Archiwa tagu: Legia Warszawa

Niydowno trefiyło 11 listopada, dziyń w kerym przeciyntnego ôbywatela Polski (kery gynał niy citnōł na zagraniczno rajza) zaciepuje sie historiami ô polskich bohatyrach-ciyrpiyntnikach, pierōńskich zaborcach, chacharskich ôkupantach i wielkich powstańczych klynskach. Polski patetyczne fandzolyni sztyjc na topie. Ślōnzok słōcho tego przeważnie z dystansu i do telkich patriotycznych utropiyń mu daleko. Ale coby niy było, że my to jakoś lepszo zorta człowieka, trza ofyn pedzieć, że i Ślōnzok rod se nikedy pomarudzi. A dyć ni ma lepszego tymatu do marudzynio i utropiyń jak historie jak to nos Warszawa wyciu… „wychacharzyła”.

Tōż i jo sie dociepna… Chca dzisio spōmnieć, że Górnik Zobrze już roz stanōł z Legiōm do haji ô 15. Majstra Polski i bez praje pōł godziny gry mioł go już na talyrzu! W ôśmiu jednak biyda wygrywać szpile… 15 czyrwca 1994 r. Górnik w kōńcu yno zrymisowoł z Legiōm 1:1 co dało majstra Warszawiokōm. Syndzia wyciepnōł tego dnia ze szpilplacu aż trzech Grubiorzy i skōńczōł szpil przed czasym. We złotych latach korupcji w polskim fusbalu ni mōgło w telkij sytuacji braknōnć kōmyntorzy, że szpil bōł sprzedany. To, że syndzia Redziński po tym szpilu skōńczōł kariera i wyjechoł za granica yno rozhajcowało famy. Klachało sie ô szwajcarskim kōncie arbitra i wybudowanej [za wycyganiōne na tym szpilu piniōndze] chałpie. Ci co szpil pamiyntajōm do dzisio godajōm ô ôszustwie abo (ôcyna bardzij popularno w Wa-wie) ô ôstrej grze Grubiorzy. Po moimu syndzia mōg być tyż tak rychtyg yno darymny+wylynkany, co potwierdzołby jego ôstatni gwizdek po tym jak kibice Legii wylecieli na murawa.

Wracōmy do 2017. Sam tyż idzie se pobuczeć. Górnik latoś z syndziami tyż miywo pod kympka. Niedzielny szpil z Legiōm synki z Zobrzo przegrali 1:0, chocioż 1:0 już wygrywali… Tym razym to skuli systymu VAR. XXI w. – ni ma co lamyntować. Trza dziwać sie do przodku. Latoś po dwōch szpilach Górnik vs Legia 1:1, a w perspektywie sztyjc rewanż na wiosna.

To by było na tela dzisio. Ślōnski fusbal wraco za tydziyń, a szpil miesiōnca na bezrok… Tōż do zaś…

Zdo sie że nojważniejszy w tym sezōnie bydzie wiosynny szpil tych drużyn. Eźli to niy ōn zdecyduje o tytule majstra 2015/16?

Statystyki tyż praje durś na rymis. Po 11 szlagōw, z kierych po 5 leciało w bramka. Przi balu troszka dłużyj Piast. Legia za to jakiś 2 razy czynścij faulowała.

Punkty podzielōne. Piast sztyjc 5 oczek przed Legiōm.

90 + 3 min. – Fol walki w środku. Nic już samek sie niy zmiyni. Kōniec.

90 + 1 min. – Nikolić blokowany lōnduje na zolu. Ni ma elwra. Napastnik Legii fest nerwowy…

90 min. – Z roga piast. Udało sie szczelić kepkōm, ale bōł to szlag za słaby.

89 min. – Nerwowo kōńcōwka. Żodyn tera niy chce przegrać

88 min. – Za Maka włazi Mokwa.

87 min. – Ale miszōng po cyntrze Legii. Młyn na piōntym metrze. Pierōn wiy kaj je bal. Jedyn z groczy Piasta znod sie na zolu. Musioł być podeptany. W kōńcu wyjazd!

86 min. – Zachoczōny ze zadku Broź. Bal do legii. Daleko od bramki.

84 min. – Z ausu Piast. Ostro walka w środku boiska

82 min. – Atak Piasta. Na elwer liczōł Mraz, ale było czysto.

