Archiwa kategorii: Ślōnzoki za granicōm

Jeszcze miesiōnc do zadku wyglōndało to biydnie. Pewny plac w ataku Nawałki mioł Lewandowski, a dalij szyroko kadra – rewiyrowcy, prawie pyndzyjōnisty, szpece ôd ławkowego „zic-hajcungu”. Sytuacjo jednak durś sie zwyrtła. W nojważniejszych szpilach sezōnu bramy zaczły klupać ślōnski snajpery. Hneda mogymy mieć majstrōw we trzech europejskich ligach…

Danio. Kamil Wilczek niy dostoł powołanio na sparingi z Nigeriōm a Koreōm. Toć, to Nawałka wkludzoł go do kadry i sztyjc powoływoł ôd 2015, ale do tera Kamil zagroł tam yno 3 szpile (z biydōm 116 min). Stary ni ma, ale modym wilczkiym tyż go biyda nazwać. Naciski coby dać se ś nim pokōj rosły, a że przestoł szpilać regularnie w Brøndby znod sie powōd. We marcu bōł już skreślōny. A co sie pocho tera? We sztyrech szpilach grupy majstrowskij Wilczek klupie piynć bramōw w tym dwie w tym nojwazniejszym z FC Midtjylland.

Bułgario. Jakuba Świerczoka ôstatni zgrupowani kadry gynał niy minyło, ale i tak za fest tamek niy poszaloł. Nijaki 23 min. we szpilu z Nigeriōm do Mundialu go na pewno niy przibliżyły. Tydziyń niyskorzij w szpilu ligowym ze Starōm Zagorōm mioł jeszcze mynij czasu coby sie wykozać, ale klupnoł dwie bramy. W ôstatnio sobota szczelōł na 4:2 z Botewym Płowdiw. To jego trzeci szpil z rzyndu, w kerym trefio i szōsto brama w lidze.

Italio. Miesiōnc tymu Milik bōł na kadrze, ale ô jego formie sztyjc wiedzielimy mało. Spōmnioł ô sia w szpilu z Chievo, kej w dwie ôstatni minuty zaliczōł brama a asysta i wykludziōł Napoli na 2:1. W ôstatnio środa z Udinese bōł już w podstawie (po 242 dniach!) i zaś wraziōł bal do neca. To dało mu plac na ôkłodce La Gazetta dello Sport i rozhajcowało dyskusje ô zwiynkszyniu jego roli w ataku. Po piyrszej kōntuzji kolana bōł nazod na szpilplacu pryndzyj. Tera za to wraco na wiynkszym szwōngu, ale Sarri Milikowe siyły sztyjc szporuje. W niedziela z Juve Arek zaś wloz z ławy, ale za to 3 punkty jaki zocne! Do ôdrobiynio ôstatni ôko…

Bydōm 3 majstry? Panie Adamie kōmbinujcie…

Kibice fusbalu po ôstatnim tydniu dzielōm sie na dwie zorty. Jedni sztyjc emocjōnujōm sie szkopyrtkōm Cristiano, inksi analizujōm tabela Ekstraklasy po rundzie rewanżowej. Jo propōnuja bramka nr 3 i zaglōndōm na szpilplace IV ligi… Toś pojechoł Buchalik! Tera żeś straciōł ôstatnigo wiernego czytelnika… Wyboczcie, ale historyczny transfer z Bundesligi na 5 poziōm rozgrywek w Polsce ôdnotować trza nawet jak dō niego jeszcze niy doszło.

Łukasz Piszczek kōntrakt z Borussiōm Dortmund mo szkryfniynty do 2020 i do tego czasu musi zrobić forma, bo poważne szpilani zacznie sie niyskorzij. Przed świyntami Piszczek ofyn padoł Kickerowi, że profesjōnalno kariera skōńczy w BVB, a potym przyndzie do LKS Goczałkowice! Tymat tyn pojawioł sie już niy roz, ale tera po lekku znojduje kōnkretny plac w kalyndorzu. IV liga czeko, yno aby rychtyg czworto? Kieby LKS utrzimoł tympo awansōw to hneda zacznie sie zbliżać do poważniejszego fusbalu. To ni ma już tyn sōm klub, z kerego Łukasz wyjyżdżoł w świat 17 lot tymu.

