Archiwa tagu: Łukasz Podolski

Ta daaam! Górnik Zobrze wygranōm 3:1 z Lechym Poznań przisztymplowoł Majstra Jesiyni, kerego raczyj trza by mianować Majstrym Pōłmetka, kieby niy to że to wcale niy pōłmetek. Tōż coby pedzieć ofyn znaczy to sztyjc niy wiela, ale uciechy żodyn tym synkōm niy weźnie…

Piyrszy plac, rekordowy krōl szczelcōw (Angulo – 16 bramōw), dwōch kadrowiczōw u Nawałki (Kądzior, Kurzawa) i sześciu w młodzieżowych reprezyntacjach Polski (Loska, Wieteska, Żurkowski, Ambrosiewicz, Pawłowski, Hajda), rekordowo frekwyncjo na szpilach (sztyjc 22-24 tys. kibicōw). Do tego nojwiyncyj klupniyntych bramōw (33). W skrōcie na Grubiorzy chce sie dziwać, chocioż do idyału fōrt daleko…

Ôstatni roz ślōnski klub na piyrszym placu po piyrszej rundzie bōł gynał 2 lata tymu. Piast Glywice do kōńca sezōnu proł sie wtedy ô majstra, ale piyrszego placu niy dowiōz do kōńca, chocioż miywoł już 10 punktōw przewogi nad drugōm ekipōm w tabeli. Terozki Górnik yno ô 1 punkt wyprzedzo drugo Legia. Ô 15. majstrze na razie ni ma co darymnie godać. Górnik to na razie łebōnie z grajfkōm, kerym chce sie tyrać, a to na polsko Ekstraklasa ôkozuje sie stykać coby kludzić w tabeli, kōńcowego sukcysu jednak niy gwarantuje.

A poprowiać sztyjc je co. Defynsywa niy zawsze funguje jak trza. 22. stracōne bramy w 15. szpilach to wynik choby w haji ô utrzimani. Yno dwa razy torman Grubiorzy słaziōł ze szpilplacu niypokōnany. Trza tyż pedzieć, że w piyrszym placu Górnika pōmogli nojgroźniejsi rywale. W Ekstraklasie przewidywalność wynikōw je na poziōmie C-klasy. Faworyty tracōm punkty z „boroczkami” bez co telki kluby jak Górnik mogōm blysnōnć a bukmachery zaś prziszporujōm.

Jeszcze 6 szpilōw wiosny na jesiyń i kluczowo pauza zimowo. Eli Gôrnik sie wzmocni? Pozōr, poważno kandydatura na widoku! Łukasz Podolski swoim ôstatnim kōmyntorzym na Tweeterze, w kerym pedzioł Grubiorzōm coby doczkali na niego zaś rozhajcowoł dyskusjo ô jego transferze do Zobrzo. Rod bych to chcioł widzieć. Yno… Chyciōłby sie tera do 11-stki? Co padocie?

Wysztartowały już wszyjski nojważniejsze ligi w Europie. Ślōnzokōw na Zachodzie zaś niy braknie. Jaki bydzie to dō nich sezōn? Piyrsze szpile już coś pedziały…

Ligue 1 sztartła na poczōntku siyrpnia. Aktualny majster AS Monaco wygroł do tyj pory wszyjski swoji 3 szpile, a Kamil Glik klupnōł brama „za 3 punkty” już w piyrszej kolejce z Tuluzōm (3:2). Ni ma sie co starać ô Kamila. To zaś bydzie jego sezōn.

Podobnie u Łukasza Piszczka, kery zaczōn w sobota swōj ôsmy sezōn w BVB. Groł w piyrszym składzie za Kloppa i Tuchela, niy inaczyj bydzie za trynera Bosza. Z Wolfsburgiym (3:0 do przodku) 90 min. Łukasza i to bydzie w tym sezōnie norma.

