Archiwa tagu: Górnik Zabrze

Ôstatnim felietōnym ô „Panach autobany” mōg żech trocha zgorszyć nikerych kibicōw Górnika, a że chca spokojnie deptać po „dzielni”, to dzisiej rysuja ich pełniejszy ôbroz. Kibice Górnika sōm na dyć roztomańci ôd artystōw po hodowcōw kur.

Zaczna zaś ôd hoolsōw. To mono niy fest wielki ôdsetek kibicōw, ale bez godki medialnie widoczny. Klasyczny pan hool to chop kery rod mo fojery (race), wesołe prziśpiywki, młyny, larmo i haje (ustawki). Acha! Bezmałaś interesuje sie tyż fusbalym. Tak rychtyk pana „hoola” z Górnika generalnie wiyncyj łōnczy niż dzieli z panym „hoolym” z Ruchu, czy (ô pierōnie!)… z Legii. Sōm jeszcze ultrasy. ôni bezmałaś raczyj robiōm ôprawy szpilōw niż haje. Nikere fajne, inksze – gańba godać… Podzortōm ultrasōw sōm „artysty”, kerzi swojo miłość do Górnika ciaprajōm na murach i perfekt malujōm zwyrtniynto „eRka”. Ich misjōm je „zdobywani terynu”. Nasze miasto, naszo ściana, nasz hasiok…

Zaś żech se pokopoł w lelujach i wyńda na „chorzowskigo”, ale po leku – to niy kōniec. À propos! Eźli kibic Górnika moge kibicować Ruchowi, czy to już grzych? Mocce kibicōw Górnika, do kerych sōm noleża (raczyj godka ô „piknikach”, co niykōniecznie chodzōm na wszyjski szpile), Ruch niy yno niy zawadzo, ale nawet majōm go w zocy. Górnik mo tyż kibicōw VIP-ōw. Na piyrszym placu chyba Łukasz Podolski, bezmałaś prziszły „Grubiorz”. Fest ważnym fanym klubu je tyż prezydynt Zobrzo p. Mańka-Szulik. Symbolym pozytywnego kibicowanio je za to pan Leōn ôd Kokotōw tōż Stanisław Sętkowski. Chop, kery bezmałaś już ôd połowy lot 80-tych po kożdym szpilu u sia dowo nojlepszymu groczowi Górnika ekstra geszyng ze swojij hodowli – to przeważnie kokot, kura abo pultok!

Trza tyż pedzieć że kibice Górnika noleżōm do nojbardzij zaangażowanych w swōj klub. Godo ô tym niy yno ôstatnio frekwyncjo na szpilach. Stowarzyszyni Socios, zbudowane na wzōr podobnych inicjatyw, kere działajōm na Zachodzie np. przi Barcelonie, Borussii, pōmogo Górnikowi finansowo, je udziałowcym i dowo pozōr na klubowe inwestycje.

Jeszcze jedne. Kibice Górnika to Hanysy, ale tyż Gorole, Krojcoki, Krzoki, Ptoki i ludzie durś niy ze Ślōnska. Jednak werci sie spōmnieć, że ślōnskość je ważnym kōnskiym tożsamości Górnika. Dyć to kibice KSG zrychtowali ôficjalno zajta klubowo durś po ślōnsku, piyrszo tako w poważnym fusbalu!

Lato. Autobana. Czorne brele. Zimny łokieć. W radiu na fol „Despacito”. Ludzie cisnōm na wczasy. Czego wiyncyj trza do szczynścio?

Pora godzin ształu! Samo uciecha. I jedź sam człowieku na plaża… Ale, ale! Dejcie pozōr! To niy bele ształ! Jerōnie, dyć to nasi… I już wiysz. Mogesz być dumny. Łezka sie krynci w ôku. Górnik pany! Pany autobany… Autobana A1 zasztrabowano, bo „wesołe dresiki” w barwach Górnika Zobrze i ich kamraty po fachu ze Stalowej Woli zrychtowali se haja. Czamu niy? Jo jes za! Telki „eventy” to jakiś ciekawy kolorycik polskigo fusbalu.”To nasze. Przez nas zrobione. I to nie jest nasze ostatnie słowo” – jak pedziołby klasyk.

