Archiwa tagu: Argentyna

Argyntyna po roz trzeci, czy Nimce po roz czworty? Już mōmy odpowiydź na nojwiynksze pytani ostatnich dni. Jednak to Nimce świyntujōm na kōniec. W 113. minucie finałowego szpilu gola, kiery doł im tytuł majstra klupnōł rezerwowy Mario Goetze.

Chocioż bez 90 minut żodyn niy poradziōł przekludzić bramkowej akcji, idzie pedzieć i tak, że finał stoł na forgot dobrym poziōmie. Pora razy yno cyntymetry decydowały o tym, że kieroś z ekip niy była bliżyj wygranej. Styknie spōmnieć lagi Higuaina czy Hoewedesa.

Od poczōntku szpilu wiyncyj przi balu byli Nimce, ale tak rychtyk to Argyntyna miała wiyncyj do godki. Dyć to ōni mieli nojwiynksze lagi piyrszej połowy. Sōm Gonzalo Higuain mōg klupnōnć hat-tricka. Nojlepsze okazjo mioł kej w truchciku spokojnie wracoł ze spolōnego i oroz dostoł niyspodziywanie elegancki podani od… Kroosa. Durś zaskoczōny Argyntyńczyk majtnōł sie z bramōm w idyalnej sytuacji sōm na sōm.

Hneda Higuainowi udało sie lepij wykōńczyć. Po piyknej akcji Argyntyny i cyntrze z prawego skrzidła napastnik wrażo w kōńcu bal do siatki. Bez jakiś 5 sekund jes bohatyrym kraju i gupnie z uciechy. Uśmiych traci mu sie dopiyro kej dowo pozōr na fankowego. Bōł minimalnie na spolōnym.

NImce doś czynsto pojawiajōm sie pod szesnostkōm Albicelestes, ale to zaś ci drudzy sōm blisko gola. Messi w swoim stylu na fol szwōngu wjyżdżo pod brama przeciwnika mijo nawet Neuera, ale w ostatnij chwili bal praje z bramy wybijo Boateng.

W doliczōnym czasie piyrszej połowy nojgroźniejszo sytuacjo jak do tyj pory majōm Nimce. Po cyntrze z roga kepkōm szczynścio próbowoł Hoewedes, ale na drodze stanōł słupek. Jeszcze basym mōg to dobić kieryś z jego kōmpli, ale to już bōłby spolōny nawet jak bal trefiōłby do neca.

Fusbaliści narobiyli kibicōm szmakōw na drugi kōnsek szpilu, kiery tyż niy musioł sie długo rozkryncać. Zaroski po wynściu z szatni dobro okazjo w szesnostce Neuera mioł zaś Messi. Tym razym jednak po jego szlagu bal minōł słupek bramki.

Pod kōniec coroz wiyncyj do godki mieli Nimce ale żodnych stoprocyntowych sytuacji już niy było. Werci sie spōmnieć yno miniynty szlag Kroosa zza szesnostki z 82 minuty. Zapowiadało sie coroz bardzij na dogrywka.

Na szczynści bez dodatkowe pōł godziny żodno z ekip ni miała zamiaru darymnie czakać na elwry. Jako piyrsi ,,bajsnōnć” prōbowali Nimce. Schuerrle z wele 10. metrōw klupnōł jednak prosto w tormana.

Odpowiydź Argyntyny mōgła być dużo lepszo. W 98. minucie mōmy gryfno cyntra z lewej strōny od Rojo, po kierej bal przefurgnie nad Hummelsym i trefi na klata Rodrigo Palacio. Próba lobowanio tormana bydzie jednak niyudano, bal ostatecznie spadnia na zol wele lewego słupka. Telko laga!

Ktoś coś w kōńcu musioł klupnōnć. A jak już kōmuś sie mo picnōnć w kōńcōwce to sōm to Nimce. Coś w tym powiedzōnko Linekera jes. Wszyjscy grajōm a wygrywajōm Nimce. W 113. minucie po zagraniu Schuerrle bal na klata przijmuje Goetze i trefio gynał po długim słupku. Tyn chop do tyj pory na Mundialu sieknōł yno jednego gola i to jak stoł sōm przed pustōm bramōm i przi próbie zagranio kepkōm szczelōł kolanym. Tym razym to niy cufal, yno nojważniejszo brama Mundialu. Argyntyna już nic niy zmiyni. Szlag Messigo z wolnego w ostatnij minucie furgnie wysoko w trybuny. Nimce majstrym!

