Archiwa kategorii: Reprezyntacje

Fajnie mieć piykny niedzielny ancug, ale niy ma siyły, kiedyś sfifro sie zōłzōm abo roztargo. A jak to trefi przed wielkōm imprezōm? Dyć gańba iś na weseli w arbaju… Ôstatni szpile reprezyntacyjne latoś to do zakwalifikowanych już na Mundial ôpcjo do ôbadanio planu B – nowych taktyk, knifōw, czornych kōni. Fto rod po awansie Polokōw pado, że w kadrze Nawałki wszyjsko funguje jak trza chyba doł sie zrobić za błozna rankigowi FIFA.

Nawałka mōnter dziwo sie na to co sie pocho w kadrze, beztōż kōmbinuje… Eli pōmoc przidzie ze Ślōnska? Selekcjōner mo syntymynt do Górnika Zobrze. Powołani do kadry dwōch nowych Grubiorzy niy wziyno sie jednak z luftu. Pōmōgła sam bez godki gra cołkigo Górnika. Damian Kądzior i Rafał Kurzawa wartko jednak piyrszych skrzipek w kadrze niy zagrajōm (z Urugwajym ani niy wleźli). U Nawałki debiutuje sie po lekku…

Wiy ô tym Kamil Wilczek (w kadrze 2 lata, z Urugwajym I roz w podstawie). Co do niego i Jakuba Świerczoka (I roz w kadrze, debiut z Urugwajym) Nawałka mo chyba jednak wiynksze plany. Rewiyry Milika i Lewandowskigo dowajōm do myślynio. Kery ze  Ślōnzokōw wyônaczy sie na zmiynnika numer jedyn w ataku? Mało czasu na testy. Nawałka stowo do „randki w ciymno”…

Kandydat nr 1. Grocz z Wodzisławia za łebka wyhoczōny bez hiszpańskich skautōw  (UD Horodada). Hneda nazod na Ślōnsku. Tytuł nojlepszego snajpera Ekstraklasy w Piaście Gliwice zakludziōł go do Serie A. W ôstatnim sezōnie w duńskim Brøndby 19 bramōw a 14 asyst. Bōł w cugu, tera trocha sztopnōł, bo tyż mało kiedy szpilo po 90 min. Wilczek jednak sztyjc bajsnōnć poradzi…

Kandydat nr 2. Synek z Tychōw tyż wczas ôgłoszōny „talyntym”, tyż wczas na Zachodzie. Transfer z Polonii Bytōm do Kaiserslautern niy rozfechtowoł jednak jego kariery. Świerczok bezmałaś w Nimcach poradziōł zjeś krauza nutelli ôroz. Wziōn sie za sia i spamiyntoł sie w Tychach. Latoś w Zagłębiu Lubin klupnōł już 9 bramōw.

Niystety z Urugwajym ôba bez bramy… Adamie, wybōr noleży do Cia.

Świyżo rozhajcowano haja w Katalōnii ô referyndum niypodległościowe przeônaczyła sie już do porzōndku na świat fusbalu. Hiszpany zdōnżyli już wygwizdać Gerarda Piqué, a szpece-wizjōnery już poukłodały nowe 11-stki reprezyntacji Hiszpanii i Katalonii.

Fusbalowo reprezyntacjo Katalōnii to gynał niy jakoś durś nowość. Piyrszy szpil zagrała bezmałaś już w 1904, a po roz piyrszy z kadrōm inkszego państwa w 1912 (0:7 z Francjōm). Downij pōmogały nij niy roz auslyndry – przeważnie grocze Barcelony (np. Johann Cruyff), ale niy yno. U Katalōńczykōw groł nawet Alfredo di Stéfano z Realu Madryt. Terozki kadra Katalōnii to już raczyj yno synki z regiōnu, ale tyż niy bele kto. Nazwiska Piqué, Busquets, Bartra godajōm same za sia. Grajōm tera przinajmij roz do roku, ôstatnio z Tunezjōm w grudniu 2016 (3:3, po elwrach 2:4).