Ô majstra w Serie A i wysoki plac w LM zaś pewno bydzie sie proł Arek Milik. Pytani yno czy do tej haji stanie w piyrszej raji? W ofynsywnym trio Insigne-Mertens-Callejón, Arek zdo sie być sztyjc yno zapasowōm tajlōm, chocioż moge być rozmańcie. W elim. LM z Niceōm Milik wloz z ławy i zaliczōł spektakularno… majtaka, za to w piyrszej kolejce Serie A znod sie już w 11-stce i klupnōł brama (3:1 z Hellas Werōna). To jego piyrszy szpil w podstawie ôd 2 paździyrnika. Bydzie yno lepij!

Glik, Piszczek, Milik… To bez godki zaś bydōm trzej nojwiynksi reprezyntanci Ślōnska na Zachodzie. A kaj nastympno raja? W duńskim Broendby bydzie dalij tyroł Kamil Wilczek. W Bundeslidze mono pokopie jeszcze Paweł Olkowski (1. FC Köln) W nojważniejszych europejskich ligach teoretycznie mogōm jeszcze zadebiutować Kamil Grabara (FC Liverpool) i Przemysław Bargiel (AC Milan), ale te synki to raczyj sztyjc tymaty prziszłości.

Ale pozōr! Na Europie fusbal sie niy kończy… Po drugij strōnie globu w Japōnii sezōn fusbalowy minōł już połowa, ale ze ślōnskij perspektywy tyż dopiyro sie tak rychtyg zaczyno. Niydowno debiutowoł tamek na dyć Łukasz Podolski. W piyrszym szpilu w Vissel Kobe klupnōł dwie bramy i doł wygrano swoim nowym kamratōm (3:1 z Omiya Ardija). Z perspektywy Europy mono to i fusbalowe „Pierōnowice”, ale jakby sie niy dziwać CV Łukasza zaś urosło.

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…

Poloki wygrywajōm z Czornogōrōm 2:1. Toć, ni mōgło by do tego dōnś bez ślōnskigo udziału. Zwyciynsko brama szczylo Łukasz Piszczek, jedyn z dwóch Ślōnzokōw na szpilplacu w Podgoricy.

W piyrszej jedynostce Nawałki wyloz tym razym yno Piszczek i Glik. Etatowy snajper kadry Milik zaglōndoł na szpil z ławy, ale w snajperskich ôbowiōnzkach zastōmpiōł go do porzōndku spōmniany Piszczek. Po zawalyniu dwóch lagōw w minuta, zrehabilitowoł sie piyknym technicznym szlagiym na 2:1. Mōmy w polskij kadrze ślōnsko jakość i ilość. Reprezyntacjo Polski ôstatnio zaś wzbogaciyła sie o jednego Ślōnzoka (torman Łukasz Skorupski). 5 powołanych do kadry na Czornogōra to już rychtyk dobry wynik, kerego zaś downo niy było. Spōmniano piōntka: Piszczek, Glik, Milik, Wilczek i Skorupski to ponad 25% wszyjskich powołań Nawałki z zagranicznych klubōw. Gorzij wyglōndajōm powołania z polskij ekstraklasy. Tukej żodnego Ślōnzoka Nawałka niy docyniōł, ale werci sie dać pozōr, że 4 z 7 powołanych „ekstraklaseiros” mo w CV dłōgszo abo krōtszo gra w jednym ze ślōnskich klubōw.

Sztyjc jednak w pierōny daleko do ślōnskich rekordōw powołań. Były na dyć telki lata kej Ślōnzoki durś zdōminowali polsko reprezyntacjo fusbalowo. Na dyć starziki Czornogōrcōw, reprezyntanci Jugosławie w latach 30’ (czasy Wilimowskigo, Wodarza) i 60’ (czasy Pohla, Brychczego) szpilali z polskōm 11-stkōm złożōnōm nikedy z nawet ôśmiu Ślōnzokōw!

Niyskorzij Hanysōw w polskij kadrze bywało już mynij. A na poczōntku XXI w. łatwij było już znolyź Ślōnzoka w Mannschaftcie. Na Euro 2008, kej bramy szczyloł Polokōm duet Podolski-Klose, Bioło-Czerwoni mieli w składzie yno rezerwowego Piszczka. To już jednak historio. À propos, w czwortek 130. szpilym i 49. bramōm z reprezyntacjōm Nimiec pożegnoł sie Łukasz Podolski, ôstatnij jak do tyj pory ślōnski reprezyntant w Mannschafcie… Na telki pożegnani forgot trza se zasłużyć. Łukasz szlagiym z dystansu symnōł pajynczyna z winkla bramy. Kaj nastympcy?

