Archiwa tagu: Liga Mistrzów

Sztyrech na sztyrech. Ślōnzoki w kōmplecie awansowali do 1/8 finału Ligi Europy. Cuzamyn do kupy we wszyjskich nij wcześniejszych sześciu edycjach w telkij fazie ni mieli my tela reprezyntantōw co yno latoś. Bohatyrym ôstatnij serii szpilōw jes Arek Milik. Yno te puste zielōne stołki jakoś niy chciały klackać po jego trzecij bramie klupniyntej Legii…

Trza pedzieć, że doping w Warszawie bōł tym razym idyalny. Bez haji, kulturalnie. Yno fala meksykańsko za pierōna niy chciała zaskoczyć… Gorzij na boisku. Frank De Boer bōł forgot zaskoczōny, że gospodorze bierōm se szpil tak po lekku. Milik z kamratami już w piyrszej połowie rozłōnaczyli Legia tak, że drugo była już yno tryningowōm gierkōm w dziada. W nastympnej rundzie Ajax moge mieć już ciynżyj. Rywalym Dnipro Dniepropietrowsk.

Awans świyntuje tyż Kamil Glik i jego Torino. Piykno rywalizacjo z Baskami skōńczyła sie historycznym sukcesym. Drużyna, kiero do Ligi Europy wlazła trocha bez cufal, bo skuli problymōw licyncyjnych Parmy, moge tamek jeszcze nafyrlać. W niedziela udowodniyli to ligowōm wygranōm 1:0 z inkszym aktualnym uczestnikiym LE, Napoli. W hefcie syndzigo przi placu na zdobywcōw goli jedyne nazwisko tego dnia to Glik… Niych yno Kamil trzimie forma na Zenit Sankt Petersburg!

W 1/8 aż piynć ekip z Serie A, tōż kiereś musiały sie cylnōnć. Włoski derby zagrajōm Fiorentina i Roma Łukasza Skorupskigo. Nasz torman pokozoł klasa w obu szpilach z Feyeenordym, beztōż chytać bydzie dalij. Na szansa w Pucharach sztyjc czeko za to Łukasz Podolski. Jego Inter niy bez problymōw wyciepoł z rozgrywek Celtic, a teroski zagro w szlagrze z Wolfsburgiym.

Mono cylnōm sie jacy dwaj nasi chopcy w warszawskim finale? Zdałoby sie, bo w Lidze Majstrōw to już niymożliwe. Naszego ôstatnigo reprezyntanta tamek czeko niestety tera jakiś 6 tydni rewiyru. Łukasz Piszczek zagro nojpryndzyj w szwierćfinale. Przody jednak Borussia musiałaby wyeliminować Juve.

Amsterdam Arena, 19 luty, 35. minuta szpilu, dwadziesty meter. Arkadiusz Milik ustawiōny zadkiym do bramki przeciwnika przijmuje bal… Kōmu w tym mōmyncie wyłōnczyli sztrōm, tyn forgot mo czego żałować… Ale spokojnie. Emocje dopiero bydōm w tym tydniu. Haja ȏ pilot miydzy fanami fusbalu i „M jak miłość” gwarantowano!

Przed czwortkiym w polskich mediach sztyjc godało sie ȏ słabszej formie Ajaksu i Milika. Grocz z Tychōw jednak zaś skludziōł kibicōw Legii na ziymia. Arek spamiyntoł sie w idyalnym mōmyncie. Piyrszo brama latoś i piyrszo w karierze klupniynto Legii. Musi smakować, pra?

1:0. Ajaks zrobiōł piyrszy mały krok do awansu. Samek, jednak trza pedzieć ofyn, że trocha pōmōgło tyż im szczynści, a raczyj darymne, durś rozłōnaczōne cylowniki snajperōw Wojskowych. Ȏkozało sie jednak, że wojsko, kiere szczylo „kole a wele” tyż poradzi być groźne. Frank de Boer ȏ tym wiy, beztōż musi tera wykōmbinować jak pōmōc Legiōnistom utrzimać ich skutyczność, tak co po szpilu w Warszawie bydymy mieli piyrszego Ślōnzoka w 1/8 Ligi Europy.

