Archiwa tagu: blog Buchalika

Piszczek skōńczōł kariera w 2013 roku. Kōntuzjowane biodro niy pozwolyło dalij szpilać. Miyszko w Goczałkowicach i ôstoł ikōnōm tamtejszego sanatorium. Milik serwoł wiynzadła yno w jednym kolanie (2016). Pōł roku czekoł na rezōnans, potym wartko diagnoza i zapisani sie na ôperacjo. Na bezrok trefi na stōł. Glik po szpetnej kōntuzji barku dostoł zarozki profesjōnalno pōmoc. Klubowy fachman pofukoł mu to zamrażaczym w szpreju, a po szpilu doł „jednego” na znieczulyni. Idzie ku dobrymu, a przinajmij boli mynij…

Tak mōgłoby to wyglōndać keby spōmniani fusbaliści szpilali w naszych C-klasowych klubach i byli wiernymi fanami lyczynio bez NFZ. Na szczynści tak ni ma. Trzech synkōw ze Ślōnska przifurgło na Mundial, ale ich drōga prosto gynał niy była.

Łukasz Piszczek poważne problymy z biodrym zaczōn mieć już w 2008. Sytuacjo pogorszyła sie w 2013. W lutym było już wiadōmo, że bez ôperacje sie niy ôbyndzie. „Problym” w tym, że Łukasz rozgrywoł sezōn życio a Borussia w Lidze Majstrōw cisła na fol szwōngu. Piszczek czekoł z ôperacjōm i musioł rozszyrzyć dieta ô zastrziki przeciwbōlowe. W ôstatnim sezōnie tyż ni mioł lekko, w paździyrniku kōntuzjo kolana wyciepła go na rewiyr aż do kōńca roku. Sōm zaś nazod, Piszczek i forma.

Arek Milik to nastympny rewiyrowy rekordzista. 24 lata, a na kōncie serwane wiynzadła w dwōch kolanach i to w ôdstympie ani roku. Po piyrszym powrocie niy zdōnżōł ani prziś do formy. Tera wyglōndo to lepij. Pytania ô kōntuzje yno szterujōm Arka. Ofyn godo: dejcie pokōj. Z kolanami je ok.

Kamil Glik rehabilituje sie tera ôd rana do wieczora i bezmałaś szykuje sie na szpil z Kolumbiōm. Kōntuzja barku to niy wszyjsko. Jego tyż niy minyły problymy z kolanym. Ôd poru lot szpilo ze serwanym wiynzadłym krziżowym zadnim. Kolano niy telepie mu sie dziynki sile muskli, beztōż ôperacjo fōndnie se dopiyro na pyndzyji.

Pora lot do zadku medycyna skreślyłaby kożdego ś nich. Dzisio idōm na szpil…

Ȏ spadkach a awansach wiymy już forgot wszyjsko. A poradzicie pedzieć wiela ślōnskich klubów poszpilo w sezōnie 2018/19 na nojwyższym szczeblu krajowej drabiny? 2, 3 a mono 6 abo 7? Ȏdpowiydź zaś downo niy była tak ciynżko…

1. Górnik Zobrze. Nojlepszo ślōnsko ekipa latoś (4. plac) i nojwiynkszo naszo nadziejo na nowy sezōn w Ekstraklasie. Klub ȏd zdrzōdeł ślōnski i ślōnskość sztyjc prōmuje.

2. Piast Glywice. Z biydōm, ale Ekstraklasa ȏbrōniyli. Klub, kery rod ȏdwołuje sie do kresowych korzyni, jednak już w swoich poczōntkach bōł ślōnsko-kresowym miszōngiym. Po roz siōdmy z raje bydzie reprezyntowoł Ślōnsk w Ekstraklasie.