Jak już ô reprezyntacjach niyzrzeszōnych w FIFA… My tyż mōmy (czy mielimy) sie czym asić! Piyrszy szpil reprezyntacji Ślōnska to już 1920 r. (8:3 w pleca z Czarnymi Lwów). Potym fest w zocy były szpile Ślōnsk Polski vs Ślōnsk Nimiecki. W latach 1924-39 było ich aż 20 (9 wygranych strōny polskij, 7 nimieckij, 4 rymisy). Po wojnie kadra Ślōnska szpilała jeszcze niy roz, przeciwnicy rozmańci ôd Polokōw po Chińczykōw! Co do gwiozd to przewinyły sie sam nojwiynksze nazwiska ślōnskigo fusbalu (np. Wilimowski, Cieślik), a były i auslyndry. W ôstatnim szpilu za Piechniczka zagrali fusbaliści… Zagłębia Sosnowiec. À propos tyn ôstatni roz kadra żōłto-niybieskich pokozała sie w 2006 r., w szpilu charytatywnym z Polskōm (1:1).

Widać trocha sōm my jednak po zadku za Katalōniōm. Spokojnie – godōm yno o fusbalu! W Polsce tera ślōnsko-katalōński to podejrzane sprawy. Dyć partia „miłościwie panujōnco” koże dać pozōr, bo w Polsce jak w Hiszpanii tyż grasujōm autōnōmisty! Po prowdzie polityka mōm kajś, ale telki szpil Reprezyntacji Ślōnska rod bych zaś ôbejrzoł. Do samego szpasu.

Nazod po 11 latach. Na ôtwarci Stadiōnu Ślōnskigo gynał, pra?

Poloki wygrywajōm z Czornogōrōm 2:1. Toć, ni mōgło by do tego dōnś bez ślōnskigo udziału. Zwyciynsko brama szczylo Łukasz Piszczek, jedyn z dwóch Ślōnzokōw na szpilplacu w Podgoricy.

W piyrszej jedynostce Nawałki wyloz tym razym yno Piszczek i Glik. Etatowy snajper kadry Milik zaglōndoł na szpil z ławy, ale w snajperskich ôbowiōnzkach zastōmpiōł go do porzōndku spōmniany Piszczek. Po zawalyniu dwóch lagōw w minuta, zrehabilitowoł sie piyknym technicznym szlagiym na 2:1. Mōmy w polskij kadrze ślōnsko jakość i ilość. Reprezyntacjo Polski ôstatnio zaś wzbogaciyła sie o jednego Ślōnzoka (torman Łukasz Skorupski). 5 powołanych do kadry na Czornogōra to już rychtyk dobry wynik, kerego zaś downo niy było. Spōmniano piōntka: Piszczek, Glik, Milik, Wilczek i Skorupski to ponad 25% wszyjskich powołań Nawałki z zagranicznych klubōw. Gorzij wyglōndajōm powołania z polskij ekstraklasy. Tukej żodnego Ślōnzoka Nawałka niy docyniōł, ale werci sie dać pozōr, że 4 z 7 powołanych „ekstraklaseiros” mo w CV dłōgszo abo krōtszo gra w jednym ze ślōnskich klubōw.

Sztyjc jednak w pierōny daleko do ślōnskich rekordōw powołań. Były na dyć telki lata kej Ślōnzoki durś zdōminowali polsko reprezyntacjo fusbalowo. Na dyć starziki Czornogōrcōw, reprezyntanci Jugosławie w latach 30’ (czasy Wilimowskigo, Wodarza) i 60’ (czasy Pohla, Brychczego) szpilali z polskōm 11-stkōm złożōnōm nikedy z nawet ôśmiu Ślōnzokōw!