81 min. – Wolny do Piasta, ale szlag gynał w mur.

Przody zmarnowano laga. Zablokowany szlag z 5 metrōw. Za chwila do bala dochodzi Mraz cyntruje a kepkōm z bliska kōńczy Badia. Czorny kōń zaś pokozoł klasa.

79 min. – Brama! Badia!

77 min. – Legio mo coroz wiyncyj placu w kōntrach

76 min. – Dobrze tera pogroł Piast. Niy zdōnżyli klupnōnć na brama.

75 min. – Szlag nikolicia po zolu. Torman chyto.

74 min. – Tera dwie lagi Piasta. Przody prostopadły bal do badia. tyn prrzepuszczo bal kiery leci prosto dobramy. W ostatnim mōmyncie wybijo obrōna. Po poru sekundach groźny szlag Vacek. Coś ruszyło…

73 min. – Niy widać na razie coby miało sie coś zmiynić z przodku

71 min. – Zmiana w Piaście. Badia za moskwika. czy zaś rozfechtuje gra w ofynsywie. Dyć z Ruchym po poru sekundach sieknōł brama…

69 min. – na spolōnym Nikolić

68 min. – Musi tera prziciś Piast…

67 min. – Faul taktyczny kucharczyka. Żōłto kartka bez godki.

65 min. – Szansa legii. rozluźniyła sie tera obrōna Piasta. Wiyncyj placu mieli tera gospodorze. Dograni pod brama i wybijo obrōńca. Wiela niy brakło a byłaby samobója.

64 min. – Terozki „reanimujōm” Lewczuka. Musi slyź z boiska.

Miszōng pod bramōm Piasta. Rykoszet. Słupek. Wybici i bal sie wraco! Było w tym trocha cufalu, ale Legia wygrywo. Tera widać że bōł to samobój Heberta.

62 min. – Brama! Nikolić

61 min. – Na zolu leżoł Szeliga. Pofukany zamrażaczym musioł wartko sie spamiyntać.

60 min. – Zmiana u gospodorzy Prijović za Trickovskigo.

58 min. – Rymis w kartkach. Do heftu syndzigo trefiōł Vacek. Niybezpieczny atak na szłapy rywala.

57 min. – Faul i żvłto kartka do Dudy za fluchcyni po akcji.

55 min. – Lekki bajzel na boisku. Żodyn niy poradzi wciepnōnć swoigo stylu gry.

54 min. – Zaś wolny Piasta. Zaś bez szału. Kepkōm zgarnōł to obrōńca.

53 min. – Niypewnie tera murawski w obrōnie. Strata. Szlag Guilherme wele bramki.

52 min. – Za płaski zagrani z wolnego. Zawalili to goście

51 min. – Brutalnie Vranjes. Poszarpoł sie jeszcze po akcji z Makiym

49 min. – Na spolōnym Nikolić

48 min. – Szlag Vranjesa z 40 metrōw, nawet w światło, ale to sztyjc yno na poprawiyni statystyk. Bramkorz spokojnie chyto.

47 min. – Legia pomału wykludzo pozycyjny atak

46 min. – Zaczyła Legia

Hneda nazod na murawa. Mono tera szpil nabiere szwōngu, a przede wszyjskim bydymy widzieć jaki szlagi…

Były momynty, kej obie ekipy poradziyły popilować z atakami. pora ciekawych wymian podań i cyntrōw ze strōny Piasta, ale to wszysjko. Żodno z ekip ni miała ta rychtyk porzōndnego szlag, o kierym szło by pedzieć coś wiyncyj.

45+1 min. – Kōniec. Idymy dychnōnć synki.

44 min. – Wszyjscy już po lekku czekajōm chyba na przerwa.

43 min. – Piast pogrywo na krōtkich odlygłościach. ni ma samek placu coby sie przeciś.

42 min. – Dobrze prziblokowany grocz Legii na prawym skrzidle.

40 min. – Dobro cyntra Maka. Zaś brakło cyntymetrōw, coby kieryś to wykōńczōł.

39 min. – Terozki mōg napochać Murawski. Groźna strata. na szczynści nic z tego niy było.

38 min. – Faul. Ze swoji połowy zaczyno legia.

