W niedziela doczkalimy sie ślōnskich derbōw w Ekstraklasie. Górnik-Piast 1:0! Cōż to tam za derby, ktoś pado. Kiedyś to były derby, pra? Ruch vs Górnik. Stadion Ślonski fol to i fusbalistōm aż chciało sie tyrać… Ale dejcie pozōr! Mono jeszcze na telki ôbrozki sie bydymy dziwać. W ta samo niedziela ślōnski fusbal doczkoł sie drugigo wielkigo momyntu. Stadiōn Ślōnski ôtwarty!

Smolić że za drogo, smolić że za dłōgo. Toć, że gańba, że tak ta budowa sie kulała, ale gorsze byłoby przerwani roboty i przeônaczyni stadiōnu na torg. Nojważniejsze, że w kōńcu jes. Telenowela sie kōńczy. Tera na debatawani czamu pora lot tymu „klynkły krokodylki” (godka ô fabrikfelerze dachu) szkoda czasu. Staro zasada telenowelōw godo, że co było 300 ôdcinkōw tymu tela sie liczy choby wcale. Tōż i my zaglōndōmy dzisiej do przodku.

„Spektakularnego show” na ôtwarci Ślonskigo niy było. Na poczōntek finał Silesia Marathonu i szportowo lekcjo historii (ôdegrany bōł szpil Polska-ZSRR z 1957). Ale po lekku imprez bydzie przibywać. Przede wszyjskim lekkoatletycznych, bo Ślōnski to terozki nojwiynkszo w Polsce aryna do telkich zawodōw. Na bezrok Memoriał Kusocińskigo, a niyskorzij mono jaki mistrzostwa świata?

Kibice fusbalu, niy starejcie sie! Ślōnski bōł na ausie ôdkōnd minyli go przi Euro’12, ale hneda wrōci na fusbalowo mapa Polski. Chocioż kōnkuryncjo do przijmowanio wielkich fusbalowych szpilōw fest urosła, a reprezyntacjo Polski i tak gro przeważnie w Waszawie, to jednak do Ślōnskigo je nadziejo. Niy chodzi sam nawet ô to wiela ludzi sam wlezie (ponad 54 tys. – poza Wa-wōm nojwiynkszy w Polsce). Argumynty ô historii i downych wielkich szpilach rozegranych w Chorzowie do niydowna zdały sie być yno fandzolyniym. Tera, kej Ślōnski już wyglancowany syntymynty mogōm nōm rychtyg pōmōc. Starzi zasłużyni grocze (nota bene Zibi Boniek tyż) majōm ze Ślonskigo dobre wspōmniynia i to je nasz plus! Prezes PZPN-u na dyć już rok tymu pedzioł, że rod dziwołby sie na szpile polskij kadry na Ślōnskim. Czekōmy…

 

Połowa września. Prezesōm klubōw, kere słabo sztartły w sezōn, po lekku kōńczy sie trwani… Robota w II-ligowym ROW-ie Rybnik po spadku na 14. plac w tabeli straciōł gynał Pioter Piekarczyk. Kryzys kozoł tyż coś pokōmbinować prezesowi Ruchu Chorzōw. Knifym na poprawa formy mo być Juan Ramon Rocha, argyntyński tryner, kery zajmuje plac Krzysztofa Warzychy. Gucia jednak żodyn niy wyciepuje. Zostoł yno „zdegradowany” na pōmagera Rochy, kery trynowoł go za czasow jego nojwiynkszych sukcysōw w Panathinaikosie.

Kiedy Ruch wykulo sie spod kryski chciołby tyż pewno wiedzieć zasłużōny tryner Niebieskich Waldemar Fornalik. Tera jednak przede wszyjskim myślami musi sie już chycić nowej roboty. Ôd środy Waldi je na dyć trynerym Piasta Gliwice. Wloz tamek na plac Dariusza Wdowczyka, bo w Glywicach tyż już zrobiōł sie ôstatnio gynsty luft i to przed sezōnym grzywczym. Fornalik przejmuje Piasta na 14 placu (2 pkt nad placym spadkowym), ale haja ô utrzimani to do pana Waldka nic nowego. Ôdmianom bydzie do niego za to robota w klubie bez finansowego bajzlu. Niy bydzie, beztōż musioł starać sie ô to, eli fusbalisty sie mu szprajcnom i niy przidōm na tryning ani myśleć eli puścić na szpilplac grocza kery sōndzi sie z klubym.

