Archiwa tagu: Ślonski Fusbal

Rozgrywki pokōńczōne już niy yno w Premier League czy Serie A, ale nawet w nojniższych klasach regiōnalnych na Ślōnsku. Hneda durś ôdpocznymy ôd fusbalu, chocioż…

Bez fusbalu jak bez luftu, chwila idzie strzimać, ale na dłōgszo meta to bezmałaś niyzdrowo. Przinjamij jo noleża do tej zorty ludzi, kerzi wyznowajōm ta zasada. Chocioż zgodza sie, że sztart Ekstraklasy w połowie lipca to gynał lekko przesada. Dokłodaniym szpilōw raczyj niy dźwignie sie ich poziōmu. Coby niy pedzieć, liga zacznie sie dō nos ciekawie. Już 15 lipca do Zobrzo przijedzie Legia. 3 punkty z Warszawiokami byłyby wymarzōnym powrotym Grubiorzy do Ekstraklasy.

Bez lato przeważnie jednak ciekawsze ôd tego rychtyk szportu sōm transfery. Ślōnskim bohatyrym ôkiynka zaś chyba bydzie Łukasz Podolski. Przekludziny z Galatasaray Stambuł do japōnskigo Vissel Kobe (dogodane już w marcu; 2,6 mln €), ciynżko bydzie przebić. Tym bardzij, że na inksze wielki transfery Ślōnzokōw sie na razie niy zbiyro… Moga sie samek jednak mylić. Eźli nojciekawszym ślōnskim nazwiskiym na rynku transferowym niy ôkoże sie Kamil Wilczek? Kōntrakt z Brøndby IF mo szkryfniynty do 2019, ale po sezōnie w kerym zaliczōł 19 bramōw i 14 asyst, ciynżko coby niy interesowoł sie nim kto lepszy. Godo sie ô Anglii. Na razie żodnych kōnkretōw, moge skōńczyć sie yno na fandzolyniu.

Ciekawe ruchy tyż „u nas na placu”. Sam miliōnōw na stole mono ni ma, ale już zaczynajōm sie „transfery podwyższōnego ryzyka”. W ôstatnim tydniu dowiedzielimy sie, że na przynści ze zdegradowanego Ruchu do Górnika Zobrze zdecydowoł sie mody ôbrōńca z Rudy Śl., Michał Koj. Ôn gynał w Górniku groł już za łebōnia, tōż idzie pedzieć, że wraco do sia, ale u „nojbardzij niebieskich” kibicōw i tak fest pokopoł se w lelujach.

To jednak moge być dopiyro poczōntek. Kej ôkozałoby sie że Ruch jednak niy dostanie licyncji na I liga to wykludzić sie z Chorzowa moge chcieć wiyncyj synkōw. Górnik, a mono i Piast mōgłyby „pomaszkecić”…

Niydowno do kin wlazła nowo ślōnsko produkcjo Jana Kidawy-Błońskigo. Gwiazdy to fabularno wariacjo na podstawie życiorysu wybitnego ślōnskigo fusbalisty, Jana Banasia. To niy piyrszy film ze ślōnskim fusbalym w tle, niy piyrszy tyż w kerym aktory godajōm abo próbujōm godać po ślōnsku. Jak wyglōndoł i jak wyglōndo ślōnski fusbal i ślōnski jynzyk w „tamtym” świecie?

Zaczna mono od małej ciekawostki. W Pasji Mela Gibsona bez cołki film kōnsekwyntnie godo sie w łacinie i po aramejsku, bezmałaś dobrze… Scynariusz na łacina i przede wszyskim j. aramejski z I w. n.e. przełożōł wybitny szpec o. William Fulco. Ôn tyż pōmogoł aktorōm uczyć sie tekstōw spisanych fōnetycznie. Gibsōn kōnsultowoł sie poza tym z przedstawicielami społeczności kere sztyjc godajōm po aramejsku, coby ôbadać eźli teksty brzmiōm dō nich naturalnie…

