Archiwa tagu: Ślonski Fusbal

Wiela idzie yno ô fusbalu? Jakeś je rychtyg szportowiec musisz poprōbować tyż czego inkszego. Narty to dobry szpas i tryning na muskle w szłapach. Poza tym idyalno ôkazjo coby wyônaczyć se stawy, połōmać sie, poskłodać jak colsztok i mieć z gowy reszta sezōnu. Mono beztōż profesjōnalny fusbalista smoli tyn szport?

Ni ma tyż co sie dować zbamōncic i darymnie histeryzować. Napochać idzie zawsze. Ni ma bezpiecznego szportu. Jednymu z fusbalowych reprezyntantōw Norwegie z lot 70-tych przitrefiyło sie minōnć zgrupowani kadry po tym jak przi tyraniu po lesie szczesnōł sie z łosiym. Jogging a nordic walking ôdpadujōm! Szukōmy bezpieczniejszego szportu. Mono gry planszowe? No, sam tyż trza dać pozōr. Downy torman PSG dostoł kōntuzje muskli plecōw przi szpilaniu w Scrabble. Ja, spadła mu literka. Co ôstowo? Siedzieć przed TV? Kaj tam! Sam lista kōntuzjowanych jeszcze dłōgszo, a ôtwiyro jōm sōm Robbie Keane z rewiyrym skuli siōnganio po pilota. Bywo i tak. Nojważniyjsze coby po rewiyre dobrze sie spamiyntać.

Nojlepszym ślōnskim „niyzniszczalnym” bez ôstatni lata je bez godki Łukasz Piszczek. Kero to już jego kōntuzjo, po kerej ôtrzepuje sie z marasu i godo „dobra, jadymy dalij”? Ôd poczōntku stycznia Piszczek je nazod na szpilplacu i ôdtōnd Borussia niy przegrała, beztōż Łukasz sztyjc szpanuje swōj rekord. We 2017, kej groł, BVB niy przegrała w Bundeslidze ani jednego szpilu. Telkich indywidualnych statystyk ni mo tamek żodyn. Problymy BVB w tym sezōnie zaczły sie z poczōntkiym rewiyru Piszczka (5 przegranych, 3 rymisy, 2 wygrane), ale to już historio. Piszczek niy przegroł w Bundeslidze od 26.11.2016. To już 30 szpilōw!

Telkigo spamiyntanio po rewiyrze idzie winszować kożdymu. Arek Milik moge mu tera pozowiścić. Przed nim misjo trudniejszo. Za nim dwa razy serwane wiynzadła we dwōch kolanach i dwie wartki rehabilitacje bez rok. Ôd kōńca stycznia Arek trynuje normalnie, ale na szpilplacu jeszcze sie niy pokozoł. Dej pozōr na łosie!

Mrōz chyto to i sie hajcuje. Szkoda yno, że niy kożdy poradzi robić to do porzōndku. Skiż tego z luftu robi siy gynsty zac, kerego skłod je dłōgszy niż w nojgorszej zorty ôplerkach i zdołby sie ku nimu spis treści. W telkich warōnkach trynuje „do zdrowio” fol ślōnskich fusbalistōw z klubōw, kerym gynał trocha brakuje coby pojechać na ôbōz na Cypr. Je tyż jednak inkszo zorta fusbalistōw, kerzi ni majōm problymōw ze smogiym i to jedyn pierōn czy trynujōm u sia czy szpilajōm za granicōm. We słowyńskij Lublanie skōńczyły sie gynał Mistrzostwa Europy we Futsalu.

Na halowym Euro niy brakło Ślōnzokōw, wszyjscy w reprezyntacji Polski, kero ôstatni roz szpilała na telkim turnieju we 2001. Byli fusbalisty Clearexu Chorzōw (3), Piasta Glywice (2) i GSF Glywice (1) jak tyż ze ślōnskich połedniowo-wschodnich kresōw, tōż z Rekordu Bielsko-Biała (3). Po rymisie z Rusami (1:1) i przegranej z Kazachstanym (1:5) bioło-czerwōni niy wyleźli z grupy, ale gańby ni ma! Futsal a fusbal na trowie to inksze światy. Sam żodnego niy dziwi, że w grupie ôdpadujōm Włochy czy Francjo, a dalij lezōm wspōmogane brazylijskōm tiki-takōm kadry Azerōw a Kazachōw.

