Archiwa tagu: Górnik Zabrze

Mrōz chyto to i sie hajcuje. Szkoda yno, że niy kożdy poradzi robić to do porzōndku. Skiż tego z luftu robi siy gynsty zac, kerego skłod je dłōgszy niż w nojgorszej zorty ôplerkach i zdołby sie ku nimu spis treści. W telkich warōnkach trynuje „do zdrowio” fol ślōnskich fusbalistōw z klubōw, kerym gynał trocha brakuje coby pojechać na ôbōz na Cypr. Je tyż jednak inkszo zorta fusbalistōw, kerzi ni majōm problymōw ze smogiym i to jedyn pierōn czy trynujōm u sia czy szpilajōm za granicōm. We słowyńskij Lublanie skōńczyły sie gynał Mistrzostwa Europy we Futsalu.

Na halowym Euro niy brakło Ślōnzokōw, wszyjscy w reprezyntacji Polski, kero ôstatni roz szpilała na telkim turnieju we 2001. Byli fusbalisty Clearexu Chorzōw (3), Piasta Glywice (2) i GSF Glywice (1) jak tyż ze ślōnskich połedniowo-wschodnich kresōw, tōż z Rekordu Bielsko-Biała (3). Po rymisie z Rusami (1:1) i przegranej z Kazachstanym (1:5) bioło-czerwōni niy wyleźli z grupy, ale gańby ni ma! Futsal a fusbal na trowie to inksze światy. Sam żodnego niy dziwi, że w grupie ôdpadujōm Włochy czy Francjo, a dalij lezōm wspōmogane brazylijskōm tiki-takōm kadry Azerōw a Kazachōw.

Forgot, werci sie roz za kedy sprōbować halōwki, bo to szport warciejszy, jeszcze bardzij techniczny i w naszych realiach zimowych nojzocniejszy a nojzdrowszy. Futsalisty już w dōma, tōż i my wracōmy a chytōmy sie fachlowanio. Nikere szpilplace musiały już być ôdśnieżōne na ôstatni piōntek, kej sztartła Ekstraklasa. Zaro we piyrszym szpilu mōglimy ôbadać forma Grubiorzy. Wyjazd do Płocka bōł do trynera Górnika ekstra misjōm, bo ôbrōna skuli kartek a kōntuzji musioł zrychtować praje na nowo. Kōmbinowoł bez cołko pauza, ale eksperymynt jak to padajōm „niy pyknōł”. Synki z Zobrzo dali se wklupać aż 4 bramy i ze 4:2 w pleca pojechali du dōm.

Trza trynować dalij… Tōż, drogi hajcyry! Dejcie żyć tym co robiōm fōrma na „świyżym” lufcie. Ô tōńszym a zdrowszym hajcowaniu poczytocie wszyjsko sam: http://czysteogrzewanie.pl/

We raji zbiōrka! Do jedynoście ôdlicz! I terozki chwila prowdy…

Marcin Brosz jeszcze tydziyń do zadku ni mōg być pewny eli jego „złoto” jedynostka sie utrzimie. Podstawa skład Górnika Zobrze bez jesiyń zmiynioł sie tak rychtyg yno wtedy kej musioł. Bez godki stracyni kogoś z podstawy byłoby czuć. Ôd 1 lutego na szczynści ôkno transferowe we nojwiynkszych europejskich ligach je zawarte, tōż Zobrze moge dychnōnć. A dyć starać było sie ô co! Bezmałaś „za piynć dwanoście” włosko Fiorentina chciała jeszcze skludzić Szymōna Żurkowskigo, 20-letnigo kapitana polskij młodziyżōwki. To już jednak (na jakiś czos) niyaktualne. Tera yno niy dać sie cylnōnć „fesztrōm” z USA, Chin eli Japōnii, chocioż do modych Grubiorzy z grajfkōm telki kierunki chyba mynij zocne.