Kej myśla ô kibicach Górnika, mōm miyszane uczucia. Mo sie coś ś nimi wspōlnego. Syntymynt do legyndarnego klubu jakoś łōnczy. Tak samo to mōj Górnik jak i ich. Yno samek mojo metafizyczno wiynź z „wesołymi dresikami” sie kōńczy. Jo jak jada bez lato autobanōm w myślach je żech na plaży i trzaskōm sie słōńcym, „prawdziwi” kibice w tym czasie myślami trzaskajōm sie już po gymbach.

Ok. Niy wszyjscy kibice majōm tak sjechane z godzin. Prziznōm tyż ofyn – nigdy niy byłech na Roosevelta na szpilu. 22 708 – aktualny kōmplet kibicōw na stadiōnie Ernesta Pohla musi robić wrażyni. Telki hat-trick udało sie zônaczyć w trzech piyrszych szpilach u sia. W czwortym prziszło już „yno” trocha ponad 20 tys., ale sztyjc kibice Górnika majōm telko średnio frekwyncji, że cołko reszta Ekstraklasy mo na noc. Eźli to yno efekt bycio „na fali” po awansie, a mono już reguła? Kibice żōndajōm rozbudowanio czwortej trybuny. Bezmałaś sōm szanse, że budowa sztartnie na bezrok, przinajmij tak godo pani prezydynt Zobrzo.

Po moimu stadion ze starōm zachodniōm trybunōm architektōnicznie wyglōndo forgot ciekawie. Idzie pomyśleć, że tak to rychtyg miało być. Chocioż jak znojdōm sie piniōndze i klub w prziszłości na tym zarobi to niych budujōm. Dyć kibica trza słuchać… Pod warunkiym, że niy kieruje ruchym na autobanie.

Szpil Górnika Zobrze z Arkom Gdynia to mono niy szlagier kolejki, ale do jednego z groczy bōł na pewno durś wyjōntkowy…

Jeszcze pora miesiyncy do zadku Adam Danch pewno niy poradziōłby se tego przedstowić – ôn przeciwko Górnikowi… ? Kapitan grubiorzy, 29 lot z czego 10 w Górniku, a tamek 303 rozegrane szpile, 2 spadki z Ekstraklasy i 1 awans. Do drugigo tyż sie dociepnōł, chocioż już w kwiytniu tryner Marcin Brosz ôdsunōł go ôd składu, a Adam hneda rozwiōnzoł kōntrakt z klubym. Ligowy finisz Górnik mioł idyalny, beztōż ô Broszu niy godōmy złego słowa, ale strata telkigo grocza w trakcie sezōnu wizerunkowo niy wyglōndo nojlepij. Pożegnani przinajmij dziwne. Mono beztōż tyż wartko rozônaczyły sie famy, że Danch coś napochoł. Godało sie ô ôbstowianiu szpilōw Górnika, co ôkozało sie yno gupim fandzolyniym. Danch ofyn tyż pedzioł, że żodnej haji z trynerym niy było, a ôdynści to jego przemyślano decyzjo…

Na szpilplacu ni ma kamratōw, jak ôstatnio pedzioł sōm Adam, kery we niedziela w Zobrzu zagroł 90 min. Jego Arka kludziyła ôd 84. min, ale pora sekund niyskorzij ôbrona, kierowano przez Dancha, niy uwachowała przi cyntrze Rafała Wolsztyńskigo, kery wyrownoł kepkōm. 1:1.

Adam to jednak niyjedyny ekstraklasowy Ślōnzok na „Goroliji”. Nasi kopiōm tyż do bala choby w Krakowie. Ôd poru lot we Wiśle gro były torman Ruchu i Lechii Michał Buchalik, a Cracovia latoś skludziyła z Chorzowa Michała Helika i z Jagi bytōmskigo trynera Michała Probierza. Je i Ślōnzok we Warszawie. Downij skuli powołań szło tamek fol naszych „wojoko-fusbalistōw”. Łukasz Moneta to już jednak niy te pokolyni. Legia dała mu ciekawszo propozycjo roboty po spadku Niebieskich.

Nojwiynkszo czelodka Ślōnzokōw poza Gōrnym Ślōnskiym zebroł jednak Lubin. Zagłębie skludziyło latoś Jakuba Świerczoka (GKS Tychy) i Bartosza Kopacza (Górnik Z.). W klubie gro tyż Bytōmiok Łukasz Janoszka (downij Ruch Ch.). W kadrach na ôstatni szpile Lubin poradziōł wpisać tela samo synkōw z Gōrnego Ślōnska co… Piast Gliwice.