Idzie na potrzeby filmu „reanimować” starożytne jynzyki i kōnsekwyntnie ich używać. A idzie zrobić do porzōndku film ze ślōnskōm godkōm? Chyba jeszcze my sie tego niy doczkali, chocioż bywało blisko np. w Angelusie (2001, reż. L. Majewski). Keby niy ślōnsko-polski miszōng narrotora byłoby dobrze…

Ale my ô fusbalu… W Piłkarskim pokerze (1988, reż. J. Zaorski) poru bohatyrōw to Hanysy – ci zwiōnzani z klubym „Czarni”. Dobrze, że wciepujōm w dialogi słowa „ciul” i „chopie”, przinajmij wiymy że ktoś „godo” po ślōnsku. Lata lecōm, a wiela sie niy zmiynio w Boisku bezdomnych (2008, reż. K. Adamik) w jednej ze scyn dialog „po ślōnsku” kludzi dwóch bohatyrōw z Bytōmia. „Na przodku żem robił”, „Nie bydziemy godać” itp. Bez kōmyntarza… Toć, że żodyn z aktorōw kerzi grali Hanysōw w w/w filmach ze Ślōnska niy pochodziōł.

2017. Zaś ô fusbalu i zaś ô Ślōnzokach. Film Gwiazdy doprowdy moge sie podobać. Co do ślōnskigo to sōm tamek aktorzy bezbłyndni jak Dziędziel (gen. Zietek), Talarczyk (ubek), Lubos (Danisz), tōż ci ze Ślōnska, ale godka inkszych, szczegōlnie głównego bohatyra to już tragedio! Je postymp, ale szału forgot ni ma… Panie Gibson – ratujcie!

Istno rewolucjo, przinajmij ze ślōnskij perspektywy. W Ekstraklasie wymiyniajōm sie dwie ślōnski legyndy. Górnik za Ruch. Z nojwyższōm klasōm rozgrywkowōm żegno sie tyż trzech ślōnskich trynerōw, a na ich plac włazi jedyn nowy. À propos, w jakij kōndycji (zdrowiu) je ta „ślōnsko myśl szkolyniowo”?

Bez zgody kardiologa za trynowani sie lepij niy chytać. Ślōnski trynery w ôstatnich szpilach sezōnu zbiyrali rekordowe dawki hercklekotōw. Poniżyj wartki ranking naszych ciśniyniowcōw…

Plac 1. Tabela niy ôcygani, nojlepszym ślōnskim trynerym w Ekstraklasie latoś bez godki Michał Probierz. Tryner z Bytōmia dokludziōł na dyć Jagiellonia do historycznego drugigo placu. Gratulować…? Lepszy pana Michała tera niy szterować. Jedna brama dzielyła go i jego synkōw ôd tytułu Majstra Polski 2017. Po szpilu Probierz oficjalnie żegno sie z Jagōm.

Plac 2. Drugi w tabeli ślōnski tryner i nastympny do kerego lepij sie tera niy zbliżać to Franz Smuda. Jego Górnik Łynczna zaliczo dopiyro 15. plac i spaduje. Strata 2-ōch bramōw w ôstatnich sekundach i bez to rymis z Ruchym 2:2 dokludziyła by go do szału, keby niy wiadōmości z Lubina, kere niy dowały już Górnikowi szans na utrzimani (3:1 do Arki Gdynia).

Plac 3. Problymōw ciśniyniowych ni mioł przinajmij w niedziela Krzysio Warzycha. Ôn nanerwowoł sie tydziyń pryndzyj kej Ruch „wychacharzyli” w Gdyni. Tera spadek Ruchu bōł już przisztymplowany. Było gwiazda ślōnskigo fusbalu na poczōntku swojij kariery trynerskij w Polsce zrobiyła se lekko antyreklama. „Gucio”, kery robi w Ruchu ôd kōńca kwiytnia, wielkigo pola manewru ni mioł, ale swoji 3 grosze do spadku dociepoł.