Forgot, werci sie roz za kedy sprōbować halōwki, bo to szport warciejszy, jeszcze bardzij techniczny i w naszych realiach zimowych nojzocniejszy a nojzdrowszy. Futsalisty już w dōma, tōż i my wracōmy a chytōmy sie fachlowanio. Nikere szpilplace musiały już być ôdśnieżōne na ôstatni piōntek, kej sztartła Ekstraklasa. Zaro we piyrszym szpilu mōglimy ôbadać forma Grubiorzy. Wyjazd do Płocka bōł do trynera Górnika ekstra misjōm, bo ôbrōna skuli kartek a kōntuzji musioł zrychtować praje na nowo. Kōmbinowoł bez cołko pauza, ale eksperymynt jak to padajōm „niy pyknōł”. Synki z Zobrzo dali se wklupać aż 4 bramy i ze 4:2 w pleca pojechali du dōm.

Trza trynować dalij… Tōż, drogi hajcyry! Dejcie żyć tym co robiōm fōrma na „świyżym” lufcie. Ô tōńszym a zdrowszym hajcowaniu poczytocie wszyjsko sam: http://czysteogrzewanie.pl/

We raji zbiōrka! Do jedynoście ôdlicz! I terozki chwila prowdy…

Marcin Brosz jeszcze tydziyń do zadku ni mōg być pewny eli jego „złoto” jedynostka sie utrzimie. Podstawa skład Górnika Zobrze bez jesiyń zmiynioł sie tak rychtyg yno wtedy kej musioł. Bez godki stracyni kogoś z podstawy byłoby czuć. Ôd 1 lutego na szczynści ôkno transferowe we nojwiynkszych europejskich ligach je zawarte, tōż Zobrze moge dychnōnć. A dyć starać było sie ô co! Bezmałaś „za piynć dwanoście” włosko Fiorentina chciała jeszcze skludzić Szymōna Żurkowskigo, 20-letnigo kapitana polskij młodziyżōwki. To już jednak (na jakiś czos) niyaktualne. Tera yno niy dać sie cylnōnć „fesztrōm” z USA, Chin eli Japōnii, chocioż do modych Grubiorzy z grajfkōm telki kierunki chyba mynij zocne.

Co do transferōw na plus Górnik tyż niy gupnōł. Testowali swoich modych synkōw – telko tera klubowo polityka. Za ciekawszy ruch idzie uznać yno wypożyczyni 22-letnigo ôbrōńcy Pawła Bochniewicza z Udinese. Tradycyjnie nojciekawszym transferym, kerego niy było, przekludziny Łukasza Podolskigo. Niy starejcie sie… Kaj tam 65! Łukasz na pyndzyjo jeszcze niy idzie.

Tōż kaj te ślōnski hity transferowe? Niy w Zobrzu to mono w Glywicach? Niy, tam asić sie mogōm co nojwyżyj wypożyczyniym dwōch legiōnistōw, kerych Wa-wa już niy chciała (Czerwiński a Jodłowiec). Szukōmy dalij i dojyżdżōmy na Dolny Ślōnsk. We Lubinie na dyć synkōw i z Gōrnego Ślōnska niy brakuje. Jedyn ś nich ôstowo bohatyrym zimowego szlagra. Jakub Świerczok trefio do Łudogorca Razgrad i zaro na sztart we trzech sparingach szczylo 4 bramy. W Lubinie Świerczok tyroł yno bez pōł roku. Kej Bułgary ciepli na stōł piniōndze szkryfniynte w kōntrakcie było już pośmiatane.