W LKS-ie trocha sie pomiyniło i to niy bez pōmocy „niywidzialnej rynki”. Łukasz żodnej oficjalnej funkcji w klubie ni mo. Raczyj ôdgrywo rola „uje z Rajchu”. Kaj jak kaj, ale na Ślōnsku wiedzōm, że nikedy werci sie mieć bogatego ujka w Nimcach. Downij taki to posyłoł bōmbōny abo jaki towory deficytowe. Toć, po 1989 „instytucjo” ujka z Rajchu ni ma już tak fest zocno, chocioż we Goczałkowicach… Łukasz ôd poru lot bardzij pōmogo swoimu klubowi, w kerym sztyjc prezesuje jego ôjciec i szpilo brat. Roz podciepnie sprzynt, roz załatwi sparing w Nimcach. Inkszym razym sōm robi na ławce za drugigo trynera. Jak niy przijedzie to dziwo sie na szpil (live!) na mobilnioku.

Łukasz to raczyj kolega fusbalistōw LKS-u niż „ujek ôd bōmbōnōw”, ale geszyng „na zajōnczka” zrychtowoł… 28 marca Piszczek szkryfnōł umowa w goczałkowickim urzyndzie Gminy. Jego fundacja mo wybudować profesjōnalne zaplecze szportowe i pokludzić akadymio fusbalowo, kero bydzie wspōłpracować z BVB. Autobana do Rajchu…

Wiela idzie yno ô fusbalu? Jakeś je rychtyg szportowiec musisz poprōbować tyż czego inkszego. Narty to dobry szpas i tryning na muskle w szłapach. Poza tym idyalno ôkazjo coby wyônaczyć se stawy, połōmać sie, poskłodać jak colsztok i mieć z gowy reszta sezōnu. Mono beztōż profesjōnalny fusbalista smoli tyn szport?

Ni ma tyż co sie dować zbamōncic i darymnie histeryzować. Napochać idzie zawsze. Ni ma bezpiecznego szportu. Jednymu z fusbalowych reprezyntantōw Norwegie z lot 70-tych przitrefiyło sie minōnć zgrupowani kadry po tym jak przi tyraniu po lesie szczesnōł sie z łosiym. Jogging a nordic walking ôdpadujōm! Szukōmy bezpieczniejszego szportu. Mono gry planszowe? No, sam tyż trza dać pozōr. Downy torman PSG dostoł kōntuzje muskli plecōw przi szpilaniu w Scrabble. Ja, spadła mu literka. Co ôstowo? Siedzieć przed TV? Kaj tam! Sam lista kōntuzjowanych jeszcze dłōgszo, a ôtwiyro jōm sōm Robbie Keane z rewiyrym skuli siōnganio po pilota. Bywo i tak. Nojważniyjsze coby po rewiyre dobrze sie spamiyntać.

Nojlepszym ślōnskim „niyzniszczalnym” bez ôstatni lata je bez godki Łukasz Piszczek. Kero to już jego kōntuzjo, po kerej ôtrzepuje sie z marasu i godo „dobra, jadymy dalij”? Ôd poczōntku stycznia Piszczek je nazod na szpilplacu i ôdtōnd Borussia niy przegrała, beztōż Łukasz sztyjc szpanuje swōj rekord. We 2017, kej groł, BVB niy przegrała w Bundeslidze ani jednego szpilu. Telkich indywidualnych statystyk ni mo tamek żodyn. Problymy BVB w tym sezōnie zaczły sie z poczōntkiym rewiyru Piszczka (5 przegranych, 3 rymisy, 2 wygrane), ale to już historio. Piszczek niy przegroł w Bundeslidze od 26.11.2016. To już 30 szpilōw!

Telkigo spamiyntanio po rewiyrze idzie winszować kożdymu. Arek Milik moge mu tera pozowiścić. Przed nim misjo trudniejszo. Za nim dwa razy serwane wiynzadła we dwōch kolanach i dwie wartki rehabilitacje bez rok. Ôd kōńca stycznia Arek trynuje normalnie, ale na szpilplacu jeszcze sie niy pokozoł. Dej pozōr na łosie!