Ôkna transferowe w nojważniejszych europejskich ligach zawarte. Styczyń ciekawy bōł przede wszyjskim skiż Chińczykōw, kerzi czatujōm na coroz lepszych fusbalistōw choby fesztry na żdżałe sorniki. Na muszka trefiōł im tyż jedyn z naszych. Tōż ślōnskim bohatyrym trensferōw tym razym bez godki Łukasz Podolski, nowy fusbalista Pekin Guoan.

Jeszcze pora lot do zadku chińskim „fesztrōm” zdarzało sie zapolować w Ekstraklasie. Interesy ś nimi robiōł nawet Górnik Zobrze. Przody na drugi kōniec świata wykludzioł sie Krzysztof Mączyński (2014, Guizhou Renhe) potym Mateusz Zachara (2015, Henan Jianye). Grubiorze wielkij kariery tamek niy zrobiyli i sōm już nazod w Polsce. Tera ô transferze do Chin grocze z Ekstraklasy mogōm pomarzyć. Chińczyki przesztelowali sie na wiynksze transfery. Plan zônaczynio fusbalowej potyngi ôgłoszony przez prezydynta Xi Jinpinga w 2012 r. włazi w nastympne fazy. Chiny fest inwestujōm w szkolyni modych groczy, a z Europy i Brazylii za kosmiczne piniōndze bierōm już yno rychtyk dobrych fusbalistōw (i to niy yno tych po 30-stce). Ôstatnio do Super League trefili choby Carlos Tevez (33 l., Boca Juniors-Shanghai Greenland), John Obi Mikel (30 l., Chelsea-Tianjin Teda), czy Oscar (26 l., Chelsea-Shanghai SIPG).

Łukasz Podolski to nojbardzij utytułowany ślōnski fusbalista z tych sztyjc aktywnych. W ôstatnich miesiōncach dowo jednak znać, że po lekku kōńczy kariera. Po euro 2016 pedzioł ofyn, że w reprezyntacji Nimiec już niy poszpilo. Terozki kōńczy z Galatasaray Stambuł i kludzi sie fōrt na drugi kōniec świata, kery z perspektywy Europy sztyjc zdo sie fusbalowymi „Pierōnowicami”. 31-letni Podolski niy musi już jednak myśleć ô rozwoju szportowym. W jego przipadku transfer do Pekinu to raczyj ciekawo przigoda i ôkazjo do prziszporowanio do pyndzyji. A dyć czamu niy? 9 miliōnōw za rok? Piechty niy depce… Ale panie Łukaszu, dejcie pozōr! Kibice na Ślōnsku pamiyntajōm, kōniec kariery bezmałaś mo być w Zobrzu…

Nocka jeszcze dłōgo wygrywać bydzie z dniym, ale hneda klara zacznie coroz dłużyj świycić. Przełōmowy mōmynt w cyklu rocznym. Ludzie dycki uznowali telki czos za wyjōntkowy. Tak było u nos niż prziszło chrześcijōństwo i tak je terozki, kej gynał w tych dniach fajrujymy Pōnbōczkowe Narodzyni. Kōńczy sie stare, idzie nowe – nojlepszy mōmynt na rozmańtej zorty wrōżby. Bezmałaś jak bez wilijo tak bez cołki rok…

Pozwolyłech se po kōnsku ôdkopać tymat sprzed roku i nawet zaczōnć podobnymi słowami. Wyboczcie. W lufcie zaczyno po lekku wōniać kaprami i moczkōm, tōż erbło mi sie trocha tej atmosfery czasu, kery chocioż cyklicznie sie powtarzo rok w rok i zdo sie fest przewidywalny, sztyjc fascynuje, dycki niesie kōnsek tajymniczości. Czas na podsumowania, postanowiynia, wrōżyni prziszłości.