Rownowoga we przirodzie być musi. Do Lubina kludzi sie synek spod Raciborza, Łukasz Moneta (24 l.). Z Gōrnego na Dolny Ślōnsk GPS pokludziōł go bez Warszawa, kerej niy zawojowoł po roz drugi. Lubin chyba rychtyg lepszōm ôpcjōm do naszych chopcōw, pra? A i kibicować pódzie Monecie… z czystym sercym.

Fusbalisty na ôbozach, tōż i newsy z naszego światka fusbalu choby we szczycie sezōnu ôgōrkowego (w realiach styczniowych to raczyj bydōm kiszōne).

Szlagrym tydnia rajdowo rajza Bartosza Sarnowskigo. Auto prezesa Górnika Zobrze miało ôstatnio lekki szczaśniynci. Nic to rychtyg poważnego, problym yno że prezes ni mo prawa jazdy, kere wypunktowała mu pryndzyj drogōwka. I co sam pedzieć? Keby yno Gornik tak punktowoł! Majstra miołby już w kapsie… Kiedyś prezydynt Wrocławia po wjechaniu pod prōnd na glajzach godoł, że pilowoł do kurie. W Zobrzu jednak tłumaczyni na biskupa niy pōmoże. Trza rzykać do wyższej instancje, bo Sarnowskimu grozi 2 lata wiynziynio!

Co do rzykanio… Mono pōmogōm kibole? Dyć ekumyniczno pōnć polskich kibicōw (ôd Legii po Odra W.) już tera szafła se miano nojgłośnyjszej pōnci 2018, a kaj tam siyrpiyń! Z cołkim szacunkiym do tych co rychtyg poszli 13 stycznia na Jasno Gōra porzykać, zaś ôbadalimy że kibol poradzi i to niy ważne czy je w miejskim haźlu czy w sanktuarium. Kibole na mszy usłyszeli to co słyszeć chcieli, a na dworze zrobiyli „młyn” we swoim stylu. Race, rasistowski fany (przody poświyncōne) plus mało fojera z transparyntōw kōntrmanifastacje. Niy brakło tradycyjnych pōntniczych prziśpiywek ôd „Jeszcze Polska” po „zamiast liści będą wisieć komuniści”.

Poważno impreza zrychtowoł za to prezes Śl.ZPN Hynryk Kula. Debata na tymat co trza zrobić coby ślōnski klub zaś bōł majstrym Polski, tōż w skrōcie „czamu jes jak jes i kiedy bydzie jak było”. Chciałoby sie pedzieć – nic nowego. Debat na tyn tymat idzie posłōchać niy ôd dzisiej w piyrszym lepszym ślōnskim szynku kaś przi trzecim-czwortym piwie. Ale u prezesa Kuli, zwracōm hōnor, było kōnkretnij. Szpece godali ô knifach na wspōmożyni systymu szkolynio a sōm prezes na kōniec pedzioł, że hneda Śl.ZPN wkludzi w życi pora idyji ekstra dlo modych fusbalistōw, jak choby program stypyndiōw. Coś sie robi i dobrze… Dyć samym fandzolyniym przi krauzie ôgōrkōw świata niy zmiyniymy!

Wartki przeglōnd fusbalowych newsōw ôstatnigo tydnia dokludziōł mie do artikla, kerego bohatyrym rumuński syndzia Ovidiu Hațegan…

Toć, syndzia fusbalowy ni mo lekko. Jak ni ma szwarnōm, wyzgernōm frelkōm to nojłatwij dać na niego pozōr kej coś napocho. Tak tyż było z Hațeganym. Ôdgwizdaniym elwra w 57 min. piyrszego barażowego szpilu ô Mundial miyndzy Irlandiōm Płn. a Szwajcariōm fest pokopoł se w lelujach. Szlag po kerym grocz z Irlandie dostoł w pukel syndzia uznoł za rynka. Pech chcioł, że brama po tym elwrze była jedynōm w ôbu szpilach i dała Szwajcarōm awans. Kej hneda FIFA ôgłosiyła lista 36 syndziōw na Mundial brakiym Hategana żodyn sie już niy dziwiōł, ani ôn sōm.