Kiery jeszcze tamek zōndzie? W Lidze Europy sztyjc jes jeszcze trzech „ślōnskich Italokōw” z Mediolanu, Turynu i Rzymu. Sprawa awansu wszyndzij ȏtwarto, bo wszyjscy swoji piyrsze szpile porymisowali. Nojlepij mo Inter Łukasza Podolskigo, kiery wywiōz z Glasgow cynny wynik 3:3. Łukasz niystety w tym szpilu niy zagroł. W Turynie groł za to, i to jak zawsze piyrsze skrzipki, fusbalista z Jastrzymbio. Po rymisie 2:2, „Kapitan Glik” w Bilbao bydzie już musioł pokludzić swoich kōmpli do wygranej. W podobnej sytuacji jes AS Roma. W Rotterdamie trza bydzie atakować. Łukasz Skorupski chytoł ȏstatnio cołki szpil, a przi straconej bramce ni mioł nic do godki. Ȏbadōmy co pokoże w czwortek.

A po drodze Liga Majstrōw… Tamek już ni mōmy tak bogato. Łukasz Piszczek to jedyny ślōnski reprezyntant. We wtorek zagro w Turynie z Juve.

Paczcie tam jako chopy!

 

To mioł być forgot jedyn z nojwiynkszych szlagrōw drugij kolejki Ligi Majstrōw. Jakby sie jednak niy dziwać to „tiki-taki” samek za pierōna niy szło zejrzeć. Na boisku dōminowoł bajzel, faule i kartki. Jednak i telki ciynżki szpile trza umieć wygrywać. Po bramie Ardy Turana 3 punkty zostowajōm w Madrycie.

Ewidyntnie wiyncyj przi balu w piyrszej połowie byli goście. Nic jednak niy poradziyli ś nim wyczarować. Wiyncyj powiy nōm beztōż inkszo statystyka – szlagi na brama. Juve ani w tym ani w drugim kōnsku szpilu niy poradziyło nasztelować cylownikōw miyndzy słupki bramy gospodorzy. Atletico w piyrszej połowie roz sprawdziyło Buffona, ale stary torman niy doł sie lekko zaskoczyć i sztyjc poprawioł rekord minut z czystym kōntym.

Bajzel, bajzel i to z czasym coroz bardzij krwawy… Nojlepsze okazje na poczōntku drugij połowy? Przody torman Atletico w rogu szesnostki walczy sōm na sōm z… balym kiery matlo mu sie pod szłapami. Niyskorzij po ostrym zagraniu w szesnostka Juve, jedyn z obrōncōw praje wrażo se bal rynkōm do swojij bramki. Na szczynści Buffon je sztyjc mōnter. Zawōniało samek elwrym, ale syndzia kozoł grać dalij.

Kieby niy tympo gry to szpil nikiedy mōgby wyglōndać jak polsko Ekstraklasa. Fusbaliści tyrali jednak wartko. Atletico nastawiyło sie nawet na wysoki pressing. Na piykne akcje sie to jednak niy przekłodało. Za to zaczły suć sie żōłte kartki za faule. W hefcie arbitra znodło sie w kōńcu dwóch groczy Atletico i aż sześciu z Juve.

Wszyjsko zapowiadało wynik bezbramkowy aż do 75. minuty. Akcja szpilu przekludzajōm wtedy gospodorze. Piyknej cyntry Juanfrana z bliskij odlygłości niy marnuje Arda Turan. Buffon ni mo samek nic do godki i traci swojo piyrszo brama w tym sezōnie.

Atletico poprawio swojo sytuacjo w grupie po darymnym sztarcie. Niy zdo sie jednak na razie coby mieli dostać telkigo szwōngu jak łōnskigo roku ,kej zatrzimali sie dopiyro w finale. Układ tabeli grupy A trocha nōm sie wyfyrloł. Teroski wszyjscy majōm po 3 punkty, beztōż bydzie coroz ciekawij…

Atletico Madryt – Juventus Turyn 1:0 (0:0)

Brama: Arda Turan (75 min.)

Żōłte kartki: Garcia, Ansaldi – Bonucci, Chiellini, Lichtsteiner, Morata, Pogba, Giovinco

Atletico: Miguel Angel Moya – Juanfran, Miranda, Diego Godin, Cristian Ansaldi – Tiago, Koke – Raul Garcia, Arda Turan (89. Guilherme Siqueira), Saul Niguez (53. Antoine Griezmann) – Mario Mandżukić (84. Mario Suarez)

Juventus: Gianluigi Buffon – Giorgio Chiellini, Martin Caceres (78. Roberto Pereyra), Leonardo Bonucci – Paul Pogba, Claudio Marchisio, Arturo Vidal (83. Alvaro Morata), Stephan Lichtsteiner (89. Sebastian Giovinco), Patrice Evra – Carlos Tevez, Fernando Llorente