Sam klasyfikacjo ekstraklasowo sie kōńczy, ale trza przedstawić kogoś jeszcze. W kōnkuryncji hercklekoty mōgby sie spokojnie rownać z Probierzym. Marcin Brosz ô awans Górnika musioł rzykać do 99. min. ôstatnigo szpilu. 1:0 do przodku w Puławach, z biydōm dowieziōne do kōńca stykło. 44-letni Knōrowiok bydzie brōniōł hōnoru ślōnskich trynerōw w nowym sezōnie Ekstraklasy.

Brama szczelōno rynkōm przisztymplowała spadek Ruchu. Pierōństwo…  Ale już po ptokach. Nic niy zmiyniymy. Ślōnski potyngi spadywały niy roz. Przibadalimy. Pytani yno co dalij…

2009. Piyrszy spadek Górnika Zobrze w XXI w. Wielki spōnsor (Allianz), wielki plany, ale gra na pierōna. Spamiyntani jednak sie zdało. W I lidze grajōm yno sezōn. Drugi plac pozwolo Grubiorzōm zaś wlyź do szoli, kero wyjyżdżo w Ekstraklasie. Sny ô potyndze jednak zostały dalij w hasioku. Finansowo Górnik to zaś boroczki. W Zobrzu za to stanōł porzōndny stadiōn. Latoś Górnik zaś musi sie prać ô Ekstraklasa.

2010. Kōniec 14-letnij przigody Odry Wodzisław z Ekstraklasōm. Darymno jesiyń, zimowe transfery i wielko pogōń na wiosna. Brakło jednego ôka. Odra kōńczy na 15. placu i ekspresowo sjyżdżo na same dno. Spadek do II ligi, brak licyncji i rozwiōnzani klubu. W sezōnie 2011/12 nowo Odra sztartuje w rybnickij Klasie C. Potym rozmańte dziwne awanse i fuzje. Doszło do tego, że latoś w lidze okryngowej szpilajōm dwa kluby, kere majōm w nazwie Odra Wodzisław. Telki derby yno tamek…

2011. Zaś spaduje klub ze Ślōnska. Polonia Bytōm kōńczy na ôstatnim placu. Problymy finansowe ôd downa niy były tamek tajymnicōm. Na dłōgszo meta ciynżko było utrzimać w Bytōmiu Ekstraklasa. Piyrszo liga tyż zrobiyła sie za mocno. Terozki Bytōmioki spadujōm do ligi III. Szportowo i ôrganizacynie (ujymne punkty w ramach sztrofy licyncyjnej) zaś niynojlepij.

Kerym scynariuszym pokulo sie prziszłość Niybieskich? Wartki awans jak Górnik? – Bydzie ciynżko. Rozônacz jak w Odrze? – Miasto chyba niy pozwoli. Na razie sytuacjo w Ruchu nojbardzij przipōmino chyba Bytōm. Problymy finansowo-licyncyjne, stare szpetne stadiōny i miasta zmynczōne szpōnsorowaniym klubōw…

Niybiescy jednak swojo historio naszkryflajōm sami. Niy sōm skozani na III liga. Zresztōm spadek z Ekstraklasy w połōnczyniu z pustym portmanejym sami tyż już przerobiali w 2003. Wtedy na powrōt do elity czakali 4 lata…

Przed ôstatecznymi rozwiōnzaniami w Lidze Majstrōw propōnuja trocha se ôd nij dychnōnć, a podziwać sie na rozgrywki na durś inkszym poziōmie. Ôbadejcie liga, w kerej jak w żodnej inkszej wre od ślōnsko-zagłymbiowskij rywalizacje, a poziōm niyprzewidywalności zaskokuje nawet starych bukmacherōw…