Co do transferōw na plus Górnik tyż niy gupnōł. Testowali swoich modych synkōw – telko tera klubowo polityka. Za ciekawszy ruch idzie uznać yno wypożyczyni 22-letnigo ôbrōńcy Pawła Bochniewicza z Udinese. Tradycyjnie nojciekawszym transferym, kerego niy było, przekludziny Łukasza Podolskigo. Niy starejcie sie… Kaj tam 65! Łukasz na pyndzyjo jeszcze niy idzie.

Tōż kaj te ślōnski hity transferowe? Niy w Zobrzu to mono w Glywicach? Niy, tam asić sie mogōm co nojwyżyj wypożyczyniym dwōch legiōnistōw, kerych Wa-wa już niy chciała (Czerwiński a Jodłowiec). Szukōmy dalij i dojyżdżōmy na Dolny Ślōnsk. We Lubinie na dyć synkōw i z Gōrnego Ślōnska niy brakuje. Jedyn ś nich ôstowo bohatyrym zimowego szlagra. Jakub Świerczok trefio do Łudogorca Razgrad i zaro na sztart we trzech sparingach szczylo 4 bramy. W Lubinie Świerczok tyroł yno bez pōł roku. Kej Bułgary ciepli na stōł piniōndze szkryfniynte w kōntrakcie było już pośmiatane.

Rownowoga we przirodzie być musi. Do Lubina kludzi sie synek spod Raciborza, Łukasz Moneta (24 l.). Z Gōrnego na Dolny Ślōnsk GPS pokludziōł go bez Warszawa, kerej niy zawojowoł po roz drugi. Lubin chyba rychtyg lepszōm ôpcjōm do naszych chopcōw, pra? A i kibicować pódzie Monecie… z czystym sercym.

Tradycyjnie już na kōniec roku Ślōnski Fusbal chyto sie za wrōżyni na bezrok. Dyć to nojlepszy ku tymu czos. Kery niy w tymacie spōminōm skōnd to sie wziyno…

Nocka durś pokōnała dziyń. Świat ôstoł w cimoku. Hneda jednak klara zacznie sie pokozywać na dłōżyj. Na świat przidzie Pōnbōczek, światło. Idzie nadziejo na lepsze. Tyn przełōmowy mōmynt nasze starziki ôd downa mieli za wyjōntkowy. W takim czasie trza fest dować pozōr co sie pocho, bo woży sie naszo prziszłość. Jak to padajōm jaki bydziesz bez wilijo taki bez cołki rok. Nikerzi tyż już 12 dni przed wilijōm (ôd 13 XII – św. Łucji) zaczynali dziwać sie w niebo, bo to dziyń po dniu wrōżba na pogoda na kożdy miesiōnc na bezrok. Prognoza pogody to gynał niy mojo bojka tōż dōm tymu pokōj. Do kōnkretōw! Nastympny rok we Ślōnskim Fusbalu pokulo sie tak…

Ôstatni postympy w rehabilitacji wrōżōm Arkowi Milikowi sztartniynci normalnych tryningōw jeszcze latoś, a w kadrze na szpil moge być już 21 stycznia z Atalantōm Bergamo. Déjà vu? Rok tymu wracoł po rewiyrze w podobnym czasie… Mono lepij niy w jego przipadku niy wrōżyć a doczkać i rzykać niych niy kopnie w jaki dornik.

Milikowi urośnie jednak ślōnsko kōnkuryncjo w ataku polskij kadry. 2 hat-tricki w dwōch grudniowych szpilach Jakuba Świerczoka ni mogōm źle wrōżyć. Tyn synek musi pojechać na Rusy, dyć Nawałce zdo sie nowo siyła w ataku… Chyba rychtyg tak bydzie, bele yno Kuba niy wrōciōł do „diety nutellowej”.

Górnik Zobrze w haji ô majstra bydzie sie liczōł do ôstatnich sekund. Bele yno niy doł se go w tych ôstatnich sekundach wytargać, jak w ôstatnim szpilu z Arkōm kaj gupio straciōł brama na 1:0 i w tabeli spod na drugi plac… Spokojnie niy wszyjski wrōżby sie spełniajōm jedyn do jedyn.