Niyskorzij Hanysōw w polskij kadrze bywało już mynij. A na poczōntku XXI w. łatwij było już znolyź Ślōnzoka w Mannschaftcie. Na Euro 2008, kej bramy szczyloł Polokōm duet Podolski-Klose, Bioło-Czerwoni mieli w składzie yno rezerwowego Piszczka. To już jednak historio. À propos, w czwortek 130. szpilym i 49. bramōm z reprezyntacjōm Nimiec pożegnoł sie Łukasz Podolski, ôstatnij jak do tyj pory ślōnski reprezyntant w Mannschafcie… Na telki pożegnani forgot trza se zasłużyć. Łukasz szlagiym z dystansu symnōł pajynczyna z winkla bramy. Kaj nastympcy?

Hneda zaś rozhajcuje sie haja ô Mundial… Adam Nawałka już ôgłosiōł zagraniczne powołania na szpil Polski z Czornogōrōm. Mōmy być z czego radzi do kadry wraco po kōntuzji Arek Milik. Powołani dostoł tyż jego stary kamrat z Zobrzo, Łukasz Skorupski nowy torman nr 3 w Polsce.

Piszczek, Glik, Milik, Wilczek i Skorupski. Do piynciu urosła nōm ślōnsko delegacjo w reprezyntacji Polski. Po tym jak Artur Boruc ôgłosiōł reprezyntacyjno pyndzyjo, rola drugigo rezerwowego erbnōł pō nim Łukasz Skorupski. Były grocz Gornika reprezyntuje terozki w Serie A Empoli FC (na wypożyczyniu z AS Roma). 10 szpilōw z czystym kōntym w drużynie, kero brōni sie przed spadkiym to wynik, kery dużo godo ô jego formie w tym sezōnie.

Łukasz to stary znajōmy selekcjōnera. Dyć to u Nawałki Skorupski debiutowoł w Ekstraklasie (nota bene razym z Milikiym i Olkowskim). Za piykne ôczy powołanio jednak niy dostowo. Selekcjōner sztyjc mo go w pamiynci. Na kadra zaprosiōł już go na jesiyń, ale Łukasz na swojo szansa bydzie musioł jeszcze trocha doczkać, bo kōnkuryncjo na bramie wielko. Swoji 5 minut jeszcze dostanie, a ôn gynał już wiy jak to wykorzystać. Pokozoł to choby w swoim debiucie w kadrze U-21 w paździyrniku 2011 r. W szpilu z Portugaliōm prziszło mu wlyź na boisko i chytać elwer. „Spokojnie, jo to chyca” pedziōł yno kamratōm na ławce i tak tyż zrobiōł.

Ślōnski słowa Łukasza trefiyły po tym szpilu do tytułōw relacji poświyncōnych tymu szpilowi. Łukasz niy gańbuje sie ofyn godać po ślōnsku. Nikedy wciepnie pora słōw po naszymu dziynnikorzowi. Bezmałaś czuje sie Ślōnzokiym i dobrze godo po ślōnsku, chocioż jego familio gynał ze Ślōnska niy pochodzi. Wychowani z synkami na Zaborzu zrobiyło jednak swoji. À propos wychowanio… Z Łukasza downij bōł niyzły hajok. Ôstatnio chyba jednak spoważnioł i spokojnie czeko na swoji nastympne 5 minut. Do tyj pory w piyrszej reprezyntacji zagroł yno roz w 2012 r. z Macedōniōm (4:1) jeszcze za Fornalika. Tyn synek mo szmaki na wiyncyj…

Kibice fusbalu z Zobrzo ni majōm ôstatnio lekko. Ô potyndze Gôrnika mogōm yno pomarzyć. Bez ôstatni weekend mōgli być jednak dumni. Derbōw ślōnskigo miasta w szwierćfinale turnieju ô majstra Afryki na dyć niy widzi sie czynsto. Poznejcie sobotnich rywali – ślōnskich Afrykańczykōw…

