Archiwa tagu: Krzysztof Król

Ôczy cołkigo fusbalowego świata zaglōndały w tym tydniu na Madryt, kaj synki z Barcelōny rozklupali Krōlewskich aż 4:0! Przi telkim szpilu to co pocho sie w inkszych ligach dycki zdo sie być w ciyniu…

A szkoda! Poru naszych pokozało na dyć klasa. Spōmnieć trza ô dwōch snajperach. W Europie ôba majōm po dwie bramy, u sia w ligach klupli gynał po szōstej. Godka ô Miliku i Podolskim. Piyrszy pōmōg Ajaksowi wygrać 5:1 z Cambuur i jego ekipa sztyjc kludzi w Eredivisie. Drugi trefiōł do neca w zrymisowanym 3:3 szpilu z Antalyasporym, beztōż Galatasaray niy dała sie ściepać z trzecigo placu.

Trza jednak ôfyn pedzieć, że to bramki z inkszej kategorii wogi niż trefiynia Neymara, Iniesty i Suareza. Na swojigo chopa w Gran Derbi przidzie nōm jeszcze trocha doczkać. Hiszpanio niy była nigdy popularnym kierunkiym emigracyjnym naszych fusbalistōw. Na stadiōnie Barcy chopcy ze Ślōnska bywali yno gościnnie. Minimalnie lepij wyglōndo naszo reprezyntacjo w Madrycie…

Nojbliżyj bōł Jurek Dudek. Torman z Knurowa bez 4 sezōny w Realu na Gran Derbi dycki wōnioł murawa z ławki. Poza tym jeszcze trzech inkszych Ślōnzokōw moge poasić sie Realym w CV i niy sōm to kasjerzy z supermarketōw. Kamil Glik, Krzysztof Król i Szymōn Matuszek szpilali jednak yno w Realu C. W kożdym razie fakt je faktym: wszyjscy grocze Realu z Polski urodziyli sie na Ślōnsku.

Chyba, że zejrzymy dalij do zadku. Polscy historycy szportu „ôdkopali” jakiś czos tymu fest ciekawo postać. Walter Rositzky jako jedyn z piyrszych w historii przekludziōł sie w 1913 r. z FC Barcelony do Realu Madryt. Ôbywatel Francji, nimiecki wojok. Kaj tak rychtyk sie urodziōł? W archiwum Barcy był Nimcym, ale już w gablocie Realu znojdymy przi nim polsko fana.

Nazod do rzeczywistości… Niy Gran Derbi, nawet niy Wielki Derby, ale sztyjc derby! Piōntek (27.11.), 20:30, Piast Gliwice – Ruch Chorzōw. Zapraszōm na ŚLŌNSKO RELACJO LIVE! Yno na internecowej zajcie DZ!