Wypado mi sie tyż rozliczyć z ôstatnigo wrōżynio. Kōńcōwka 2015 zapowiadała nic yno sukcesy. Wszyjscy ślōnscy ekstraklasowcy powygrywali swoji szpile przed wilijōm. Górnik zaczōn ôdbijać sie od dna. Ruch trzimoł sie wiyrchu, a Piast kludziōł w tabeli i szoł na majstra. Bramy Milika i Podolskigo zapowiadały ciekawo rywalizacjo Polski z Nimcami na Euro.

Trza ofyn pedzieć, że na wiosna niy wszyjsko pokulało sie tak jak miało. Piast na samym finiszu doł sie ściepać z piyrszego placu. Górnik do ôstatnij kolejki liczōł, że niy sfurgnie – niystety. Ruch cudōw już niy pokozoł. Co do szpilu Poloków z Nimcami to tamek gynał bramōw niy było (chocioż Milik pora lagōw mioł). Ôbie reprezyntacje wylazły jednak z grupy i pokozały sie niynojgorzij. Polocy skończyli Euro na szwierć- Nimce na pōłfinale.

W drugij połowie roku tyż nōm sie niy mierzło. Podolski kōńczy z reprezyntacjōm. Milik w Napoli. Glik w Monaco. Kōntuzjo Arka. Klose idzie na pyndzyjo. Trzech Ślōnzokōw 1/8 Ligi Majstrōw. I na deser forgot klasyk – finansowo-szportowo-ôrganizacyjnych problymōw Ruchu ciōng dalszy. Chocioż… Ôstatni szpil Niebiescy wygrali. Mono powrōżymy?

Wszyjski „ślōnski” drużyny wlazły do 1/8 Ligi Majstrōw z piyrszych placōw w swoich grupach i ôd niydowna znajōm już swoich rywali w 1/8 finału. UEFA zafyrlała kulkami gynał ô 12 w połedni 12 grudnia. Nas nojbardzij interesujōm trzi wylosowane pory. Borussia vs Benfica, Monaco vs Manchester City i w kōńcu szlagier szlagrōw Napoli vs Real.

Kieby niy cudzysłōw przi tych “ślōnskich” drużynach zdani na poczōntku brzmiałoby forgot piyknie, pra? Telkich cudōw poradzymy chyba jednak sie niy doczkać, ale i tak latoś mōmy z czego być radzi. W 1/8 zagro trzech synkōw ze Ślōnska, Łukasz Piszczek, Kamil Glik a Arek Milik. Telkij reprezyntacji na tym poziōmie w Lidze Majstrōw jeszcze my ni mieli ôd poczōntku nij istniynio!

Ôd sezōnu 2003/2004, kej po roz piyrszy szpilało sie bez drugij fazy grupowej, trzech reprezyntantōw w 1/8 mielimy yno 2 razy. Ôstatnio 3 sezōny tymu. Byli to Łukasz Piszczek (Borussia), Łukasz Podolski (Arsenal) i Sebastian Boenisch (Bayer). Pewnym do szpilanio w podstawie bōł jednak yno Piszczek. Lepij wyglōndało to 5 lot pryndzyj. Sezōn 2008/09 to tyż trzech naszych w 1/8. Jurek Dudek w Realu Madryt co prowda yno grzoł ława, ale za to ślōnski Bajeroki mōgli sie już wykozać. Podolski i Klose siekli we dwōch szpilach ze Sportingiym po dwie bramy i ekipa z Mōnachium rozklupała Lizbōńczykōw 5:0 a 7:1.

Terozki po roz trzeci mōmy trzech Ślōnzokōw w 1/8, ale sytuacjo je durś inkszo. Tym razym kożdy ś nich je fest ważnym groczym swojij drużyny. Piszczek ôstatnio chyto zaś życiowo forma, Glik rzōndzi defynsywōm w Monaco, a jak trza to klupnie ważno brama, a wiela we werci je Milik w Neapolu kapli sie chyba dopiyro jak poszoł na rewiyr, wcześnij po dwōch szpilach w Lidze Majstrōw mioł już 3 bramy. Do Glika i Milika to piyrszo ôkazjo pokopanio do bala na telkim poziōmie. Piszczek w 1/8 LM zagro już po roz czworty, dogōni beztōż Łukasza Podolskigo. Przed nim ze Ślōnzokōw już yno Klose i Dudek. A kaj tam pyndzyjo…

W 11-stce Polskij kadry lekki miszōng. Styknōł jedyn szpil i ze składu wyfurgło dwóch naszych synkōw. Na Polsko-Armynio Milik z Piszczkiym mōgli dziwać sie yno w TV. Niy doś, że trza lyczyć kolana to sam jeszcze telko dawka hercklekotōw! Po szlagu Lewego mōgli dychnōnć. Yno co na ta brama padaliby Pan Ernest Pohl i co czujōm Pan Włodek Lubański?