Piyrszy to już doświadczōny chop. Reprezyntant Tunezji, urodzōny 70 lot tymu w Zobrzu Hynryk Kasperczak. Drugo młodość przeżywo sie rozmańcie. Jedni balujōm w sanatorium w Ustrōniu inksi grajōm ô majstra Afryki… Kasperczakowi ciynżko iś na pyndzyjo. Afryka niy dałaby mu pokōj. Z telkim CV… Pan Hynio kludziōł już kadry sześciu afrykańskich państw. W Pucharze Norodōw Afryki zagroł latoś po roz siōdmy. Brakuje mu yno majstra. Zgarnōł już na dyć czworty plac z Mali (’02), trzeci z WKS (’94) i drugi gynał z Tunezjōm (’96). Tera Orły Kartaginy zaś pod jego rzōndami…

W drugim narożniku reprezyntant Burkina Faso, Prejuce „Prezes” Nakoulma, wicemajster Afryki 2013 i chyba chop z nojwiynkszōm pojymnościōm płuc w historii Ekstraklasy. Były grubiorz (2011-14 w Gorniku Zabrze) w PNA’17 przed szwierćfinałym klupnōł już brama Gabōnowi (1:1) i dodoł asysta z Gwineōm Bissau (2:0).

„Ślōnski derby” zapowiadały sie ciekawie, chocioż Tunezjo a Burkina Faso to ekipy bez gwiozd europejskich klubōw. Faworyty jak Aubameyang (Gabōn) czy Mahrez (Algeria) w sobota mōgli sie już yno dziwać na turniej z boku, niy wyleźli ani z grupy.

3, 2, 1. Jadymy… Szpil w trzech słowach. Synki Hyńka miejscami fest przewożali, ale ôstatni 15 minut noleżało do Burkińczykōw, kerzi po piyknym szlagu z wolnego kludziyli 1:0. Tera Tunezjo ciepie sie do przodku. Majōm rōg. W tym czasie Nakoulma trzimie słupek swojij bramki. Wyjazd! Po poranostu sekundach, 100 metrowym sprincie z miniynciym tormana Prezes szczylo i wkludzo Burkina do pōłfinału!

Hynio Kasperczak ôstoł gynał nojstarszym selekcjōnerym w historii PNA, ale sztyjc ni mo majstra. Eźli niy sprōbuje za 2 lata? Latoś zostowo kibicować Prezesowi…

Pizło dwanoście. Kalyndorze przeszkyrtniynte na 2017. Jes i nazod Ślōnski Fusbal. Jes i pytani. Czym bydymy żyć latoś? Rok bez  Euro i Mundialu. Eźli rychtyk fanōm fusbalu musi sie w 2017 mierznōnć?

Jak godka ô turniejach miyndzypaństwowych to jes dobro wiadōmość do fanōw hycu i wuwuzeli. Jeszcze w styczniu sztartuje Puchar Narodōw Afryki w Gabōnie. Bydzie gorko i zaś niy braknie ślōnskigo akcyntu. Nasz pewny reprezyntant w PNA Hynio Kasperczak tym razym pokludzi kadra Tunezji.

U nos w tym czasie emocjōnować sie bydymy  transferami. Tak ciekawie jak bez lato moge niy być, ale już sie zaczyno pochać. Eźli doczkōmy sie ślōnskigo fusbalisty w Interze Mediolan? Na razie to yno famy…

Radzi na pewno za to bydymy skuli Ligi Majstrōw. Już to, że trzech Ślōnzokōw doszło do 1/8 tego turnieju je wynikiym historycznym. Glikowi, Milikowi i Piszczkowi bydymy kibicować już ôd połowy lutego. Widzymy sie 3 czyrwca w Cardiff?

W ekstraklasie cudōw ni mogymy sie latoś spodziywać. Nasze ekipy bydōm walczyć ô byt i tyn szportowy i finansowo-licyncyjny. Przody bydymy dować pozōr wiela ujymnych punktōw dostanie Ruch, a dopiyro potym ôbadōmy czy gra synkōw z Chorzowa i Gliwic styknie na utrzimani.