36 min. – W szlagach 5:5, ale Legia czynścij trefio w światło (3:1)

35 min. – Szpetny faul w środku. leży na zolu Szeliga. Panie syndzia dyć to miała być kartka!

34 min. – Zmiana w Piaście. Słazi terozki definitywnie Nespor. Napochoł a napochoł. niy doś że skwawiōny to chrōmie. Na boisku Barisić.

32 min. – Zaś Piast.Próba szlagu, ale napastnik majtnōł sie z balym.

31 min. – Szeliga przejmuje bal przed szesnostkōm. Chcioł przynś obrōńcy, ale znod sie na zolu. Ni ma szans na elwer.

30 min. – Zaś dobry atak prawōm strōnōm przekludziōł Piast. Za ciasno było pod bramōm.

29 min. – Terozki po stracie rozfechtowany broź wlecioł w szesnostka Piasta. torman wybijo jego cyntroszlag.

28 min. – Goście już w kōmplecie

27 min. – Śloz z boiska skwawiōny Nespor. Krew kidze mu z łuku brwiowego.

26 min. – Zaś groźnie po cyntrze, a hneda szlag Nespora fest wysoko w trybuny.

25 min. – Wysoki pressing Piasta przinosi efekty. Zaś odbiōr i nastympno dobro akcjo. Bydzie rōg.

23 min. – Akcjo Piasta Miōd-malina. Ciynżko nawet pedzieć wiela podań wymiynili na prawym skrzidle. Wszyjsko kōńczy sie cyntrōm i szlagiym z kepki z bliskij odlygłości. Kuciak niyprzidrzymoł i bal w jego rynkach.

22 min. – Na razie minimalnie dłōżyj przi balu Piast (54-46%)

21 min. – Szlagu Murawskigo z przizwoitości niy skōmyntuja…

20 min. – Vranjes mioł fol placu w środku. Jego zagrani w uliczka na szczynści przeciynte przez defynsywa Piasta.

18 min. – Cyntra Maka na 5 meter. Żodyn niy wraziōł tamek szłapy.

17 min. – Szczasnōł sie Szeliga z Broziym. Grocz Piasta swijo sie na ausie.

16 min. – Potraciyła sie Legia w ataku. Niypochytali sie w swoich pōmysłach.

15 min. – Zablokowany szlag Nikolicia. Bramkorz chyto po rykoszecie.

14 min. – Prosto w tormana. Tyn piōnstkuje. dobitka zza szesnostka „Pōnbōczkowi w okno”

13 min. – Faul terozki bydzie groźnie pod bramōm Piasta.25 metrōw do bramy.

12 min. – Vacek z roga. Bal doszoł do niywachowanego Mraza, kiery cofoł sie na 11 meter, ale tyn bala niy opanowoł.

10 min.- Odpedzieć chciała Legia, ale tyż niyzafungowało ostatni podani. Dobrze ustawiōny obrōńca.

9 min. – Terozki akcjo Piasta. Dobrze rościepali bal, ale ostatnio cyntra leciała za długo i za pomału.

8 min. – Legia z roga, ale bal wartko wyōnaczōny na środek placu gry.

7 min. – Teroski mieli wiyncyj placu. Brzyski mocno wycofoł bal na piōnty meter, ale ni mio tamek kto to zawrzić.

6 min. – Legia niy poradzi sie przeciś bez zagynszczōno obrōna Piasta.

4 min. – Blokuje mur a tak rychtyk grocz Piasta kiery sie tamek wcis. Biere to na swōj pukel.

3 min. – Faul. 30 metrōw do bramy. Piast mo szansa na piyrszy szlag…

2 min. – Zasztopowany atak Piasta prawōm strōnōm.

1 min. – Bal sie kulo

Piast sztyjc kludzi w tabeli z wyraźnōm przewogōm, kiero jednak ostatnio trocha stopniała. 5 punktōw dzieli tera obie ekipy. Dzisio synki ze Ślōnska zaś majōm szansa odskoczyć…

Do szpilu jakiś 10 minut. Zdałoby sie beztōż podziwać sie na składy:

Legia: Dusan Kuciak – Łukasz Broź, Igor Lewczuk, Tomasz Jodłowiec, Tomasz Brzyski – Stojan Vranjes, Guilherme – Michał Kucharczyk, Ondrej Duda, Ivan Trickovski – Nemanja Nikolić.

