Archiwa tagu: Ruch Chorzów

Toć, w Ruchu Chorzōw bywało lepij, fusbalistōw widziało sie tyż tyrać w lepszej formie, ale nojwierniejszego kibica gorsze czasy niy zniychyncōm. To już sztyry lata jak z „loży VIP” na wiyrchu na szpile Ruchu dziwo sie legynda klubu…

Wszyjskich Świyntych, czas spōminanio tych kerzi wybrali sie na lepszy świat praje gynał złazi sie z rocznicōm ôdynścio Gerarda Cieślika (3 XI 2013). Latoś miołby 90 lot. Pod wiela siyły mu pozwolały chodziōł na szpile przi Cichej i chocioż już ofyn żodnej roboty w Ruchu ni mioł to kożdy w klubie z jego słowym sie liczōł. W radach jednak szporobliwy niy chcioł sie trynerōm styrkać, bo jak to pedzioł we swoim ôstatnim wywiadzie niy chcioł coby ktoś pedzioł że mōndruje.

Pan Gerard pewno jednak i tamek z wiyrchu starajōm sie ô Ruch. W piyrszym sezōnie w „loży Vip” Cieślik fajrowali 3. plac w Ekstraklasie, niyskorzij było już gorzij. Po spadku, sezōn 2017/18 Ruch zaczōn z minus 5 punktami sztrofy a piyrsze szpile yno to pogorszyły. To co pocho sie na trybunach Cieślika tyż by szterowało. Ôstatnio kej kibole Ruchu zhajcowali fany Rakowa, goście zaczli ciepać wytarganymi zicami. Na derbach z GieKSōm kibiców Ruchu już niy było, a tym razym fojera z ich szalikōw zrobiyli kibole Katowic. Z „loży VIP” spokojnij…

Klara po leku kaśtam jednak blynduje. We ôstatnich sześciu szpilach Ruch wygroł 5 razy. Kieby niy ujymne punkty już bōłby w pojszczodku tabeli. Fusbaliści sie spamiyntali, spamiyntać trza jeszcze kibicōw. Co do nastympcōw Pana Gerarda – na razie darymnie szukać. Downij Ruch latami wychowywoł nowe legyndy i tera idzie godać ô czasach Wilimowskigo, Cieślika, czy nawet Warzychy. Terozki jednak ci, kerzi mōgliby telkimi ikōnami ôstać wyjyżdżajōm z Chorzowa za modych lot. W Ruchu zaczli zbiyrać auslyndrōw (bezmałaś sōm tańsi). Zostowo yno rzykać, że zaś jaki ślōnski łebōń z grajfkōm do fusbalu zaś sie ôbjawi. Niychby doczkoł czasōw kej marzyniym grocza Ruchu niy bydzie ś niego citnōnć. „Loża VIP” bydzie rada.

Połowa września. Prezesōm klubōw, kere słabo sztartły w sezōn, po lekku kōńczy sie trwani… Robota w II-ligowym ROW-ie Rybnik po spadku na 14. plac w tabeli straciōł gynał Pioter Piekarczyk. Kryzys kozoł tyż coś pokōmbinować prezesowi Ruchu Chorzōw. Knifym na poprawa formy mo być Juan Ramon Rocha, argyntyński tryner, kery zajmuje plac Krzysztofa Warzychy. Gucia jednak żodyn niy wyciepuje. Zostoł yno „zdegradowany” na pōmagera Rochy, kery trynowoł go za czasow jego nojwiynkszych sukcysōw w Panathinaikosie.

Kiedy Ruch wykulo sie spod kryski chciołby tyż pewno wiedzieć zasłużōny tryner Niebieskich Waldemar Fornalik. Tera jednak przede wszyjskim myślami musi sie już chycić nowej roboty. Ôd środy Waldi je na dyć trynerym Piasta Gliwice. Wloz tamek na plac Dariusza Wdowczyka, bo w Glywicach tyż już zrobiōł sie ôstatnio gynsty luft i to przed sezōnym grzywczym. Fornalik przejmuje Piasta na 14 placu (2 pkt nad placym spadkowym), ale haja ô utrzimani to do pana Waldka nic nowego. Ôdmianom bydzie do niego za to robota w klubie bez finansowego bajzlu. Niy bydzie, beztōż musioł starać sie ô to, eli fusbalisty sie mu szprajcnom i niy przidōm na tryning ani myśleć eli puścić na szpilplac grocza kery sōndzi sie z klubym.