Stadiōn Ślōnski doczko sie szpilu reprezyntacji Polski po ponad 8 latach… To już gynał niy wrōżba a ôbietnica prezesa PZPN. Poloki na Ślōnskim poszpilajōm już w marcu. Przijedzie sam Korea abo Nigerio.

 

—————-

Ślōnski Fusbal robi świōnteczno-noworoczno pauza. Nastympny felietōn pokoże sie 9 stycznia. Wesołych, nojlepszego i do zaś!

GB

Dopiyro zimowo pauza powiy nōm tak rychtyg eli Górnik Zobrze na dłōgszo meta myśli ô poważnym fōngowaniu i szpilaniu ô majstra. Hneda piyrszy test. Eli z Zobrzo ôdyndzie nojlepszy snajper?

Bez ôstatni lata sprzedowani nolepszego „samca alfa” po kożdej rundzie było podstawōm polityki transferowej Górnika. Wtedy szło być wiernym klubowi i za jednym szlagiym nim ciepnōnć, skoro transfer dowoł mu trocha kotlokōw na życi. Tera bezmałaś w Zobrzu je inacy, co pokozać już miało letni ôkno transferowe. Po tych co poszli żodyn już niy ślimto (Danch, Kopacz), a poru nowych poradziyło sie dobrze w KSG znojś (Koj, Wieteska, Kądzior). Górnik idzie w modych, kerzi majōm idyntyfikować sie z klubym i dobrze firmować Ślōnsk…

Igor Angulo zdałoby sie średnio ku tymu pasuje, chocioż… Wiek? Sprawa dyskusyjno. To je w gowie. Wiynzi z klubym/regiōnym?  Ciynżko liczyć że 32-letni fusbalista z Bilbao po zaliczyniu 11 klubōw karierze ôroz z miłości do roladōw i paprotek ôdbitych we wōnglu przekludzi sie na zawsze do Zobrzo. A jednak, Górnik to do Igora coś wiyncyj! Godka, że Zobrze spōmino mu Bilbao i że rychtyg dobrze sie sam czuje ni ma yno fandzolyniym. Zobrze to dwanosty i nojlepszy przistanek w karierze Angulo. Tukej zrobiōł awans, bije snajperski rekordy, stadiōn wyśpiywuje jego nazwisko i sztyjc jy zupa na zdobycznym kokocie. Niy dziwne, że czuje sie jak u sia i ofyn godo, że nikaj sie stōnd niy wybiyro. Z jednym „ale”! Do sia du dōm rod by wrōciōł. Hiszpańsko „Marca” wywōniała, że Athletic Bilbao (latoś w dolnych kōnskach tabeli Primera Division) chciołby Igora nazod. Bramy klupie, rodzōny Bask i sztyjc 3 lata modszy ôd Aduriza, podstawowego snajpera Athleticu. Kandydat klasa!

Angulo gynał szkryfnōł kōntrakt do 2020 r. Wert je tera wiyncyj. Pora lot do zadku czakali by już w Zobrzu na brif z Bilbao choby na zbowiyni. Tera? Ni ma brifu – ni ma ô czym godać. Problym bydzie jak brif rychtyg przidzie. Chynć zatrzimanio grocza moge niy styknōnć jak rolady przestanōm wōniać…

Jak 4 grudnia to Barbōrka, jak Barbōrka to fajrowani. Jak fajrowani to gybōrstag. I zaś na tapecie zobrzański Górnik…

Klub szportowy je jak familijo. W nikerych kōnskach świata ofyn godo sie, że do familiji noleżōm  ci co sam byli, ci sam sōm i ci co sam bydōm. To dobro lekcjo do klubōw, kere coby dobrze fōngować muszōm sztyjc dować pozōr na to co je, co bydzie, ale i na to co było. Dobrze zagrać szpil, trynować bajtli, i szanować starych groczy… Górnik-dzisio wygrywo z Wisłōm 3:2  i kludzi w Ekstraklasie, Górnik-jutro trynuje łebōni, kerzi już wygrywajōm im szpile, a Górnik-wczora sztyjc żyje sukcysami z lot 60. a 70.