Piast: Jakub Szmatuła – Patrik Mraz, Uros Korun, Hebert Silva Santos – Paweł Moskwik, Radosław Murawski, Kamil Vacek, Bartosz Szeliga, Marcin Pietrowski – Mateusz Mak – Martin Nespor.

Zaproszōm na grudniowy Szpil Miesiōnca. Legia vs Piast tōż wicelider vs lider. Bal zacznie kulać sie o godzinie szōstej. Do szpilu zostało już yno 20 minut. Dejcie pozōr!

Przaja tymu! Eźli już hneda kōmputerowe myszki niy bydōm goreć ôd prziciskanio tego knefla po nastympnych przegranych Legii? Robota nad ślōnskōm wersjōm popularnej zajty internecowej nabiyro szwōngu. Na razie Legia przegrywo, a jo już tera „przaja tymu” i bez prziciskanio słynnego niebieskigo knefla.

Mało kiedy trefi mi sie pedzieć coś takigo ô polskij ekstraklasie, ale tym razym ofyn prziznōm: doprowdy robi sie ciekawie. A dō mie jeszcze ciekawsze je to co kulo sie po moimu. Legia poległa z Poznaniokami i zrobiyła wielki krok do zadku na drōdze po majstra. W tabeli kludzi teroski Lech. Yno kaj sam w tym wszyjskim nasi i z czego tak rychtyk cołki Ślōnsk dzisio je rod?

Sprawa zdałoby sie prosto. Złoto zasada. Wygrać moge kożdy bele niy Warszawioki. To na dyć fest ważny kōnsek tożsamości ślōnskigo kibica fusbalu. Antagōnizm Ślōnsk-Warszawa niy wżōn sie z luftu. Jego szczyty trefiyły chyba na ôstatni dekady PRL-u, kej kwitnōł procedyr powoływanio Ślōnzokōw do służby wojskowo-fusbalowej w Warszawie. W latach 90-tych haja rozhajcowoł jeszcze finał rozgrywek 1993/94, w kerym Legii po fest kōntrowersyjnym szpilu udało sie zrymisować z zdekōmpletowanym przez arbitra Górnikiym 1:1, co dało wojskowym majstra.

Potym sytuacji kōnfliktowych było mynij, skiż tego że ślōnski ekipy mało kiedy biyły sie już z Legiōm ô nojwyższe place w tabeli. Ôstatni tytuł majstra na Ślōnsk pojechoł w 1989 roku (Ruch). Ôd tego czasu fest sie pomiyniyło. Hneda Układ Warszawski sie rozōnaczōł (1991), radziecki wojska wykludziyły sie do sia (1993) , polsko armio tyż „schudła”, ale wojskowo Legia na wolnym rynku se poradziyła i ôd tego czasu wygrała liga już 6 razy. Gorzij zmiany gospodarcze odbiyły sie na ślōnskich grubach i hutach, a co za tym idzie kōndycji naszych klubōw. Zero majstrōw…

Jakby sie niy dziwać sztyjc kludzymy. Górnik i Ruch majōm po 14 tytułōw. Legia yno 10. I niych tak na razie bydzie. Cyk i pyrsk! Przaja tymu!

Jes 15 grudnia 2014. Zasłużōny torman z Knurowa, Jerzy D. fyrlo w koszyku. To ōn zaroski wybiere rywala do znanego i lubianego klubu z Warszawy w 1/16 LE. Chwila prowdy. Karteczka rozōnaczōno i… Ajax! Legia bydzie musiała zatrzimać nojlepszego ȏstatnio ślōnskigo snajpera Arkadiusza M. Cufal? Czy aby na pewno?