Potyngōm synki z Glywic niy sōm, ale Fornalik musioł zejrzeć w nich potyncjał. W kożdym razie robota w Piaście była rychtyg przemyślanōm decyzjōm. Na dyć bezrobotnymu ôd kwiytnia panu Waldkowi ofert niy brakowało (bezmałaś chcieli go w GKS-ie Tychy, Cracovii, Niecieczy, czy Lubinie). Fornalik, kery miyszko tera w Tychach zaś wybroł jednak Ślōnsk. Ôpcjo chodzynio „w laczkach” do roboty dycki kusi. To bez godki tryner z nojwiynkszym doświadczyniym w ślōnskich klubach. Transferōw za miedza jak widać sie niy lynko. Poza Piastym i Ruchym kludziōł jeszcze na dyć Górnik Zobrze, Polonia Bytom i Odra Wodzisław.

Fornalik, jak sōm pedzioł, debiuty miywoł rozmańte, ale „niyskorzij wszyjsko sie prostowało”. Tym razym na poczōntek 0:1 w pleca z Arkōm.

Rewolucji w Chorzowie szło sie spodziywać. Ruch zdegradowany do I ligi (dobrze że yno) musioł sie liczyc z ôdynściym poru ambitnych groczy, kerych zresztōm ani niy próbowali przi Cichej przitrzimać. Eźli klub, kery dłōgo bazowoł w wielkim kōnsku na „swoich”, uratujōm tera auslyndry?

Kej godka ô chorzowskich emigracjach, zaczōnć trza od Przymka Bargiela. 17-letni fusbalista z Rudy Śl. je już ôficjalnie groczym AC Milan. To piyrszy ślōnski reprezyntant w ekipie, kero 7 razy dźwigała Puchar Europy. Wartko drugi Pirlo czy Inzaghi ś niego niy bydzie, ale jeszcze kaś ô nim usłyszymy. Dwōch inkszych synkōw z Rudy, kerzi jednak już trocha wiyncyj poszpilali w Ekstraklasie, niy szukało daleko. Martin Konczkowski kludzi sie do Glywic a Michał Koj wybiyro Zobrze kaj groł jeszcze za bajtla. Niy wszyjscy kibice Niybieskich telki decyzje poradzōm lekko przetrowić. Mie gynał niy dziwiōm – po blisku, sztyjc na Ślōnsku, sztyjc w Ekstraklasie. Ôba majōm już pewny plac w 11-stkach.

Sōm jednak bardzij „gorki” kierunki. Mateusz Cichocki idzie do Zagłębia Sosnowiec. W przipadku grocza z Warszawy, to jednak niy dziwi. Bardzij zaboli ślōnskich kibicōw transfer Łukasza Monety do Legii. Synek spod Raciborza trefio tamek już po roz drugi. Przikro bydzie sie dziwać na niego z „L”-kōm, ale c’est la vie… Trza ciś do przodku i robić piniōndze. Łukasz zaczyno na ławie.

Lista modych Ślōnzokōw, kerzi zostowiajōm Ruch kōńczy Michał Helik. Tym bardzij żol, że to wychowanek i synek z Chorzowa. Terozki ôblyko koszulka Cracovii i zarozki zostowo podstawowym sztoperym, a już w drugim ligowym szpilu szczylo zwyciynsko brama (1:0 z Lechiōm).

To sztyjc niy kōniec chorzowskigo exodusu. Z klubu poszło tyż poru starszych groczy (Grodzicki, Surma). Dziury łoto sie bliżyj niyznanymi auslyndrami z Bałkanōw czy Ameryki Płd. Mono pōmogōm jeszcze jakiś mode synki z rezerw. Na „tiki-taka” trza bydzie jednak doczkać. Na sztarcie 1:0 w pleca w Mielcu. W tabeli sztyjc z piōntkōm na minusie.

