Archiwa tagu: Ernest Wilimowski

Gospodorz majstruje jeszcze przi zicherōngach, ale na pierōna. Ktoś do porzōndku szkyrtnōł „off” i sztrōmu ni ma. Zasłużōny klub zatoplany w dłōgach traci sie w cimoku… Telki szpetne wizje tropiōm abo tropiyły działoczy niyjednego ślōnskigo klubu. Nojdramatyczniejsze haje ô być abo niy być kludzōm ôd jakigoś czasu chorzowski Ruch i bytōmsko Polonia.

Ruch bezmałaś wylazuje na prosto, przinajmij tak godo prezes. Kōmisjo licyncyjno deciepuje im za to nastympne -6 punktōw za niyspłocani dłōgōw (jak popłacōm co trza bydzie yno -1), kerych tak po prowdzie spłocać niy pozwolo im prawo, bo klub je gynał restrukturyzowany. Jak latoś jakimś cudym niy sfurgnōm do II ligi to bydzie musiało już być yno lepij

We Bytōmiu po spadku Polonii z Ekstaraklasy w 2011 leci cołko kryzysowo telenowela. Ôstatnio haja ô prziszłość klubu przeniōsła sie do rady miejskij, kero miała zlikwidować zadłużōno spōłka Bytomski Sport, pod kerej mianym Polōnia reaktywowała sie po czyrwcowym spadku z III ligi, kery w połōnczyniu z dłōgami dokludziōł do rozwiōnzanio klubu, po kerym nowy-stary reaktywowany klub Śl.ZPN dopuściōł do IV ligi. Kery sie niy potraciōł? Ôstatecznie rada miejsko wycofała sie z likwidowanio spōłki. Polōnia ôbstoi, problymy ôstanōm.

„A u nos w Rajchu to je ordnung!” – pado uja z Nimiec – „Kluby fungujōm jak trza”! Eli rychtyg? Wielko firma idzie rozônaczyć wszyndzij. Piyrsze przikłody z kraja ślōnski kibic skojarzy…

Klub Ernesta Wilimowskigo, TSV 1860 Mōnachium to jedyn z nojstarszych w Nimcach, majster z 1966. W czyrwcu sfurgli z 2. Bundesligi, inwestor cofnōł geld i klub niy dostoł licyncji na trzecio liga beztōż ściepli ich na poziōm nr 4, Regionalliga.

Klub Mirka Klose,1 FC. Kaiserslautern to majster z lot 1951, 1953, 1991,1998. Latoś przed sztartym rundy rewanżowej na ôstatnim placu w 2. Bundeslidze. Z kasōm gorzij ôd rozbudowy stadiōnu na Mundial. Zbrojōm sie, ale jak niy wypoli mogōm skōnczyć choby TSV.

Złe gospodarzyni i życi „na krycha”. Jak to kogoś pocieszy, to niy yno u nos…

W 11-stce Polskij kadry lekki miszōng. Styknōł jedyn szpil i ze składu wyfurgło dwóch naszych synkōw. Na Polsko-Armynio Milik z Piszczkiym mōgli dziwać sie yno w TV. Niy doś, że trza lyczyć kolana to sam jeszcze telko dawka hercklekotōw! Po szlagu Lewego mōgli dychnōnć. Yno co na ta brama padaliby Pan Ernest Pohl i co czujōm Pan Włodek Lubański?

Nasi poza szpilplacym, abo trocha w ciyniu. Poza debiutym Kamila Wilczka nic co byłoby we werci ôpisać. W cyntrum zainteresowanio za to sztyjc Robert Lewandowski. Po klupniynciu 40-stej bramy w kadrze w piyrszej 10-tce nojlepszych snajperōw reprezyntacji wyprzedziōł już trzecigo Ślōnzoka. Tym razym Lewy wziōn Ernesta Pohla, kery tyroł w bioło-czerwōnym „ancugu” w latach 1955-65. Za Robertym sōm już telki legyndy jak Ernest Wilimowski (21 bramōw, 9. plac) czy Gerard Cieślik (27 bramōw, 7. plac). Ze zadku ôstoł tyż snajper Górnika Zabrze, urodzōny w Gdańsku Andrzej Szarmach (32 bramy, 6. plac). Lider sztyjc w ślōnskich rynkach, ale po lekku zagrożōny. Do Lubańskigo Lewy traci na dyć już yno 8 bramōw.