Terozki Rumun ofyn godo, że zawalōł i wypaczōł wynik barażu. Szacunek do tego chopa, bo telki słowa ôd arbitra biyda usłyszeć, i to nawet w epoce kej kibic moge wszyjsko ôbadać w 10-ciu rozmańtych powtōrkach! Te słowa jednak niy pōmogōm panu Hațeganowi spokojnie wypić piwa w piyrszym lepszym szynku w Belfaście. Jeszcze dłōgo mogōm tam go spōminać. Chyba, że to yno u nos kibic taki pamiyntliwy? Przi artiklu o Hațeganie w kōmyntorzach zaro ôbjawiyło sie fol porownań do inkszego rumuńskigo arbitra Victora Padureanu, kery podpod kibicōm reprezyntacji Polski jakiś…46 lot tymu.

Padureanu syndziowoł szpil Polski z Bułgariōm w kwalifikacjach do IO Monachium 1972. Dobrze pamiynto to tyż poru groczy ze Ślōnska, przede wszyjskim Lubański, wyciepany ze szpilplacu za pora szpetnych słōw po elwrze do gospodorzy, czy Banaś autor niyuznanej bramy. Bohatyrym pamiyntnej akcji z tym, że pora godzin niyskorzij bōł inkszy grocz Górnika Zobrze. Na wspōlnej wieczerzy po szpilu Ziga Anczok w ramach wicu zaczōn tyjatralnie brōsić swōj nōż i dziwać sie na syndzigo, a kej tyn stanōł ôd stoła Poloki poszli za nim w szpacyr. Syndzia citoł!

Na tej tragikōmicznej historyjce trza by skōńczyć i dać śp. syndzimu pokōj. Żodnych miliōnōw za szpil niy zebroł, jak godały famy. Kożdy miywo gorsze dni, pra?

To co kożdego roku… ściepna 10 kilo. Coś do zdrowio… ciepna kurzyni. I jeszcze coś rychtyg ambitnego… rajza naôkoło świata!

Toć, postanowiynia trza mieć ambitne. Tak tyż pedzieli se w Chorzowie. To nic, że Ruch chwilo na ôstatnim placu w I lidze, a nojnowocześniejszy na świecie stadiōn anno domini 1935 troszka sie postarzoł. Trza dziwać sie do przodku. A prziszłość (ni moge być inaczyj) rysuje sie kolorowo! Abo Ruch doczkoł sie zaś dobrych PR-owcōw abo rychtyg idzie ku dobrymu…

Prezes Paterman zrobiōł dobre wrażyni na Prezydyncie i radnych Chorzowa. Ruch dostanie dofinansowani z miasta (a dokładnij miasto kupi akcje klubu). Znojdōm sie piniōndze na stadiōn, ale nic za darmo… Ruch musioł przody wykozać sie szporobliwościōm. Bezmałaś kożdego kotloka przed wydaniym ôglōndo sie tam tera po trzi razy. Ôd fusbalistōw po Zarzōnd kożdy zarobio mynij. Stare dłōgi sōm spłocane i Ruch po leku wyłazi nad kryska (przinajmij tak sie ofyn godo).

W Chorzowie niydowno skōńczyła sie wieczno budowa Stadiōnu Ślōnskigo. Złośliwi padajōm, że znod sie nowy maras w kery idzie wyciepywać piniōndze. Niy tak downo tymu godało sie zresztōm, że Ruch durś przekludzi sie na Stadiōn Ślōnski, co zdałoby sie synsowne, ale fachmany wyliczyły, że klub yno by do tego dopłocoł i hneda jeszcze bardzij zatoplołby sie w dłōgach. Tera bezmałaś Ruch chce robić na Ślōnskim yno nojważniyjsze szpile (z GieKSōm abo Sosnowcym), reszta przi Cichej kaj za jakiś 4 lata mo już stoć wysztryndzōny stadiōn na 16-tys. kibicōw.