Do epoki majstrōw Grubiorzy przełōmu lot 60. a 70. noleżōm bez godki sztoper i kapitan Stanisław Oślizło, kery gynał skōńczōł 80 lot. Przed szpilym z Jagiellōniōm Oślizło ôdebroł geszynki i powinszowania, a stadiōn ôdśpiywoł mu „sto lot”. Jymu, tōż chopowi, kery z Górnikym 8 razy robiōł Majstra Polski, 6 razy Puchar Polski, a do tego doszoł ś nim do finału Pucharu Europejskich Zdobywcōw Pucharōw, w kerym klupnōł brama (2:1 w pleca z Man. City), beztōż do dzisiej je jedynym fusbalistōm z Polski z bramōm we finale europejskigo pucharu.

Ô chopie z Jedłownika wypado pamiyntać, tym bardzij, że ôn ô Górniku i starych Grubiorzach tyż niy zapōmino. Niy tak downo tymu przi Wszyjskich Świyntych Oślizło deptoł jeszcze po rozmańtych kyrchowach razym z kapelōnkiym Górnika coby poświycić i porzykać za downych fusbalistōw, trynerōw a działoczy klubu. Oślizło robi za ambasadora Gornika Zobrze i doradcy Zarzōndu klubu.

Niy zawsze jednak było tak kolorowo. Oślizły ôdsunyli ôd piyrszej drużyny kej mioł 35 lot, czego dowiedzioł sie przi… pasowaniu ancugōw przed tournée po Ameryce. Niy było go na liście jeglorza. Potym w kwiytniu 1973 na szpilu z Ruchym w przerwie zaprosiyli go yno na bieżnia, dali kolorowy telewizor i tela. Niysmak ôstoł, ale Ôślizło na Górnik sie niy gorszy. Rod dziwo sie na grubski wczorej, dzisiej i jutro…

Niydowno trefiyło 11 listopada, dziyń w kerym przeciyntnego ôbywatela Polski (kery gynał niy citnōł na zagraniczno rajza) zaciepuje sie historiami ô polskich bohatyrach-ciyrpiyntnikach, pierōńskich zaborcach, chacharskich ôkupantach i wielkich powstańczych klynskach. Polski patetyczne fandzolyni sztyjc na topie. Ślōnzok słōcho tego przeważnie z dystansu i do telkich patriotycznych utropiyń mu daleko. Ale coby niy było, że my to jakoś lepszo zorta człowieka, trza ofyn pedzieć, że i Ślōnzok rod se nikedy pomarudzi. A dyć ni ma lepszego tymatu do marudzynio i utropiyń jak historie jak to nos Warszawa wyciu… „wychacharzyła”.

Tōż i jo sie dociepna… Chca dzisio spōmnieć, że Górnik Zobrze już roz stanōł z Legiōm do haji ô 15. Majstra Polski i bez praje pōł godziny gry mioł go już na talyrzu! W ôśmiu jednak biyda wygrywać szpile… 15 czyrwca 1994 r. Górnik w kōńcu yno zrymisowoł z Legiōm 1:1 co dało majstra Warszawiokōm. Syndzia wyciepnōł tego dnia ze szpilplacu aż trzech Grubiorzy i skōńczōł szpil przed czasym. We złotych latach korupcji w polskim fusbalu ni mōgło w telkij sytuacji braknōnć kōmyntorzy, że szpil bōł sprzedany. To, że syndzia Redziński po tym szpilu skōńczōł kariera i wyjechoł za granica yno rozhajcowało famy. Klachało sie ô szwajcarskim kōncie arbitra i wybudowanej [za wycyganiōne na tym szpilu piniōndze] chałpie. Ci co szpil pamiyntajōm do dzisio godajōm ô ôszustwie abo (ôcyna bardzij popularno w Wa-wie) ô ôstrej grze Grubiorzy. Po moimu syndzia mōg być tyż tak rychtyg yno darymny+wylynkany, co potwierdzołby jego ôstatni gwizdek po tym jak kibice Legii wylecieli na murawa.