Potyngōm synki z Glywic niy sōm, ale Fornalik musioł zejrzeć w nich potyncjał. W kożdym razie robota w Piaście była rychtyg przemyślanōm decyzjōm. Na dyć bezrobotnymu ôd kwiytnia panu Waldkowi ofert niy brakowało (bezmałaś chcieli go w GKS-ie Tychy, Cracovii, Niecieczy, czy Lubinie). Fornalik, kery miyszko tera w Tychach zaś wybroł jednak Ślōnsk. Ôpcjo chodzynio „w laczkach” do roboty dycki kusi. To bez godki tryner z nojwiynkszym doświadczyniym w ślōnskich klubach. Transferōw za miedza jak widać sie niy lynko. Poza Piastym i Ruchym kludziōł jeszcze na dyć Górnik Zobrze, Polonia Bytom i Odra Wodzisław.

Fornalik, jak sōm pedzioł, debiuty miywoł rozmańte, ale „niyskorzij wszyjsko sie prostowało”. Tym razym na poczōntek 0:1 w pleca z Arkōm.

Downo, downo tymu kej za tyrani za balym szło zarobić co nojwyżyj szacunek kibicōw a transfery robiyło sie za krzinka piwa i wōszt (ciekawe wiela piwa i wōsztu idzie kupić za 222 mln euro?) bōł taki szport… „rychtyg fusbal”.

„Rychtyg fusbal” to terozki już szport praje na wymarciu. Ôd profesjōnalnego fusbalu rōżni go podstawowo zasada „grōmy yno do uciechy”. W XXI w. mało kōmu beztōż telki szport już ôdpowiado, pomału smolōm go nawet „wielki fusbalisty” z B-klasy. Uciecha to za mało. Piniōndze! Na szczynści kożdy kalyndorz mo dni wyjōntkowe. Sōm jeszcze telki dni kej na szpilplac wyłażom nojlepsi szportowcy i gwiozdy, kerzi niy szpilajōm z myślōm ô swojij kapsie. Grajōm do uciechy i co nojważniejsze coby pōmōc inkszym.

Telki dziyń trefiōł 9 września. Legyndarny Kosmiczny Szpil przikludziōł na stadiōn ROWu Rybnik kole 5 tys. kibicōw i fol gwiozd. Na szpilplacu do haji stanyli szportowcy vs kabareciorze z kamratami. Dōminowali Ślonzoki, ale niy brakło wybitnych auslyndrow. Tak to u szportowcōw zagrali Dariusz Gęsior, Marcin Baszczyński i grocze ROW-u (np. Sebastian Musiolik), ale tyż Marcin Wasilewski, czy Jerzy Brzęczek. Niy brakło reprezyntantōw inkszych dyscyplin. Sam nojwiynksze nazwiska to Plawgo (lekkoatletyka), Gacek (siatkōwka) a Woryna (żużel). W kabareciorzach Ślōnsk reprezyntowali ôrganizatory – rybnicki Kabaret Młodych Panōw, pōmogało im Radio 90 i zespōł Myslovitz a nawet sōm Adam Małysz. Z auslyndrōw – gwiozdy kabaretu Tōmek Jachimek i Ewa Błachnio.

Teoretycznie wiymy kto lepij kopie do bala, ale w telkim szpilu ô faworytach sie niy godo. Zresztōm niy yno szpil bōł tego popołednia atrakcjōm. Sōm wjazd groczy na stadiōn na wypasiōnych motorach autach i… traktorze robiōł wrażyni. Niyskorzij rozgrzywka w rytmach zumby, do kerej skokoł cołki stadiōn! Poza fusbalym dziwalimy sie na rajzy żużlowcōw i rajdowcōw. Piniōndze zaszporowane na imprezie przekozane sōm Fundacji Piątka.

Samo uciecha! „Rychtyg fusbal” sztyjc żyje!