Nasi poza szpilplacym, abo trocha w ciyniu. Poza debiutym Kamila Wilczka nic co byłoby we werci ôpisać. W cyntrum zainteresowanio za to sztyjc Robert Lewandowski. Po klupniynciu 40-stej bramy w kadrze w piyrszej 10-tce nojlepszych snajperōw reprezyntacji wyprzedziōł już trzecigo Ślōnzoka. Tym razym Lewy wziōn Ernesta Pohla, kery tyroł w bioło-czerwōnym „ancugu” w latach 1955-65. Za Robertym sōm już telki legyndy jak Ernest Wilimowski (21 bramōw, 9. plac) czy Gerard Cieślik (27 bramōw, 7. plac). Ze zadku ôstoł tyż snajper Górnika Zabrze, urodzōny w Gdańsku Andrzej Szarmach (32 bramy, 6. plac). Lider sztyjc w ślōnskich rynkach, ale po lekku zagrożōny. Do Lubańskigo Lewy traci na dyć już yno 8 bramōw.

To jednak jeszcze niy sōm szczyt ślōnskich reprezyntacyjnych rekordōw. 48 bramōw, tela samo co Lubański, klupnōł w kadrze Łukasz Podolski. W Nimcach to stykło jednak „yno” na nojniższy stopiyń podium. Piyrszy plac na snajperskij liście Mannschaftu i aż 71 bramōw noleży do Mirka Klose. Co by ci Nimce zrobiyli bez Ślōnska…

Trza jednak ofyn pedzieć, że pokolyni Lewego mo fory. Reprezyntacje grajōm tera czynścij. Spōmnianymu Pohlowi do siekniyncio 39 bramōw stykło 46 szpilōw, Lewy coby go dogōnić musioł zagrać aż 83 razy. Chytōmy za kalkulator… Skutyczność Roberta to 48%. W porownaniu z Pohlym (85%), Lubańskim (64%), czy Cieślikiym (60%) mo na noc. A kaj mu tam do Wilimowskigo (95%), kerego wynik przi dodaniu wystympōw w kadrze Nimiec rośnie do 113% (34 bramy na 30 szpilōw)!

Perspektywy na rekordy? Arek Milik (21. plac, 11 br.). Latoś już nic niy dociepnie, ale po rewiyrze bydzie mioł fol czasu…

Pukeltasza na sia i „Ślōnski Fusbal” wraco nazod z poczōntkiym września choby szkolorze. Przijazdy z urlopu bywajōm doprowdy niylekki. Jak sie chytać roboty kej w uszach sztyjc gro Maa-jor-kaa…? Jo tyż niy chca sie dzisio ôroz drastycznie ôdrywać od telkich klimatōw, beztōż propōnuja samek przeglōnd wakacyjnej listy ślōnskich szlagrōw. Ale spokojnie, trzimiymy sie fusbalu! Niy byda was szterowoł Mirkiym Szołtyskiym.

Szlagier nr 1. Transfery, rekordy. Ôd zakōńczynio Euro’16 na rynku transferowym napochało sie a napochało. Dobry wystymp naszych groczy we Francji yno im pōmōg. Hneda doczkali my sie efektōw. Nojwiyncyj emocji prziniōsły tranfery Kamila Glika i Arka Milika. Piyrszy przekludziōł sie z Turynu do Monaco i szkryfnōł kontrakt na 4 lata. Drugi zamiyniōł Amsterdam na Neapol, przi czym sieknōł nowy transferowy rekord – 32 mln euro. Arek wskoczōł na wiyrch list nojdroższych fusbalistōw ze Ślōnska (przed Klose i Podolskim)  i z Polski (przed Krychowiakiym). W Neapolu mo grać bez 5 lot, ale tego gynał niy idzie być pewnym…