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…

Istno rewolucjo, przinajmij ze ślōnskij perspektywy. W Ekstraklasie wymiyniajōm sie dwie ślōnski legyndy. Górnik za Ruch. Z nojwyższōm klasōm rozgrywkowōm żegno sie tyż trzech ślōnskich trynerōw, a na ich plac włazi jedyn nowy. À propos, w jakij kōndycji (zdrowiu) je ta „ślōnsko myśl szkolyniowo”?

Bez zgody kardiologa za trynowani sie lepij niy chytać. Ślōnski trynery w ôstatnich szpilach sezōnu zbiyrali rekordowe dawki hercklekotōw. Poniżyj wartki ranking naszych ciśniyniowcōw…

Plac 1. Tabela niy ôcygani, nojlepszym ślōnskim trynerym w Ekstraklasie latoś bez godki Michał Probierz. Tryner z Bytōmia dokludziōł na dyć Jagiellonia do historycznego drugigo placu. Gratulować…? Lepszy pana Michała tera niy szterować. Jedna brama dzielyła go i jego synkōw ôd tytułu Majstra Polski 2017. Po szpilu Probierz oficjalnie żegno sie z Jagōm.

Plac 2. Drugi w tabeli ślōnski tryner i nastympny do kerego lepij sie tera niy zbliżać to Franz Smuda. Jego Górnik Łynczna zaliczo dopiyro 15. plac i spaduje. Strata 2-ōch bramōw w ôstatnich sekundach i bez to rymis z Ruchym 2:2 dokludziyła by go do szału, keby niy wiadōmości z Lubina, kere niy dowały już Górnikowi szans na utrzimani (3:1 do Arki Gdynia).

Plac 3. Problymōw ciśniyniowych ni mioł przinajmij w niedziela Krzysio Warzycha. Ôn nanerwowoł sie tydziyń pryndzyj kej Ruch „wychacharzyli” w Gdyni. Tera spadek Ruchu bōł już przisztymplowany. Było gwiazda ślōnskigo fusbalu na poczōntku swojij kariery trynerskij w Polsce zrobiyła se lekko antyreklama. „Gucio”, kery robi w Ruchu ôd kōńca kwiytnia, wielkigo pola manewru ni mioł, ale swoji 3 grosze do spadku dociepoł.

Sam klasyfikacjo ekstraklasowo sie kōńczy, ale trza przedstawić kogoś jeszcze. W kōnkuryncji hercklekoty mōgby sie spokojnie rownać z Probierzym. Marcin Brosz ô awans Górnika musioł rzykać do 99. min. ôstatnigo szpilu. 1:0 do przodku w Puławach, z biydōm dowieziōne do kōńca stykło. 44-letni Knōrowiok bydzie brōniōł hōnoru ślōnskich trynerōw w nowym sezōnie Ekstraklasy.

Brama szczelōno rynkōm przisztymplowała spadek Ruchu. Pierōństwo…  Ale już po ptokach. Nic niy zmiyniymy. Ślōnski potyngi spadywały niy roz. Przibadalimy. Pytani yno co dalij…

2009. Piyrszy spadek Górnika Zobrze w XXI w. Wielki spōnsor (Allianz), wielki plany, ale gra na pierōna. Spamiyntani jednak sie zdało. W I lidze grajōm yno sezōn. Drugi plac pozwolo Grubiorzōm zaś wlyź do szoli, kero wyjyżdżo w Ekstraklasie. Sny ô potyndze jednak zostały dalij w hasioku. Finansowo Górnik to zaś boroczki. W Zobrzu za to stanōł porzōndny stadiōn. Latoś Górnik zaś musi sie prać ô Ekstraklasa.

2010. Kōniec 14-letnij przigody Odry Wodzisław z Ekstraklasōm. Darymno jesiyń, zimowe transfery i wielko pogōń na wiosna. Brakło jednego ôka. Odra kōńczy na 15. placu i ekspresowo sjyżdżo na same dno. Spadek do II ligi, brak licyncji i rozwiōnzani klubu. W sezōnie 2011/12 nowo Odra sztartuje w rybnickij Klasie C. Potym rozmańte dziwne awanse i fuzje. Doszło do tego, że latoś w lidze okryngowej szpilajōm dwa kluby, kere majōm w nazwie Odra Wodzisław. Telki derby yno tamek…

2011. Zaś spaduje klub ze Ślōnska. Polonia Bytōm kōńczy na ôstatnim placu. Problymy finansowe ôd downa niy były tamek tajymnicōm. Na dłōgszo meta ciynżko było utrzimać w Bytōmiu Ekstraklasa. Piyrszo liga tyż zrobiyła sie za mocno. Terozki Bytōmioki spadujōm do ligi III. Szportowo i ôrganizacynie (ujymne punkty w ramach sztrofy licyncyjnej) zaś niynojlepij.