Postanowiyniym nr 1 zostowo awans do Ekstraklasy, ale sam już cudōw ni ma. Tabeli niy ôcyganiymy. Latoś trza dać pozōr coby niy sfurgnōnć.

PS. Piyrszego Majstra Ruch robiōł na szpilplacu, kery niy bez cufal mianowany bōł „Hasiokiym”. Ok, czasy trocha sie zmiyniły. Na grubach niy robiōm kōnie, a rolady kupuje sie już poswijane. Niy idzie w 2018 mieć klubu w Ekstraklasie i kozać groczōm tyrać po hasiōwie za „Bōg zapłać”. Inwestycje na miara XXI wieku, ale ambicjo jak „za Hasioka” i bydzie dobrze!

Tradycyjnie już na kōniec roku Ślōnski Fusbal chyto sie za wrōżyni na bezrok. Dyć to nojlepszy ku tymu czos. Kery niy w tymacie spōminōm skōnd to sie wziyno…

Nocka durś pokōnała dziyń. Świat ôstoł w cimoku. Hneda jednak klara zacznie sie pokozywać na dłōżyj. Na świat przidzie Pōnbōczek, światło. Idzie nadziejo na lepsze. Tyn przełōmowy mōmynt nasze starziki ôd downa mieli za wyjōntkowy. W takim czasie trza fest dować pozōr co sie pocho, bo woży sie naszo prziszłość. Jak to padajōm jaki bydziesz bez wilijo taki bez cołki rok. Nikerzi tyż już 12 dni przed wilijōm (ôd 13 XII – św. Łucji) zaczynali dziwać sie w niebo, bo to dziyń po dniu wrōżba na pogoda na kożdy miesiōnc na bezrok. Prognoza pogody to gynał niy mojo bojka tōż dōm tymu pokōj. Do kōnkretōw! Nastympny rok we Ślōnskim Fusbalu pokulo sie tak…

Ôstatni postympy w rehabilitacji wrōżōm Arkowi Milikowi sztartniynci normalnych tryningōw jeszcze latoś, a w kadrze na szpil moge być już 21 stycznia z Atalantōm Bergamo. Déjà vu? Rok tymu wracoł po rewiyrze w podobnym czasie… Mono lepij niy w jego przipadku niy wrōżyć a doczkać i rzykać niych niy kopnie w jaki dornik.

Milikowi urośnie jednak ślōnsko kōnkuryncjo w ataku polskij kadry. 2 hat-tricki w dwōch grudniowych szpilach Jakuba Świerczoka ni mogōm źle wrōżyć. Tyn synek musi pojechać na Rusy, dyć Nawałce zdo sie nowo siyła w ataku… Chyba rychtyg tak bydzie, bele yno Kuba niy wrōciōł do „diety nutellowej”.

Górnik Zobrze w haji ô majstra bydzie sie liczōł do ôstatnich sekund. Bele yno niy doł se go w tych ôstatnich sekundach wytargać, jak w ôstatnim szpilu z Arkōm kaj gupio straciōł brama na 1:0 i w tabeli spod na drugi plac… Spokojnie niy wszyjski wrōżby sie spełniajōm jedyn do jedyn.

Stadiōn Ślōnski doczko sie szpilu reprezyntacji Polski po ponad 8 latach… To już gynał niy wrōżba a ôbietnica prezesa PZPN. Poloki na Ślōnskim poszpilajōm już w marcu. Przijedzie sam Korea abo Nigerio.

 

—————-

Ślōnski Fusbal robi świōnteczno-noworoczno pauza. Nastympny felietōn pokoże sie 9 stycznia. Wesołych, nojlepszego i do zaś!

GB

Dopiyro zimowo pauza powiy nōm tak rychtyg eli Górnik Zobrze na dłōgszo meta myśli ô poważnym fōngowaniu i szpilaniu ô majstra. Hneda piyrszy test. Eli z Zobrzo ôdyndzie nojlepszy snajper?