To, wiela ekip bydymy mieć w Ekstraklsie na jesiyń, do kōńca sezōnu moge być niywiadōme. Dyć ô awans z I ligi na pewno powalczy GKS Katowice, a bydzie to tym ciekawsze, że ich rywalami sōmsiody zza Brynicy. Radzi włōnczyliby sie w ta haja synki z Zobrzo, ale w przipadku Górnika ô awans moge być ciynżyj.

Kōniec wiosny to tyż emocje zwiōnzane z Euro U-21. Kōnsek turnieju pokulo sie tyż na Ślōnsku. Tychy bydōm na dyć jednym z gospodorzy, tamek tyż ôdbydzie sie pōłfinał. Na turnieju niy braknie Ślōnzokōw, zagrać bydzie mōg nawet reprezyntant kadry A, Arek Milik.

Bez jesiyń pozaglōndōmy na finał eliminacji do Mundialu, ale przody mōmy doczkać sie istnego cudu. We wrześniu bezmałaś ôtwiyrōmy Stadiōn Ślōnski…

Tym razym niy trza było dwōch w ataku coby Polsko klupła Rumunōm 3 bramy. Na dłōgszo meta jednak telko taktyka moge już tak niy fungować. Lepszy coby Arek Milik wartko wracoł z rewiyru.  Na szczynści niy próbujōm go lyczyć jak „za piyrwyj”…

54 min. fest ważnego szpilu eliminacji do Mundialu. Kapitan reprezyntacji Polski na fol szwōngu wylatuje na wolny plac, ale ze zadku szpetnōm „kosōm”sztopuje go ôbrōńca. Trza boroka sniyś. Niy zagro już latoś ani na bezrok. Po faulu Roya Mac Farlanda Włodzimierz Lubański uszkodziōł se dwie łōnkotki i wiynzadło prziboczne. Na rewiyrze bōł ôd 6 czyrwca 1973 fōrt do marca 1975! W szczycie kariery nojlepszy snajper Górnika Zobrze i polskij kadry siedzioł w dōma. Czamu?

Piyrszo na wartko przekludzōno ôperacjo w Piekarach Śl. Zło diagnoza. Dochtory napochały wiynkszygo pierōństwa niż Mac Farland. Rehabilitacje niy pōmogały. Pōmōgła dopiyro rajza do Wiednia i ôperacjo u dochtora Schwingera. Lubański zaczōn wartko zdrowieć i w kōńcu doczkoł mōmyntu kej mōg se ôbuć fusbaloki, co stoło już pod znakiym zapytanio. Pan Włodek do formy sprzed rewiyru już niy wrōciōł. Sztyjc niy poradzi do kōńca zgiōnć prawej nogi. Jego staw kolanowy je fest rozônaczōny.

Nazod w XXI wieku. 40 min. fest ważnego szpilu eliminacji do Mundialu. Napastnik reprezyntacji Polski walczy ô bal z ôbrōńcōm. Złe stōmpniynci i w kolanie coś szczyrkło. Wiōnzadło krziżowe przedni niy strzimało. Scynariusz trocha podany na tyn z 73. Ciōng dalszy już jednak durś inkszy. Niż skōńczy sie szpil Arek bydzie w drōdze na badania. Hneda pofurgnie do Rzymu, kaj już dwa dni po szpilu przyndzie ôperacjo kolana. Piyrsze prognozy godały ô 6 miesiōncach pauzy. Chwila potym była już godka, że rewiyr Arka niy zetrwie wiyncyj jak 100 dni.

Dziyń przed szpilym Polski z Rumuniōm po badaniach kōntrolnych Milikowi pozwolyli na tyrać z balym. Jedne je pewne zdrowio nojlepszych ślōnskich fusbalistōw wachuje sie tera w durś inkszym standardzie niż w latach 70-tych.