 

Nimce – Argyntyna 1:0 po dogrywce (0:0, 0:0)

Brama: Mario Goetze (113. min. – 1:0)

Nimce: Manuel Neuer – Philipp Lahm, Jerome Boateng, Mats Hummels, Benedikt Hoewedes – Thomas Mueller, Bastian Schweinsteiger, Christoph Kramer (32. Andre Schuerrle), Toni Kroos, Mesut Oezil (120. Per Mertersacker) – Miroslav Klose (88. Mario Goetze).

Argyntyna: Sergio Romero – Pablo Zabaleta, Martin Demichelis, Ezequiel Garay, Marcos Rojo – Lucas Biglia, Javier Mascherano, Enzo Perez (86. Fernando Gago) – Gonzalo Higuain (78. Rodrigo Palacio), Lionel Messi, Ezequiel Lavezzi (46. Sergio Aguero).

Wartki bramy. Messi na szwōngu i w kōńcu Argyntyna, na kiero idzie sie dziwać. W Porto Alegre Albicelestes wygrywajōm z Nigeriōm 3:2, ale po szpilu ni ma przegranych. Obie ekipy w 1/8.

Tyn kiery pora minut za niyskoro włōnczōł transmisjo straciōł niy yno śpiywani hymnōw. Po sztyrech minutach szpilu mielimy już na dyć bramkowy rymis. W 3. minucie z lewej strōny szczyloł Di Maria, ale tyn szlag obrōniōł jeszcze torman na spōła ze słupkiym. Przi dobitce Messigo żodyn ni mōg już jednak nic zrobić. 1:0. Uciecha niy zetrwała za długo. Już po minucie piyknym szlagiym idyalnie pod słupek bal zawijo Ahmed Musa i momy forgot ekspresowe wyrownani.

Messi tak tego ni mōg zostawić. W doliczōnym do piyrszej połowy czasie Argyntyńczyk pokozuje, że rychtyk poważnie interesuje go korōna krōla strzelcōw mundialu. Szlag z wolnego miōd-malina! Bal furgnie nad murym i trefio gynał pod słupek. Do szatni z uciechōm cisnōm Argyntyńczycy.

W drugim kōnsku szpilu zaś trza było do porzōndku dować pozōr od piyrszych sekund. Fusbaliści niy kozali nōm długo czakać na nastympne bramy. W 47. minucie drugo brama tego dnia klupnōł Musa. Argyntyńczycy zostawiyli mu fol placu tak, że tyn mōg wlyź cyntralnie w szesnostka jak nabrōszōny nōż w masło. Nigeryjczyk ze spokojym wykōńczōł akcjo i wyrownoł wynik na 2:2.

Tym razym to Argyntyna poradziyła sie wartko spamiyntać. 3 minuty niyskorzij przi cyntrze z roga gola zdobywo niyuwachowany Marcos Rojo. Trza jednak ofyn pedzieć, że było w tym trocha cufalu. Chop, kiery wyskakiwoł do kepki wraziōł bal do siatki… kolanym. W notesie syndzigo tak czy tak sie znoloz, beztōż wypado mu yno pogratulować ustalynio wyniku na 3:2.

Na boisku nic już sie niy zmiyniło. Bez presji szpil zostoł dograny. Śloz nawet Messi, kierego siyły tryner zdecydowoł prziszporować już na nastympno runda. Argyntyna we wtorek zagro ze Szwajcariōm, Nigeria dziyń pryndzyj trefi sie z Francjōm.

Nigeria – Argyntyna 2:3 (1:2)

Bramy: Ahmed Musa (4 min.-1:1 i 47 min.-2:2) – Lionel Messi (3 min.-0:1 i 45+1 min.-1:2), Marcos Rojo (50 min.-2:3).

Nigeria: Vincent Enyeama – Efe Ambrose, Joseph Yobo, Kenneth Omeruo, Juwon Oshaniwa – John Mikel Obi, Ogenyi Onazi, Ahmed Musa – Peter Odemwingie (80. Uche Nwofor), Emmanuel Emenike, Michael Babatunde (65. Michael Uchebo).

Argyntyna: Sergio Romero – Pablo Zabaleta, Ezequiel Garay, Marcos Rojo, Federico Fernandez – Fernando Gago, Javier Mascherano, Angel Di Maria – Lionel Messi (63. Ricardo Alvarez), Gonzalo Higuain (90+1. Lucas Biglia), Sergio Aguero (38. Ezequiel Lavezzi).