Szkoda czasu na toplani sie w kaczokach. Lepszy zaro ciś na głymboko woda. Górnik Zobrze w piyrszych sztyrech kolejkach Ekstraklasy przeszoł rychtyg porzōndny egzamin. Kalyndorz niy dowoł taryfy ulgowej byniaminkowi. Górnik zagroł już z majstrym, wicemajstrym i zdobywcami czwortego i szōstego placu 2016/17. Na kōncie 7 punktōw i 5. plac a w składzie nojlepszy snajper ligi…

Górnik zaliczo sztart-marzyni. Po roku na ausie wraco nazod do Ekstraklasy i już w piyrszym szpilu rozônaczo Legia, jakby sie niy dziwać aktualnego majstra Polski, tōż teoretycznie nojlepszego rywala na ligowym placu (FC Astana niy gro w Ekstraklasie – tela dobrze). Na historyczny szpil na stadiōnie E. Pohla dziwo sie 22,7 tys. kibicōw. 3:1 po bramach Dani Suareza i dwōch Igora Angulo – bezmałaś werciło sie prziś…

Z wicemajstrym niy było już tak lekko. Górnik w Białymstoku kludziōł 1:0 (Angulo), ale wynik przewożōł sie w drugo strōna w ôstatnich sekundach. Dwie bramy stracōne z elwrōw i dwōch groczy wyciepanych do szatni przed czasym. Kibel zimnej wody, kery mono i sie zdoł, bo już z Wisłōm Kraków u sia (zaś przi praje fol stadiōnie), Górnik niy doł wytargać se punktōw. Hat-trick Igora Angulo pozwolōł wygrać 3:2.

Ôstatnio kolejka to szpil z Lechiōm w Gdańsku. Tamek rymis 1:1 – tradycyjnie z bramōm Igora, kery tym razym niy wykorzystoł pora rychtyk porzōndnych lagōw. Skuli rekordowych statystyk na sztarcie trza mu to jednak wyboczyć.

Piyrszy egzamin zaliczōny na ôcyna „moge być”. W Górniku rzōndzōm „łebōnie”. W 11-stce wyłażōm na dyć yno synki urodzōne w latach 90-tych (nojmłodsi 19-20 lot). Wyjōntkiym je sam baskijski supersnajper – 33 lata. Przi reszcie czelodki mōgby czuć sie staro, ale tyro jeszcze bez kryki i balkōnika a przi tymu szczylo jak trza. Angulo klupnōł już 7 bramōw.

Górnik za Marcina Brosza w kōńcu je młodōm drużynōm z ambicjōm i co ważne na ich szpile doprowdy idzie sie dziwać. Cudōw mono niy bydymy latoś ôd nich rzōndać, ale niychby tam co zafyrlali!

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…

Istno rewolucjo, przinajmij ze ślōnskij perspektywy. W Ekstraklasie wymiyniajōm sie dwie ślōnski legyndy. Górnik za Ruch. Z nojwyższōm klasōm rozgrywkowōm żegno sie tyż trzech ślōnskich trynerōw, a na ich plac włazi jedyn nowy. À propos, w jakij kōndycji (zdrowiu) je ta „ślōnsko myśl szkolyniowo”?

Bez zgody kardiologa za trynowani sie lepij niy chytać. Ślōnski trynery w ôstatnich szpilach sezōnu zbiyrali rekordowe dawki hercklekotōw. Poniżyj wartki ranking naszych ciśniyniowcōw…

Plac 1. Tabela niy ôcygani, nojlepszym ślōnskim trynerym w Ekstraklasie latoś bez godki Michał Probierz. Tryner z Bytōmia dokludziōł na dyć Jagiellonia do historycznego drugigo placu. Gratulować…? Lepszy pana Michała tera niy szterować. Jedna brama dzielyła go i jego synkōw ôd tytułu Majstra Polski 2017. Po szpilu Probierz oficjalnie żegno sie z Jagōm.

Plac 2. Drugi w tabeli ślōnski tryner i nastympny do kerego lepij sie tera niy zbliżać to Franz Smuda. Jego Górnik Łynczna zaliczo dopiyro 15. plac i spaduje. Strata 2-ōch bramōw w ôstatnich sekundach i bez to rymis z Ruchym 2:2 dokludziyła by go do szału, keby niy wiadōmości z Lubina, kere niy dowały już Górnikowi szans na utrzimani (3:1 do Arki Gdynia).