Ôstatnim felietōnym ô „Panach autobany” mōg żech trocha zgorszyć nikerych kibicōw Górnika, a że chca spokojnie deptać po „dzielni”, to dzisiej rysuja ich pełniejszy ôbroz. Kibice Górnika sōm na dyć roztomańci ôd artystōw po hodowcōw kur.

Zaczna zaś ôd hoolsōw. To mono niy fest wielki ôdsetek kibicōw, ale bez godki medialnie widoczny. Klasyczny pan hool to chop kery rod mo fojery (race), wesołe prziśpiywki, młyny, larmo i haje (ustawki). Acha! Bezmałaś interesuje sie tyż fusbalym. Tak rychtyk pana „hoola” z Górnika generalnie wiyncyj łōnczy niż dzieli z panym „hoolym” z Ruchu, czy (ô pierōnie!)… z Legii. Sōm jeszcze ultrasy. ôni bezmałaś raczyj robiōm ôprawy szpilōw niż haje. Nikere fajne, inksze – gańba godać… Podzortōm ultrasōw sōm „artysty”, kerzi swojo miłość do Górnika ciaprajōm na murach i perfekt malujōm zwyrtniynto „eRka”. Ich misjōm je „zdobywani terynu”. Nasze miasto, naszo ściana, nasz hasiok…

Zaś żech se pokopoł w lelujach i wyńda na „chorzowskigo”, ale po leku – to niy kōniec. À propos! Eźli kibic Górnika moge kibicować Ruchowi, czy to już grzych? Mocce kibicōw Górnika, do kerych sōm noleża (raczyj godka ô „piknikach”, co niykōniecznie chodzōm na wszyjski szpile), Ruch niy yno niy zawadzo, ale nawet majōm go w zocy. Górnik mo tyż kibicōw VIP-ōw. Na piyrszym placu chyba Łukasz Podolski, bezmałaś prziszły „Grubiorz”. Fest ważnym fanym klubu je tyż prezydynt Zobrzo p. Mańka-Szulik. Symbolym pozytywnego kibicowanio je za to pan Leōn ôd Kokotōw tōż Stanisław Sętkowski. Chop, kery bezmałaś już ôd połowy lot 80-tych po kożdym szpilu u sia dowo nojlepszymu groczowi Górnika ekstra geszyng ze swojij hodowli – to przeważnie kokot, kura abo pultok!

Trza tyż pedzieć że kibice Górnika noleżōm do nojbardzij zaangażowanych w swōj klub. Godo ô tym niy yno ôstatnio frekwyncjo na szpilach. Stowarzyszyni Socios, zbudowane na wzōr podobnych inicjatyw, kere działajōm na Zachodzie np. przi Barcelonie, Borussii, pōmogo Górnikowi finansowo, je udziałowcym i dowo pozōr na klubowe inwestycje.

Jeszcze jedne. Kibice Górnika to Hanysy, ale tyż Gorole, Krojcoki, Krzoki, Ptoki i ludzie durś niy ze Ślōnska. Jednak werci sie spōmnieć, że ślōnskość je ważnym kōnskiym tożsamości Górnika. Dyć to kibice KSG zrychtowali ôficjalno zajta klubowo durś po ślōnsku, piyrszo tako w poważnym fusbalu!

Lato. Autobana. Czorne brele. Zimny łokieć. W radiu na fol „Despacito”. Ludzie cisnōm na wczasy. Czego wiyncyj trza do szczynścio?

Pora godzin ształu! Samo uciecha. I jedź sam człowieku na plaża… Ale, ale! Dejcie pozōr! To niy bele ształ! Jerōnie, dyć to nasi… I już wiysz. Mogesz być dumny. Łezka sie krynci w ôku. Górnik pany! Pany autobany… Autobana A1 zasztrabowano, bo „wesołe dresiki” w barwach Górnika Zobrze i ich kamraty po fachu ze Stalowej Woli zrychtowali se haja. Czamu niy? Jo jes za! Telki „eventy” to jakiś ciekawy kolorycik polskigo fusbalu.”To nasze. Przez nas zrobione. I to nie jest nasze ostatnie słowo” – jak pedziołby klasyk.