Ja, dzisio ô polskij piyrszej lidze. Wiym, że nikerzi ciepnōm tera tym felietōnōm w pierōny, bo wiyncyj emocji to dyć majōm na grzibach. Tej zorcie kibicōw chca spōmnieć, że z deficytym emocji w szporcie ludzie już downo nauczyli se radzić. Darymnie przeca zakładōw bukmacherskich niy wymyślili. Już w starożytnym Rzymie ludzie niy roz szli ô weta, kery gladiator „wklupie” kerymu. Ôjczyznōm bukmacherki uznowo sie jednak Wielko Brytanio. Tamek już w XVIII w. szło sie wetnōnć na wyścigach kōnnych. Biznes bukmacherōw rozfechtowoł sie jednak do porzōndku z rozwojym fusbalu na przełōmie XIX i XX w. Do terozki, trza pedzieć, jak idzie ô fantazjo przi wetach bukmacherskich, to Angliki wyprzedzajōm nas i to fest. Przi ôkazji Olimpiady w Lōndynie szło dyć wetnōnć sie, że na stadiōnie wylōnduje UFO, abo że kōmuś ôd pochodni olimpijskij hajcnōm sie włosy. Wielko haja skuli zakładōw bukmacherskich rozônaczyła sie tyż tamek i latoś, kej w szpilu ô Pucharu Anglii rezerwowego tormana piōntoligowego Sutton United chyciōł głōd. Ôkozało sie, że jedyn z bukmacherōw doł szansa kibicōm wetnōnć sie, że doświadczōny i, trza pedzieć ofyn, bachraty torman zjy w trakcie szpilu „a pie” (nadziywany maszket na słodko abo słōno). Zostało yno wyjaśnić czy był to tyn rychtyg tyn angielski „pie” czy zwykło sznita…

Bukmacherka poradzi dodać emocji fusbalowi. Ale wyboczcie, miało być o I lidze… Tamek telkich kosmiczno-spożywczych kōmplikacji niy trza. I liga to nojbardzij niyprzewidywalne rozgrywki jaki znōm. Ô awans gro latoś pora ślōnskich drużyn, a coby było ciekawij przeszkadzajōm im w tym Zagłymbioki. Ôstatnio zdało sie, że żodyn niy chce awansować. Górnik, kery zapowiado awans ôdkōnd spod z Ekstraklasy, poradzioł wygrać z Sandecjōm (2:0), coby potym przegrać z ôstatnim Kluczborkiym (2:1) i ôstatnio z Sosnowcym (1:2) po bramie z 89 min. (tyn sōm Sosnowiec przegroł wczesnij z tōm samōm Sandecjōm 5:0!). GKS Katowice sztyjc w czubie, ale sztyjc tyż sōm kōmplikuje se szanse na awans (porażki z Podbeskidziym i Sosnowcym). Gieksa i Górnik mōgłyby już sie z awansym pożegnać, ale rywale tyż poradzōm zaskoczyć. Lider z Chojnic w ôstatnij kolejce dostowo wklupane z potyncjalnym spadkowiczym, GKS-ym Tychy (1:4). I kto sam chce awansować? Aż żol tych bukmacherōw…

Ôdliczōmy ôstatni godziny do wtorkowego szwierćfinału Ligi Majstrōw. Taktyki prziszykowań do „ślōnskich derbōw” Monaco-Borussia rozmańte. Piszczek szporuje siyły Glik bydzie właziōł w szpil w cugu. Co lepij zafunguje?

Monaco wygrało w ôstatnij kolejce w Angers 1:0, a Kamil Glik rozegroł cołki szpil w ekipie lidera Ligue 1. Ni mōgło być na dyć inacy. Kamil to jedyn z nojbardzij eksploatowanych groczy w klubie. Jak yno moge to gro w podstawie. W cołkim sezōnie jeszcze ani razu niy śloz z boiska przed czasym. Tryner niy doł mu tyż se dychnōnć w ôstatnio sobota, dyć wiy że nojlepszy Glik to Glik w cugu. Ni ma co majstrować.

Der Klassiker to szpil, na kery dycki sie czeko z uciechōm. Łukasz dostoł jednak bezmałaś na beztydziyń lekkij kōntuzji kostki. Do kōńca wahało sie eźli zagro abo niy, ale w kōńcu prziszła decyzjo, że ni ma co darymnie ryzykować. Łukasz dobrze zno swoji ciało. Jak trza poradzi zacisnōnć zymby. W sezōnie 2012/13 bez długi czos tyroł na dyć na zastrzikach, skuli problymōw z biodrym. Na ôperacjo dogodoł sie dopiyro po sezōnie. Kej zdało sie, że już niy wrōci, ôn po lekku ôdbudowywoł forma. Głōd fusbalu dycki mu pōmogoł. Po ôbejrzyniu jak Bajeroki rozônaczajōm Borussia 4:1, wyposzczōny Piszczu wylezie na Monaco w podstawie…