Plac 3. Problymōw ciśniyniowych ni mioł przinajmij w niedziela Krzysio Warzycha. Ôn nanerwowoł sie tydziyń pryndzyj kej Ruch „wychacharzyli” w Gdyni. Tera spadek Ruchu bōł już przisztymplowany. Było gwiazda ślōnskigo fusbalu na poczōntku swojij kariery trynerskij w Polsce zrobiyła se lekko antyreklama. „Gucio”, kery robi w Ruchu ôd kōńca kwiytnia, wielkigo pola manewru ni mioł, ale swoji 3 grosze do spadku dociepoł.

Sam klasyfikacjo ekstraklasowo sie kōńczy, ale trza przedstawić kogoś jeszcze. W kōnkuryncji hercklekoty mōgby sie spokojnie rownać z Probierzym. Marcin Brosz ô awans Górnika musioł rzykać do 99. min. ôstatnigo szpilu. 1:0 do przodku w Puławach, z biydōm dowieziōne do kōńca stykło. 44-letni Knōrowiok bydzie brōniōł hōnoru ślōnskich trynerōw w nowym sezōnie Ekstraklasy.

Brama szczelōno rynkōm przisztymplowała spadek Ruchu. Pierōństwo…  Ale już po ptokach. Nic niy zmiyniymy. Ślōnski potyngi spadywały niy roz. Przibadalimy. Pytani yno co dalij…

2009. Piyrszy spadek Górnika Zobrze w XXI w. Wielki spōnsor (Allianz), wielki plany, ale gra na pierōna. Spamiyntani jednak sie zdało. W I lidze grajōm yno sezōn. Drugi plac pozwolo Grubiorzōm zaś wlyź do szoli, kero wyjyżdżo w Ekstraklasie. Sny ô potyndze jednak zostały dalij w hasioku. Finansowo Górnik to zaś boroczki. W Zobrzu za to stanōł porzōndny stadiōn. Latoś Górnik zaś musi sie prać ô Ekstraklasa.

2010. Kōniec 14-letnij przigody Odry Wodzisław z Ekstraklasōm. Darymno jesiyń, zimowe transfery i wielko pogōń na wiosna. Brakło jednego ôka. Odra kōńczy na 15. placu i ekspresowo sjyżdżo na same dno. Spadek do II ligi, brak licyncji i rozwiōnzani klubu. W sezōnie 2011/12 nowo Odra sztartuje w rybnickij Klasie C. Potym rozmańte dziwne awanse i fuzje. Doszło do tego, że latoś w lidze okryngowej szpilajōm dwa kluby, kere majōm w nazwie Odra Wodzisław. Telki derby yno tamek…

2011. Zaś spaduje klub ze Ślōnska. Polonia Bytōm kōńczy na ôstatnim placu. Problymy finansowe ôd downa niy były tamek tajymnicōm. Na dłōgszo meta ciynżko było utrzimać w Bytōmiu Ekstraklasa. Piyrszo liga tyż zrobiyła sie za mocno. Terozki Bytōmioki spadujōm do ligi III. Szportowo i ôrganizacynie (ujymne punkty w ramach sztrofy licyncyjnej) zaś niynojlepij.

Kerym scynariuszym pokulo sie prziszłość Niybieskich? Wartki awans jak Górnik? – Bydzie ciynżko. Rozônacz jak w Odrze? – Miasto chyba niy pozwoli. Na razie sytuacjo w Ruchu nojbardzij przipōmino chyba Bytōm. Problymy finansowo-licyncyjne, stare szpetne stadiōny i miasta zmynczōne szpōnsorowaniym klubōw…

Niybiescy jednak swojo historio naszkryflajōm sami. Niy sōm skozani na III liga. Zresztōm spadek z Ekstraklasy w połōnczyniu z pustym portmanejym sami tyż już przerobiali w 2003. Wtedy na powrōt do elity czakali 4 lata…

Ekstraklasa i Piyrszo Liga na finiszu. Sztyjc  ni mōmy jednak ôdpowiedzi na pytani wiela ślōnskich klubōw poszpilo ô Majstra Polski w nastympnym sezōnie. Możliwe scynariusze sōm roztomańte…

Wariant ultrapesymistyczny: Piast i Ruch przegrywajōm ôstatni szpile i kōńczōm na dwōch ôstatnich placach. W piyrszej lidze Górnik niy ôdrabio dwōch ôczek strat do strefy awansu (tym bardzij GieKSa swoich sztyrech). W efekcie w Ekstraklasie ni ma żodnej gōrnoślōnskij drużyny. A gratis mōmy majstra Legii i awans Sosnowca. Nic yno przeciepać sie na szkata!

