downa mieli za wyjōntkowy. W takim czasie trza fest dować pozōr co sie pocho, bo woży sie naszo prziszłość. Jak to padajōm jaki bydziesz bez wilijo taki bez cołki rok. Nikerzi tyż już 12 dni przed wilijōm (ôd 13 XII – św. Łucji) zaczynali dziwać sie w niebo, bo to dziyń po dniu wrōżba na pogoda na kożdy miesiōnc na bezrok. Prognoza pogody to gynał niy mojo bojka tōż dōm tymu pokōj. Do kōnkretōw! Nastympny rok we Ślōnskim Fusbalu pokulo sie tak…

Ôstatni postympy w rehabilitacji wrōżōm Arkowi Milikowi sztartniynci normalnych tryningōw jeszcze latoś, a w kadrze na szpil moge być już 21 stycznia z Atalantōm Bergamo. Déjà vu? Rok tymu wracoł po rewiyrze w podobnym czasie… Mono lepij niy w jego przipadku niy wrōżyć a doczkać i rzykać niych niy kopnie w jaki dornik.

Milikowi urośnie jednak ślōnsko kōnkuryncjo w ataku polskij kadry. 2 hat-tricki w dwōch grudniowych szpilach Jakuba Świerczoka ni mogōm źle wrōżyć. Tyn synek musi pojechać na Rusy, dyć Nawałce zdo sie nowo siyła w ataku… Chyba rychtyg tak bydzie, bele yno Kuba niy wrōciōł do „diety nutellowej”.

Górnik Zobrze w haji ô majstra bydzie sie liczōł do ôstatnich sekund. Bele yno niy doł se go w tych ôstatnich sekundach wytargać, jak w ôstatnim szpilu z Arkōm kaj gupio straciōł brama na 1:0 i w tabeli spod na drugi plac… Spokojnie niy wszyjski wrōżby sie spełniajōm jedyn do jedyn.

Stadiōn Ślōnski doczko sie szpilu reprezyntacji Polski po ponad 8 latach… To już gynał niy wrōżba a ôbietnica prezesa PZPN. Poloki na Ślōnskim poszpilajōm już w marcu. Przijedzie sam Korea abo Nigerio.

 

—————-

Ślōnski Fusbal robi świōnteczno-noworoczno pauza. Nastympny felietōn pokoże sie 9 stycznia. Wesołych, nojlepszego i do zaś!

GB

Dopiyro zimowo pauza powiy nōm tak rychtyg eli Górnik Zobrze na dłōgszo meta myśli ô poważnym fōngowaniu i szpilaniu ô majstra. Hneda piyrszy test. Eli z Zobrzo ôdyndzie nojlepszy snajper?

Bez ôstatni lata sprzedowani nolepszego „samca alfa” po kożdej rundzie było podstawōm polityki transferowej Górnika. Wtedy szło być wiernym klubowi i za jednym szlagiym nim ciepnōnć, skoro transfer dowoł mu trocha kotlokōw na życi. Tera bezmałaś w Zobrzu je inacy, co pokozać już miało letni ôkno transferowe. Po tych co poszli żodyn już niy ślimto (Danch, Kopacz), a poru nowych poradziyło sie dobrze w KSG znojś (Koj, Wieteska, Kądzior). Górnik idzie w modych, kerzi majōm idyntyfikować sie z klubym i dobrze firmować Ślōnsk…

Igor Angulo zdałoby sie średnio ku tymu pasuje, chocioż… Wiek? Sprawa dyskusyjno. To je w gowie. Wiynzi z klubym/regiōnym?  Ciynżko liczyć że 32-letni fusbalista z Bilbao po zaliczyniu 11 klubōw karierze ôroz z miłości do roladōw i paprotek ôdbitych we wōnglu przekludzi sie na zawsze do Zobrzo. A jednak, Górnik to do Igora coś wiyncyj! Godka, że Zobrze spōmino mu Bilbao i że rychtyg dobrze sie sam czuje ni ma yno fandzolyniym. Zobrze to dwanosty i nojlepszy przistanek w karierze Angulo. Tukej zrobiōł awans, bije snajperski rekordy, stadiōn wyśpiywuje jego nazwisko i sztyjc jy zupa na zdobycznym kokocie. Niy dziwne, że czuje sie jak u sia i ofyn godo, że nikaj sie stōnd niy wybiyro. Z jednym „ale”! Do sia du dōm rod by wrōciōł. Hiszpańsko „Marca” wywōniała, że Athletic Bilbao (latoś w dolnych kōnskach tabeli Primera Division) chciołby Igora nazod. Bramy klupie, rodzōny Bask i sztyjc 3 lata modszy ôd Aduriza, podstawowego snajpera Athleticu. Kandydat klasa!

Angulo gynał szkryfnōł kōntrakt do 2020 r. Wert je tera wiyncyj. Pora lot do zadku czakali by już w Zobrzu na brif z Bilbao choby na zbowiyni. Tera? Ni ma brifu – ni ma ô czym godać. Problym bydzie jak brif rychtyg przidzie. Chynć zatrzimanio grocza moge niy styknōnć jak rolady przestanōm wōniać…