To bydōm piyrsze ślōnski derby na telkim etapie LM i niychby było takich wiyncyj! Poru naszych synkōw mo tera rychtyk pewny plac we wielkich klubach europejskich. Tōż jako powtōrka ślōnskich derbōw w LM za rok czy 2 je fest prowdopodobno. Szanse rosnōm. Piszczek szkryfnōł gynał nowy kōntrakt z Borusssiōm do kōńca czyrwca 2019. Dziynnikorski klachule niy roz widziały już Łukasza w Realu, Barcelōnie czy Liverpoolu. Tera to już chyba kōniec fandzolynio. Łukasz ofyn godo, że rod skōńczy kariera w BVB, klubie kery regularnie szpilo w LM.

Telko ôferta moge przebić już yno… LKS Goczałkowice, macierzysty klub Piszcza z ligi okryngowej. Ligi Majstrōw tam mono i ni ma, za to ślōnski derby sztyjc…

Gynał tydziyń tymu spōminołech, że z siedmiu fusbalistōw powołanych ôstatnio do polskij kadry, żodyn ni ma ze Ślōnska. Pyndziałkowe derby Ruchu i Piasta kożōm sie zastanowić eźli trynery ôstatnich ślōnskich klubōw w ekstraklasie dowajōm chocioż szansa Nawałce pozaglōndać na jakiś naszych synkōw, kerzi byliby co we werci?

Trza zaczōnć ôd tego – Ruch i Piast w tym sezōnie walczōm sztyjc w dolnym kōnsku tabeli, a mōmyntami realno robiyła sie groźba, że latoś Ślōnsk pozbydzie sie z Ekstraklasy ôbydwu swoich drużyn. Ôstatnio jednak nad Chorzowym i Glywicami wylazła klara i zablindowało nadziejōm, kej Ruch i Piast wygrały swoji 2 ôstatni przedderbowe szpile. Serio Niybieskich je nawet lepszo. Latoś przegrali yno z Cracoviōm, niyskorzij już sztyjc punktowali, a po drōdze wklupali Legii we Warszawie (3:1) i Lechii u sia (2:1).

W ôstatnij kolejce Ruch w piyrszej 11-stce wystawiōł dwóch wychowankōw (Michał Helik z Chorzowa i Maciej Urbańczyk z Mikołowa) a w sumie sztyrech Ślōnzokōw (plus Martin Konczkowski z Rudy Śl. i Łukasz Moneta z Raciborza). Poradziesiōnt lot do zadku telki wynik bōłby słaby, ale tera inksze czasy –sztyjc sie zmiynio kluby. Tym bardzij na tle rywala ni ma sam gańby. Liczba wychowankōw i groczy ze Ślōnska w piyrszym składzie Piasta to 1 (Radek Murawski z Glywic).

Wszyjski spōmniane samek Ślōnzoki z Ruchu i Piasta to mode synki. Toć, Nawałka powołań im jeszcze niy wysyło. Ni ma jednak prowdōm, że ślōnski kluby ni majōm swoich kadrowiczōw. Na ôstatni szpile reprezyntacji Polski U-21 pojechało na dyć sztyrech groczy Ruchu (Helik, Moneta, Niezgoda, Lipski) i jedyn z Piasta (Murawski).

Tōż coby podsumować… Forma w ôstatnich szpilach – punkt do Ruchu, fusbaliści w reprezyntacji – lepszy Ruch, inwestycje w wychowankōw i chopcōw ze Ślōnska – tyż na plus do Niybieskich. Wartki przedderbowy bilans pokozuje 3:0 do synkōw z Chorzowa. Jak sie to mo do pyndziałkowych derbōw [tekst ôddany do druku przed szpilym]?

Poloki wygrywajōm z Czornogōrōm 2:1. Toć, ni mōgło by do tego dōnś bez ślōnskigo udziału. Zwyciynsko brama szczylo Łukasz Piszczek, jedyn z dwóch Ślōnzokōw na szpilplacu w Podgoricy.