Kej myśla ô kibicach Górnika, mōm miyszane uczucia. Mo sie coś ś nimi wspōlnego. Syntymynt do legyndarnego klubu jakoś łōnczy. Tak samo to mōj Górnik jak i ich. Yno samek mojo metafizyczno wiynź z „wesołymi dresikami” sie kōńczy. Jo jak jada bez lato autobanōm w myślach je żech na plaży i trzaskōm sie słōńcym, „prawdziwi” kibice w tym czasie myślami trzaskajōm sie już po gymbach.

Ok. Niy wszyjscy kibice majōm tak sjechane z godzin. Prziznōm tyż ofyn – nigdy niy byłech na Roosevelta na szpilu. 22 708 – aktualny kōmplet kibicōw na stadiōnie Ernesta Pohla musi robić wrażyni. Telki hat-trick udało sie zônaczyć w trzech piyrszych szpilach u sia. W czwortym prziszło już „yno” trocha ponad 20 tys., ale sztyjc kibice Górnika majōm telko średnio frekwyncji, że cołko reszta Ekstraklasy mo na noc. Eźli to yno efekt bycio „na fali” po awansie, a mono już reguła? Kibice żōndajōm rozbudowanio czwortej trybuny. Bezmałaś sōm szanse, że budowa sztartnie na bezrok, przinajmij tak godo pani prezydynt Zobrzo.

Po moimu stadion ze starōm zachodniōm trybunōm architektōnicznie wyglōndo forgot ciekawie. Idzie pomyśleć, że tak to rychtyg miało być. Chocioż jak znojdōm sie piniōndze i klub w prziszłości na tym zarobi to niych budujōm. Dyć kibica trza słuchać… Pod warunkiym, że niy kieruje ruchym na autobanie.

Wysztartowały już wszyjski nojważniejsze ligi w Europie. Ślōnzokōw na Zachodzie zaś niy braknie. Jaki bydzie to dō nich sezōn? Piyrsze szpile już coś pedziały…

Ligue 1 sztartła na poczōntku siyrpnia. Aktualny majster AS Monaco wygroł do tyj pory wszyjski swoji 3 szpile, a Kamil Glik klupnōł brama „za 3 punkty” już w piyrszej kolejce z Tuluzōm (3:2). Ni ma sie co starać ô Kamila. To zaś bydzie jego sezōn.

Podobnie u Łukasza Piszczka, kery zaczōn w sobota swōj ôsmy sezōn w BVB. Groł w piyrszym składzie za Kloppa i Tuchela, niy inaczyj bydzie za trynera Bosza. Z Wolfsburgiym (3:0 do przodku) 90 min. Łukasza i to bydzie w tym sezōnie norma.

Ô majstra w Serie A i wysoki plac w LM zaś pewno bydzie sie proł Arek Milik. Pytani yno czy do tej haji stanie w piyrszej raji? W ofynsywnym trio Insigne-Mertens-Callejón, Arek zdo sie być sztyjc yno zapasowōm tajlōm, chocioż moge być rozmańcie. W elim. LM z Niceōm Milik wloz z ławy i zaliczōł spektakularno… majtaka, za to w piyrszej kolejce Serie A znod sie już w 11-stce i klupnōł brama (3:1 z Hellas Werōna). To jego piyrszy szpil w podstawie ôd 2 paździyrnika. Bydzie yno lepij!

Glik, Piszczek, Milik… To bez godki zaś bydōm trzej nojwiynksi reprezyntanci Ślōnska na Zachodzie. A kaj nastympno raja? W duńskim Broendby bydzie dalij tyroł Kamil Wilczek. W Bundeslidze mono pokopie jeszcze Paweł Olkowski (1. FC Köln) W nojważniejszych europejskich ligach teoretycznie mogōm jeszcze zadebiutować Kamil Grabara (FC Liverpool) i Przemysław Bargiel (AC Milan), ale te synki to raczyj sztyjc tymaty prziszłości.

Ale pozōr! Na Europie fusbal sie niy kończy… Po drugij strōnie globu w Japōnii sezōn fusbalowy minōł już połowa, ale ze ślōnskij perspektywy tyż dopiyro sie tak rychtyg zaczyno. Niydowno debiutowoł tamek na dyć Łukasz Podolski. W piyrszym szpilu w Vissel Kobe klupnōł dwie bramy i doł wygrano swoim nowym kamratōm (3:1 z Omiya Ardija). Z perspektywy Europy mono to i fusbalowe „Pierōnowice”, ale jakby sie niy dziwać CV Łukasza zaś urosło.