Wracōmy do 2017. Sam tyż idzie se pobuczeć. Górnik latoś z syndziami tyż miywo pod kympka. Niedzielny szpil z Legiōm synki z Zobrzo przegrali 1:0, chocioż 1:0 już wygrywali… Tym razym to skuli systymu VAR. XXI w. – ni ma co lamyntować. Trza dziwać sie do przodku. Latoś po dwōch szpilach Górnik vs Legia 1:1, a w perspektywie sztyjc rewanż na wiosna.

Fajnie mieć piykny niedzielny ancug, ale niy ma siyły, kiedyś sfifro sie zōłzōm abo roztargo. A jak to trefi przed wielkōm imprezōm? Dyć gańba iś na weseli w arbaju… Ôstatni szpile reprezyntacyjne latoś to do zakwalifikowanych już na Mundial ôpcjo do ôbadanio planu B – nowych taktyk, knifōw, czornych kōni. Fto rod po awansie Polokōw pado, że w kadrze Nawałki wszyjsko funguje jak trza chyba doł sie zrobić za błozna rankigowi FIFA.

Nawałka mōnter dziwo sie na to co sie pocho w kadrze, beztōż kōmbinuje… Eli pōmoc przidzie ze Ślōnska? Selekcjōner mo syntymynt do Górnika Zobrze. Powołani do kadry dwōch nowych Grubiorzy niy wziyno sie jednak z luftu. Pōmōgła sam bez godki gra cołkigo Górnika. Damian Kądzior i Rafał Kurzawa wartko jednak piyrszych skrzipek w kadrze niy zagrajōm (z Urugwajym ani niy wleźli). U Nawałki debiutuje sie po lekku…

Wiy ô tym Kamil Wilczek (w kadrze 2 lata, z Urugwajym I roz w podstawie). Co do niego i Jakuba Świerczoka (I roz w kadrze, debiut z Urugwajym) Nawałka mo chyba jednak wiynksze plany. Rewiyry Milika i Lewandowskigo dowajōm do myślynio. Kery ze  Ślōnzokōw wyônaczy sie na zmiynnika numer jedyn w ataku? Mało czasu na testy. Nawałka stowo do „randki w ciymno”…

Kandydat nr 1. Grocz z Wodzisławia za łebka wyhoczōny bez hiszpańskich skautōw  (UD Horodada). Hneda nazod na Ślōnsku. Tytuł nojlepszego snajpera Ekstraklasy w Piaście Gliwice zakludziōł go do Serie A. W ôstatnim sezōnie w duńskim Brøndby 19 bramōw a 14 asyst. Bōł w cugu, tera trocha sztopnōł, bo tyż mało kiedy szpilo po 90 min. Wilczek jednak sztyjc bajsnōnć poradzi…

Kandydat nr 2. Synek z Tychōw tyż wczas ôgłoszōny „talyntym”, tyż wczas na Zachodzie. Transfer z Polonii Bytōm do Kaiserslautern niy rozfechtowoł jednak jego kariery. Świerczok bezmałaś w Nimcach poradziōł zjeś krauza nutelli ôroz. Wziōn sie za sia i spamiyntoł sie w Tychach. Latoś w Zagłębiu Lubin klupnōł już 9 bramōw.

Niystety z Urugwajym ôba bez bramy… Adamie, wybōr noleży do Cia.

Ta daaam! Górnik Zobrze wygranōm 3:1 z Lechym Poznań przisztymplowoł Majstra Jesiyni, kerego raczyj trza by mianować Majstrym Pōłmetka, kieby niy to że to wcale niy pōłmetek. Tōż coby pedzieć ofyn znaczy to sztyjc niy wiela, ale uciechy żodyn tym synkōm niy weźnie…