We raji zbiōrka! Do jedynoście ôdlicz! I terozki chwila prowdy…

Marcin Brosz jeszcze tydziyń do zadku ni mōg być pewny eli jego „złoto” jedynostka sie utrzimie. Podstawa skład Górnika Zobrze bez jesiyń zmiynioł sie tak rychtyg yno wtedy kej musioł. Bez godki stracyni kogoś z podstawy byłoby czuć. Ôd 1 lutego na szczynści ôkno transferowe we nojwiynkszych europejskich ligach je zawarte, tōż Zobrze moge dychnōnć. A dyć starać było sie ô co! Bezmałaś „za piynć dwanoście” włosko Fiorentina chciała jeszcze skludzić Szymōna Żurkowskigo, 20-letnigo kapitana polskij młodziyżōwki. To już jednak (na jakiś czos) niyaktualne. Tera yno niy dać sie cylnōnć „fesztrōm” z USA, Chin eli Japōnii, chocioż do modych Grubiorzy z grajfkōm telki kierunki chyba mynij zocne.

Co do transferōw na plus Górnik tyż niy gupnōł. Testowali swoich modych synkōw – telko tera klubowo polityka. Za ciekawszy ruch idzie uznać yno wypożyczyni 22-letnigo ôbrōńcy Pawła Bochniewicza z Udinese. Tradycyjnie nojciekawszym transferym, kerego niy było, przekludziny Łukasza Podolskigo. Niy starejcie sie… Kaj tam 65! Łukasz na pyndzyjo jeszcze niy idzie.

Tōż kaj te ślōnski hity transferowe? Niy w Zobrzu to mono w Glywicach? Niy, tam asić sie mogōm co nojwyżyj wypożyczyniym dwōch legiōnistōw, kerych Wa-wa już niy chciała (Czerwiński a Jodłowiec). Szukōmy dalij i dojyżdżōmy na Dolny Ślōnsk. We Lubinie na dyć synkōw i z Gōrnego Ślōnska niy brakuje. Jedyn ś nich ôstowo bohatyrym zimowego szlagra. Jakub Świerczok trefio do Łudogorca Razgrad i zaro na sztart we trzech sparingach szczylo 4 bramy. W Lubinie Świerczok tyroł yno bez pōł roku. Kej Bułgary ciepli na stōł piniōndze szkryfniynte w kōntrakcie było już pośmiatane.

Rownowoga we przirodzie być musi. Do Lubina kludzi sie synek spod Raciborza, Łukasz Moneta (24 l.). Z Gōrnego na Dolny Ślōnsk GPS pokludziōł go bez Warszawa, kerej niy zawojowoł po roz drugi. Lubin chyba rychtyg lepszōm ôpcjōm do naszych chopcōw, pra? A i kibicować pódzie Monecie… z czystym sercym.

Gospodorz majstruje jeszcze przi zicherōngach, ale na pierōna. Ktoś do porzōndku szkyrtnōł „off” i sztrōmu ni ma. Zasłużōny klub zatoplany w dłōgach traci sie w cimoku… Telki szpetne wizje tropiōm abo tropiyły działoczy niyjednego ślōnskigo klubu. Nojdramatyczniejsze haje ô być abo niy być kludzōm ôd jakigoś czasu chorzowski Ruch i bytōmsko Polonia.

Ruch bezmałaś wylazuje na prosto, przinajmij tak godo prezes. Kōmisjo licyncyjno deciepuje im za to nastympne -6 punktōw za niyspłocani dłōgōw (jak popłacōm co trza bydzie yno -1), kerych tak po prowdzie spłocać niy pozwolo im prawo, bo klub je gynał restrukturyzowany. Jak latoś jakimś cudym niy sfurgnōm do II ligi to bydzie musiało już być yno lepij

We Bytōmiu po spadku Polonii z Ekstaraklasy w 2011 leci cołko kryzysowo telenowela. Ôstatnio haja ô prziszłość klubu przeniōsła sie do rady miejskij, kero miała zlikwidować zadłużōno spōłka Bytomski Sport, pod kerej mianym Polōnia reaktywowała sie po czyrwcowym spadku z III ligi, kery w połōnczyniu z dłōgami dokludziōł do rozwiōnzanio klubu, po kerym nowy-stary reaktywowany klub Śl.ZPN dopuściōł do IV ligi. Kery sie niy potraciōł? Ôstatecznie rada miejsko wycofała sie z likwidowanio spōłki. Polōnia ôbstoi, problymy ôstanōm.

