Archiwa tagu: Stadion Śląski

W niedziela doczkalimy sie ślōnskich derbōw w Ekstraklasie. Górnik-Piast 1:0! Cōż to tam za derby, ktoś pado. Kiedyś to były derby, pra? Ruch vs Górnik. Stadion Ślonski fol to i fusbalistōm aż chciało sie tyrać… Ale dejcie pozōr! Mono jeszcze na telki ôbrozki sie bydymy dziwać. W ta samo niedziela ślōnski fusbal doczkoł sie drugigo wielkigo momyntu. Stadiōn Ślōnski ôtwarty!

Smolić że za drogo, smolić że za dłōgo. Toć, że gańba, że tak ta budowa sie kulała, ale gorsze byłoby przerwani roboty i przeônaczyni stadiōnu na torg. Nojważniejsze, że w kōńcu jes. Telenowela sie kōńczy. Tera na debatawani czamu pora lot tymu „klynkły krokodylki” (godka ô fabrikfelerze dachu) szkoda czasu. Staro zasada telenowelōw godo, że co było 300 ôdcinkōw tymu tela sie liczy choby wcale. Tōż i my zaglōndōmy dzisiej do przodku.

„Spektakularnego show” na ôtwarci Ślonskigo niy było. Na poczōntek finał Silesia Marathonu i szportowo lekcjo historii (ôdegrany bōł szpil Polska-ZSRR z 1957). Ale po lekku imprez bydzie przibywać. Przede wszyjskim lekkoatletycznych, bo Ślōnski to terozki nojwiynkszo w Polsce aryna do telkich zawodōw. Na bezrok Memoriał Kusocińskigo, a niyskorzij mono jaki mistrzostwa świata?

Kibice fusbalu, niy starejcie sie! Ślōnski bōł na ausie ôdkōnd minyli go przi Euro’12, ale hneda wrōci na fusbalowo mapa Polski. Chocioż kōnkuryncjo do przijmowanio wielkich fusbalowych szpilōw fest urosła, a reprezyntacjo Polski i tak gro przeważnie w Waszawie, to jednak do Ślōnskigo je nadziejo. Niy chodzi sam nawet ô to wiela ludzi sam wlezie (ponad 54 tys. – poza Wa-wōm nojwiynkszy w Polsce). Argumynty ô historii i downych wielkich szpilach rozegranych w Chorzowie do niydowna zdały sie być yno fandzolyniym. Tera, kej Ślōnski już wyglancowany syntymynty mogōm nōm rychtyg pōmōc. Starzi zasłużyni grocze (nota bene Zibi Boniek tyż) majōm ze Ślonskigo dobre wspōmniynia i to je nasz plus! Prezes PZPN-u na dyć już rok tymu pedzioł, że rod dziwołby sie na szpile polskij kadry na Ślōnskim. Czekōmy…

 

Pizło dwanoście. Kalyndorze przeszkyrtniynte na 2017. Jes i nazod Ślōnski Fusbal. Jes i pytani. Czym bydymy żyć latoś? Rok bez  Euro i Mundialu. Eźli rychtyk fanōm fusbalu musi sie w 2017 mierznōnć?

Jak godka ô turniejach miyndzypaństwowych to jes dobro wiadōmość do fanōw hycu i wuwuzeli. Jeszcze w styczniu sztartuje Puchar Narodōw Afryki w Gabōnie. Bydzie gorko i zaś niy braknie ślōnskigo akcyntu. Nasz pewny reprezyntant w PNA Hynio Kasperczak tym razym pokludzi kadra Tunezji.

U nos w tym czasie emocjōnować sie bydymy  transferami. Tak ciekawie jak bez lato moge niy być, ale już sie zaczyno pochać. Eźli doczkōmy sie ślōnskigo fusbalisty w Interze Mediolan? Na razie to yno famy…

Radzi na pewno za to bydymy skuli Ligi Majstrōw. Już to, że trzech Ślōnzokōw doszło do 1/8 tego turnieju je wynikiym historycznym. Glikowi, Milikowi i Piszczkowi bydymy kibicować już ôd połowy lutego. Widzymy sie 3 czyrwca w Cardiff?

W ekstraklasie cudōw ni mogymy sie latoś spodziywać. Nasze ekipy bydōm walczyć ô byt i tyn szportowy i finansowo-licyncyjny. Przody bydymy dować pozōr wiela ujymnych punktōw dostanie Ruch, a dopiyro potym ôbadōmy czy gra synkōw z Chorzowa i Gliwic styknie na utrzimani.

To, wiela ekip bydymy mieć w Ekstraklsie na jesiyń, do kōńca sezōnu moge być niywiadōme. Dyć ô awans z I ligi na pewno powalczy GKS Katowice, a bydzie to tym ciekawsze, że ich rywalami sōmsiody zza Brynicy. Radzi włōnczyliby sie w ta haja synki z Zobrzo, ale w przipadku Górnika ô awans moge być ciynżyj.

Kōniec wiosny to tyż emocje zwiōnzane z Euro U-21. Kōnsek turnieju pokulo sie tyż na Ślōnsku. Tychy bydōm na dyć jednym z gospodorzy, tamek tyż ôdbydzie sie pōłfinał. Na turnieju niy braknie Ślōnzokōw, zagrać bydzie mōg nawet reprezyntant kadry A, Arek Milik.