Kerym scynariuszym pokulo sie prziszłość Niybieskich? Wartki awans jak Górnik? – Bydzie ciynżko. Rozônacz jak w Odrze? – Miasto chyba niy pozwoli. Na razie sytuacjo w Ruchu nojbardzij przipōmino chyba Bytōm. Problymy finansowo-licyncyjne, stare szpetne stadiōny i miasta zmynczōne szpōnsorowaniym klubōw…

Niybiescy jednak swojo historio naszkryflajōm sami. Niy sōm skozani na III liga. Zresztōm spadek z Ekstraklasy w połōnczyniu z pustym portmanejym sami tyż już przerobiali w 2003. Wtedy na powrōt do elity czakali 4 lata…

Ekstraklasa i Piyrszo Liga na finiszu. Sztyjc  ni mōmy jednak ôdpowiedzi na pytani wiela ślōnskich klubōw poszpilo ô Majstra Polski w nastympnym sezōnie. Możliwe scynariusze sōm roztomańte…

Wariant ultrapesymistyczny: Piast i Ruch przegrywajōm ôstatni szpile i kōńczōm na dwōch ôstatnich placach. W piyrszej lidze Górnik niy ôdrabio dwōch ôczek strat do strefy awansu (tym bardzij GieKSa swoich sztyrech). W efekcie w Ekstraklasie ni ma żodnej gōrnoślōnskij drużyny. A gratis mōmy majstra Legii i awans Sosnowca. Nic yno przeciepać sie na szkata!

Telko kalkulacjo mo jednak małe szanse realizacje, ale same to, że na dwie kolejki przed kōńcym możliwe je że Gōrny Ślōnsk hneda zostanie bez klubu w Ekstraklasie to już gańba. Ôd 1922 r. kej kōnsek Ślōnska dostoł sie Polsce dycki chocioż jedna ślōnsko drużyna stowała na poczōntku sezōnu do haji ô Majstra Polski. Przeważnie naszych w nowyższej klasie rozgrywkowej było jednak wiyncyj. W rekordowym sezōnie 1968/69 aż siedym (Górnik Z., Polonia B., Szombierki B., Ruch Ch., GKS K., Odra O., ROW Rybnik), co było połowōm cołkij I ligi! Ślōnski drużyny poradziyły wygrywać majstra 10 razy z rzyndu (lata 1959-68; Górnik-7, Ruch-2, Polonia B.-1), a z podium niy złaziyły nawet bez 28 lot (1950-77). W sumie gōrnoślōnski drużyny były na podium w 57. z 81. skōńczōnych do tyj pory sezōnōw nojwyższej klasy rozgrywkowej w Polsce. Nojmaśniejsze lata downo za nami, ale nawet w XXI w. miywalimy po sztyry gōrnoślōnski kluby w Ekstraklasie. Latoś kryzys szczytuje.

Ale po lekku… Sztyjc możliwy je na dyć wariant ultraoptymistyczny: Ruch wygrywo dwa ôstatni szpile a rywale grajōm „pod nich” (Górnik Ł. i Arka tracōm punkty). Przi telkim ukłodzie Piast już niy musi nic. Ôbie ślōnski drużyny sie utrzimujōm. W piyrszej lidze dwie wygrane Grubiorzy, 1 przegrany szpil Sosnowca,  1 rymis Grudziōndza i voilà! Górnik nazod w Ekstraklasie i je nas trzech!

Zaś wōnio utopiōm? Mono lepij żyć nadziejōm niż yno historiōm?