To jednak jeszcze niy sōm szczyt ślōnskich reprezyntacyjnych rekordōw. 48 bramōw, tela samo co Lubański, klupnōł w kadrze Łukasz Podolski. W Nimcach to stykło jednak „yno” na nojniższy stopiyń podium. Piyrszy plac na snajperskij liście Mannschaftu i aż 71 bramōw noleży do Mirka Klose. Co by ci Nimce zrobiyli bez Ślōnska…

Trza jednak ofyn pedzieć, że pokolyni Lewego mo fory. Reprezyntacje grajōm tera czynścij. Spōmnianymu Pohlowi do siekniyncio 39 bramōw stykło 46 szpilōw, Lewy coby go dogōnić musioł zagrać aż 83 razy. Chytōmy za kalkulator… Skutyczność Roberta to 48%. W porownaniu z Pohlym (85%), Lubańskim (64%), czy Cieślikiym (60%) mo na noc. A kaj mu tam do Wilimowskigo (95%), kerego wynik przi dodaniu wystympōw w kadrze Nimiec rośnie do 113% (34 bramy na 30 szpilōw)!

Perspektywy na rekordy? Arek Milik (21. plac, 11 br.). Latoś już nic niy dociepnie, ale po rewiyrze bydzie mioł fol czasu…

Nastympny tydziyń Euro za nami. U nas nojwiynksze emocje zwiōnzane bōły z czwortkiym. Polska – Nimce to dycki szpil wyjōntkowy. Ślōnscy i Polscy kibice wiōnżōm ś nim specyficzne emocje. Tym bardzij kej gra je ô poważne punkty.

Nimce w polskij narracji historycznej ni majōm lekko. Ni ma co godać – trocha „napochali”. Jako by historio niy była, to gynał polsko kinymatografio z Nimcami umi se poradzić. Ôd Krziżakōw po Hansa Klosa i Sztyrech Pancernych… Nimce ni majōm lekko. Lata lecōm, epoki sie zmiyniajōm, ale potrzeba pokōnanio, rozklupanio i rozônaczynio Nimca w Polsce je sztyjc aktualno. Na szczynści terozki rywalizacjo kulo sie już yno na szpilplacach. Chocioż Polocy radzi ôdwołujōm sie przi ôkazji szpilōw z Nimcami do historie. Ni ma ôpcji coby w telkij sytuacji w mediach niy spōmnieliby ô bitwie pod Grunwaldym. Trza sie na dyć dowartościować. Tak stwierdziyło tyż latoś TVP, beztōż w czwortkowy wieczōr pokozali „2 szpile Polokōw z Nimcami”, z czego przinajmij jedyn musioł być wygrany. Ulrich von Jungingen już na sztarcie mioł słabe typy u bukmacherów…

Fusbal rzōndzi sie jednak swoimi prawami. Tukej nie tak lekko pokōnać Nimca jak w filmie. Bywało rozmańcie. Ślōnzoki niy roz grywali tamek głōwne role. W latach 30-tych knify na Nimcōw w reprezyntacji Polski poradziyli znolyź yno Hanysy – Wilimowski, Pazurek, Wodarz i Peterek. Ôd bramy tego ôstatnigo w 1938 mniyło 70 lot aż nastympny Ślōnzok w polsko-nimieckij kōnfrōntacji trefiōł do neca. Dwie bramy Łukasza Podolskigo, dały na Euro 2008 wygrano Nimcōm. Trza było doczkać jeszcze 6 lot na brama bioło-czerwōnego Ślōnzoka. Zaś historyczny mōmynt – eliminacje do euro 2016. Arek Milik szczylo na 1:0 i Polsko piyrszy roz wygrywo z Nimcami.

Cufal zadecydowoł, że Polska i Nimce zaś trefiyli na sia w Euro. Tym razym bez goli, chocioż Milik ewidyntnie mioł szmaki. Nic yno trefić w bal… Ale mono jeszcze niy po ptokach? Eźli Poloki i Nimce niy stanōm hneda do nastympnej historycznej haji?

Czasy kej wyjazd ślōnskigo grocza w świat bōł możliwy yno na nimieckich papiōrach, abo po skōńczyniu 28 lot, młode pokolyni groczy moge znać już yno z relacji ôjcōw. Teroski regularnie mogymy zaglōndać na telki ôbrozki jak te z ôstatnich dni. 21-letni Arek Milik klupie zaś w Holandii dwie bramy. Za jego snajperskim tympym nawystyko już tera yno jedyn inkszy „łebōń” ze Ślōnska…

Mirosław Klose jes o 16 lot i pora dobrych rozōnaczōnych por fusbalokōw starszy ôd Arka. Za pierōna jednak pō nim tego niy znać. Mirek choby Krzysiu Ibisz – sztyjc młodszy, sztyjc wyzgerniejszy. W marcu sieknōł już dwie bramy Fiorentinie a po jednej Sassoulo i Napoli (Mirek niy Krzysiu!). Na pyndzyji mōgby już być downo, ale dalij klupie gole i robi pō nich swoji słynne yntki. Mundial 2014 prziniōs mu tytuł majstra i nojlepszego snajpera w historii tego turnieju (16 goli).