3. Zagłębie Sosnowiec. Ok, to taki pōłwic. Wszyjscy wiymy, że ze Ślōnskiym bardzij idyntifikujōm sie fusbaliści Sydney FC i Los Angeles Galaxy niż Zagłymbioki, ale jakby sie niy dziwać szpile u sia ȏd 62 lot grajōm po ślōnskij strōnie Brynicy. Kej w 1954 sztartowała budowa ich stadionu plac tyn noleżoł do Szopiynic. Dopiyro korekta administracyjno z 1960 przeciepła downe szopiynicki łōnki do Sosnowca. Do Ekstraklasy z 2. placu Zagłymbiokōw wkludzo Knōrowiok, Dariusz Dudek.

Nowościōm je, że w nowym sezōnie wiyncyj ślōnskich klubōw w piyrszej klasie rozgrywkowej zagro po strōnie czeskij. Liczymy dalij…

4. Slezský Ȏpawa. Synki z Ȏpawy byli latoś nojlepsi w drugij lidze, beztōż bydōm tera trzecim ślōnskim klubym w Gambrinus lidze.

5. MFK Karwina. Im za to udało sie niy sfurgnōnć z I ligi dziynki wygraniu ȏstatnigo szpilu z Jihlavōm.

6. Banik Ȏstrawa. Baniček tyż do kōńca groł ȏ utrzimani i misjo zrealizowoł. Tera ȏstowo walka ȏ powrōt na Ślōnsk. U nich na ȏpy niż w Sosnowcu. Grajōm na Vitkovicach, morawskim kōnsku Ȏstrawy ȏd trzech lot, bo ich ślōnski stadiōn Bazaly niy spełnio ligowych wymogōw. Chachaři (kibice Banika) niy ȏd dzisiej walczōm ȏ powrōt. Baníček patří na Slezsko!

To niy kōniec. Ni mogymy zapōmnieć ȏ frelkach.

7. GKS Katowice – zbudowano ȏd zera sekcjo kobiyco, zaliczo awans za awansym i gynał melduje sie w Ekstralidze.

Kōmu tera kibicujesz?

Niy zetrwało sztwierć wieku i voilà! Górnik Zobrze nazod w europejskich pucharach. We ôstatnim szpilu sezōnu Grubiorze wygrali 2:0 z Wisłōm Krakōw i szafli se 4. plac, kery wkludzo ich do Ligi Europy. Widzicie ôczami wyôbraźnie juzaś te szpile z Romōm abo Manchesterym City…?

Pomału! Europa ôd lot 70-tych trocha urosła. Niż pojedzie sie na Włochy czy Anglio trza nikedy po drōdze zaliczyć telki przistanki jak azerski Agdam, kazachsko Astana, abo cypryjsko Nikozja. Jeszcze pora lot do zadku fusbalisty polskich klubōw po cichu (a nikedy ofyn) lachali sie z telkich przeciwnikōw. Ôdpadniynci Wisły z Karabachym Agdam abo Jagiellonii z Irtyszym Pawłodar i inksze telki przipadki dowajōm jednak do myślynio. Nasi tyż niy lepsi! 2003/04 GieKSa ôdpado z Cementarnicōm Skopje, 2010/11 Ruch z biydōm awansuje po dwōch rymisach z maltańskōm Valettōm, 2013/14 Piasta pokōnuje Karabach. To niy cufal za cufalym. Wcześnij polski ekipy niy chciały wylosowywać drużyn z przikładowo Kazachstanu coby darować se dłōgo rajza, ale w kōńcu musieli dać pozōr, że to grocze, kerzi poradzōm ich nauczyć fusbalu.

Na szczynści do fusbalistōw rajzowani na zagraniczne szpile tyż sie już zmiyniyło. Za PRL-u jak kery grocz bōł politycznie podpadniynty za granica mōgli go wcale niy puścić. Przeważnie jednak z wyjazdami na wielki szpile problymōw niy było, chocioż niy brakowało przigōd. Na trzeci szpil pōłfinału Górnik vs Roma w PZP z 1970 fusbaliści ôbu ekip mieli podjechać na stadiōn jednym autobusym. Tryner Romy zrobiōł jednak za błozna szofera i tyn Grubiorzy niy wziōn. Zobrzanōw na stadiōn podciepali swojimi autami kibice tak, że na stadiōnie byli 20 min. przed szpilym. Na finał do Wiednia Grubiorze jechali już swoim autobusym. Przijechali jednak dopiyro w dniu szpilu przed połedniym. Zmynczyni rajzōm grocze w ramach ôdpoczynku i prziszykowań poszli na…. gyszefty. Kaj tyż wracać du dōm z pustymi rynkami!