Bez ôstatni lata sprzedowani nolepszego „samca alfa” po kożdej rundzie było podstawōm polityki transferowej Górnika. Wtedy szło być wiernym klubowi i za jednym szlagiym nim ciepnōnć, skoro transfer dowoł mu trocha kotlokōw na życi. Tera bezmałaś w Zobrzu je inacy, co pokozać już miało letni ôkno transferowe. Po tych co poszli żodyn już niy ślimto (Danch, Kopacz), a poru nowych poradziyło sie dobrze w KSG znojś (Koj, Wieteska, Kądzior). Górnik idzie w modych, kerzi majōm idyntyfikować sie z klubym i dobrze firmować Ślōnsk…

Igor Angulo zdałoby sie średnio ku tymu pasuje, chocioż… Wiek? Sprawa dyskusyjno. To je w gowie. Wiynzi z klubym/regiōnym?  Ciynżko liczyć że 32-letni fusbalista z Bilbao po zaliczyniu 11 klubōw karierze ôroz z miłości do roladōw i paprotek ôdbitych we wōnglu przekludzi sie na zawsze do Zobrzo. A jednak, Górnik to do Igora coś wiyncyj! Godka, że Zobrze spōmino mu Bilbao i że rychtyg dobrze sie sam czuje ni ma yno fandzolyniym. Zobrze to dwanosty i nojlepszy przistanek w karierze Angulo. Tukej zrobiōł awans, bije snajperski rekordy, stadiōn wyśpiywuje jego nazwisko i sztyjc jy zupa na zdobycznym kokocie. Niy dziwne, że czuje sie jak u sia i ofyn godo, że nikaj sie stōnd niy wybiyro. Z jednym „ale”! Do sia du dōm rod by wrōciōł. Hiszpańsko „Marca” wywōniała, że Athletic Bilbao (latoś w dolnych kōnskach tabeli Primera Division) chciołby Igora nazod. Bramy klupie, rodzōny Bask i sztyjc 3 lata modszy ôd Aduriza, podstawowego snajpera Athleticu. Kandydat klasa!

Angulo gynał szkryfnōł kōntrakt do 2020 r. Wert je tera wiyncyj. Pora lot do zadku czakali by już w Zobrzu na brif z Bilbao choby na zbowiyni. Tera? Ni ma brifu – ni ma ô czym godać. Problym bydzie jak brif rychtyg przidzie. Chynć zatrzimanio grocza moge niy styknōnć jak rolady przestanōm wōniać…

Jak 4 grudnia to Barbōrka, jak Barbōrka to fajrowani. Jak fajrowani to gybōrstag. I zaś na tapecie zobrzański Górnik…

Klub szportowy je jak familijo. W nikerych kōnskach świata ofyn godo sie, że do familiji noleżōm  ci co sam byli, ci sam sōm i ci co sam bydōm. To dobro lekcjo do klubōw, kere coby dobrze fōngować muszōm sztyjc dować pozōr na to co je, co bydzie, ale i na to co było. Dobrze zagrać szpil, trynować bajtli, i szanować starych groczy… Górnik-dzisio wygrywo z Wisłōm 3:2  i kludzi w Ekstraklasie, Górnik-jutro trynuje łebōni, kerzi już wygrywajōm im szpile, a Górnik-wczora sztyjc żyje sukcysami z lot 60. a 70.

Do epoki majstrōw Grubiorzy przełōmu lot 60. a 70. noleżōm bez godki sztoper i kapitan Stanisław Oślizło, kery gynał skōńczōł 80 lot. Przed szpilym z Jagiellōniōm Oślizło ôdebroł geszynki i powinszowania, a stadiōn ôdśpiywoł mu „sto lot”. Jymu, tōż chopowi, kery z Górnikym 8 razy robiōł Majstra Polski, 6 razy Puchar Polski, a do tego doszoł ś nim do finału Pucharu Europejskich Zdobywcōw Pucharōw, w kerym klupnōł brama (2:1 w pleca z Man. City), beztōż do dzisiej je jedynym fusbalistōm z Polski z bramōm we finale europejskigo pucharu.