Szlagier nr 2. Podolski godo doś. Na Euro 2016 skōńczyła sie bezmałaś kariera Łukasza Podolskigo w Maanshafcie zaczynto w 2004 roku. Latoś 15 siyrpnia Łukasz pedzioł ofyn doś. Statystyk kadrowych już niy poprawi, ale te i tak impōnujōm. Podwójne podium. 48 bramōw i 129 szpilōw dowo mu 3 plac na listach nojlepszych snajperów i tych kierzi nojwiyncyj razy zagrali do Nimiec.

Szlagier nr 3. Górnik wyciepuje Legia z PP. Telkich ôbrozkōw brakowało nōm we ôstatnim sezonie. Górnik w Pucharze Polski pokōnuje Warszawiokōw po dogrywce 3:2, chocioż do przerwy przegrywoł już 2:0 i zdało sie że majster Polski mo wszyjsko pod kōntrolōm. Zaś jednak ôkozało sie wiela we fusbalu znaczy ambicjo, walka do kōńca i chynć wklupanio teoretycznie lepszymu rywalowi.

Wakacje bōły latoś forgot fest aktywne, ale bez jesiyń tyż sie niy bydzie mierzło. Zaproszōm do czytanio „Ślōnskigo Fusbalu”…

Rok 2004, finał Euro w Portugalii. Pierōńsko skuteczni Grecy ôgrywajōm gospodorzy. Styknōł jedyn dobry szlag i „joga bonito” wziyna w łeb… 12 lot niyskorzij sytuacjo zwyrto sie ô 180 stopni. Tym razym gospodorzami sōm Francuzi a „joga bonito” zdōnżyła ewoluować w stylu greckim. Szpetnie sie na to dziwo, ale to ôna nojlepij ze wszyjskich poradziyła se z francuskōm „beau jeu”. Ta rychtyk gryfno gra chyba jednak zaś przegrywo…

Już po szpilu Polokōw z Portugalczykami europejski media miały biyda przeboleć, że do pōłfinału wlazła ekipa, kero niy wygrała w 90. minutach jeszcze żodnego szpilu i cufalym, skiż nowych przepisōw wylazła z grupy z trzema rymisami. Nimiecki „Die Welt” nazwoł awans Portugalii do pōłfinału „ponurym wicym”, a portal „France24.fr” zastanawioł sie eźli do sie wygrać Euro bez wygranio szpilu.

Ôstatecznie fusbal to niy łyżwiarstwo figurowe ani taniec z gwiazdami, beztōż ani noty za styl ani sms-y telewidzōw ni majōm samek (na szczynści) nic do godki. Jakby sie niy dziwać majstrym sōm Portugalczyki, beztōż wypado im pogratulować. Tradycyjnie na „Ślōnskim fusbalu” trza by jeszcze yno poszukać jakigo Ślōnskigo kōntekstu. Ciynżko sprawa… Bohatyrym finału zdobywca bramy ze 109. min., urodzōny w byłej portugalskij kolōnii w Afryce, Eder. Idzie ze świycōm i taszlampōm deptać, ale biyda byłoby mu wynolyź starzika Hanysa…

Niy doczkali my sie niystety historycznego finału z udziałym naszych fusbalistōw. Poloki ôdpadli w szwierćfinale, a ôstatni Ślōnzok w turnieju, Podolski pojechoł du dōm po pōłfinałowej przegranej Mannschaftu z Francuzami. Trocha gryfnej gry my jednak ôbejrzeli, tōż dziwić ni moge, że na rynku transferowym nasi sōm coroz bardzij w zocy. Kamil Glik jeszcze przed kōńcym turnieju szkryfnōł kōntrakt z AS Monaco, a Arek Milik sztyjc analizuje ôferty rozmańtych europejskich  klubōw. Dyć na Euro fusbal sie niy kōńczy. Gryfno gra jeszcze bydzie zocno!

 

PS. Ślōnski Fusbal włazi gynał w przerwa letnio, ale spokojnie. Bydymy nazod…

GB