Latoś niy trza już sie ôbkupować ani wozić kryształōw na handel. Yno i aż grać…

Ô szpilu Piasta z Górnikym a ô decyzji Kōmisji Ligi Ekstraklasy SA., kero ôba ślōnski kluby ôstawiyła bez punktōw, wypedziały sie już wszyjski szpece. Nojczynścij cytowany je Z. Boniek, kery padoł że za porzōndek na stadiōnie ôdpowiado gospodorz, tōż yno Piast i kōnkretni kibice ôbu ekip powinni dostać sztrofy. Ciynżko sie niy zgodzić, ale smolić już walkowery! Mie bardzij zaciekawiyły słowa prezydyntōw Glywic a Zobrza, kerzi ofyn kozali klubōm korać kiboli zakozami stadiōnowymi. Z. Frankiewicz, prezydynt Glywic godoł nawet ô dożywotnich zakozach na glywicki stadiōn i egzekwowaniu ôdszkodowań ôd wszyskich zidyntyfikowanych kiboli-hajokōw, ale tyż ô zawieszyniu wsparcio do stowarzyszynio kibicōw Piasta. Telki słowa i to w roku wyborōw samorzōndowych… Szacunek!

A jak wyglōndo walka z kibolami ôd zadnich dźwiyrzi? Pora lot do zadku byłech na szkolyniu do stadiōnowych stewardōw. Bez dwa dni wykłodali tamek wszyjsko co ôbsługa stadiōnu musi wiedzieć. Hruby heft, kery my dostali, mioł cołko lista rzeczy, haseł, symboli, kere na fusbalowej imprezie masowej za pierōna ni mogōm sie ôbjawić. Szalik i śmiyszno czopka przyńdōm, ale race i fany sektorowe, hakynkrojce i krziże celtycki, jak tyż noże masorski, paryzole i wino jabkowe „samuraj” na stadiōnie sōm zakozane. Szkolyli my sie w kōntroli na bramkach podług złotej zasady „chopy macajōm chopōw, baby macajōm baby”. W ćwiczyniu na bramkach prziszli stewardzi bez problymu znojdywali u „kibicōw” wszyjski potyncjalnie groźne wihajstry. Wyjōntkiym była włościcielka nojwiynkszego lajbika na szkolyniu, kero w roli kibicki przemyciyła w nim telefōn.

Terozki zagodka dlo inteligyntnych… Jaki trza mieć rozmiar cycyhaltra coby wniyś na stadiōn fana sektorowo 10x20m abo poraset racōw? Eli możliwe je coby ôbsługa sie niy kapła? Kery jeszcze wierzy, że telki cuda pochajōm sie bez wiedzy klubōw? Ciche przizwolynia i dziwne relacje kluby-kibole to sztyjc nojwiynkszy problym ślōnskich a polskich stadiōnōw.

Ekstraklasa i Piyrszo Liga na finiszu. Sztyjc  ni mōmy jednak ôdpowiedzi na pytani wiela ślōnskich klubōw poszpilo ô Majstra Polski w nastympnym sezōnie. Możliwe scynariusze sōm roztomańte…

Wariant ultrapesymistyczny: Piast i Ruch przegrywajōm ôstatni szpile i kōńczōm na dwōch ôstatnich placach. W piyrszej lidze Górnik niy ôdrabio dwōch ôczek strat do strefy awansu (tym bardzij GieKSa swoich sztyrech). W efekcie w Ekstraklasie ni ma żodnej gōrnoślōnskij drużyny. A gratis mōmy majstra Legii i awans Sosnowca. Nic yno przeciepać sie na szkata!