Szpil Górnika Zobrze z Arkom Gdynia to mono niy szlagier kolejki, ale do jednego z groczy bōł na pewno durś wyjōntkowy…

Jeszcze pora miesiyncy do zadku Adam Danch pewno niy poradziōłby se tego przedstowić – ôn przeciwko Górnikowi… ? Kapitan grubiorzy, 29 lot z czego 10 w Górniku, a tamek 303 rozegrane szpile, 2 spadki z Ekstraklasy i 1 awans. Do drugigo tyż sie dociepnōł, chocioż już w kwiytniu tryner Marcin Brosz ôdsunōł go ôd składu, a Adam hneda rozwiōnzoł kōntrakt z klubym. Ligowy finisz Górnik mioł idyalny, beztōż ô Broszu niy godōmy złego słowa, ale strata telkigo grocza w trakcie sezōnu wizerunkowo niy wyglōndo nojlepij. Pożegnani przinajmij dziwne. Mono beztōż tyż wartko rozônaczyły sie famy, że Danch coś napochoł. Godało sie ô ôbstowianiu szpilōw Górnika, co ôkozało sie yno gupim fandzolyniym. Danch ofyn tyż pedzioł, że żodnej haji z trynerym niy było, a ôdynści to jego przemyślano decyzjo…

Na szpilplacu ni ma kamratōw, jak ôstatnio pedzioł sōm Adam, kery we niedziela w Zobrzu zagroł 90 min. Jego Arka kludziyła ôd 84. min, ale pora sekund niyskorzij ôbrona, kierowano przez Dancha, niy uwachowała przi cyntrze Rafała Wolsztyńskigo, kery wyrownoł kepkōm. 1:1.

Adam to jednak niyjedyny ekstraklasowy Ślōnzok na „Goroliji”. Nasi kopiōm tyż do bala choby w Krakowie. Ôd poru lot we Wiśle gro były torman Ruchu i Lechii Michał Buchalik, a Cracovia latoś skludziyła z Chorzowa Michała Helika i z Jagi bytōmskigo trynera Michała Probierza. Je i Ślōnzok we Warszawie. Downij skuli powołań szło tamek fol naszych „wojoko-fusbalistōw”. Łukasz Moneta to już jednak niy te pokolyni. Legia dała mu ciekawszo propozycjo roboty po spadku Niebieskich.

Nojwiynkszo czelodka Ślōnzokōw poza Gōrnym Ślōnskiym zebroł jednak Lubin. Zagłębie skludziyło latoś Jakuba Świerczoka (GKS Tychy) i Bartosza Kopacza (Górnik Z.). W klubie gro tyż Bytōmiok Łukasz Janoszka (downij Ruch Ch.). W kadrach na ôstatni szpile Lubin poradziōł wpisać tela samo synkōw z Gōrnego Ślōnska co… Piast Gliwice.

Szkoda czasu na toplani sie w kaczokach. Lepszy zaro ciś na głymboko woda. Górnik Zobrze w piyrszych sztyrech kolejkach Ekstraklasy przeszoł rychtyg porzōndny egzamin. Kalyndorz niy dowoł taryfy ulgowej byniaminkowi. Górnik zagroł już z majstrym, wicemajstrym i zdobywcami czwortego i szōstego placu 2016/17. Na kōncie 7 punktōw i 5. plac a w składzie nojlepszy snajper ligi…

Górnik zaliczo sztart-marzyni. Po roku na ausie wraco nazod do Ekstraklasy i już w piyrszym szpilu rozônaczo Legia, jakby sie niy dziwać aktualnego majstra Polski, tōż teoretycznie nojlepszego rywala na ligowym placu (FC Astana niy gro w Ekstraklasie – tela dobrze). Na historyczny szpil na stadiōnie E. Pohla dziwo sie 22,7 tys. kibicōw. 3:1 po bramach Dani Suareza i dwōch Igora Angulo – bezmałaś werciło sie prziś…

Z wicemajstrym niy było już tak lekko. Górnik w Białymstoku kludziōł 1:0 (Angulo), ale wynik przewożōł sie w drugo strōna w ôstatnich sekundach. Dwie bramy stracōne z elwrōw i dwōch groczy wyciepanych do szatni przed czasym. Kibel zimnej wody, kery mono i sie zdoł, bo już z Wisłōm Kraków u sia (zaś przi praje fol stadiōnie), Górnik niy doł wytargać se punktōw. Hat-trick Igora Angulo pozwolōł wygrać 3:2.