Telko kalkulacjo mo jednak małe szanse realizacje, ale same to, że na dwie kolejki przed kōńcym możliwe je że Gōrny Ślōnsk hneda zostanie bez klubu w Ekstraklasie to już gańba. Ôd 1922 r. kej kōnsek Ślōnska dostoł sie Polsce dycki chocioż jedna ślōnsko drużyna stowała na poczōntku sezōnu do haji ô Majstra Polski. Przeważnie naszych w nowyższej klasie rozgrywkowej było jednak wiyncyj. W rekordowym sezōnie 1968/69 aż siedym (Górnik Z., Polonia B., Szombierki B., Ruch Ch., GKS K., Odra O., ROW Rybnik), co było połowōm cołkij I ligi! Ślōnski drużyny poradziyły wygrywać majstra 10 razy z rzyndu (lata 1959-68; Górnik-7, Ruch-2, Polonia B.-1), a z podium niy złaziyły nawet bez 28 lot (1950-77). W sumie gōrnoślōnski drużyny były na podium w 57. z 81. skōńczōnych do tyj pory sezōnōw nojwyższej klasy rozgrywkowej w Polsce. Nojmaśniejsze lata downo za nami, ale nawet w XXI w. miywalimy po sztyry gōrnoślōnski kluby w Ekstraklasie. Latoś kryzys szczytuje.

Ale po lekku… Sztyjc możliwy je na dyć wariant ultraoptymistyczny: Ruch wygrywo dwa ôstatni szpile a rywale grajōm „pod nich” (Górnik Ł. i Arka tracōm punkty). Przi telkim ukłodzie Piast już niy musi nic. Ôbie ślōnski drużyny sie utrzimujōm. W piyrszej lidze dwie wygrane Grubiorzy, 1 przegrany szpil Sosnowca,  1 rymis Grudziōndza i voilà! Górnik nazod w Ekstraklasie i je nas trzech!

Zaś wōnio utopiōm? Mono lepij żyć nadziejōm niż yno historiōm?

Przed ôstatecznymi rozwiōnzaniami w Lidze Majstrōw propōnuja trocha se ôd nij dychnōnć, a podziwać sie na rozgrywki na durś inkszym poziōmie. Ôbadejcie liga, w kerej jak w żodnej inkszej wre od ślōnsko-zagłymbiowskij rywalizacje, a poziōm niyprzewidywalności zaskokuje nawet starych bukmacherōw…

Ja, dzisio ô polskij piyrszej lidze. Wiym, że nikerzi ciepnōm tera tym felietōnōm w pierōny, bo wiyncyj emocji to dyć majōm na grzibach. Tej zorcie kibicōw chca spōmnieć, że z deficytym emocji w szporcie ludzie już downo nauczyli se radzić. Darymnie przeca zakładōw bukmacherskich niy wymyślili. Już w starożytnym Rzymie ludzie niy roz szli ô weta, kery gladiator „wklupie” kerymu. Ôjczyznōm bukmacherki uznowo sie jednak Wielko Brytanio. Tamek już w XVIII w. szło sie wetnōnć na wyścigach kōnnych. Biznes bukmacherōw rozfechtowoł sie jednak do porzōndku z rozwojym fusbalu na przełōmie XIX i XX w. Do terozki, trza pedzieć, jak idzie ô fantazjo przi wetach bukmacherskich, to Angliki wyprzedzajōm nas i to fest. Przi ôkazji Olimpiady w Lōndynie szło dyć wetnōnć sie, że na stadiōnie wylōnduje UFO, abo że kōmuś ôd pochodni olimpijskij hajcnōm sie włosy. Wielko haja skuli zakładōw bukmacherskich rozônaczyła sie tyż tamek i latoś, kej w szpilu ô Pucharu Anglii rezerwowego tormana piōntoligowego Sutton United chyciōł głōd. Ôkozało sie, że jedyn z bukmacherōw doł szansa kibicōm wetnōnć sie, że doświadczōny i, trza pedzieć ofyn, bachraty torman zjy w trakcie szpilu „a pie” (nadziywany maszket na słodko abo słōno). Zostało yno wyjaśnić czy był to tyn rychtyg tyn angielski „pie” czy zwykło sznita…