Telko kalkulacjo mo jednak małe szanse realizacje, ale same to, że na dwie kolejki przed kōńcym możliwe je że Gōrny Ślōnsk hneda zostanie bez klubu w Ekstraklasie to już gańba. Ôd 1922 r. kej kōnsek Ślōnska dostoł sie Polsce dycki chocioż jedna ślōnsko drużyna stowała na poczōntku sezōnu do haji ô Majstra Polski. Przeważnie naszych w nowyższej klasie rozgrywkowej było jednak wiyncyj. W rekordowym sezōnie 1968/69 aż siedym (Górnik Z., Polonia B., Szombierki B., Ruch Ch., GKS K., Odra O., ROW Rybnik), co było połowōm cołkij I ligi! Ślōnski drużyny poradziyły wygrywać majstra 10 razy z rzyndu (lata 1959-68; Górnik-7, Ruch-2, Polonia B.-1), a z podium niy złaziyły nawet bez 28 lot (1950-77). W sumie gōrnoślōnski drużyny były na podium w 57. z 81. skōńczōnych do tyj pory sezōnōw nojwyższej klasy rozgrywkowej w Polsce. Nojmaśniejsze lata downo za nami, ale nawet w XXI w. miywalimy po sztyry gōrnoślōnski kluby w Ekstraklasie. Latoś kryzys szczytuje.

Ale po lekku… Sztyjc możliwy je na dyć wariant ultraoptymistyczny: Ruch wygrywo dwa ôstatni szpile a rywale grajōm „pod nich” (Górnik Ł. i Arka tracōm punkty). Przi telkim ukłodzie Piast już niy musi nic. Ôbie ślōnski drużyny sie utrzimujōm. W piyrszej lidze dwie wygrane Grubiorzy, 1 przegrany szpil Sosnowca,  1 rymis Grudziōndza i voilà! Górnik nazod w Ekstraklasie i je nas trzech!

Zaś wōnio utopiōm? Mono lepij żyć nadziejōm niż yno historiōm?

Ôstatni tydziyń to forgot wyjōntkowy czas w karierze Kamila Glika. Telkich dni fusbalista z Jastrzymbio jeszcze niy przeżōł. Haja ô finał Ligi Majstrōw ôkozała sie przegrano, ale już po poru dniach humor poprawio szpil w Ligue 1. Po rozklupaniu u sia Lille 4:0 AS Monaco już praktycznie zgarnyło tytuł majstra Francji. Została forgot yno kropka nad „i”.

Tak po prowdzie to niy lubia kōmyntatorōw, kerzi prziznowajōm tytuły przed czasym jak bal jeszcze sie kulo i dużo moge sie zmiynić. Rod potym zaglōndōm jak telki szpece przeżywajōm niyskorzij mały szok. Do niypochytanych chciołbych jednak wyklarować aktualno sytuacjo w lidze francuskij. AS Monaco rychtyg majstra ni mo jeszcze pewnego, ale przegrani tej rywalizacje na telkim etapie było by już forgot gańbōm. Synki z Ksiynstwa majōm 3 pkt i 17 bramōw przewogi nad PSG (w Ligue 1 ô placu w tabeli decydujōm przody punkty, potym bramy), do tego drużyna Glika zagro jeszcze 2 szpile a rywal z Paryża yno jedyn. Teoretycznie Monaco moge jeszcze 2 razy dostać wklupane po 6:0 w pleca, a PSG moge 6:0 wygrać, ale trza se ofyn pedzieć je to… „średnio” prowdopodobne. Zaległy szpil z St. Etienne Monaco rozegro w środa. Zdo sie, że szampany bydōm po prostu trocha bardzij zmrożōne.