Piyrszy plac, rekordowy krōl szczelcōw (Angulo – 16 bramōw), dwōch kadrowiczōw u Nawałki (Kądzior, Kurzawa) i sześciu w młodzieżowych reprezyntacjach Polski (Loska, Wieteska, Żurkowski, Ambrosiewicz, Pawłowski, Hajda), rekordowo frekwyncjo na szpilach (sztyjc 22-24 tys. kibicōw). Do tego nojwiyncyj klupniyntych bramōw (33). W skrōcie na Grubiorzy chce sie dziwać, chocioż do idyału fōrt daleko…

Ôstatni roz ślōnski klub na piyrszym placu po piyrszej rundzie bōł gynał 2 lata tymu. Piast Glywice do kōńca sezōnu proł sie wtedy ô majstra, ale piyrszego placu niy dowiōz do kōńca, chocioż miywoł już 10 punktōw przewogi nad drugōm ekipōm w tabeli. Terozki Górnik yno ô 1 punkt wyprzedzo drugo Legia. Ô 15. majstrze na razie ni ma co darymnie godać. Górnik to na razie łebōnie z grajfkōm, kerym chce sie tyrać, a to na polsko Ekstraklasa ôkozuje sie stykać coby kludzić w tabeli, kōńcowego sukcysu jednak niy gwarantuje.

A poprowiać sztyjc je co. Defynsywa niy zawsze funguje jak trza. 22. stracōne bramy w 15. szpilach to wynik choby w haji ô utrzimani. Yno dwa razy torman Grubiorzy słaziōł ze szpilplacu niypokōnany. Trza tyż pedzieć, że w piyrszym placu Górnika pōmogli nojgroźniejsi rywale. W Ekstraklasie przewidywalność wynikōw je na poziōmie C-klasy. Faworyty tracōm punkty z „boroczkami” bez co telki kluby jak Górnik mogōm blysnōnć a bukmachery zaś prziszporujōm.

Jeszcze 6 szpilōw wiosny na jesiyń i kluczowo pauza zimowo. Eli Gôrnik sie wzmocni? Pozōr, poważno kandydatura na widoku! Łukasz Podolski swoim ôstatnim kōmyntorzym na Tweeterze, w kerym pedzioł Grubiorzōm coby doczkali na niego zaś rozhajcowoł dyskusjo ô jego transferze do Zobrzo. Rod bych to chcioł widzieć. Yno… Chyciōłby sie tera do 11-stki? Co padocie?

Ôstatnim felietōnym ô „Panach autobany” mōg żech trocha zgorszyć nikerych kibicōw Górnika, a że chca spokojnie deptać po „dzielni”, to dzisiej rysuja ich pełniejszy ôbroz. Kibice Górnika sōm na dyć roztomańci ôd artystōw po hodowcōw kur.

Zaczna zaś ôd hoolsōw. To mono niy fest wielki ôdsetek kibicōw, ale bez godki medialnie widoczny. Klasyczny pan hool to chop kery rod mo fojery (race), wesołe prziśpiywki, młyny, larmo i haje (ustawki). Acha! Bezmałaś interesuje sie tyż fusbalym. Tak rychtyk pana „hoola” z Górnika generalnie wiyncyj łōnczy niż dzieli z panym „hoolym” z Ruchu, czy (ô pierōnie!)… z Legii. Sōm jeszcze ultrasy. ôni bezmałaś raczyj robiōm ôprawy szpilōw niż haje. Nikere fajne, inksze – gańba godać… Podzortōm ultrasōw sōm „artysty”, kerzi swojo miłość do Górnika ciaprajōm na murach i perfekt malujōm zwyrtniynto „eRka”. Ich misjōm je „zdobywani terynu”. Nasze miasto, naszo ściana, nasz hasiok…

Zaś żech se pokopoł w lelujach i wyńda na „chorzowskigo”, ale po leku – to niy kōniec. À propos! Eźli kibic Górnika moge kibicować Ruchowi, czy to już grzych? Mocce kibicōw Górnika, do kerych sōm noleża (raczyj godka ô „piknikach”, co niykōniecznie chodzōm na wszyjski szpile), Ruch niy yno niy zawadzo, ale nawet majōm go w zocy. Górnik mo tyż kibicōw VIP-ōw. Na piyrszym placu chyba Łukasz Podolski, bezmałaś prziszły „Grubiorz”. Fest ważnym fanym klubu je tyż prezydynt Zobrzo p. Mańka-Szulik. Symbolym pozytywnego kibicowanio je za to pan Leōn ôd Kokotōw tōż Stanisław Sętkowski. Chop, kery bezmałaś już ôd połowy lot 80-tych po kożdym szpilu u sia dowo nojlepszymu groczowi Górnika ekstra geszyng ze swojij hodowli – to przeważnie kokot, kura abo pultok!