Zdo sie, że to Holyndry mogōm być bardzij radzi z losowanio. Mōgli na dyć trefić dużo gorzij. Czy Jurek z Arkiym niy cylnyli sie pryndzyj kaj na jakijś kawie? Ni ma to aby jaki nastympny chacharski spisek przeciwko Legii? Zdołby sie jaki „Macierewicz i partnerzy” coby wyjaśnić te ślōnski kōnszachty. Jo sprawa zostawiōm ȏtwarto…

Ȏd losowanio por Ligi Europy minyło już trocha czasu, ale emocje tak rychtyk dopiyro bydōm sie rozkryncać. Żodno ze strōn niy śpi. Doszło już do piyrszych wywiadōw i mini-haji w internecie. Prezes Legii przeszoł do kōntrofynsywy na Twitterze! Po wpisie Milika, kiery liczy na dwie wizyty w Warszawie (z Legiōm i w finale), szef wojskowych zapropōnowoł coby nasz grocz sie darymnie niy marasiōł i załatwiōł obie te wizyty za jednym szlagiym. Pojechoł prezes po bandzie! 1:0 do Legii!

Ale pozōr! Mōmy 1:1! Punkt do Ajaksu, bo trybuny na szczynści dō nich i ich stadiōnu bydōm tym razym strefōm zdemilitaryzowanōm tak w Warszawie jak i w Amsterdamie. Na trybunach niy trefiymy żodnego legiōnisty, ani nawet ,,zielōnych ludzikōw”. Stewardzi styknōm, a stadiōny bydōm durś bioło-czerwōne.

Tōż Boniek moge dychnōnć. Tym razym gańba go minie. Prezes PZPN-u niy bydzie zaś świyciōł ȏczami przed Monsieur’ym Platinim. Yno borok Milik bydzie musioł jakoś obynś sie bez „dopingu” jego wiernych fanōw z Warszawy, kierzi ȏstatnio pojechali ekstra do Holandii, coby wspiyrać go na szpilu Eredivisie popularnymi w ich repertuarze kōmplymyntami na literka „k”. Miyjmy nadziejo, że i bez tego nasz snajper pora bramōw klupnie…

„Bioło-czerwōne to barwy niyzwyciynżōne…”! A Wy za kim’eście sōm?

Zaproszōm na nastympne ślōnski relacje na żywo. Bele yno z lepszym zakōńczyniym…

Niystety. Statystyki z drugij czynści szpilu ofyn godajōm kto samek mioł wiyncyj do godki. Szkoda jednak tych bramek. Górnik bōł blisko, chocioż tego jednego punktu, ale z drugij strōny mōg stracić nawet pora bramek wiyncyj.

Po ptokach. Darymnie to wyglōndało w drugij połowie. Górnik przegrywo piyrszy szpil w sezōnie.

90+3 min. – Jeszcze kartka do Kosznika. Musi poleżeć chwila na zolu Legionista.

90+1 min. – Szpetny faul Vrdoljaka i kartka.

90 min. – 3 minuty doliczōnego czasu…

90 min. – Legia utrzimuje bal daleko od swojij bramki.

88 min. – Wartko mōg odpedzieć Górnik. Atakowany Nakoulma kopnōł wysoko do luftu z wysokości 11 metra!

Vrdoljak trefio w lata a bal spaduje gynał pod nogi Jodłowca. Jes brama.

86 min. – Brama do Legii! Pierōnowy cufal i 2:1!

85 min. – Rōg do Legii

84 min. – Cyntymetry brakły coby Radović przelobowoł Steinborsa!

83 min. – Fol walki w środku pola. Obie ekipy chcōm trzech punktōw.

81 min. – W kōncu gra sie trocha wyrownała, ale sztyjc trza dować pozōr ze zadku.

80 min. – Tera szlag Olkowskigo. Kieby bal odbiōł sie od zola kōnsek bliżyj Skaba miołby biyda to chycić.

79 min. – Kōntra Górnika, ale Legia juz zdōnżyła wrōcić.

77 min. – Z kożdego placu na boisku klupiōm tera na bramka Górnika gospodorze.

76 min. – Ojamaa wloz jak w masło fōrt pod piōnty meter od bramki, ale obrōna zaś lepszo.

75 min. – Brzyski tak fōmlowoł, że sōm sie w tym patraciōł. Bal na ausie.

74 min. – Urban wkldzo na boisko Helio Pinto. Na ławce już zicnōł se Furman.

73 min. – Szlag Brzyskigo i dobitka Radovicia. Zaś sie zamloło.

72 min. – I zaś zmiana w Górniku. Iwan za Sobolewskigo.

71 min. – Obalōny Małkowski. Goście wkludzajōm bal do gry ze swojij połowy.