Yno Ligi Majstrōw żol, tamek tyż szło sie szkryfnōnć w historii. Sztyjc ôstatnim Ślōnzokiym, kery zagroł w finale je Łukasz Piszczek (2013), a ôstatnim kery finał wygroł Jerzy Dudek (2005). Glik mioł szansa powtōrzyć sukcesy starszych kōmpli już w swoim debiucie w LM. Na to już za niyskoro, ale bezmałaś w Monaco po LM niy płaczōm. Glik już po piyrszym przegranym szpilu z Juventusym ofyn pedzioł, że ôd poczōntku głōwnym cylym jego klubu na tyn sezōn je majster Ligue 1 i tego sie trzimiōm.

Mielimy ślōnskich majstrōw w Polsce, Nimcach, Hiszpanii czy Holandii. We Francji telkigo tytułu żodyn synek ze Ślōnska jeszcze sie niy doczkoł… Jeszcze.

Ôstatni tydziyń bōł forgot bogaty fusbalowo. Sztart Ligi Majstrōw. Debiut Milika po rewiyrze. Szpil Ruchu z Legiōm. Kibicōm niy mōgło sie mierznōnć. Na piyrszy plan bez godki wyônaczōł nōm sie jednak Łukasz Piszczek i jego nowy snajperski rekord. Man of the match szpilu z Wolfsburgiym (3:0) zaliczōł 2 asysty i klupnōł brama, to jego piōnte trefiyni w tym sezōnie…

Krzysiu Ibisz przi Piszczku po lekku mo na noc. Łukasz z kożdym sezōnym młodnieje. Wartki, wyzgerny, waleczny synek z Goczałkowic spōmino czasy kej etatowo szpiloł w ataku. Hneda minie 8 lot ôdkōnd w Hercie Berlin przesztelowali go na prawego ôbrōńcy. Zdecydowoł wtedy cufal. Gynał na tym placu brakowało chopa. Piszczek znod sie na dobrym placu w dobrym mōmyncie. Zostoł ôbrōńcōm, ale cugu na bramka przeciwnika żodyn mu niy ôdebroł. Nowoczesny fusbal przaje ôfynsywnym ôbrōńcōm…

Łukasz ôd tego czasu sztyjc wystawiany je w defynsywie a gynał latoś bije swōj snajperski rekord w Bundeslidze. Na klupniynci 5 bramōw stykło mu 16 szpilōw. Do porownanio w nojlepszym do tyj pory sezōnie 2011/12 na szczelyni sztyrech bramōw potrzebowoł 2 razy wiyncyj, bo aż 32 szpile. Tera Łukasz już je drugim (exequo z Ousmane Dembele) nojlepszym snajperym Borussii po Aubameyangu. Je tyż nojlepszym ôbrōńcōm Bundesligi. W Europie jedynym skutyczniejszym defynsorym je terozki Sergio Ramos z Realu Madryt (6 bramōw). Werci sie spōmnieć, że w piyrszej piōntce tej klasyfikacji je inkszy Ślōnzok, Kamil Glik z AS Monaco (4 bramy, w tym jedyn niyzapōmniany piykny szlag z Ligi Majstrōw na woga trzech punktōw). Kto jak kto, ale Kamil wiy jak wrazić bal do neca. Dyć sezōn 2014/15 w Serie A skōńczoł z siedmiōma bramami na kōncie.

Eźli niy bydymy świadkami korespōndyncyjnej haji na bramy miyndzy dwōma ślōnskimi ôbrōńcami. Szanse wyrownane. Ôba grajōm regularnie w swoich ligach, lidze majstrōw i reprezyntacji. Robi sie rychtyk ciekawie. A kaj tam kōniec sezōnu…

Tym razym na warsztat bierymy transfery ślonskich „ekstraklaseiros”. Za nami już piyrszo latoś kolejka Ekstraklasy. Po lekku bydymy weryfikować wiela we werci sōm świyżo skludzyni fusbaliści i czy rychtyk bydzie nōm tesno po tych co ze ślōnskich klubōw wyjechali…