Gynał tydziyń tymu spōminołech, że z siedmiu fusbalistōw powołanych ôstatnio do polskij kadry, żodyn ni ma ze Ślōnska. Pyndziałkowe derby Ruchu i Piasta kożōm sie zastanowić eźli trynery ôstatnich ślōnskich klubōw w ekstraklasie dowajōm chocioż szansa Nawałce pozaglōndać na jakiś naszych synkōw, kerzi byliby co we werci?

Trza zaczōnć ôd tego – Ruch i Piast w tym sezōnie walczōm sztyjc w dolnym kōnsku tabeli, a mōmyntami realno robiyła sie groźba, że latoś Ślōnsk pozbydzie sie z Ekstraklasy ôbydwu swoich drużyn. Ôstatnio jednak nad Chorzowym i Glywicami wylazła klara i zablindowało nadziejōm, kej Ruch i Piast wygrały swoji 2 ôstatni przedderbowe szpile. Serio Niybieskich je nawet lepszo. Latoś przegrali yno z Cracoviōm, niyskorzij już sztyjc punktowali, a po drōdze wklupali Legii we Warszawie (3:1) i Lechii u sia (2:1).

W ôstatnij kolejce Ruch w piyrszej 11-stce wystawiōł dwóch wychowankōw (Michał Helik z Chorzowa i Maciej Urbańczyk z Mikołowa) a w sumie sztyrech Ślōnzokōw (plus Martin Konczkowski z Rudy Śl. i Łukasz Moneta z Raciborza). Poradziesiōnt lot do zadku telki wynik bōłby słaby, ale tera inksze czasy –sztyjc sie zmiynio kluby. Tym bardzij na tle rywala ni ma sam gańby. Liczba wychowankōw i groczy ze Ślōnska w piyrszym składzie Piasta to 1 (Radek Murawski z Glywic).

Wszyjski spōmniane samek Ślōnzoki z Ruchu i Piasta to mode synki. Toć, Nawałka powołań im jeszcze niy wysyło. Ni ma jednak prowdōm, że ślōnski kluby ni majōm swoich kadrowiczōw. Na ôstatni szpile reprezyntacji Polski U-21 pojechało na dyć sztyrech groczy Ruchu (Helik, Moneta, Niezgoda, Lipski) i jedyn z Piasta (Murawski).

Tōż coby podsumować… Forma w ôstatnich szpilach – punkt do Ruchu, fusbaliści w reprezyntacji – lepszy Ruch, inwestycje w wychowankōw i chopcōw ze Ślōnska – tyż na plus do Niybieskich. Wartki przedderbowy bilans pokozuje 3:0 do synkōw z Chorzowa. Jak sie to mo do pyndziałkowych derbōw [tekst ôddany do druku przed szpilym]?

Tym razym na warsztat bierymy transfery ślonskich „ekstraklaseiros”. Za nami już piyrszo latoś kolejka Ekstraklasy. Po lekku bydymy weryfikować wiela we werci sōm świyżo skludzyni fusbaliści i czy rychtyk bydzie nōm tesno po tych co ze ślōnskich klubōw wyjechali…

Przody dziwōmy sie na Glywice. Drużyna Radoslava Látala za pierōna niy przipōmino tej z ôstatnigo sezōnu, kero do ôstatnij kolejki prała sie ô majstra. Látal w sezōnie 2015/16 zrychtowoł istny cud. Poradziōł dać nowe (lepsze!) życi pacjyntowi, z wymiyniōnym sercym, płōcami i resztōm wewnytrznych tajli. Na wartko poukłodoł drużyna, do kerej bez lato prziszło 13 nowych fusbalistōw. Straciyło sie za to fol podstawowych groczy z krōlym szczelcōw Ekstrakalasy Kamilym Wilczkiym włōncznie. Látal pokozoł wtedy swojo trynersko grajfka i poukłodoł drużyna praje ôd zera. Latoś zmiany troszka myjsze, ale jak na zimowe ôkiynko niyzły miszōng. Piast skludzo piynciu nowych groczy z doświadczyniym w nojwyższych klasach rozgrywkowych. Z ciekawszych nazwisk trza spōmnieć Papadopulosa (z Z. Lubin) i Vranješa (z Legii). Tryner godo tyż, że w piyrszej drużynie pokozywać zacznie sie sztyrech juniorōw. Látal je rod z trasferōw, jaki tym razym bydōm skutki ôperacji?