W piyrszej jedynostce Nawałki wyloz tym razym yno Piszczek i Glik. Etatowy snajper kadry Milik zaglōndoł na szpil z ławy, ale w snajperskich ôbowiōnzkach zastōmpiōł go do porzōndku spōmniany Piszczek. Po zawalyniu dwóch lagōw w minuta, zrehabilitowoł sie piyknym technicznym szlagiym na 2:1. Mōmy w polskij kadrze ślōnsko jakość i ilość. Reprezyntacjo Polski ôstatnio zaś wzbogaciyła sie o jednego Ślōnzoka (torman Łukasz Skorupski). 5 powołanych do kadry na Czornogōra to już rychtyk dobry wynik, kerego zaś downo niy było. Spōmniano piōntka: Piszczek, Glik, Milik, Wilczek i Skorupski to ponad 25% wszyjskich powołań Nawałki z zagranicznych klubōw. Gorzij wyglōndajōm powołania z polskij ekstraklasy. Tukej żodnego Ślōnzoka Nawałka niy docyniōł, ale werci sie dać pozōr, że 4 z 7 powołanych „ekstraklaseiros” mo w CV dłōgszo abo krōtszo gra w jednym ze ślōnskich klubōw.

Sztyjc jednak w pierōny daleko do ślōnskich rekordōw powołań. Były na dyć telki lata kej Ślōnzoki durś zdōminowali polsko reprezyntacjo fusbalowo. Na dyć starziki Czornogōrcōw, reprezyntanci Jugosławie w latach 30’ (czasy Wilimowskigo, Wodarza) i 60’ (czasy Pohla, Brychczego) szpilali z polskōm 11-stkōm złożōnōm nikedy z nawet ôśmiu Ślōnzokōw!

Niyskorzij Hanysōw w polskij kadrze bywało już mynij. A na poczōntku XXI w. łatwij było już znolyź Ślōnzoka w Mannschaftcie. Na Euro 2008, kej bramy szczyloł Polokōm duet Podolski-Klose, Bioło-Czerwoni mieli w składzie yno rezerwowego Piszczka. To już jednak historio. À propos, w czwortek 130. szpilym i 49. bramōm z reprezyntacjōm Nimiec pożegnoł sie Łukasz Podolski, ôstatnij jak do tyj pory ślōnski reprezyntant w Mannschafcie… Na telki pożegnani forgot trza se zasłużyć. Łukasz szlagiym z dystansu symnōł pajynczyna z winkla bramy. Kaj nastympcy?

Już niy w kōmplecie, ale sztyjc sōm my w grze. Z Ligōm Majstrōw pożegnoł sie Arek Milik… W szwierćfinale ślōnskich emocji jednak niy braknie. Już 11 kwiytnia bydymy sie dziwać na małe ślōnski derby. Borussia Łukasza Piszczka zagro z Monaco Kamila Glika. Jedne je pewne. Mōmy Ślōnzoka w pōłfinale…

Przody pora słōw a naszym „wielkim niyobecnym” w szwierćfinale. Napoli Arka Milika przegrało 2 razy z Realym (3:1 i 1:3) i pożegnało sie z Ligōm Majstrōw. W tej rywalizacji Arek już jednak piyrszych skrzipek niy groł. Właziōł na szpilplac z ławki i wiela swoim kamratōm niy poradziōł pōmōc. Szkoda, bo jego sztart w Lidze Majstrōw w tym sezōnie zapowiadoł lepszy „finisz”. 3 bramy Arka w dwóch piyrszych szpilach. Snajper z Tychōw bōł wtedy w formie. Piykny scynariusz przerwała jednak kōntuzjo i rewiyr. Milik niy zdōnżōł wrōcić do szczytowej formy i niy udało mu sie pożegnać z Ligōm Majstrōw tak jak by se to wymarzōł. Zostowo zaglōndać w TV co popochajōm kamraty z kadry.