Ôstatnio kolejka to szpil z Lechiōm w Gdańsku. Tamek rymis 1:1 – tradycyjnie z bramōm Igora, kery tym razym niy wykorzystoł pora rychtyk porzōndnych lagōw. Skuli rekordowych statystyk na sztarcie trza mu to jednak wyboczyć.

Piyrszy egzamin zaliczōny na ôcyna „moge być”. W Górniku rzōndzōm „łebōnie”. W 11-stce wyłażōm na dyć yno synki urodzōne w latach 90-tych (nojmłodsi 19-20 lot). Wyjōntkiym je sam baskijski supersnajper – 33 lata. Przi reszcie czelodki mōgby czuć sie staro, ale tyro jeszcze bez kryki i balkōnika a przi tymu szczylo jak trza. Angulo klupnōł już 7 bramōw.

Górnik za Marcina Brosza w kōńcu je młodōm drużynōm z ambicjōm i co ważne na ich szpile doprowdy idzie sie dziwać. Cudōw mono niy bydymy latoś ôd nich rzōndać, ale niychby tam co zafyrlali!

Rewolucji w Chorzowie szło sie spodziywać. Ruch zdegradowany do I ligi (dobrze że yno) musioł sie liczyc z ôdynściym poru ambitnych groczy, kerych zresztōm ani niy próbowali przi Cichej przitrzimać. Eźli klub, kery dłōgo bazowoł w wielkim kōnsku na „swoich”, uratujōm tera auslyndry?

Kej godka ô chorzowskich emigracjach, zaczōnć trza od Przymka Bargiela. 17-letni fusbalista z Rudy Śl. je już ôficjalnie groczym AC Milan. To piyrszy ślōnski reprezyntant w ekipie, kero 7 razy dźwigała Puchar Europy. Wartko drugi Pirlo czy Inzaghi ś niego niy bydzie, ale jeszcze kaś ô nim usłyszymy. Dwōch inkszych synkōw z Rudy, kerzi jednak już trocha wiyncyj poszpilali w Ekstraklasie, niy szukało daleko. Martin Konczkowski kludzi sie do Glywic a Michał Koj wybiyro Zobrze kaj groł jeszcze za bajtla. Niy wszyjscy kibice Niybieskich telki decyzje poradzōm lekko przetrowić. Mie gynał niy dziwiōm – po blisku, sztyjc na Ślōnsku, sztyjc w Ekstraklasie. Ôba majōm już pewny plac w 11-stkach.

Sōm jednak bardzij „gorki” kierunki. Mateusz Cichocki idzie do Zagłębia Sosnowiec. W przipadku grocza z Warszawy, to jednak niy dziwi. Bardzij zaboli ślōnskich kibicōw transfer Łukasza Monety do Legii. Synek spod Raciborza trefio tamek już po roz drugi. Przikro bydzie sie dziwać na niego z „L”-kōm, ale c’est la vie… Trza ciś do przodku i robić piniōndze. Łukasz zaczyno na ławie.

Lista modych Ślōnzokōw, kerzi zostowiajōm Ruch kōńczy Michał Helik. Tym bardzij żol, że to wychowanek i synek z Chorzowa. Terozki ôblyko koszulka Cracovii i zarozki zostowo podstawowym sztoperym, a już w drugim ligowym szpilu szczylo zwyciynsko brama (1:0 z Lechiōm).

To sztyjc niy kōniec chorzowskigo exodusu. Z klubu poszło tyż poru starszych groczy (Grodzicki, Surma). Dziury łoto sie bliżyj niyznanymi auslyndrami z Bałkanōw czy Ameryki Płd. Mono pōmogōm jeszcze jakiś mode synki z rezerw. Na „tiki-taka” trza bydzie jednak doczkać. Na sztarcie 1:0 w pleca w Mielcu. W tabeli sztyjc z piōntkōm na minusie.

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…