Bukmacherka poradzi dodać emocji fusbalowi. Ale wyboczcie, miało być o I lidze… Tamek telkich kosmiczno-spożywczych kōmplikacji niy trza. I liga to nojbardzij niyprzewidywalne rozgrywki jaki znōm. Ô awans gro latoś pora ślōnskich drużyn, a coby było ciekawij przeszkadzajōm im w tym Zagłymbioki. Ôstatnio zdało sie, że żodyn niy chce awansować. Górnik, kery zapowiado awans ôdkōnd spod z Ekstraklasy, poradzioł wygrać z Sandecjōm (2:0), coby potym przegrać z ôstatnim Kluczborkiym (2:1) i ôstatnio z Sosnowcym (1:2) po bramie z 89 min. (tyn sōm Sosnowiec przegroł wczesnij z tōm samōm Sandecjōm 5:0!). GKS Katowice sztyjc w czubie, ale sztyjc tyż sōm kōmplikuje se szanse na awans (porażki z Podbeskidziym i Sosnowcym). Gieksa i Górnik mōgłyby już sie z awansym pożegnać, ale rywale tyż poradzōm zaskoczyć. Lider z Chojnic w ôstatnij kolejce dostowo wklupane z potyncjalnym spadkowiczym, GKS-ym Tychy (1:4). I kto sam chce awansować? Aż żol tych bukmacherōw…

Ôkna transferowe w nojważniejszych europejskich ligach zawarte. Styczyń ciekawy bōł przede wszyjskim skiż Chińczykōw, kerzi czatujōm na coroz lepszych fusbalistōw choby fesztry na żdżałe sorniki. Na muszka trefiōł im tyż jedyn z naszych. Tōż ślōnskim bohatyrym trensferōw tym razym bez godki Łukasz Podolski, nowy fusbalista Pekin Guoan.

Jeszcze pora lot do zadku chińskim „fesztrōm” zdarzało sie zapolować w Ekstraklasie. Interesy ś nimi robiōł nawet Górnik Zobrze. Przody na drugi kōniec świata wykludzioł sie Krzysztof Mączyński (2014, Guizhou Renhe) potym Mateusz Zachara (2015, Henan Jianye). Grubiorze wielkij kariery tamek niy zrobiyli i sōm już nazod w Polsce. Tera ô transferze do Chin grocze z Ekstraklasy mogōm pomarzyć. Chińczyki przesztelowali sie na wiynksze transfery. Plan zônaczynio fusbalowej potyngi ôgłoszony przez prezydynta Xi Jinpinga w 2012 r. włazi w nastympne fazy. Chiny fest inwestujōm w szkolyni modych groczy, a z Europy i Brazylii za kosmiczne piniōndze bierōm już yno rychtyk dobrych fusbalistōw (i to niy yno tych po 30-stce). Ôstatnio do Super League trefili choby Carlos Tevez (33 l., Boca Juniors-Shanghai Greenland), John Obi Mikel (30 l., Chelsea-Tianjin Teda), czy Oscar (26 l., Chelsea-Shanghai SIPG).

Łukasz Podolski to nojbardzij utytułowany ślōnski fusbalista z tych sztyjc aktywnych. W ôstatnich miesiōncach dowo jednak znać, że po lekku kōńczy kariera. Po euro 2016 pedzioł ofyn, że w reprezyntacji Nimiec już niy poszpilo. Terozki kōńczy z Galatasaray Stambuł i kludzi sie fōrt na drugi kōniec świata, kery z perspektywy Europy sztyjc zdo sie fusbalowymi „Pierōnowicami”. 31-letni Podolski niy musi już jednak myśleć ô rozwoju szportowym. W jego przipadku transfer do Pekinu to raczyj ciekawo przigoda i ôkazjo do prziszporowanio do pyndzyji. A dyć czamu niy? 9 miliōnōw za rok? Piechty niy depce… Ale panie Łukaszu, dejcie pozōr! Kibice na Ślōnsku pamiyntajōm, kōniec kariery bezmałaś mo być w Zobrzu…