69 min. – Radović wkrynco w zol obrōńcōw Górnika w ich szesnostce, ale bydzie z tego yno rōg.

68 min. – Gancarczyk włazi za Augustyna. Fyrlo tera coroz bardzij w składzie Nawałka. Staro sie obudzić swojo drużyna jak yno sie do.

67 min. – Chocioz tera dobrze fechtnōł sie Kosznik. Jes dograni do srodka, ale ni mo kto tego zawrzeć.

66 min. – Straciōł tera Górnik pōmysł na gra z przōdku…

65 min. – Długo akcja Legii zakōńczōno mocnym szlagiym Radovicia. Wele słupka.

63 min. – Górnik w kōńcu wyłazi ze swojij połowy.

62 min. – Madej może już ciś sie kōmpać. Za niego włazi Małkowski.

61 min. – Brzyski klupnōł w mur.

61 min -. Nakoulma fauluje pora cyntymetrōw przed liniōm szesnostego metra.

60 min – Praje do swojij bramki bal wraziōł jedyn z obrōńcōw Górnika!

58 min. – Sztyjc bajzel w obrōnie gości. Vrdoljak mioł już praje pusto brama. Do szlagu na szczynści niy doszło. W wielkim miszōngu kierys to  jednak wybiōł.

57 min. – Niypewnie gro tera defynsywa Górnika.

55 min. – Strata Górnika. Za spokojnie klepali se w obrōnie. Na szczynści nic groźnego sie z tego niy złōnaczyło.

53 min. – Cyntralnie w gymba  balym dostoł Vrdoljak. Leży…

52 min. – W dwóch ciepli sie na Rzeźniczaka Grubiorze. Tyn jednak poradziōł utrzimac sie przi balu i zrobic ,,wyjazd”

50 min. – Ojamaa zawalōł dobro akcjo Legii. Steinbors chycioł pewnie jego dograni do środka.

48 min. – Krōtko rozegrany rōg w porze Mączyński-Prezes. Z cyntry nic jednak ni ma.

47 min. – Wysoko atakuje obrōńcy Legii Nakoulma. Trocha musioł go wylynkać. Rozfechtowany Prezes to pierōnowe zagrożyni do przeciwnika.

46 min. – Nazot na murawie. Jadymy z tym światym…

Kōnsek chwili na analiza powtórek… Widzymy jeszcze roz jak Ojamaa odbijo sie jak ping-pōng od obrōńcy Górnika i lygo w szesnostce jak paniczka. Jo by samek elwra na pewno niy gwizdnōł…

Kōniec piyrszej połowy. Szpil rychtyk może sie podobać. Szkoda yno tego elwra…

45 +2  – Elegancko bal na klata przijmuje… Nawałka. Tryner pokozoł, że zno sie na swojij robocie niy yno w teorii.

45 +1 – Sobolewski zagrywo w uliczka. Kieby bal trefiōł do Zachary byłoby rychtyk ciekawie.

45 min. – Syndzia dociepuje jeszcze 2 minuty w gratisie.

43 min. – Na razie 11 fauli Górnika przi trzech Legii. Synki z Zabrzo niy oszczyndzajōm rywala.

40 min. – Furman straciōł bal w środku pola jak bajtel, kiery piyrszo roz gro we fusbal. Skuli tego Mączyński znod sie w dobrej sytuacji i bōł blisko klupniyncio gola, ale bal pofurgnōł nad latōm.

40 min. – Blisko do sia podłazōm tera fusbalyry obu ekip

39 min. – Po rogu Legii od bramki zaczyno Steinbors.

38 min. – Nakoulma dostoł kartka za wybici bala po gwizdku, ale po akcji dugoł go tyż Brzyski. Tymu chopowi karteczka tyż by sie noleżała.

36 min. – Z placu gry śloz kōntuzjowany Kosecki. Na wartko szczewiki musioł obuwać Żyro.

35 min. – Wartko odmiynio sie sam sytuacjo. Faul, po kierym arbiter pokozoł na wopno bōł przinajmij wōntpliwy…

34 min. – Vrdoljak pewnie trefio na 1:1

33 min. – Elwer do Legii i kartka do Przybylskigo!

31 min. – Mōndrze zachowoł sie Sobol. Spokojnie zareagowoł na pretynsje Radovicia, czym jeszcze bardzij go poszterowoł. Radovic tyż dostowo kartka.