Durś inacy w Chorzowie. Tamek  w styczniu żodyn ô wielkich transferach niy myśloł. Piniōndze i cołko energio dziołaczy poszły na spłaty długōw i pokozywani światu, że w Ruchu wszyjsko funguje jak trza. Ôdhoczōne. Ta misjo zaliczōno. Synki Fornalika mōgli spokojnie trynować. Boli jednak co inkszego. Ruch straciōł nojlepszego grocza jesiyni Pyjtra Ćwielōnga, kery po letnim wielkim „come back-u” poszpiloł w Chorzowie yno pōł roku i pojechoł nazod do Nimiec (1. FC Magdeburg). Z nowych groczy yno wypożyczōny z Lechii Gamakow. Je szansa, że z Wisły wrōci sprawdzōny ekstraklasowy torman z Rybnika Michał Buchalik. Tōż Ruch (chce czy niy) stawio na swoich. Po wiyncyj bydzie siōngoł do rezerw. Fornalik zaś do szansa poru łebōniōm.

PS. Szpil Ruchu z Cracoviōm ekstra przemilczołech. Kto widzioł wiy czamu…

1946 rok. Silesian Team je na tournée w Szkocji. Drużyna poskłodano z nojlepszych groczy ślōnskich klubōw i poru fusbalistōw z Krakowa pokozuje klasa! Profesjōnalne szkocki kluby chcōm naszych u sia. Synki wracajōm jednak nazod du dōm i rozjyżdżajōm sie po swoich klubach…

XXI wiek. Wszyjski legyndarne ślōnski kluby w kryzysie. Roz za kiedy (przinajmij bez kōnsek sezōnu) poradzōm prezyntować dobry poziōm, ale potym majōm biyda utrzimać skład, przichodzi kryzys i sōm brutalnie skludzani na zol. Złe zarzōndzani to brak piniyndzy w portmaneju a brak piniyndzy to z czasym brak fusbalistōw i brak wynikōw to zaś brak spōnsorōw i nazod brak piniyndzy, złe zarzōndzani itd. Kōłko sie zawiyro i ciynżko pedzieć co samek rychtyk je żdżōdłym problymu?

Epoka ciynżkigo przemysłu downo minyła i Ślōnska niy stać już na utrzimywani poru klubōw na rychtyk dobrym poziōmie. Wielki rozdrobniyni wpływo na to, że żodyn ślōnski klub niy poradzi sie wybić i ustabilizować szportowo a finansowo. Ruch Chorzōw, Górnik Zobrze, Polōnia Bytōm itd. Kożdy ze swojōm historiōm, sukcysami, tożsamościōm, kibicami i… problymami. Nasze legyndarne kluby szpōnsorowane sōm przeważnie przez miasta, kere miywajōm ś nimi istno ôstuda. Górnik po kōniec grudnia zaś musioł prosić radnych o pożyczka. Ruch pogrywoł na miglanca przi wypłatach za co już dostoł sztrofa, a Polōnia z Bytōmia bezmałaś zaś dobijo do progu bankructwa. Ni ma lekko.

Spōmniany Silesian Team, podobnie jak kadra Ślōnska, były zbiyrane na potrzeby szpilōw a turniejōw sparingowych. Tera bardzij zdołby sie mono „Silesian Club”. Jedyn, wielki ślōnski klub, kery istniołby niy od świynta yno groł normalnie w lidze. Silesian Club z siedzibōm przikładowo na neutralnym gynał wykańczanym Stadiōnie Ślōnskim mōgby nafyrlać niy yno w Ekstraklasie. Ślōnski klub bez podziałōw, do nojlepszych z nojlepszych, kerych u nos by niy brakło, dyć niy musieliby wyjyżdżać w świat coby sie rozwijać…

To jednak yno utopia. Biyda uwierzyć, że mōgłoby to być prowdōm. W Bytōmiu próbowali już tego na myjszo skala. Próba połōnczynio Szombierek z Polōniōm niy skōńczyła sie nojlepij. Rozmańte kluby, rozmańte tradycje. To sie niy udo…