Zaś doczkali my sie kōńca jakijś epoki. Już „hneda”, za jakiś poradziesiōnt lot z perspektywy czasu radzi bydymy mōgli godać młodszym pokolyniōm kibiców: „Synek, a jo to jeszcze widzioł Mirka Klose po szpilplacu tyrać…” We wieku 38 lot snajper ofyn pedzioł „doś”. Terozki leberka. Poczōntek fusbalowej pyndzyji…

Niy tak wartko. Coś trza na dyć robić. Mirek już se to dobrze przemyśloł. Niy trynuje już profesjonalnie ôd lata kej skōńczōł mu sie kōntrakt w Lazio. Przody jeszcze myśloł do jakigoś klubu sie chycić. W kōńcu, jak pedzioł, dojrzoł do decyzji, że terozki chce ôbadać fusbal z inkszej perspektywy. Dołōnczo beztōż do sztabu szkolyniowego Mannschaftu kaj przi nojlepszech szpecach bydzie uczōł sie nowego fachu.

Z telkim doświadczyniym, bez godki mo papiōry na trynera. À propos, forgot we wartkim skrōcie. 2 razy tytuł majstra i 2 razy Puchar Nimiec, roz Puchar Włoch. Krōl szczelōw Bundesligi i Mundialu, na Mistrzostwach Świata i Europy razym 6 razy na podium, w tym tytuł Majstra Świata z 2014. Do tego trza dociepać indywidualne rekordy, kere wartko pobite niy bydōm, tōż 16 bramōw na Mundialach (4 turnieje) i  71 bramōw w kadrze Nimiec klupniynte w 137 szpilach (wiyncyj razy w kadrze zagroł yno Lothar Matthäus). Na telki CV szłoby szporować bez pora żyć…

Poza tym Mirek to fusbalista z klasōm. Poradziōł prziznować sie syndziōm, że szczelōł brama rynkōm, abo wykopać bal w trybuny z elwra, kery sie niy noleżoł. To jednak za mało coby przichlybić sie polskim dziynnikorzōm a kibicom, w ôczach kerych zdoł sie nawet zdrajcōm. To za głośno nimiecki hymn śpiywoł, to zaś po Polsku niy chcioł sie ôdezwać. Toż to pierōn! Za mało „polski” tyn Mirek. Na szczynści w gupi fandzolyni sie niy wdowoł yno robiōł swojo robota. Niy musioł fōmlować choby Messi abo Ronaldo, coby impōnować skutycznościōm. Bliżyj mu raczyj do starego pokolynio snajperōw, jak Inzaghi abo Raul, kerych bal szuko sōm. Szlag-brama-ynta. Kto widzioł wiy ô czym godka…

W 11-stce Polskij kadry lekki miszōng. Styknōł jedyn szpil i ze składu wyfurgło dwóch naszych synkōw. Na Polsko-Armynio Milik z Piszczkiym mōgli dziwać sie yno w TV. Niy doś, że trza lyczyć kolana to sam jeszcze telko dawka hercklekotōw! Po szlagu Lewego mōgli dychnōnć. Yno co na ta brama padaliby Pan Ernest Pohl i co czujōm Pan Włodek Lubański?

Nasi poza szpilplacym, abo trocha w ciyniu. Poza debiutym Kamila Wilczka nic co byłoby we werci ôpisać. W cyntrum zainteresowanio za to sztyjc Robert Lewandowski. Po klupniynciu 40-stej bramy w kadrze w piyrszej 10-tce nojlepszych snajperōw reprezyntacji wyprzedziōł już trzecigo Ślōnzoka. Tym razym Lewy wziōn Ernesta Pohla, kery tyroł w bioło-czerwōnym „ancugu” w latach 1955-65. Za Robertym sōm już telki legyndy jak Ernest Wilimowski (21 bramōw, 9. plac) czy Gerard Cieślik (27 bramōw, 7. plac). Ze zadku ôstoł tyż snajper Górnika Zabrze, urodzōny w Gdańsku Andrzej Szarmach (32 bramy, 6. plac). Lider sztyjc w ślōnskich rynkach, ale po lekku zagrożōny. Do Lubańskigo Lewy traci na dyć już yno 8 bramōw.