Przody dziwōmy sie na Glywice. Drużyna Radoslava Látala za pierōna niy przipōmino tej z ôstatnigo sezōnu, kero do ôstatnij kolejki prała sie ô majstra. Látal w sezōnie 2015/16 zrychtowoł istny cud. Poradziōł dać nowe (lepsze!) życi pacjyntowi, z wymiyniōnym sercym, płōcami i resztōm wewnytrznych tajli. Na wartko poukłodoł drużyna, do kerej bez lato prziszło 13 nowych fusbalistōw. Straciyło sie za to fol podstawowych groczy z krōlym szczelcōw Ekstrakalasy Kamilym Wilczkiym włōncznie. Látal pokozoł wtedy swojo trynersko grajfka i poukłodoł drużyna praje ôd zera. Latoś zmiany troszka myjsze, ale jak na zimowe ôkiynko niyzły miszōng. Piast skludzo piynciu nowych groczy z doświadczyniym w nojwyższych klasach rozgrywkowych. Z ciekawszych nazwisk trza spōmnieć Papadopulosa (z Z. Lubin) i Vranješa (z Legii). Tryner godo tyż, że w piyrszej drużynie pokozywać zacznie sie sztyrech juniorōw. Látal je rod z trasferōw, jaki tym razym bydōm skutki ôperacji?

Durś inacy w Chorzowie. Tamek  w styczniu żodyn ô wielkich transferach niy myśloł. Piniōndze i cołko energio dziołaczy poszły na spłaty długōw i pokozywani światu, że w Ruchu wszyjsko funguje jak trza. Ôdhoczōne. Ta misjo zaliczōno. Synki Fornalika mōgli spokojnie trynować. Boli jednak co inkszego. Ruch straciōł nojlepszego grocza jesiyni Pyjtra Ćwielōnga, kery po letnim wielkim „come back-u” poszpiloł w Chorzowie yno pōł roku i pojechoł nazod do Nimiec (1. FC Magdeburg). Z nowych groczy yno wypożyczōny z Lechii Gamakow. Je szansa, że z Wisły wrōci sprawdzōny ekstraklasowy torman z Rybnika Michał Buchalik. Tōż Ruch (chce czy niy) stawio na swoich. Po wiyncyj bydzie siōngoł do rezerw. Fornalik zaś do szansa poru łebōniōm.

PS. Szpil Ruchu z Cracoviōm ekstra przemilczołech. Kto widzioł wiy czamu…

1946 rok. Silesian Team je na tournée w Szkocji. Drużyna poskłodano z nojlepszych groczy ślōnskich klubōw i poru fusbalistōw z Krakowa pokozuje klasa! Profesjōnalne szkocki kluby chcōm naszych u sia. Synki wracajōm jednak nazod du dōm i rozjyżdżajōm sie po swoich klubach…

XXI wiek. Wszyjski legyndarne ślōnski kluby w kryzysie. Roz za kiedy (przinajmij bez kōnsek sezōnu) poradzōm prezyntować dobry poziōm, ale potym majōm biyda utrzimać skład, przichodzi kryzys i sōm brutalnie skludzani na zol. Złe zarzōndzani to brak piniyndzy w portmaneju a brak piniyndzy to z czasym brak fusbalistōw i brak wynikōw to zaś brak spōnsorōw i nazod brak piniyndzy, złe zarzōndzani itd. Kōłko sie zawiyro i ciynżko pedzieć co samek rychtyk je żdżōdłym problymu?

Epoka ciynżkigo przemysłu downo minyła i Ślōnska niy stać już na utrzimywani poru klubōw na rychtyk dobrym poziōmie. Wielki rozdrobniyni wpływo na to, że żodyn ślōnski klub niy poradzi sie wybić i ustabilizować szportowo a finansowo. Ruch Chorzōw, Górnik Zobrze, Polōnia Bytōm itd. Kożdy ze swojōm historiōm, sukcysami, tożsamościōm, kibicami i… problymami. Nasze legyndarne kluby szpōnsorowane sōm przeważnie przez miasta, kere miywajōm ś nimi istno ôstuda. Górnik po kōniec grudnia zaś musioł prosić radnych o pożyczka. Ruch pogrywoł na miglanca przi wypłatach za co już dostoł sztrofa, a Polōnia z Bytōmia bezmałaś zaś dobijo do progu bankructwa. Ni ma lekko.