Ô chopie z Jedłownika wypado pamiyntać, tym bardzij, że ôn ô Górniku i starych Grubiorzach tyż niy zapōmino. Niy tak downo tymu przi Wszyjskich Świyntych Oślizło deptoł jeszcze po rozmańtych kyrchowach razym z kapelōnkiym Górnika coby poświycić i porzykać za downych fusbalistōw, trynerōw a działoczy klubu. Oślizło robi za ambasadora Gornika Zobrze i doradcy Zarzōndu klubu.

Niy zawsze jednak było tak kolorowo. Oślizły ôdsunyli ôd piyrszej drużyny kej mioł 35 lot, czego dowiedzioł sie przi… pasowaniu ancugōw przed tournée po Ameryce. Niy było go na liście jeglorza. Potym w kwiytniu 1973 na szpilu z Ruchym w przerwie zaprosiyli go yno na bieżnia, dali kolorowy telewizor i tela. Niysmak ôstoł, ale Ôślizło na Górnik sie niy gorszy. Rod dziwo sie na grubski wczorej, dzisiej i jutro…

Gynał rok tymu dziwilimy sie jak „ślōnski” kluby przisztymplowywały awanse do 1/8 Ligi Majstrōw. Napoli, Monaco, Borussia – hat-trick jak trza. Powtōrki niystety niy bydzie. Latoś w Lidze Majstrōw Ślōnzoki sōm już po leku na ausie.

Do rozgrywek stanyli jednak w kōmplecie. Te same nojlepsze ślōnski fusbalisty i ich kluby, kere w ôstatnim sezōnie poradziyły w LM porzōndnie nafyrlać…

Piszczkowo Borussia wygrywo grupa F, w kerej lepszo je ôd Realu Madryt. Przesztelowuje fol rekordōw szczeleckich i za jednym szlagiym (a raczyj za 12. szlagami) troszka poszteruje legiōnistōw z Wa-wy (12:4 po dwōch szpilach!)… Tak było rok tymu. Tera przed ôstatniōm kolejkōm LM Borussia mo yno 2 pkt i zostowo nij już yno haja ô Liga Europy z APOELym Nikozja. A dyć wōniało już rychtyg dobrym sezōnym! W Bundeslidze BVB latoś piyrszo brama straciyło dopiyro w 6. kolejce. Kryzys szpryngnōł hneda po kōntuzji Piszczka. Cufal? No, niy wiym…

Milikowe Napoli nojlepsze w grupie B. Dwie bramy Arka z Dynamym Kijōw i jedna z Benficōm w piyrszych kolejkach wyônaczyły go na sōm wiyrch klasyfikacji snajperōw. Keby yno niy tyn rewiyr… Minōł rok, a w Neapolu czas choby stanōł. Milik zaś ôd nowa lyczy sie z nowej kōntuzji. Yno w tabeli trocha gorzij. Arek zdōnżōł jeszcze latoś wykorzystać elwra w przegranym szpilu z Szachtarym (2:1), ale już do wygranego rewanżu (3:0) ni mōg sie dociepnōnć. Tyn ôstatni szpil przedłużōł szanse synkōw z Neapolu na 1/8. Yno tera już sōm awans Napoli niy gwarantuje gry Milika w LM bez wiosna.

Glikowe Monaco włazi do 1/8 tyż z piyrszego placu. Niy było by tego bez Kamila, a już na pewno bez jego „bōmbōn”-szlagu, kery wytargoł punkt Bayerowi Leverkusen… Rok niyskorzij Monaco wyplōmpane ze swoich nojlepszych groczy telkich cudōw już jednak niy pokozuje. W grupie z Besiktasym, Porto i RB Lipsk byli faworytym, a tukej w ôstatnij kolejce zagrajōm już yno ô „czopka śliwek”. Nigdy ni ma tak darymnie coby niy szło żodnego plusa wykopać. Kamil przinajmij sztyjc tyro w jednym kōnsku.