„A u nos w Rajchu to je ordnung!” – pado uja z Nimiec – „Kluby fungujōm jak trza”! Eli rychtyg? Wielko firma idzie rozônaczyć wszyndzij. Piyrsze przikłody z kraja ślōnski kibic skojarzy…

Klub Ernesta Wilimowskigo, TSV 1860 Mōnachium to jedyn z nojstarszych w Nimcach, majster z 1966. W czyrwcu sfurgli z 2. Bundesligi, inwestor cofnōł geld i klub niy dostoł licyncji na trzecio liga beztōż ściepli ich na poziōm nr 4, Regionalliga.

Klub Mirka Klose,1 FC. Kaiserslautern to majster z lot 1951, 1953, 1991,1998. Latoś przed sztartym rundy rewanżowej na ôstatnim placu w 2. Bundeslidze. Z kasōm gorzij ôd rozbudowy stadiōnu na Mundial. Zbrojōm sie, ale jak niy wypoli mogōm skōnczyć choby TSV.

Złe gospodarzyni i życi „na krycha”. Jak to kogoś pocieszy, to niy yno u nos…

Tradycyjnie już na kōniec roku Ślōnski Fusbal chyto sie za wrōżyni na bezrok. Dyć to nojlepszy ku tymu czos. Kery niy w tymacie spōminōm skōnd to sie wziyno…

Nocka durś pokōnała dziyń. Świat ôstoł w cimoku. Hneda jednak klara zacznie sie pokozywać na dłōżyj. Na świat przidzie Pōnbōczek, światło. Idzie nadziejo na lepsze. Tyn przełōmowy mōmynt nasze starziki ôd downa mieli za wyjōntkowy. W takim czasie trza fest dować pozōr co sie pocho, bo woży sie naszo prziszłość. Jak to padajōm jaki bydziesz bez wilijo taki bez cołki rok. Nikerzi tyż już 12 dni przed wilijōm (ôd 13 XII – św. Łucji) zaczynali dziwać sie w niebo, bo to dziyń po dniu wrōżba na pogoda na kożdy miesiōnc na bezrok. Prognoza pogody to gynał niy mojo bojka tōż dōm tymu pokōj. Do kōnkretōw! Nastympny rok we Ślōnskim Fusbalu pokulo sie tak…

Ôstatni postympy w rehabilitacji wrōżōm Arkowi Milikowi sztartniynci normalnych tryningōw jeszcze latoś, a w kadrze na szpil moge być już 21 stycznia z Atalantōm Bergamo. Déjà vu? Rok tymu wracoł po rewiyrze w podobnym czasie… Mono lepij niy w jego przipadku niy wrōżyć a doczkać i rzykać niych niy kopnie w jaki dornik.

Milikowi urośnie jednak ślōnsko kōnkuryncjo w ataku polskij kadry. 2 hat-tricki w dwōch grudniowych szpilach Jakuba Świerczoka ni mogōm źle wrōżyć. Tyn synek musi pojechać na Rusy, dyć Nawałce zdo sie nowo siyła w ataku… Chyba rychtyg tak bydzie, bele yno Kuba niy wrōciōł do „diety nutellowej”.

Górnik Zobrze w haji ô majstra bydzie sie liczōł do ôstatnich sekund. Bele yno niy doł se go w tych ôstatnich sekundach wytargać, jak w ôstatnim szpilu z Arkōm kaj gupio straciōł brama na 1:0 i w tabeli spod na drugi plac… Spokojnie niy wszyjski wrōżby sie spełniajōm jedyn do jedyn.

Stadiōn Ślōnski doczko sie szpilu reprezyntacji Polski po ponad 8 latach… To już gynał niy wrōżba a ôbietnica prezesa PZPN. Poloki na Ślōnskim poszpilajōm już w marcu. Przijedzie sam Korea abo Nigerio.