Spōmniany Silesian Team, podobnie jak kadra Ślōnska, były zbiyrane na potrzeby szpilōw a turniejōw sparingowych. Tera bardzij zdołby sie mono „Silesian Club”. Jedyn, wielki ślōnski klub, kery istniołby niy od świynta yno groł normalnie w lidze. Silesian Club z siedzibōm przikładowo na neutralnym gynał wykańczanym Stadiōnie Ślōnskim mōgby nafyrlać niy yno w Ekstraklasie. Ślōnski klub bez podziałōw, do nojlepszych z nojlepszych, kerych u nos by niy brakło, dyć niy musieliby wyjyżdżać w świat coby sie rozwijać…

To jednak yno utopia. Biyda uwierzyć, że mōgłoby to być prowdōm. W Bytōmiu próbowali już tego na myjszo skala. Próba połōnczynio Szombierek z Polōniōm niy skōńczyła sie nojlepij. Rozmańte kluby, rozmańte tradycje. To sie niy udo…

W 11-stce Polskij kadry lekki miszōng. Styknōł jedyn szpil i ze składu wyfurgło dwóch naszych synkōw. Na Polsko-Armynio Milik z Piszczkiym mōgli dziwać sie yno w TV. Niy doś, że trza lyczyć kolana to sam jeszcze telko dawka hercklekotōw! Po szlagu Lewego mōgli dychnōnć. Yno co na ta brama padaliby Pan Ernest Pohl i co czujōm Pan Włodek Lubański?

Nasi poza szpilplacym, abo trocha w ciyniu. Poza debiutym Kamila Wilczka nic co byłoby we werci ôpisać. W cyntrum zainteresowanio za to sztyjc Robert Lewandowski. Po klupniynciu 40-stej bramy w kadrze w piyrszej 10-tce nojlepszych snajperōw reprezyntacji wyprzedziōł już trzecigo Ślōnzoka. Tym razym Lewy wziōn Ernesta Pohla, kery tyroł w bioło-czerwōnym „ancugu” w latach 1955-65. Za Robertym sōm już telki legyndy jak Ernest Wilimowski (21 bramōw, 9. plac) czy Gerard Cieślik (27 bramōw, 7. plac). Ze zadku ôstoł tyż snajper Górnika Zabrze, urodzōny w Gdańsku Andrzej Szarmach (32 bramy, 6. plac). Lider sztyjc w ślōnskich rynkach, ale po lekku zagrożōny. Do Lubańskigo Lewy traci na dyć już yno 8 bramōw.

To jednak jeszcze niy sōm szczyt ślōnskich reprezyntacyjnych rekordōw. 48 bramōw, tela samo co Lubański, klupnōł w kadrze Łukasz Podolski. W Nimcach to stykło jednak „yno” na nojniższy stopiyń podium. Piyrszy plac na snajperskij liście Mannschaftu i aż 71 bramōw noleży do Mirka Klose. Co by ci Nimce zrobiyli bez Ślōnska…

Trza jednak ofyn pedzieć, że pokolyni Lewego mo fory. Reprezyntacje grajōm tera czynścij. Spōmnianymu Pohlowi do siekniyncio 39 bramōw stykło 46 szpilōw, Lewy coby go dogōnić musioł zagrać aż 83 razy. Chytōmy za kalkulator… Skutyczność Roberta to 48%. W porownaniu z Pohlym (85%), Lubańskim (64%), czy Cieślikiym (60%) mo na noc. A kaj mu tam do Wilimowskigo (95%), kerego wynik przi dodaniu wystympōw w kadrze Nimiec rośnie do 113% (34 bramy na 30 szpilōw)!

Perspektywy na rekordy? Arek Milik (21. plac, 11 br.). Latoś już nic niy dociepnie, ale po rewiyrze bydzie mioł fol czasu…