Dwóch reprezyntantōw w 1/4 LM Ślōnsk mioł yno 3 razy ostatnio w 2009 (Klose i Podolski – Bayern) i 2007 roku (Dudek – Liverpool i Podolski – Bayern). Piyrszy roz telko sytuacjo przitrefiyła sie już dużo pryndzyj w czwortej edycji Ligi Majstrōw. Bōł to rok 1995/96, kej Panathinaikos w składzie z Krzysztofym Warzychōm i Józefym Wandzikiym wyciepali z LM w szwierćfinale Legia. „Gucio” klupnōł wtedy nawet dwie bramy. Terozki po roz piyrszy jednak nasi zagrajōm na tym poziōmie przeciwko siebie. Do Piszczka bydzie to już trzeci szwierćfinał w karierze. Ze Ślōnzokōw wiyncyj razy na tym poziōmie znod sie yno Jerzy Dudek (3 razy z Liverpoolym i roz z Realym), chocioż niy zawsze był w tych szpilach podstawowym tormanym. Glikowi dō nich daleko, w Lidze Majstrōw je absolutnym debiutantym.

Rywalizacjo Glika i Piszczka to tyż haja jednych z nojskuteczniejszych obrōńcōw w Europie. Zresztōm i Monaco i Borussia to drużyny kere majōm rade ôfynsywny fusbal. Tōż ni ma inkszej ôpcji – bydzie sie dzioło!

Hneda zaś rozhajcuje sie haja ô Mundial… Adam Nawałka już ôgłosiōł zagraniczne powołania na szpil Polski z Czornogōrōm. Mōmy być z czego radzi do kadry wraco po kōntuzji Arek Milik. Powołani dostoł tyż jego stary kamrat z Zobrzo, Łukasz Skorupski nowy torman nr 3 w Polsce.

Piszczek, Glik, Milik, Wilczek i Skorupski. Do piynciu urosła nōm ślōnsko delegacjo w reprezyntacji Polski. Po tym jak Artur Boruc ôgłosiōł reprezyntacyjno pyndzyjo, rola drugigo rezerwowego erbnōł pō nim Łukasz Skorupski. Były grocz Gornika reprezyntuje terozki w Serie A Empoli FC (na wypożyczyniu z AS Roma). 10 szpilōw z czystym kōntym w drużynie, kero brōni sie przed spadkiym to wynik, kery dużo godo ô jego formie w tym sezōnie.

Łukasz to stary znajōmy selekcjōnera. Dyć to u Nawałki Skorupski debiutowoł w Ekstraklasie (nota bene razym z Milikiym i Olkowskim). Za piykne ôczy powołanio jednak niy dostowo. Selekcjōner sztyjc mo go w pamiynci. Na kadra zaprosiōł już go na jesiyń, ale Łukasz na swojo szansa bydzie musioł jeszcze trocha doczkać, bo kōnkuryncjo na bramie wielko. Swoji 5 minut jeszcze dostanie, a ôn gynał już wiy jak to wykorzystać. Pokozoł to choby w swoim debiucie w kadrze U-21 w paździyrniku 2011 r. W szpilu z Portugaliōm prziszło mu wlyź na boisko i chytać elwer. „Spokojnie, jo to chyca” pedziōł yno kamratōm na ławce i tak tyż zrobiōł.

Ślōnski słowa Łukasza trefiyły po tym szpilu do tytułōw relacji poświyncōnych tymu szpilowi. Łukasz niy gańbuje sie ofyn godać po ślōnsku. Nikedy wciepnie pora słōw po naszymu dziynnikorzowi. Bezmałaś czuje sie Ślōnzokiym i dobrze godo po ślōnsku, chocioż jego familio gynał ze Ślōnska niy pochodzi. Wychowani z synkami na Zaborzu zrobiyło jednak swoji. À propos wychowanio… Z Łukasza downij bōł niyzły hajok. Ôstatnio chyba jednak spoważnioł i spokojnie czeko na swoji nastympne 5 minut. Do tyj pory w piyrszej reprezyntacji zagroł yno roz w 2012 r. z Macedōniōm (4:1) jeszcze za Fornalika. Tyn synek mo szmaki na wiyncyj…