 

—————-

Ślōnski Fusbal robi świōnteczno-noworoczno pauza. Nastympny felietōn pokoże sie 9 stycznia. Wesołych, nojlepszego i do zaś!

GB

Gynał rok tymu dziwilimy sie jak „ślōnski” kluby przisztymplowywały awanse do 1/8 Ligi Majstrōw. Napoli, Monaco, Borussia – hat-trick jak trza. Powtōrki niystety niy bydzie. Latoś w Lidze Majstrōw Ślōnzoki sōm już po leku na ausie.

Do rozgrywek stanyli jednak w kōmplecie. Te same nojlepsze ślōnski fusbalisty i ich kluby, kere w ôstatnim sezōnie poradziyły w LM porzōndnie nafyrlać…

Piszczkowo Borussia wygrywo grupa F, w kerej lepszo je ôd Realu Madryt. Przesztelowuje fol rekordōw szczeleckich i za jednym szlagiym (a raczyj za 12. szlagami) troszka poszteruje legiōnistōw z Wa-wy (12:4 po dwōch szpilach!)… Tak było rok tymu. Tera przed ôstatniōm kolejkōm LM Borussia mo yno 2 pkt i zostowo nij już yno haja ô Liga Europy z APOELym Nikozja. A dyć wōniało już rychtyg dobrym sezōnym! W Bundeslidze BVB latoś piyrszo brama straciyło dopiyro w 6. kolejce. Kryzys szpryngnōł hneda po kōntuzji Piszczka. Cufal? No, niy wiym…

Milikowe Napoli nojlepsze w grupie B. Dwie bramy Arka z Dynamym Kijōw i jedna z Benficōm w piyrszych kolejkach wyônaczyły go na sōm wiyrch klasyfikacji snajperōw. Keby yno niy tyn rewiyr… Minōł rok, a w Neapolu czas choby stanōł. Milik zaś ôd nowa lyczy sie z nowej kōntuzji. Yno w tabeli trocha gorzij. Arek zdōnżōł jeszcze latoś wykorzystać elwra w przegranym szpilu z Szachtarym (2:1), ale już do wygranego rewanżu (3:0) ni mōg sie dociepnōnć. Tyn ôstatni szpil przedłużōł szanse synkōw z Neapolu na 1/8. Yno tera już sōm awans Napoli niy gwarantuje gry Milika w LM bez wiosna.

Glikowe Monaco włazi do 1/8 tyż z piyrszego placu. Niy było by tego bez Kamila, a już na pewno bez jego „bōmbōn”-szlagu, kery wytargoł punkt Bayerowi Leverkusen… Rok niyskorzij Monaco wyplōmpane ze swoich nojlepszych groczy telkich cudōw już jednak niy pokozuje. W grupie z Besiktasym, Porto i RB Lipsk byli faworytym, a tukej w ôstatnij kolejce zagrajōm już yno ô „czopka śliwek”. Nigdy ni ma tak darymnie coby niy szło żodnego plusa wykopać. Kamil przinajmij sztyjc tyro w jednym kōnsku.

Paraskewidekatriafobia. Ja, bezmałaś je coś takigo. Tak fachowo godo sie na paniczny lynk przed piōntkiym trzinostego. Ciyrpiōm na to przeważnie roztomańte boroki, kere gynał klupły sie tego dnia w dekel. W pecha idzie wierzyć abo niy. Fusbalista kery na idyalnie „wybiglowanej” murawie na Wembley kopnie w dornik abo kretowina i złōmie szłapa  pryndzyj nazwie siebie pechowcym, niż szłapokiym, chocioż inksi niy kōniecznie sie zgodzōm.

Jo jednak niy ô szłapokach i borokach, a ô ślōnskich reprezyntantach Polski, kerym jakby sie niy dziwać, szczynścio ôstatnio brakuje. Piyrszy z kraja – Arek Milik. Gynał minōł rok ôdkōnd serwoł wiynzadło w lewym kolanie a Arek już je na nastympnym rewiyrze. Podobno kōntuzjo yno w prawej nodze. Szpece podzielyni. Jedni godajōm ô pechu, inksi ô za krōtkij rehabilitacji (ôstatnio Milik wkludzany bōł nazod do gry już po sztyrech miesiōncach!). Pech, niy pech, ale pierōnstwo na pewno. Bezmałaś na świynta mo już być do granio – telki geszyng na Dzieciōntko. Bele niy za wczas…