Bez jesiyń pozaglōndōmy na finał eliminacji do Mundialu, ale przody mōmy doczkać sie istnego cudu. We wrześniu bezmałaś ôtwiyrōmy Stadiōn Ślōnski…

22 lipca 1956. „Wielki dzień całego społeczeństwa województwa stalinogrodzkigo”. Ôtwarty zostoł ôbiekt zbudowany jak sie wtedy godało „pracą, wysiłkiem i ofiarnością społeczeństwa śląskiego przy wydatnej pomocy Partii i Rządu”. Mogymy terozki podśmiywywać sie z tego propagandowego fandzolynio, ale zbudowani telkigo 100-tysiyncznika było wtedy ôsiōngniynciym, kere docyniali i kerego nawet zowiścili na Zachodzie. Budowa Stadiōnu Ślōnskigo zetrwała 3 lata i 4 miesiōnce…

Gynał mijo 7 lot ôd ôstatnigo szpilu na Ślōnskim. W szporcie to forgot epoka. W tym czasie Michael Phelps zdobył 12 medali olimpijskich, Arek Milik 5 razy zmiyniōł klub a San Marino klupło brama Polsce w eliminacjach do Mundialu. Jakby sie niy dziwać w słusznie miniōnym systymie budowa stadiōnu zetrwała 2 razy krōcyj niż sztyjc niydokōńczōno modernizacjo w XXI wieku. Straciylimy Euro’12, fol czasu i fol piniyndzy. Zdałoby sie, że szpil nowego ôtwarcio Stadiōnu Ślōnskigo bōłby w telenoweli ô jego przebudowie wydarzyniym na miara zmartwychwstanio Hanki Mostowiak. Niyjedyn zwōntpiōł że tego doczko.

Mogymy tak fandzolić, wynokwiać i wyśmiywać sie bez kōńca. Beztōż hamuja, bo hneda poradzilibymy dōnś do starego motta pt. „za kōmuny było lepij”. Niy ô tym dzisio. Ô Ślōnskim pisza w tym tydniu niy bez cufal. Dyć stadiōnowo telenowela przeżywo gynał ważne (przełōmowe?) mōmynty. W ôstatnim tydniu Ministerstwo Szportu szkryfło ze Stadiōnym Ślōnskim umowa na dofinansowni na wkludzyni na ôbiekcie funkcji lekkoatletycznej. Tym knifym w Chorzowie bydymy mieli stadiōn I klasy IAFF przirychtowany do rozgrywanio nojwiynkszych imprez w lekkij atletyce. Ministerstwo Szportu ciepnie na to 10 mln zł. Do tego trza jeszcze znolyź jakiś nastympne 20 mln, ale gynał to przi setkach miliōnōw zainwestowanych w Ślōnski, wielkigo wrażynio już niy robi.

Bezmałaś kōniec telenoweli przewidziany je gynał za rok, 30.09.2017. Rychtyk?

Z budowaniym stadiōnōw bez ôstatni lata mōmy na Ślōnsku niy nojlepsze skojarzynia. Skuli rozmańtych felerów nojwiynksze inwestycje stadiōnowe w regiōnie prziniōsły fol strat i to niy yno tych finansowych. Je szansa co sie to zmiyni?

11 listopada co bardzij twardzi kibice, kerym niy zmierzło sie długi czekani w kolejce w przed Stadiōnym Ślōnskim, mōgli ôbejrzeć jak prezyntuje sie nowy (sztyjc niydokōńczōny) dach tego ôbiektu. Zainteresowanych mocka! Widać, że magia Ślōnskigo sztyjc prziciōngo. Z tym że póki stadiōn ni ma zrobiōny na zicher doprowdy ni mōmy sie czym asić. Latoś minyło na dyć 6 lot ôd ôstatnigo szpilu na Ślōnskim.

Telkigo statusu jak jeszcze pora lot do zadku Ślōnski już mieć niy bydzie. Wtedy bōł nojważniejszym stadiōnym w Polsce. Niystety w 2009 ôdciepali go z listy gospodorzy Euro, a 2 lata niyskorzij robota sztopła kej wyszoł fabrikfeler dachu. W Polsce pobudowały sie nowe stadiōny a tukej doszli do godki zwolynnicy zaôranio Ślōnskigo i posadzynio tam zimiokōw.

Na szczynści terozki zdo sie, że inwestycjo hneda bydzie sfinalizowano (planowo pod kōniec 2016). Yno przeciynci szlajfy to niy kōniec. Na Ślōnski trza znolyź nowy pōmysł i to lepszy niż zimioki. Ô regularnych szpilach kadry mogymy zapōmnieć. Pewno wrōcōm kōncerty i rozmańte imprezy, ale to sztyjc mało. Zdo sie, że dobrym pōmysłym byłyby przekludziny Ruchu na Ślōnski. Podpisoł sie już pod tym nawet ich prezes, ale szprajcli sie fani stadiōnu na Cichej i jego przebudowy. Jak to u nas – haja musi być. Ślōnski mo być do Ruchu yno stadiōnym ôdświyntnym. „Zastow sie, a postow sie” chyba zaś wygrało, na kōńcowy efekt przidzie nōm jeszcze doczkać…

Z budowami u nas na dyć rozmańcie bywo. Sztyjc przeciōngo sie remōnt w Zobrzu. W Tychach stanōł piykny stadion, yno GKS zdōnżōł sfurgnōnć do II ligi przed wielkim ôtwarciym. Sōm tyż na szczynści lepsze przikłady, choby Gliwice… I tego trza sie trzimać. Chcymy to poradzymy.