To jednak jeszcze niy sōm szczyt ślōnskich reprezyntacyjnych rekordōw. 48 bramōw, tela samo co Lubański, klupnōł w kadrze Łukasz Podolski. W Nimcach to stykło jednak „yno” na nojniższy stopiyń podium. Piyrszy plac na snajperskij liście Mannschaftu i aż 71 bramōw noleży do Mirka Klose. Co by ci Nimce zrobiyli bez Ślōnska…

Trza jednak ofyn pedzieć, że pokolyni Lewego mo fory. Reprezyntacje grajōm tera czynścij. Spōmnianymu Pohlowi do siekniyncio 39 bramōw stykło 46 szpilōw, Lewy coby go dogōnić musioł zagrać aż 83 razy. Chytōmy za kalkulator… Skutyczność Roberta to 48%. W porownaniu z Pohlym (85%), Lubańskim (64%), czy Cieślikiym (60%) mo na noc. A kaj mu tam do Wilimowskigo (95%), kerego wynik przi dodaniu wystympōw w kadrze Nimiec rośnie do 113% (34 bramy na 30 szpilōw)!

Perspektywy na rekordy? Arek Milik (21. plac, 11 br.). Latoś już nic niy dociepnie, ale po rewiyrze bydzie mioł fol czasu…

Poloki wygrywajōm z Daniōm 3:2 po trzech bramach Lewandowskigo. W piyrszej jedynostce Polski wylazło zaś trzech ślōnskich pewniakōw, ale kej godōmy ô nich to trza se ofyn pedzieć: mōgło być lepij… Dzisiejszo relacjo bydzie bardzij szporobliwo przi ciepaniu bōmbōnowo-maszketowymi metaforami.

Zaczna ôd plusōw, bo niy wypado ô nich zapōmnieć. Poloki zdobyli 3 punkty i do tego dociepnōł coś kożdy z trzech Ślōnzokōw, kerzi tyrali w sobota po szpilplacu. Fest aktywny bōł Arek Milik, kery wywalczōł elwer i kerego fest brakowało w drugij połowie. Niy idzie tyż zapōmnieć ô dłōgim podaniu/”wyjeździe” Łukasza Piszczka, po kerym Lewandowski klupnōł trzecio brama. Mono tela styknie… Trocha spamiyntanio sie na dyć noleży!

To niy bōł nojlepszy szpil Kamila Glika. Pokozała to już piyrszo akcjo Duńczykōw z 4. minuty. Zło kalkulacjo Kamila pozwolyła wlecieć rywalowi na fol szwōngu w „szesnostka” Fabiańskigo. Dogodywani sie z nowym sztoperym Cionkiym tyż niy fungowało jak trza. W drugim kōnsku szpilu Glik pokozoł jednak, że je w snajperskim cugu. Po piyknej bramie w Lidze Majstrōw prziszła (tyż niy szpetno) brama w kadrze, szkoda yno że do swojigo neca.

Niynojgorsze zawody groł Łukasz Piszczek, ale jakby sie niy dziwać to jymu niy udało sie wybić bala spod szłapōw Poulsena przi akcji na 3:2. Ciynżko co złego pedzieć ô Arku Miliku. Wiela niy brakło a klupnōł by brama po cyntrze Grosickigo. Hneda jednak szpetnie spod na kolano i musioł slyź, chocioż jeszcze bez dwie minuty przed przerwōm liczōł, że kōntuzjo „rozdepce”. Niystety już wiymy, że czeko go dłōgszy rewiyr i to je tak rychtyk nojwiynkszy minus tego szpilu.

Toć… Dycki niy bydzie idyalnie. Nikiedy trza klupnōnć samobója coby kiedy indzij być man of the match w Lidze Majstrōw, pra? Kto jak kto, ale Glik w tym tymacie wiy ô co sie rozchodzi. Proszōny ô kōmyntorz do samobóji pedzioł, że niy piyrszo to i niy ôstatnio w jego karierze. Kibel zimnej wody w wygranym szpilu ni ma zły.