Drugi pechowiec to Łukasz Piszczek. Synek z Goczałkowic wloz ôstatnio zaś na szczyty swojij formy. Niystety w szpilu Polski z Czornogōrōm niyszczynsne szczaśniynci ze Szczęsnym dokludziyło do naderwianio wiynzadeł. Czeko go przinamij pora tydni pauzy, inksze kalkulacje godajōm, że latoś już niy poszpilo. Na szczyt trza bydzie zaś spinać sie po rehabilitacji, ale spokojnie – Łukasz zymby zacisnōnć poradzi. W 2013, kej Borussia doszła do finału Ligi Majstrōw, bez pōł wiosny tyroł na zniyczulyniu, a kōntuzjowane biodro zôperowali mu dopiyro po sezōnie (tego knifu raczyj niypolycōmy modym szportowcōm). Potym przetrzimoł swojo nojdłōgszo pauza w karierze – 31 miniyntych szpilōw i voilà!

Szport to zdrowi (yno niy tyn profesjōnalny). Tym bardzij winszujymy naszym kadrowiczōm wartkigo spamiyntanio. Nadziejo w tym, że kōntuzjowe doświadczynia pōmogōm warcij zdrowieć. Dyć Mundial hneda…

Wysztartowały już wszyjski nojważniejsze ligi w Europie. Ślōnzokōw na Zachodzie zaś niy braknie. Jaki bydzie to dō nich sezōn? Piyrsze szpile już coś pedziały…

Ligue 1 sztartła na poczōntku siyrpnia. Aktualny majster AS Monaco wygroł do tyj pory wszyjski swoji 3 szpile, a Kamil Glik klupnōł brama „za 3 punkty” już w piyrszej kolejce z Tuluzōm (3:2). Ni ma sie co starać ô Kamila. To zaś bydzie jego sezōn.

Podobnie u Łukasza Piszczka, kery zaczōn w sobota swōj ôsmy sezōn w BVB. Groł w piyrszym składzie za Kloppa i Tuchela, niy inaczyj bydzie za trynera Bosza. Z Wolfsburgiym (3:0 do przodku) 90 min. Łukasza i to bydzie w tym sezōnie norma.

Ô majstra w Serie A i wysoki plac w LM zaś pewno bydzie sie proł Arek Milik. Pytani yno czy do tej haji stanie w piyrszej raji? W ofynsywnym trio Insigne-Mertens-Callejón, Arek zdo sie być sztyjc yno zapasowōm tajlōm, chocioż moge być rozmańcie. W elim. LM z Niceōm Milik wloz z ławy i zaliczōł spektakularno… majtaka, za to w piyrszej kolejce Serie A znod sie już w 11-stce i klupnōł brama (3:1 z Hellas Werōna). To jego piyrszy szpil w podstawie ôd 2 paździyrnika. Bydzie yno lepij!

Glik, Piszczek, Milik… To bez godki zaś bydōm trzej nojwiynksi reprezyntanci Ślōnska na Zachodzie. A kaj nastympno raja? W duńskim Broendby bydzie dalij tyroł Kamil Wilczek. W Bundeslidze mono pokopie jeszcze Paweł Olkowski (1. FC Köln) W nojważniejszych europejskich ligach teoretycznie mogōm jeszcze zadebiutować Kamil Grabara (FC Liverpool) i Przemysław Bargiel (AC Milan), ale te synki to raczyj sztyjc tymaty prziszłości.

Ale pozōr! Na Europie fusbal sie niy kończy… Po drugij strōnie globu w Japōnii sezōn fusbalowy minōł już połowa, ale ze ślōnskij perspektywy tyż dopiyro sie tak rychtyg zaczyno. Niydowno debiutowoł tamek na dyć Łukasz Podolski. W piyrszym szpilu w Vissel Kobe klupnōł dwie bramy i doł wygrano swoim nowym kamratōm (3:1 z Omiya Ardija). Z perspektywy Europy mono to i fusbalowe „Pierōnowice”, ale jakby sie niy dziwać CV Łukasza zaś urosło.

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…