31 min. – Sobolewski zatrzimoł kōntra Radovicia. Żōłto kartka bez godki…

30 min. – Górnik z wolnego. Legia miała biyda tera wylyź spod swojij bramki. Dobrze wysoko wyłazi na presa Górnik.

28 min. – W stylu Prezesa w szesnostka próbowoł wlyź Ojamaa. To jednak ni ma to…

Elegancko zafyrloł balym Nakoulma. Żodyn niy poradziōł zatrzimać rozfechtowanego Prezesa. Bal w kōńcu trefiōł do Madeja, kiery technicznym szlagiym z wele 12 metra wycylowoł w sōm winkel.

24 min. – Madej wrażo bal do siatki 0:1!

23 min. – Olkowski obalōny pod szesnostkōm gospodorzy. Tym razym ni ma faulu.

22 min. – Zaś faule. Na zolu przody Vrdoljak, niyskorzij Radović.

20 min. – Szlag Ojaamy leci wele słupka. Legia zaczyno mieć coroz wiyncyj do godki.

19 min. – Tera dobrze fechtnōł sie na lewej Kosecki. Na szczynści ta akcjo Legii kōnczy sie darymnōm cyntrōm Brzyskigo. Torman zaczyno z piōntego metra.

17 min. – Kosecki wyciynty rowno z zolym. Ostro jak pierōn, ale sztyjc bez kartek.

16 min. – Przybylski lygo na zol po tym jak przi próbie wybicio bala szkopyrtkōm, przitrzimywoł go Legiōnista. Faul.

15 min. – Dobry prostopadły bal do Zachary, ale syndzia przerywo gra. Bezmała kaś był faul…

13 min. – Radović oddowo szlag. Bal w trybunach.

12 min. – Zdo sie, że na razie bardzij szarpiōm ,,Grubiorze”

11 min. – Po cyntrze Brzyskigo z wolnego i małym miszōngu w szesnostce Górnika na spolōnym znod sie Jodłowiec.

9 min. – Kosznik chyto przeciwnik i jes faul. Na razie syndzia niy szuko kartek po kapsie…

7 min. – W odpowiedzi kōntra Nakoulmy zakōnczōno szlagiym ,,Pōnbōczkowi w łokno”

6 min. – Furman zagrywo długi bal z wolnego. Bal furgnie z głymboko. Torman pewnie chyto.

5 min. – Skaba przecino cyntra Kokoszki. Było groźnie. Tamek za nim juz yno czekoł na bala Zachara.

3 min. – Tera Olkowski elegancko wywalczōł se niezły kōnsek wolnego placu w szesnostce Legii, ale jego dograni do środka niczego niy prziniōsło.

2 min. – Górnik próbuje przecis sie pod bramka gospodorzy prawōm strōnōm.

1 min. – Przybylski podowo do Nakoulmy i zaczyno sie 111. szpil Górnika z Legiōm. Historio zobowiōnzuje. Trza sam dzisio pokozać klasa…

Tak jak już spōminołech w zapowiedzi. Szpile Górnika z Legiōm nigdy niy sōm o ,,czopka  śliwek”. Dzisio dodatkowo grōmy o plac lidera…

17:58 Fusbaliści obu ekip gynał wyłażōm na murawa stadiōnu w Warszawie

Składy:

Legia: Wojciech Skaba, Łukasz Broź, Jakub Rzeźniczak, Tomasz Jodłowiec, Tomasz Brzyski, Henrik Ojamaa, Ivica Vrdoljak, Dominik Furman, Miroslav Radović, Jakub Kosecki, Marek Saganowski

Górnik: Pāvels Šteinbors, Paweł Olkowski, Błażej Augustyn, Oleksandr Szeweluchin, Rafał Kosznik, Prejuce Nakoulma, Radosław Sobolewski, Krzysztof Mączyński, Mariusz Przybylski, Łukasz Madej, Mateusz Zachara

Syndzia: Daniel Stefański (Bydgoszcz)

Legia vs Górnik! Zaproszōm fest na relacjo na żywo z szpilu, kiery bez godki jes szlagrym tej kolejki. Dejcie pozōr zaczynōmy już pora minut przed godzinōm 6…