Kadrōm Mirek już ciepnōł, a szkoda, bo rekordōw do pobicio masa. Kameruńczyk Roger Milla w wieku 38 lot na dyć dopiyro sie fechtnōł. Jego tańce przi rogowej fance po kożdym z sztyrech goli na Mundialu Italia’90 to pamiyntny ôbrozek. 4 lata niyskorzij w USA Roger sieknōł jeszcze brama Rusōm, beztōż stoł sie nojstarszym mundialowym szczelcym. A mioł kōńczyć reprezytacyjno kariera w 1987, na szczynści „spamiyntoł” go… prezydynt Kamerunu. Co na to pani Angela M.?

Mirek i tak mo kogo gōnić. Niy trza szukać daleko. Nojdługszo i nojbogatszo kariera Ślōnzoka to bezmałaś przipadek Ernesta Wilimowskigo. W wieku 43 lot szpiloł jeszcze w Kehler VF i z uśmiychym robiōł za błozna młodych fusbalorzy. 5 lot pryndzyj pakowoł już tasza na mundial, ale w kōńcu majstra Nimce zdobyli bez niego. Biyda mioł to przeboleć. Klose musiołby jednak urodzić sie jeszcze ze 3 razy coby klupnōnć Ernestowe 1175 bramōw.

Yntki tańce i błozna… Fusbalowe „starziki” muszōm przoć tymu co robiōm. Jeszcze yno wyrozumiało baba i idzie szpilać i pod krykōm.

Nowy snajperski rekordu Mundialu i dwóch majstrōw świata w barwach Nimiec. Toć! Tych to Nimiec, kierych niyskorzij na ziymia skludziyła Polsko i to z niymałym ślōnskim udziałym… To yno kōnsek naszych sukcesōw fusbalowych w 2014.

05.06.1938 r. Ernest Wilimowski jeszcze jako reprezyntant Polski klupie 4 gole Brazylii, co bez długi lata jes rekordym MŚ. To jego piyrszy i ȏstatni mundialowy szpil. Mono beztōż na nastympny telki rekord Ślōnzoki muszōm czakać 76 lot, miesiōnc i 3 dni. Tera zaś rywalym je Brazylio, ale bohatyrym już grocz Nimiec. Tego dnia Mirek Klose szczylo swojo 16. mundialowo brama. Ōn mioł jednak trocha wiyncyj czasu niż Ezi, bo na mistrzostwach zagroł aż 24 szpile.

Hneda Klose z Podolskim mogōm świyntować majstra jako piyrsze Ślōnzoki ȏd czasōw Richarda Herrmanna (RFN; 1954). Po Mundialu Klose ogłaszo kadrowo pyndzyjo, ale sztyjc klupie bramy w Lazio. Podolski w nowym sezōnie trefio na ławka Arsenalu, ale u Loewa sztyjc je ważny. Dyć to jego szlag praje połōmie lata w Wa-wie…

Gola niy było, beztōż nastympny historyczny szpil 2014 r. stoł sie faktym. Poloki piyrszy roz ȏgrali Nimcōw. Tym razym wiyncyj Ślōnzokōw było bioło-czerwōnych. Trza dać pozōr, że gynał Piszczek, Glik i zdobywca gola Milik to kluczowe postaci tego szpilu!

Tera trocha spamiyntanio. W ślōnskich klubach sztyjc „bez szału”. Co prowda trzeci w Ekstraklasie Ruch próbowoł coś powalczyć w Lidze Europy, ale potym było yno gorzij. Na jesiyń w lidze Ślōnzoki forgot ni majōm sie czym asić.

Lepszy na Zachodzie. Milik sieknōł bez jesiyń w Ajaksie 17 goli. Glik, sztoper i kapitan Torino tyż szczylo i sōm poradzi wygrać szpil. Skorupski debiutuje w Lidze Majstrōw. Bundesliga? W Borussi dobrze spamiyntoł sie po rewiyrze Piszczek, a w Koeln blysnoł Olkowski. Gorzij u Boenisha – zaś ława w Bayerze. To samo nasz jedyny chop w Belgii. Sobota co prowda zagroł z Nimcami, ale niyskorzij wypod na drugi plan w klubie i kadrze.

Co nos czeko latoś…?