Trza tyż pedzieć że kibice Górnika noleżōm do nojbardzij zaangażowanych w swōj klub. Godo ô tym niy yno ôstatnio frekwyncjo na szpilach. Stowarzyszyni Socios, zbudowane na wzōr podobnych inicjatyw, kere działajōm na Zachodzie np. przi Barcelonie, Borussii, pōmogo Górnikowi finansowo, je udziałowcym i dowo pozōr na klubowe inwestycje.

Jeszcze jedne. Kibice Górnika to Hanysy, ale tyż Gorole, Krojcoki, Krzoki, Ptoki i ludzie durś niy ze Ślōnska. Jednak werci sie spōmnieć, że ślōnskość je ważnym kōnskiym tożsamości Górnika. Dyć to kibice KSG zrychtowali ôficjalno zajta klubowo durś po ślōnsku, piyrszo tako w poważnym fusbalu!

Lato. Autobana. Czorne brele. Zimny łokieć. W radiu na fol „Despacito”. Ludzie cisnōm na wczasy. Czego wiyncyj trza do szczynścio?

Pora godzin ształu! Samo uciecha. I jedź sam człowieku na plaża… Ale, ale! Dejcie pozōr! To niy bele ształ! Jerōnie, dyć to nasi… I już wiysz. Mogesz być dumny. Łezka sie krynci w ôku. Górnik pany! Pany autobany… Autobana A1 zasztrabowano, bo „wesołe dresiki” w barwach Górnika Zobrze i ich kamraty po fachu ze Stalowej Woli zrychtowali se haja. Czamu niy? Jo jes za! Telki „eventy” to jakiś ciekawy kolorycik polskigo fusbalu.”To nasze. Przez nas zrobione. I to nie jest nasze ostatnie słowo” – jak pedziołby klasyk.

Kej myśla ô kibicach Górnika, mōm miyszane uczucia. Mo sie coś ś nimi wspōlnego. Syntymynt do legyndarnego klubu jakoś łōnczy. Tak samo to mōj Górnik jak i ich. Yno samek mojo metafizyczno wiynź z „wesołymi dresikami” sie kōńczy. Jo jak jada bez lato autobanōm w myślach je żech na plaży i trzaskōm sie słōńcym, „prawdziwi” kibice w tym czasie myślami trzaskajōm sie już po gymbach.

Ok. Niy wszyjscy kibice majōm tak sjechane z godzin. Prziznōm tyż ofyn – nigdy niy byłech na Roosevelta na szpilu. 22 708 – aktualny kōmplet kibicōw na stadiōnie Ernesta Pohla musi robić wrażyni. Telki hat-trick udało sie zônaczyć w trzech piyrszych szpilach u sia. W czwortym prziszło już „yno” trocha ponad 20 tys., ale sztyjc kibice Górnika majōm telko średnio frekwyncji, że cołko reszta Ekstraklasy mo na noc. Eźli to yno efekt bycio „na fali” po awansie, a mono już reguła? Kibice żōndajōm rozbudowanio czwortej trybuny. Bezmałaś sōm szanse, że budowa sztartnie na bezrok, przinajmij tak godo pani prezydynt Zobrzo.

Po moimu stadion ze starōm zachodniōm trybunōm architektōnicznie wyglōndo forgot ciekawie. Idzie pomyśleć, że tak to rychtyg miało być. Chocioż jak znojdōm sie piniōndze i klub w prziszłości na tym zarobi to niych budujōm. Dyć kibica trza słuchać… Pod warunkiym, że niy kieruje ruchym na autobanie.